San Alwiġi Gonżaga

San Alwiġi Gonzaga twieled fid-9 ta’ Marzu 1568 fil-kastell ta’ Castiglione delle Stivieri, ġo Lombardija ġewwa l-Italja.  Il-familja tiegħu kienet waħda mill-aktar nobbli u setgħana ta’ dak iż-żmien.  Missieru kien Ferrante, Markiż ta’ Castiglione u ommu kienet l-Assistenta Personali tal-mara tar-Re Filippu II ta’ Spanja.  Alwiġi trabba imdawwar bil-ġid u l-kumdita’, iżda kellu ukoll problemi f’saħħtu.

Missieru kellu tama qawwija li Alwiġi, l-ewwel wild tiegħu, kien jew jidħol fil-militar jew ikun persuna fil-politika.  Mit-tfulija bikrija tiegħu, missieru kien determinat li jintroduċi lil Alwiġi għall-ħajja fil-militar tant hu hekk li missieru kien jieħdu miegħu għat-taħriġ militari meta Alwiġi kellu biss erba snin.

Meta kellu 8 snin, intbagħat il-palazz ta’ Francesco Medici, flimkien ma ħuħ Rodolfo, bil-għan li itejjbu l-għarfien tagħhom tal-Latin u Taljan.  Matul is-sentejn li Alwiġi għamel fil-palazz, sab diversi kotba dwar il-ħajjiet tal-qaddisin kif ukoll dwar il-missjunarji Ġiżwiti ġewwa l-Indja; kien hawn li tnisslet fih il-vokazzjoni Ġiżwita.  F’l-istess ħin beda jinduna bl-ambjent ħażin li kien jinsab fih; kienu jidhqu bih għax ma riedx jieħu sehem f’ċelebrazzjonijiet bla rażan u imġieba ħażina.  Alwiġi beda jitlob u jsum kif ukoll iżomm ‘il bogħod mid-dnub.

Meta irritorna lura d-dar, sab lil Kardinal Karlu Borromeo (li huwa Qaddis ukoll).  Dan il-Kardinal kien mar iżżur il-familja ta’ Alwiġi u sar jaf li ta’ tnax -il sena, Alwiġi kien għadu ma’ għamilx l-ewwel tqarbina.  Il-Kardinal kien impressjonat bl-attitudni serja ta’ Alwiġi; ippreparah għall-ewwel tqarbina billi għallmu l-katekiżmu u iċċelebra l-Ewwel Tqarbina ta’ Alwiġi huwa stess.

Meta kellu 13-il sena, Alwiġi flimkien ma ħuħ marru Spanja ma’ missierhom fejn kellhom ikunu servjenti ta’ Ġakbu, bin Filippu II.  Din l-esperjenza kompliet isaħħaħ f’Alwiġi il-vokazzjoni Ġizwita tiegħu, kontra dak li xtaq missieru.

Meta wasal lura l-Italja, kien deċiż li jsir Ġiżwita, kontra ix-xewqa tal-familja tiegħu, b’mod speċjali kontra dak li ried missieru li kien joħlom dwar poter u glorja għal ibnu.  Missieru ma tahx permess biex issir Ġizwita.  Alwiġi irrinunzja il-ġid tal-familja u għaddih lil ħuħ.

Alwiġi daħal mal-Ġiżwiti fis-sena 1587, 3 snin wara mar Ruma biex jistudja għas-Saċerdozju.  F’dak iż-żmien fl-Italja waqa l-għaks u faqqgħet ukoll il-Pesta s-Sewda.  Alwiġi offra li jgħin fl-isptar tal-Ġiżwiti ma dawk milquta mill-pesta; waqt li kien qiegħed jgħin il-pazjenti morda, huwa ittieħed mill-marda u minħabba l-fatt li saħħtu kienet delikata, miet ftit taż-żmien wara fl-eta ta’ 23 sena, bl-Isem Imqaddes ta’ Ġesu’ fuq fommu.

Matul ħajtu kollha Alwiġi qatt ma waqaf jiffoka fuq Alla u jimxi fuq dak li ried minnu: li jħobbu u jħobb lil-proxxmu tiegħu.

San Alwiġi ġie iddikjarat patrun ta l-istudenti u aktar tard patrun taż-żagħażagħ Nsara.