San Ġwann il-Battista kien persuna eċċezzjonali, b’personalità li tolqtok. Hu kien mogħti importanza speċjali minn Ġesu’ meta dan stqarr : “Minn dawk imwielda min-nisa m’hawn ħadd akbar minn Ġwanni l-Battista!.”(Mat. 11,11) L-24 ta’ Ġunju hija l-festa ta’ meta twieled San Ġwann bħalma kien ħabbar l-Anġlu Gabirjel lil missieru Żakkarija qabel ma’ twieled. Żakkarija ma setax jemmen dan għax hu u martu kienu xjuħ. Hu mmuta sakemm twieled ibnu u hu kiteb li Ġwanni għandu jissejjaħ skont kif kien qallu l-anġlu. L-anġlu Gabrijel kien ukoll ħabbar it-twelid ta’ Ġwanni meta deher lill-Madonna u qalilha li hi kellha tkun Omm Alla u l-kuġina tagħha Eliżabetta wkoll fi xjuħitha kien se jkollha iben avolja kienet anzjana. Fil-fatt, meta l-Madonna marret għand Eliżabetta, it-tnejn kienu qed jistennew tarbija: Eliżabetta lil Ġwanni u l-Madonna lil Ġesù.
Bħala żgħażugħ, Ġwanni kompla l-missjoni tiegħu billi beda jippriedka l-iktar fuq il-valur kbir tal-verita’ u tal-imħabba, jitlob lin-nies biex jikkonvertu u biex jitolbu maħfra minn dnubiethom. Hu kien jgħallem ħdejn ix-Xmara Ġordan, fejn beda jgħammed bl-ilma tax-xmara.
Għalhekk sar magħruf bħala Ġwanni l-Battista, jew l-Għammied. San Ġwann kien jgħammed bl-ilma biss imma kien jgħin lin-nies biex jagħmlu ndiema ta’ dnubiethom u hu kien jiġbed folol ta’ nies u jikkonvertu. Hu ma kienx jgħammed bl-Ispirtu s-Santu, u l-Ispirtu s-Santu ma kienx jinżel fuq in-nies bħalma jiġri fis-Sagrament tal-Magħmudija tagħna. Ġwanni kien jiġbed ħafna nies u kienu jemmnu fit-tagħlim tiegħu u biċċa minnhom kienu jaħsbuh il-Messija, imma hu kien jgħidilhom li hu ma kienx il-Messija imma li kien jgħin lin-nies biex jippreparaw ruħhom għall-miġja tiegħU. Ġesu’ nnifsu ġie fejn il-Ġordan u talab lil Ġwanni biex jgħammdu . Waqt il-Magħmudija ta’ Ġesu’ nstama’ leħen il-Mulej li ddikjara: “Dan hu Ibni l-Maħbub, fih jien sibt il-għaxqa tiegħi.” (Mt 3, 14-17) Ġwanni beda jnaqqas ftit mill-importanza tiegħu meta ġie Ġesu’.
Ir-Re Erodi ma tantx kien jieħu gost bil-popolarita’ ta’ Ġwanni l-Battista u l-mara li kellu miegħu għax Ġwanni kien jikkoreġih li ma kienx qed jagħmel sew jieħu miegħu lill-mara ta’ ħuh. Ġwanni qatgħulu rasu fuq talba tat-tifla ta’ Erodiade li riedet tpattihielu tal-kundanna li kien għamel lil ommha.
Il-ħajja ta’ Ġwanni tibqa’ messaġġ għal kull min irid jimxi wara Kristu. Dawn jeħtieġ li jpoġġu lil Alla l-ewwel fid-deċiżjonijiet tagħhom avolja ma jkunux aċċettati mis-soċjetà.
It-tradizzjoni li jagħmlu ħuġġieġa lejliet il-festa tiegħu, għalkemm hija oriġinarjament prattika pagana biex jilqgħu l-istaġun tas-sajf, hija wkoll rappreżentazzjoni pagana tal-ferħ li ġab it-twelid tal-prekursur tal-Messija, id-Dawl tad-dinja.
Dwar
L-għan ta’ bekids.mt hu li joffri formazzjoni kateketika komprensiva għat-tfal u għall-adolexxenti li qegħdin jippreparaw biex jirċievu s-sagramenti.
