Sant’Andrija

Hawn tajjeb li tiddiskuti mat-tfal: 

• Aħna dixxipli ta’ kristu?
• Ġesù lilna sejħilna?

Aħna ma konniex imsejħa biex nimxu wara Ġesù fit-triq imma konna msejħin biex nimxu warajH meta tgħammidna. Tajjeb li t-tfal ifittxu ritratti ta’ meta tgħammdu. Għinhom jibqgħu jiftakru d-data tal-magħmudija flimkien ma’ dik tat-twelid tagħhom. 

• Ġesù għadu jistedinna biex inkunu dixxipli tiegħU, biex nimxu warajH, biex inkunu bħalu.
• Ġesù għadu jistedinna biex “Immorru u Naraw” bħalma qal lil Indri, kull meta jsejħilna biex inħobbu, waqt li ilħna oħra fina jitolbunu nkunu differenti. 
• Ma nistgħux nimxu wara Ġesù jekk ma nsirux nafuH.
  
  Kif insiru nafu lil Ġesù?
• Għin lit-tfal jaslu għal konkluzjoni li Mattew, Mark, Luqa u Ġwanni jgħidulna ħafna affarijiet dwar Ġesù.
• Din tista tkun opportunita’ biex tibda “mumenti fejn niltaqgħu ma’ Ġesù ”.
• Agħzel xi parabola, miraklu, xi ġrajja mill-Vanġelu. Irrakkontaha, u fittixha fil-Bibbja tat-Tfal bl-istampi jew għal tfal akbar, aqraha flimkien magħhom.

Uza ftit ħin biex tirrifletu flimkien il-kwalitajiet ta’ Ġesù li jidhru f’dan l-episodju ….. x’kienu jagħmlu huma kieku kienu hemm…… x’jaħsbu li kien il-messaġġ ta’ Kristu għalina illum bħala dixxipli tiegħU.

Indri, bħal l-appostli l-oħra kollha, wara li kien imsaħħah mill-Ispirtu s-Santu, intela bl-entuzjazmu biex jgħid lil kulħadd dwar Kristu. Dik kienet il-missjoni tiegħu bħala dixxiplu u dak kien li għamel. Dan hu li jagħmlu l-missjunarji llum. Huma magħzula għal missjoni speċjali: li jitkellmu fuq Kristu man-nies. Huma msejħa biex ixandru missjoni speċjali li jxandru l-Kelma t’Alla lil min għadu ma jafx bi Kristu.

 Imma Alla wkoll għandu missjoni għal kull wieħed u waħda minnha. Aħna msejħa biex inkunu dixxipli tiegħu bil-missjoni li naqsmu l-imħabba tal-Kelma Tiegħu ma’ l-oħrajn. Din hi msejħa “Evanġelizzazjoni”. 

Il-Papa Franġisku jitkellem fuq “Evanġelizzazzjoni Ġdida”.  Jgħid li din tfisser “li taqsam l-idejat u t-twemmin Kristjan tagħna, billi nġibu l-imħabba t’Alla u t-tama lill-oħrajn” b’hekk “l-imħabba tagħna lejn l-oħrajn iġġagħlhom jaraw il-ħniena u l-imħabba tenera ta’ Alla lejhom”.

Kif nistgħu nagħmlu dan kollu? 

• Billi nersqu viċin Ġesù permezz tal-Ewkaristija (Il-Quddiesa u t-Tqarbin), kif ukoll billi ninagħqdu fis-Sagrifiċċju tal-Quddiesa u t-Tqarbina tax-Xewqa, meta mhux possibbli għalina li nkunu fil-Knisja. 
• Nistgħu nagħmlu dan ukoll bil-mod kif aħna nġibu ruħna kull fejn inkunu.

Inkuraġġixxi lit-tfal il-kbar li jkunu attivi billi jieħdu sehem f’diskussjonijiet fl-iskola, fi gruppi ta’ ħbieb, f’laqgħat tal-adolexxenti fil-parroċċa u billi ma jibqgħux lura milli jissuġġerixxu idejat li bihom juru l-imħabba t’Alla fil-Fidi Nisranija.

Ta’ min jinvolvi lit-tfal il-kbar biex flimkien miegħek ifittxu kwotazzjonijiet kristjani li int tista’ xxerred fuq l-Internet.  

Ejja niftakru li bħala ġenituri u bħala nies li għandna f’idejna il-kura tat-tfal aħna għandna l-opportunita’ li fil-ħajja tat-tfal nibnu l-pedamenti tad-dixxipulat u tal-missjoni tal-evanġelizzazzjoni biex huma ma jikbrux u jsiru “Insara ta’ kafkaf”.