San Ġwann Neumann

5 ta' Jannar

San Ġwann Neumann twieled fl-1811 fil-Boemja – dik li llum nafuha bħala r-Repubblika Ċeka, pajjiż żgħir fl-Ewropa Ċentrali. Hu kien jaf li, biex jirnexxi fil-ħajja, kien importanti għalih li jitgħallem aktar mil-lingwa materna tiegħu, iċ-Ċek. Fil-fatt hu tgħallem sitt lingwi oħra!

Meta kien għadu żagħżugħ, Ġwanni kien jaf li kien imsejjaħ biex isir qassis.  Hu beda l-istudji tiegħu għas-saċerdozju, iżda malli temm l-istudji teoloġiċi, ma setax isib isqof biex jordnah saċerdot.  Kien hemm wisq qassisin fl-Ewropa u ma kienx hemm biżżejjed parroċċi fejn setgħu jiġu assenjati.

Ġwanni ma qatax qalbu. Hu kiteb lill-Isqof ta’ New York biex jistaqsih jekk kienx lest jilqgħu fid-djoċesi tiegħu. L-Isqof aċċetta u Ġwanni telaq minn art twelidu determinat li jasal fid-Dinja l-Ġdida, kif kienet magħrufa l-Amerka dak iż-żmien.   Hu għamel il-vjaġġ bil-mixi minn Boemja sa Franza; minn hemm seta’ jitla’ fuq vapur lejn New York, fejn wasal “b’dollaru wieħed biss fil-but u libsa waħda fuqu.”

L-Isqof ordnah saċerdot u hu beda jwettaq il-vokazzjoni missjunarja tiegħu; kien jivvjaġġa fuq dahar iż-żiemel lejn diversi parroċċi missjunarji, kien jorqod ftit wisq u fil-biċċa l-kbira tal-jiem kien jgħix biss bil-ħobż u l-ilma. Kien milqugħ tajjeb, iżda kienu wkoll jiddieħku bih! Ġwanni kellu dehra pjuttost goffa u kien tant qasir li saqajh ma kinux jilħqu meta kien ikun fuq iż-żiemel.

Wara xi żmien ħadem waħdu, hu ħass is-sejħa biex jingħaqad ma’ komunità ta’ saċerdoti. Għalhekk ssieħeb mar-Redentoristi, Kongregazzjoni ta’ saċerdoti li kienu jgħixu f’komunità u marbutin bil-voti tal-faqar, tal-kastità u tal-ubbidjenza.    Maż-żmien, Ġwanni ġie elett Superjur Provinċjali tar-Redentoristi fl-Istati Uniti u, aktar tard, inħatar Isqof ta’ Filadelfja; b’hekk sab ruħu reponsabbli minn djoċesi vasta li kienet tinkludi għadd kbir ta’ immigranti, sitwazzjoni li hu stess kien esperjenzha snin qabel.

Bħala Isqof, kompla jwaqqaf parroċċi u skejjel ġodda fid-dijoċesi tiegħu.  Madankollu, huwa ffaċċja oppożizzjoni qawwija hekk kif kellu jaffaċċja rewwixti kontra l-Kattoliċi li wasslu biex jinħarqu knejjes u kunventi. Iżda Ġwanni Neumann baqa’ sod fil-missjoni tiegħu u kompla jgħix ħajja sempliċi; kien iqassam dak kollu li kellu u jżomm għalih innifsu biss l-essenzjal.

Miet b’attakk tal-qalb waqt li kien miexi fit-triq, impenjat fil-ħidma pastorali tad-djoċesi tiegħu. Kellu tmienja u erbgħin sena.

Il-Papa Piju XII faħħru għal “ħajtu qaddisa, il-ħlewwa tiegħu ta’ tifel, il-ħidma bla heda u l-viżjoni kbira tiegħu.”

Il-kwalitajiet sbieħ ta’ San Ġwann Neumann għenuh iwettaq affarijiet sbieħ għal Alla.

Tkellmu mat-tfal dwar kif San Ġwann qatt ma qata’ qalbu li jilħaq l-għan tiegħu, li jwassal lil Ġesù lin-nies fid-dijoċesi tiegħu.

Ibdew konversazzjoni mat-tfal dwar sitwazzjonijiet jew sfidi li qed isibu diffiċli biex iwettqu. Isma’ s-suġġerimenti ta’ kif jistgħu jegħlbu d-diffikultajiet tagħhom.  Enfasizza li s-sigriet hu li jibqgħu jippruvaw anki jekk ma jirnexxux mal-ewwel.

Ħin tat-Talb mal-Familja

  • Flimkien mat-tfal irringrazzjaw lil Alla tal-kwalitajiet sbieħ li tana. Ibdew it-talba billi tgħidu: Grazzi Mulej talli……….
  • Irringrazzjaw lil Alla għall-għalliema u l-katekisti li jkomplu jippromovu l-edukazzjoni Kattolika. (Semmihom b’isimhom)
  • Itolbu lil Alla biex ikompli jħares lill-Papa, lill-Arċisqof, l-Isqfijiet, kappillani u saċerdoti jew religjużi li tafu.
  • Hekk kif niċċelebraw il-festa tal-Epifanija, niftakru fil-perserveranza tat- Tlett Slaten Maġi biex isibu lil Ġesù Bambin li kien għadu kif twieled!

Iċċelebraw din il-festa bil-kant tal-innu ‘We Three Kings of Orient Are’.


Kif tuża dan l-ispazju

Alla jkellimna b'ħafna modi, inkluż permezz tal-qaddisin tal-Knisja. Hawnhekk tista' ssib tagħrif u attivitajiet li jistgħu jgħallmuk dwar x'inhi l-qdusija u li jħeġġuk tgħix ħajja dejjem aktar qaddisa.