Illum nibdew iż-Żmien tal-Milied. Għalina l-insara dan huwa żmien importanti ħafna, aqwa minnu, hemm biss l-Għid. F’dan iż-żmien speċjali qed niċċelebraw it-twelid ta’ Ġesù Kristu, il-misteru tal-inkarnazzjoni, meta Alla sar bniedem bħalna. X’rigal kbir! Fl-imħabba tiegħu, Alla għażel li jsir tad-demm u l-laħam u jgħix il-ħajja ta’ bniedem. Miraklu kbir, li għalkemm seħħ darba, għax Ġesù twieled darba u daqshekk, f’kull quddiesa, Alla jagħtina ġismu u demmu biex nirċevuh u hu jsir parti minna.
L-istaġun tal-Milied, jibda waqt il-quddiesa tal-Vġili tal-Milied u jispiċċa fil-festa tal-Magħmudija ta’ Ġesù. Il-Knisja tagħtina dan iż-żmien biex nirriflettu dwar Ġesù f’ħajjitna, u jekk tbegħidna minnu, nerġgħu nistednuh jitwieled ġewwa fina. Huwa wkoll żmien fejn nirriflettu fuq il-fatt, li l-skop ewlieni għalfejn Ġesù sar bniedem, kien biex isalvana.
Fl-omelija tal-Milied tas-sena l-oħra, Papa Franġisku qal hekk, “Dan huwa l-messaġġ: Alla ma jogħliex fil-kobor, imma jitbaxxa fiċ-ċokon. Iċ-ċokon huwa t-triq li huwa għażel biex jasal għandna, biex imisslna qalbna, biex isalvana u jeħodna lura għal dak li jiswa tassew.”
F’dan il-jum speċjali, il-Knisja tagħtina aktar minn qari wieħed, illum ser nirriflettu fuq l-Evanġelju skont San Luqa, li jinqara fil-quddiesa tas-sebħ. (Jekk tixtieq tara riflessjoni dwar l-Evanġelju skont San Ġwann, li jinqara bin-nhar, mur fuq.
Is-silta tal-Evanġelju hija qasira u sempliċi, iżda toffrielna ħafna x’nitgħallmu minnha. Min kienu r-ragħajja? Dawn kienu nies li ħajjithom kienet man-nagħaġ, ma kienux xi għorrief. Kienu jgħixu ħajja sempliċi. Żgur li ma kienux jafu kif kellhom iġibu ruħhom quddiem il-kbarat, aħseb u ara quddiem Alla. Imma dan il-ħsieb lanqas biss daħal f’moħħhom wara li kellmuhom l-anġli, minflok qalu, “Ejjew immorru Betlehem ħa naraw x’ġara kif għarrafna l-Mulej”. Aħna ġieli naqtgħu qalbna meta niġu biex nitolbu? Forsi nibżgħu li ser nużaw kliem mhux addattat, jew jidħlilna dubju f’moħħna li ma nafux kif nindirizzaw lil Alla. Ejjew inħallu lil dawn ir-ragħajja jgħallmuna. Fis-sempliċità tagħhom, huma resqu quddiem Alla bla pretenzjonijiet.
X’kien ix-xogħol tar-ragħajja? Li jieħdu ħsieb in-nagħaġ. Vera ma nafux kemm minnhom marru lejn l-għar ta’ Betlehem, iżda marru kemm marru, wara l-kliem tal-anġli, huma kienu aktar moħħhom li jmorru lejn Betlehem, milli moħħhom fin-nagħaġ. Kemm-il darba aħna wkoll inkunu ppreżentati b’sitwazzjonijiet li t-tnejn ikunu importanti u bżonnjużi u nitfixklu liema ser nagħżlu? Nhar ta’ Ħadd per eżempju, x’nagħżlu? Li mmorru l-quddies, jew li nlaħħqu max-xogħol tad-dar, li ma stajniex nagħmlu matul il-ġimgħa, jew li nieħdu lit-tfal għall-attivitajiet li għandhom? Kollox importanti, imma fejn jidħol Alla, l-affarijiet l-oħra ma humiex komparabbli.
“bdew jgħarrfu b’kulma kien intqal lilhom dwar dik it-tarbija u kulmin semagħhom baqa’ mistagħġeb b’dak li qalulhom ir-ragħajja.” Il-probabbiltà kbira hi li ma kellhom l-ebda skola, ma kellhom l-ebda taħriġ ta’ kif ser iwasslu messaġġ, iżda dan ma qatgħalhomx qalbhom. Ma żammewx dak li raw u dak li semmgħu għalihom, imma marru jaqsmuh mal-oħrajn. U aħna kif inġibu ruħha? Xi drabi mhux talli ma nwasslux lil Ġesù għand l-oħrajn, iżda għad-dirittura nistħu, pereżempju nroddu s-salib qabel nibdew nieklu f’restaurant, inkomplu mal-oħrajn meta jgħidu li l-laqgħat ta’ katekeżi tat-tfal huma żejda, inwaqqgħu l-isem ta’ Alla biex inkunu bħall-oħrajn!
Ir-ragħajja marru jgħaġġlu. X’inhi l-għaġla tagħna? Dawn il-ġranet kulħadd ikollu ħafna impenji: ikliet, parties, ħruġ, xiri ta’ rigali, ikel, visti lill-qraba u ħbieb. Jista’ jkun li din l-għaġla kollha tnessina dak li suppost qegħdin niċċelebraw: it-twelid ta’ Alla fostna. Ninsew dak li ħabbru l-anġli, li dan Alla twieled biex iġibilna l-paċi. U aħna fejn qed infittxuh il-paċi tagħna? Fejn qed infittxuh lil Ġesù? Ir-ragħajja marru “jgħaġġlu” u wara li fittxew “sabu lil Marija u lil Ġużeppi bit-tarbija mimduda f’maxtura.” Huma ma qatgħux qalbhom, baqgħu iffitxu sakemm sabuh. Dan huwa li jgħallmuna dawn ir-ragħajja.
Il-fatt li Alla għażel lir-ragħajja u mhux xi teoloġi turina li Alla jrid isalva lil kulħadd, il-messaġġ ta’ mħabba u fidwa huwa għalina lkoll, aħna min aħna. Fl-istess ħin, Alla jrid jurina wkoll, li ma jagħmilx differenza bejnietna, li aħna lkoll importanti għalih. U jekk għal Alla kulħadd huwa importanti, aħna wkoll, m’għandniex nagħmlu differenza. Irridu nagħtu kas ta’ kulħadd, irridu ngħinu lil kulħadd, mingħajr ma nagħmlu distinzjoni ta’ razza, post fis-soċjetà, jew twemmin.
Dwar
L-għan ta’ bekids.mt hu li joffri formazzjoni kateketika komprensiva għat-tfal u għall-adolexxenti li qegħdin jippreparaw biex jirċievu s-sagramenti.
