Il-Profeta Elija

Il-Profeta Elija huwa deskritt bħala ‘profeta kuraġġuż’ minħabba l-kwalitajiet sbieħ tiegħu ta’ kuraġġ, erojiżmu u li ma kien jibża minn xejn.  Madankollu Elija għadda ukoll minn żminijiet ta’ qtigħ il-qalb, biża u dubji.  Kienet il-Fidi qawwija tiegħu u talb li għenuħ jirbaħ dawn is-sfidi, kienu izzommuħ fil-preżenza ta’ Alla.

Min kien Elija li jissemma fil-Bibbja fl-Ewwel Ktieb tas-Slaten?  Ismu jfisser ‘Alla tiegħi huwa Yahweh’.  Elija kien minn Tisbe f’Gilad ġewwa Iżrael, imma xejn hu magħruf dwar it-twelied u l-familja tiegħu.

Kien profeta, magħżul minn Alla għal missjoni partikulari, biex ikun messaġġier għal Poplu ta’ Iżrael.  Is-Sultan Aħab, dawwar l-Poplu ta’ Iżrael mill-qima ta’ Alla wieħed u veru, lejn l-idoli wara li iżżewweġ lill Ġeżabel, bint is-Sultan tal-Feniċi.  Din introduċiet il-qima lejn l-alla falz bagħal.  Kienet il-missjoni ta’ Elija li ireġġa lura l-Poplu ta’ Iżrael lejn il-qima t’Alla.

Alla bagħat lil Elija għand is-Sultan Aħab b’sejħa għal indiema, inkella għaks kbir kien se jolqot lill- pajjiż.  Meta s-Sultan Aħab u Ġeżabel komplew iqimu lil bagħal, il-pajjiż intlaqgħat minn nixfa kbira li damet aktar minn tlett snin.

Elijah ingħata tort għal din is-saħta.  Meta s-Sultan heddidlu ħajtu, Alla mexxieh għal post fejn seta jistaħba u wara mexxieh għand armla li kienet tgħix ma binha u qallu li l-armla ser tipprovdi għalih. Fil-fatt minkejja l-għaks, it-tqiq ta’ l-armla u ż-żejt fil-ġara ma kienux jonqsu, minħabba f’hekk qatt ma batew l-ġuħ.  Waqt li kien qiegħed jgħix magħhom Elija, it-tifel ta’ l-armla marad u miet, bl-interċessjoni ta’ Elija tqajjem mill-mewt.

Eventwalment, Alla bagħat lil Elija jiffaċċja lis-Sultan Aħab. Elija sfida lis-Sultan biex fuq l-Għolja tal-Karmelu jaraw minn hu l-veru Alla.  Elija qal “Jekk il-Mulej hu Alla morru warajh; imma jekk bagħal, morru warajh”.  Is-sfida kienet minn l-ewwel li jibgħat in-nar mis-Sema fuq l-offerta huwa l-veru Alla.  Il-profeti ta’ bagħal ippreparaw barri bħala offerta u bdew ikantaw u jitolbu biex bagħal jibgħat in-nar.  Wara ġurnata ta’ talb ma kien hemm l-ebda sinjal.  Wara Elija ipprepara l-barri fuq l-artal tas-sagrifiċċju u xarrab l-offerta, kif ukoll l-injam ta’ madwar l-offerta diversi drabi.  Wara Elija talab lil Alla ta’ Iżrael biex jibgħat in-nar.  Minnufiħ niżel nar mis-sema u ħaraq l-offerta kif ukoll inxtorob l-ilma u nixef l-injam ta’ madwar l-offerta.  

Il-Poplu ta’ Iżrael issa kien konvint li Alla ta’ Iżrael hu l-veru Alla.  Elija imbagħad talab lil Alla biex tintemm in-nixfa, u Alla bagħat ix-xita.  Madankollu Elija baqa mhedded u persegwitat speċjalment min Ġeżabel.  Meta Elija beda jħoss li l-missjoni tiegħu waslet fi tmiem, sab lil Eliżew biex jeħodlu postu bħala Profeta, skont kif mexxieh Alla.  

Elija ma mietx mewta naturali, imma ġie meħud is-sema f’riefnu ġo karru tan-nar waqt li kien ma Eliżew, kif kienu ser jaqsmu ix-Xmara Ġordan.  Eliżew ġabar il-mantar ta’ Elija, li kien ħalla warajh, libsu u beda is-sejħa ġdida tiegħu bħala Profeta ta’ Alla.