Għadna kif bdejna ż-żmien speċjali tar-Randan, fejn il-Knisja tħeġġiġna biex nikbru aktar fil-ħajja spiritwali u fil-ħajja tat-talb, biex naħsbu fl-oħrajn u ngħinuhom, u biex insumu. Huma kollha mezzi li jnisslu fina sens ta’ dixxiplina. Huwa żmien li jfakkarna u jagħtina l-opportunità biex nerġgħu nirriflettu dwar dak li hu l-aktar importanti fil-ħajja tagħna u dak li jagħtiha direzzjoni.
Il-qari kollu tal-lum, jipponta lejn żewġ temi: il-magħmudija u t-tentazzjoni.
Il-magħmudija hija patt – wegħda. Kull sagrament huwa patt u huwa patt bejn Alla u bejna. Alla dejjem iżomm il-patt li jagħmel magħna u qatt ma jmur lura minnu. Fil-magħmudija, Alla jagħmilna wliedu u jinħafrilna d-dnub tagħna, fost l-oħrajn. Min-naħa tagħna rridu ngħixu ta’ wlied denji ta’ Alla. Forsi tgħidu, imma aħna konna żgħar wisq, ħadd ma staqsiena jekk irridux nitgħammdu. Din hija verità. U din l-għażla għamilnieha għal uliedna wkoll. Iżda aħna msejħa biex ngħixu ta’ ulied Alla kuljum, kull ħin, inkunu fejn inkunu. U għalkemm tgħammidna meta konna trabi, f’kull quddiesa, nhar ta’ Ħadd, nerġgħu nistqarru l-fidi tagħna. B’mod speċjali, ta’ kull sena, il-Knisja tfakkarna u tistaqsina jekk aħna rridux inġeddu dak li meta konna żgħar stqarrewh għalina l-ġenituri u parrini. Issa adulti, għalhekk issa l-għażla hija tagħna u mhux ta’ oħrajn. Fil-Vġili tal-Għid u nhar l-Għid il-Kbir, nerġgħu nġeddu l-wegħdiet tal-magħmudija. F’dawn il-wegħdiet, aħna:
- niċħdu t-tentazzjonijiet u dak kollu li ġej mix-xitan
- b’mod pubbliku nuru li aħna nemmnu f’Alla Missier, f’Alla l-Iben u f’Alla l-Ispirtu s-Santu
- nemmnu li Ġesù, Iben Alla, sar bniedem, u miet għalina biex isalvana
- nemmnu li l-Knisja hija waħda, qaddisa, kattolika u appostolika
- nwegħdu, li ninpenjaw ruħna li nsiru nixbħu lil Kristu
- nwegħdu, li nħejju ruħna biex wara din il-ħajja niltaqgħu ma’ Alla wiċċ imb’wiċċ u nibqgħu ngħixu miegħu għal dejjem.
Dawn il-wegħdiet jiġu wara ż-żmien tar-Randan, meta aħna, flimkien mal-komunità nisranija kollha, inkunu qegħdin ninpenjaw ruħna biex nagħmlu eżami tal-kuxjenza u b’impenn ġdid u bl-għajnuna offruta mill-Knisja, neżaminaw l-istil ta’ ħajja tagħna u ninbidlu skont fejn u kif hemm bżonn biex ngħixu skont ir-rieda ta’ Alla, li jħobbna u jrid biss dak li hu tajjeb għalina.
Ser niltaqgħu ma’ tentazzjonijiet? Din hija ċertezza. Anke Ġesù kien ittentat. Ġesù irreżista t-tentazzjonijiet u ssielet magħhom bl-armi tal-Kelma ta’ Alla u t-talb filwaqt li kien akkumpanjat mill-anġli. Din l-għajnuna qegħda hemm għalina wkoll.
1. L-Evanġelju tal-lum, jirrakkuntalna li l-Ispirtu ħareġ lil Ġesù...
2. Kemm-il ġurnata għamel Ġesù fid-deżert?
3. Matul dawn il-jiem, Ġesù kien qed jiġi mġarrab minn xi ħadd. Min kien dan?
4. X'kien l-appell li għamel Ġesù, huwa u jxandar l-Evanġelju ta' Alla?
Dwar
L-għan ta’ bekids.mt hu li joffri formazzjoni kateketika komprensiva għat-tfal u għall-adolexxenti li qegħdin jippreparaw biex jirċievu s-sagramenti.
