Ħobż tal-Ħajja

Ġisem u d-Demm Imqaddes ta’ Ġesù

Illum huwa t-tieni Ħadd wara Pentekoste u niċċelebraw solennità oħra, magħrufa bħala Corpus Christi li hija l-festa tal-Ġisem u d-Demm Imqaddes ta’ Ġesù.

Fl-Evanġelju nisimgħu dwar il-miraklu tal-ħobż u l-ħut. Dan huwa l-unika miraklu li nsibuh fl-erba’ Evanġelji u li għandu rabta mal-Ewkaristija. L-Ewkaristija hija l-għajn tal-ħajja nisranija. Imsejħa Ewkaristija minħabba li hi ringrazzjament lil Alla. Il-kelma ġejja minn kliem Grieg, eucharistein u eulogein li għandhom rabta mal-barka Lhudija li kienet tingħad waqt l-ikel; dawn il-kliem ifakkru wkoll il-ħolqien ta’ Alla, il-fidwa u l-qdusija. Aħna nemmnu li fil-liturġija Ewkaristika, il-ħobż u l-inbid, li noffru u li jsir talb fuqhom mis-saċerdot, jinbidlu fil-ġisem u fid-demm ta’ Ġesù, wara li jinżel fuqhom l-Ispirtu ta’ Alla. Din hija l-“preżenza reali” ta’ Kristu. Ġesù huwa preżenti verament fl-Ewkaristija. Din il-preżenza reali ta’ Ġesù fl-Ewkaristija hija twemmin ċentrali fil-fidi Kattolika. X’aktarx, waħda mill-akbar impenji tal-familja, hija li nkunu preżenti verament għalihom. Bħala ġenituri tagħmlu ħilitkom kollha biex tattendu għall-okkażjonijiet importati ta’ wliedkom, bħalma huma birthdays, l-ewwel ġurnata tal-iskola, gradwazzjonijiet, logħob tal-football, reċti tal-iskola. Tippruvaw li tkunu hemm għat-tfal meta jkunu mdejjqin, imbeżżgħin, morda jew muġgħuwa. It-tfal ikunu jixtiequ jkunu jafu li qegħdin hemm tissapportjawhom f’mumenti ta’ konfużjoni, dwejjaq, dubji; ħadd ma jixtieq li jkun waħdu. Aħna ilkoll għandna bżonn l-assigurazzjoni li Alla l-Missier qiegħed magħna. Hu rrivela il-preżenza tiegħu f’Ibnu Ġesù Kristu. Min-naħa l-oħra, Ġesù jagħtina lilu nnifsu fl-Ewkaristija. Il-messaġġ tiegħu, huwa li aħna m’aħniex waħedna. Emmanuel (Alla magħna) huwa verament magħna. Il-preżenza ta’ Alla qegħda fostna u meta nirċievu l-Ewkaristija, aħna msejħa biex inkunu bħal Kristu – preżenti għall-oħrajn fil-bżonn. Kull darba li nirċievu l-Ewkaristija, inkunu qegħdin nirċievu l-Kelma ta’ Alla fina u din hija speċjali ħafna. Bħala ġenituri għandna nagħmlu ħilitna biex inkunu preżenti verament għall-familja tagħna u l-Ewkaristija, tgħinna nagħmlu dan. L-akbar rigal li qatt nistgħu nirċievu, hija l-preżenza ta’ Alla ġo fina! Ġesù stess qalilna “Dan hu ġismi li jingħata għalikom; agħmlu dan b’tifkira tiegħi.” (Luqa 22:19)

Qari mill-Evanġelju skont San Luqa (Lq 9: 11-17)

F’dak iż-żmien, Ġesù qagħad ikellem il-folol fuq is-Saltna ta’ Alla, u fejjaq lil dawk li kienu jeħtieġu l-fejqan. Il-jum kien wasal biex jintemm. Resqu lejh it-Tnax u qalulu: “Ibgħathom in-nies ħa jmorru fl-irħula u r-rziezet tal-qrib biex isibu fejn jistrieħu u jieklu xi ħaġa, għax hawnhekk qegħdin f’post imwarrab”.

Iżda hu qalilhom: “Agħtuhom intom x’jieklu”. Qalulu: “Ma għandniex aktar minn ħames ħobżiet u żewġ ħutiet, jekk għall-inqas ma mmorrux aħna stess nixtru l-ikel għal dawn in-nies kollha!”

Għax kien hemm madwar il-ħamest elef raġel. U qal lid-dixxipli tiegħu: “Qegħduhom bilqiegħda ħamsin ħamsin”. Hekk għamlu, u qiegħdu lil kulħadd bilqiegħda.

Imbagħad ħa l-ħames ħobżiet u ż-żewġ ħutiet, rafa’ għajnejh lejn is-sema, berikhom u qasamhom, u tahom lid-dixxipli biex inewluhom lin-nies. U kulħadd kiel u xaba’ u l-bċejjeċ tal-ħobż li kien fadal ġabruhom fi tnax-il qoffa.

Il-Kelma tal-Mulej
Tifħir lilek Kristu

Istruzzjonijiet u għan

  1. Aqra sew l-Evanġelju biex issir aktar familjari miegħu.
  2. Aħseb dwaru u ara x’qiegħed jgħid lilek personali. Liema hi l-parti li l-aktar li laqtitek? Għaliex?
  3. Fi żmien Ġesù, il-qsim tal-ħobż kien sinjal ta’ ħbiberija u ta’ mpenn. Fl-ikliet tal-familja u okkażjonijiet speċjali, inkunu qegħdin naqsmu dawn l-istess rabtiet. Ippruvaw li tieklu flimkien bħala familja. Dejjem ibdew billi troddu s-salib u tgħidu talba qasira lil Alla.
  4. Matul din il-ġimgħa ppruvaw li tkunu preżenti f’mod ħaj u veru fil-familja tagħkom. Dawn huma mumenti prezzjużi fejn ikollkom qsim ta’ esperjenzi li jsaħħlu lill-familja tagħkom. 
  5. Flimkien bħala familja sibu ħin u post biex taqraw dan l-Evanġelju. L-ambjent jgħin ukoll, għalhekk qabel ma tibdew, fejn ser tiltaqgħu ppreparaw:
    i. Bibbja bil-qari minn San Luqa (9: 11-17)
    ii. Xemgħa kbira bajda
    iii. Il-mejda fejn hemm il-Bibbja, miksija bi drapp abjad
    iv. Computer/laptop bil-qari u clips
    v. Ikona jew stampa tat-Trinità
  6. Mur fil-parti tat-tfal skont l-etajiet u għamilha flimkien magħhom
  7. Addatta din il-parti skont kif hemm bżonn, tiddejjaqx tkun kreattiv 😊

Fl-Evanġelju tal-lum ser nisimgħu dwar miraklu ta’ Ġesù, meta bi ftit ħobż u ħut, irnexxielu jitma’ ħamest elef persuna. Dan il-miraklu, huwa importanti għalina wkoll.

  • Il-miraklu ta’ meta Ġesù jitma’ lill-ħamest elef, jgħallimna li l-Ewkaristija hija ikla speċjali, li Ġesù qalilna biex niċċelebrawha biex niftakru fih
  • Fl-Ewkaristija, Ġesù jagħtina lilu nnifsu fil-ħobż u fl-inbid li jinbidlu fil-ġisem u d-demm tiegħu
  • Printout tal-ħut u ħobż
  • Imqass/gloj
  • Kuluri
PrintoutNiżżel

Il-miraklu li smajna dwaru llum huwa ġrajja importanti ħafna fil-ħajja ta’ Ġesù.  Tant huwa importanti li nistgħu naqrawh fl-erba’ evanġelji (Mattew, Mark, Luqa u Ġwanni). Huwa wkoll importanti għalina li nimxu wara Ġesù. Ejjew naraw kif.

Ħafna nies kienu jimxu wara Ġesù, minħabba li hu kien ifejjaq lin-nies, u biex jisimgħu l-istejjer li kien jgħid (parabboli). Darba waħda, Ġesù tela’ fuq dgħajsa biex imur fil-kwiet biex jitlob. Madanakollu, in-nies indunaw fejn kien sejjer u marru fil-post bil-mixi. Meta rahom, Ġesu iddispjaċih u għalhekk għamel ġurnata jgħallimhom u jfejjaq lill-morda.

Meta sar il-ħin, in-nies qabadhom ħafna ġuħ. Minkejja dan, kienx hemm minfejn imorru jixtru x’jieklu. Id-dixxipli qalu lil Ġesù biex jibgħat lin-nies id-dar. Minflok għamel hekk, Ġesù qalilhom, “ma hemmx għalfejn tibgħatuhom. Agħtuhom intom x’jieklu.” Ħadd ma kellu ikel, ħlief tifel, li kellu ħames ħobżiet u żewġ ħutiet. Id-dixxipli ħadu lit-tifel quddiem Ġesù u wrewh il-ħobż u l-ħut. “Hawn dan it-tifel li għandu ħames ħobżiet u żewġ ħutiet. Iżda dawn ma humiex biżżejjed biex jieklu dawn in-nies kollha!” Ġesù qalilhom “Poġġu lin-nies bilqegħda fi gruppi.” Kien hemm aktar minn ħamest elef persuna bilgħeda. Ġesù ħa il-ħobż u qal grazzi lil Alla; qasamhom u qal lid-dixxipli biex jagħtu l-ħobż lin-nies. L-istess għamel bil-ħut. Kulħadd kiel kemm ried u wara kien għad baqa’ l-fdalijiet. B’dawn imlew tnax-il basket!

X’taħsbu li qalu d-dixxipli u n-nies meta raw dan kollu?

Immaġina li inti kont hemm. Kellek ħafna ġuħ. Ma kellek l-ebda idea minn fejn se ġġib x’tiekol, iżda mbagħad Ġesù għamel dan il-miraklu u inti kilt. Forsi tirringrazzjah lil Ġesù tal-ikel li tak. Dakinhar, Ġesù ried jieħu ħsieb ta’ dawk in-nies. Għamel miraklu biex jurina kemm hija kbira l-imħabba ta’ Alla u li hu jagħtina dak li għandna bżonn.

Waqt il-quddiesa, Ġesù jagħtina ikel speċjali fl-Ewkaristija. Xi wħud minnkom għadkom kemm kellkom jew dalwaqt ikollkom l-Ewwel Tqarbina. Fit-tqarbin, Ġesù jiġi għandna permezz tal-ħobż u l-inbid. Ġesù jiġi għandna bħala ikel spiritwali għar-ruħ tagħna. Ġesù jgħix ġo fina u jibqa’ fina biex ikun jista’ jgħinna dejjem. Għalhekk, l-Ewkaristija hija tant speċjali.

Biex tibqgħu tiftakru fil-miraklu tal-lum, għamlu printout tal-ħobż, ħut u basket. Agħtuhom il-kulur u aqtgħuhom. Waħħlu l-ħobż u l-ħut fil-basket, ħalluhom jidhru. Imbagħad waħħluhom fuq kartonċina u aqtgħu max-xifer. Fuq wara iktbu sentenza mill-Evanġelju biex tibqgħu tiftakruha.

Isimgħu s-song, No Greater Gift.

Radd tas-salib

Alla tal-mirakli, grazzi ta’ Ġesù, il-Ħobż tal-Ħajja. Grazzi tar-rigal tal-Ewkaristija. Għinna biex naqsmu dak li għandna mal-oħrajn, kif inti taqsam lilek innifsek magħna. Ammen

Illum niċċelebraw il-festa l-Ġisem u d-Demm ta’ Ġesù. Niċċelebraw li aħna nemmnu fl-Ewkaristija. Waqt il-quddiesa, il-ħobż u l-inbid, isiru l-Ġisem u d-Demm ta’ Kristu. Ġesù huwa verament preżenti fl-Ewkaristija.

  • Bl-istess mod li l-ġisem tagħna għandu bżonn l-ikel biex jikber u jkun b’saħtu, għandna bżonn ukoll l-ikel għall-bżonnijiet spiritwali u emozzjonali tagħna. Ġesù jissodisfa l-ġuħ spiritwali fl-Ewkaristija u dejjem nistgħu nduru lejh għal aktar.
  • Printout tal-kalċi u l-ostja
  • Kuluri / imqass / gloj / gloj bil-glitter jew stickers
  • Kartonċina safra, oħra bajda u oħra blu
  • Stampa ta’ Ġesù (li ssib fuq l-internet jew li tpinġi inti)
PrintoutNiżżel

Permezz tas-sagramenti, Ġesù jurina l-imħabba tiegħu. Is-sagramenti jagħtuna l-grazzja ta’ Alla u jgħinuna matul ħajjitna kollha. Huma jagħtuna l-qawwa u jimlewna bl-imħabba ta’ Alla. Liema hu dak is-sagrament, fejn il-ħobż u l-inbid, jinbidlu fil-ġisem u demm ta’ Ġesù? Huwa l-Ewkaristija.

Taf xi nsejħula t-tazza li juża s-saċerdot fil-quddiesa, meta jiċċelebra l-Ewkaristija? Insejħulha kalċi u din tkun fuq l-altar, flimkien mal-ostja li tkun qegħda fuq platt, li nsejħulu patena. Ir-rigali ta’ ħobż u inbid, intellgħuhom fuq l-altar, waqt l-offertorju. Nafu li Ġesù uża l-ħobż u l-inbid waqt l-aħħar ikla. Din hija r-raġuni għalfejn nużawhom anke aħna. Madanakollu, hemm ukoll raġuni oħra. Huma jinbidlu fil-ġisem u fid-demm ta’ Ġesù, u jsiru offerta ta’ Ġesù nnifsu (hu preżenti realment). Flimkien mal-offerta tiegħu nnifsu lil Alla l-Missier, Ġesù joffri wkoll ir-ringrazzjament, it-tifħir u n-niket tagħna. Fl-Ewkaristija, Ġesù huwa verament magħna. Illum niċċelebraw il-festa tal-ġisem u d-demm ta’ Ġesù.

L-Evanġelju tal-lum, jirrakkonta ikla differenti li Ġesù ta lil folla kbira ta’ nies. Din il-ġrajja nsibuha fl-erba’ Evanġelji (Mattew, Mark, Luqa u Ġwanni). Hija ġrajja importanti ħafna fit-tagħlim ta’ Ġesù. Huwa jitma’ aktar minn ħamest elef persuna b’ħames ħobżiet u żewġ ħutiet, b’miraklu li jagħmel. Ġesù bierek l-ikel u kien hemm biżżejjed ikel għal kulħadd, kien hemm ukoll fdalijiet, li d-dixxipli ġabru fi 12-il qoffa! Dan l-Evanġelju jgħallimna dwar l-imħabba ta’ Alla. Ma’ Ġesù, il-folla kellha biżżejjed x’tiekol; Ġesù jissodisfa l-ġuħ spiritwali tagħna. Hemm aktar minn biżżejjed ikel spiritwali għal kulħadd. Ġesù jista’ jissodisfa l-bżonnijiet spiritwali tagħna, kemm-il darba jkollna bżonn, permezz tal-Ewkaristija.

Biex nifhmu l-messaġġ tal-Evanġelju aħjar, ser nagħmlu l-attività tal-lum. Iġbru l-affarijiet li għandkom bżonn. Agħmlu printout tan-nofs kalċi u ostja. Araw li l-istampa ta’ Ġesù toqgħod sew fl-ostja. Itwu l-karta safra min-nofs u poġġu nofs il-kalċi fuqha, aqtgħu max-xifer, u hekk ikollkom kalċi sħiħ. Waħħlu dan fuq karta blu, araw li tħallu biżżejjed spazju għall-ostja fuq il-kalċi. Mill-karta bajda, aqtgħu l-ostja, kif għamiltu għall-kalċi. Waħħlu l-ostja fuq il-kaliċi, imma twaħħluhiex kollha, biex tkun tista’ tinfetaħ qisha bieb. Iftħu l-ostja u ġewwa waħħlu l-istampa ta’ Ġesù. Fuq in-naħa ta’ barra, penġu salib. Iddekoraw il-kalċi bi stickers jew bil-glitter, jew tistgħu tużaw il-kuluri.

Meta tlestuha ser ikollkom stampa sabiħa ta’ kalċi u ostja, li meta tiftħuha, issibu lil Ġesù. Din tfakkarkom li Ġesù, huwa verament preżenti fl-Ewkaristija. 

Isimgħu, The E-U-C-H-A-R-I-S-T Song.

Inroddu s-salib.

O Sagrament imqaddes, O Sagrament divin, kull radd ta’ ħajr foħrija, minn qalbi ntik kull ħin. Ammen.

FuljettNiżżel

Kif tuża din il-paġna

Alla jkellimna b'ħafna modi, inkluż bil-qari mill-Bibbja fil-Quddiesa. Hawnhekk tista' ssib tagħrif u attivitajiet marbuta mal-qari tal-Quddiesa tal-Ħadd u li għandhom jispirawk tgħix kuljum dan il-qari mill-Bibbja.