It-Tempju t’Alla

It-Tielet Ħadd tar-Randan

Fl-Evanġelju tal-lum, Ġesù jaqleb l-imwejjed ta’ dawk li kienu jsarrfu flus u tal-bejjiegħa tal-annimali, fosthom barrin, nagħaġ u ħamiem li kienu jkunu offruti b’sagrifiċċju fit-tempju. Huwa jitfagħhom ’l barra mit-tempju għax kienu bidlu dan il-post f’dar tan-negozju. Meta staqsewh x’awtorità kellu biex jagħmel dan, qalilhom biex iħottu t-tempju u jerġa jibnih fi tlitt ijiem.

Ġesù rrabja għal dak li kien qiegħed isir fit-tempju, post ta’ qima. Ra l-abbuż ta’ dawk li jsarrfu l-flus, għax kienu jqarrqu bin-nies meta jbiddlu l-muniti barranin għall-flus li setgħu iħallsu t-taxxa tat-tempju bihom. Jista’ jkun li nħossu ċerta diżappunt li Ġesù “għamel sawt mill-ħbula.” Iżda biex nifhmu l-aġir ta’ Ġesù, u t-tweġiba tiegħu meta kien mistoqsi għalfejn għamel dan kollu, rridu l-ewwel nifhmu kif kienet issir il-qima fit-tempju f’dawk iż-żminijiet, kif ukoll nirriflettu dwar l-Evanġelju kollu ta’ San Ġwann. 

Fit-tempju ta’ Ġerusalemm, il-bejjiegħa kienu jbiegħu l-annimali lil dawk li jmorru jqimu lil Alla. L-annimali kienu jkunu offruti b’sagriffiċju bi tpattija għad-dnubiet tagħhom, ħlas simboliku. Id-demm tal-annimali kien jitqies bħala l-‘ħajja’ nnifisha, l-oppost tal-mewt u mod kif persuna tista’ żżomm relazzjoni tajba ma’ Alla. Dawk li jbiddlu l-flus kienu jbiddlu flus Rumani, li kellhom wiċċ l-imperatur Ruman (li r-Rumani kienu jqisuh bħala alla) għal flus oħra li bihom kienu jistgħu jħallsu t-taxxa tat-tempju (dawn it-taxxi kienu jintużaw għall-bżonnijiet tat-tempju). Dawn li jsarrfu l-flus kienu magħrufa bħala nies li jqarrqu. Is-sagrifiċċji tal-annimali jidhru strambi għalina, imma rridu nifhmuhom fid-dawl tal-passjoni, l-mewt u l-qawmien mill-mewt ta’ Ġesù. Ġwanni juża dan l-episodju tat-tempju biex aktar ’l quddiem jinterpreta ġrajja oħra u jikxef l-identità ta’ Ġesù bħala l-Messija. Dan ir-rakkont ta’ Ġwanni (b’differenza mill-Evanġelji Sinottiċi) insibuh fil-bidu tal-ħajja pubblika ta’ Ġesù, eżatt wara l-ewwel miraklu f’Kana. Ġwanni qiegħed jikteb fi żmien l-ewwel insara (80 – 100 WK). Hu jsostni li l-qima fit-tempju ma għadx hemm bżonnha, ġaladarba Ġesù bata’, miet u qam mill-mewt. 

Ġesù mhuwiex jitkellem dwar it-tiġrif fiżiku tat-tempju imma qiegħed iħabbar il-mewt u qawmien tiegħu mill-mewt wara tlitt ijiem. In-nies jixtiequ sinjal, iridu prova tal-awtorità li kellu biex jagħmel dan kollu. Is-sinjal, per eċċellenza tal-Evanġelju tal-lum, huwa l-passjoni, il-mewt u l-qawmien ta’ Ġesù. Aħna jkollna dubji fil-fidi? Jew naċċettaw li Ġesù huwa l-Mulej u salvatur?

Qari mill-Evanġelju skont San Ġwann (Ġw 2: 13-25)

Kien qorob l-Għid tal-Lhud, u Ġesù tela’ Ġerusalemm. Fit-tempju sab min qiegħed ibigħ barrin, nagħaġ u ħamiem, u min kien bilqiegħda jsarraf il-flus. Għamel sawt mill-ħbula, u keċċiehom ilkoll ’il barra mit-tempju, bin-nagħaġ u l-barrin tagħhom; xerred il-flus ta’ dawk li kien jsarrfu, u qalbilhom l-imwejjed. U lill-bejjiegħa tal-ħamiem qalilhom: “Warrbu dawn minn hawn, u dar Missieri tagħmluhiex dar tan-negozju!” Id-dixxipli ftakru f’dak li kien hemm miktub fl-Iskrittura: “Il-ħeġġa għal darek fnietni”.

Imbagħad il-Lhud qabdu u qalulu: “X’sinjal se turina li inti tista’ tagħmel dan?” Ġesù weġibhom: “Ħottu dan it-tempju, u fi tlitt ijiem jien nerġa’ntellgħu”. Għalhekk il-Lhud qalulu: “Dan it-tempju ħa sitta u erbgħin sena biex inbena, u int se ttellgħu fi tlitt ijiem?”

Iżda hu tkellem fuq it-tempju tal-ġisem tiegħu. Meta mbagħad qam mill-imwiet, id-dixxipli tiegħu ftakru f’dak li kien qal, u emmnu fl-Iskrittura u fil-kliem li kien qal Ġesù. Waqt li kien Ġerusalemm għall-festa tal-Għid, kien hemm ħafna li emmnu f’ismu billi raw is-sinjali li kien jagħmel. Imma Ġesù, min-naħa tiegħu, ma kienx jafda fihom, għax hu kien jaf lil kulħadd u ma kellux bżonn min jagħtih xhieda fuq il-bniedem, għax hu stess kien jaf x’hemm fil-bniedem.

Il-Kelma tal-Mulej
Tifħir lilek Kristu

Istruzzjonijiet u għan

  1. Aqra sew l-Evanġelju biex issir midħla tiegħu.
  2. Aħseb dwaru u ara x’qiegħed jgħid lilek personali. Liema hi l-parti li l-aktar li laqtitek? Għaliex?
  3. Ġesù wera d-dispjaċir tiegħu għall-abbuż li kien qiegħed isir fit-Tempju, post ta’ qima u mhux ta’ negozju. Bħala nsara, aħna għandna nirrabjaw meta naraw ċertu abbużi. Ir-rabja nnifisha mhix ħażina jew tajba, huwa l-mod li nesprimuha li jagħmilha hekk. Jien kif nesprimi r-rabja tiegħi, b’mod pożittiv jew negattiv? X’attitudni nieħu quddiem ir-razziżmu, abbuż, vjolenza u inġustizzji? X’inhu r-rwol tiegħi? Passiv jew attiv?
  4. Matul din il-ġimgħa nitolbu biex Alla jbiddel ir-rabja ġusta tagħna f’paċi u azzjonijiet pożittivi. Ir-Randan huwa żmien fejn nuru aktar imħabba u nippruvaw inkunu aktar ta’ servizz għall-oħrajn u wkoll żmien li naħsbu dwar l-qima tagħna lil Alla. 
  5. Flimkien bħala familja sibu ħin u post biex taqraw dan l-Evanġelju. L-ambjent jgħin ukoll, għalhekk qabel ma tibdew, fejn ser tiltaqgħu ppreparaw:
    i. Bibbja bil-qari minn San Ġwann (2, 13-25);
    ii. Xemgħa;
    iii. Il-mejda fejn hemm il-Bibbja, miksija bi drapp vjola;
    iv. Computer/laptop bil-qari u clips
  6. Mur fil-parti tat-tfal skont l-etajiet u għamilha flimkien magħhom
  7. Addatta din il-parti skont kif hemm bżonn, tiddejjaqx tkun kreattiv 😊
  8. Mur fil-parti Itlob mid-dar għall-mument ta’ talb flimkien bħala familja

Illum ser nisimgħu dwar meta Ġesù rrabja minħabba dak li kien qiegħed jiġri fit-tempju. Hu għamel bħal ‘spring cleaning’ tat-tempju! It-tempju huwa d-dar ta’ Alla, post fejn wieħed imur biex jitlob u jqim lil Alla.

  • Ġesù jaħfrilna meta aħna nirrabjaw
  • Dejjem għandna nagħmlu dak li jixtieq Ġesù
  • Karti vojta
  • Lapsijiet 

Fl-Evanġelju tal-lum naqraw li kien kważi wasal l-Għid tal-Lhud u Ġesù mar Ġerusalemm. Hekk kif wasal, baqa’ sejjer dritt it-tempju (id-dar ta’ Alla). Ma setax jemmen dak li ra fil-bitħa tat-tempju. Kien hemm in-nies ibiegħu l-barrin, in-nagħaġ u l-ħamiem, biex dawk li jmorru t-tempju joffruhom bħala sagrifiċċju. Kien hemm ukoll xi mwejjed fejn in-nies kienu jbiddlu l-flus tagħhom biex ikunu jistgħu jħallsu t-taxxa tat-tempju. Kien aktar jixbah xi suq milli dar ta’ Alla!

Din ma għoġbitx lil Ġesù, u rrabbja. Għamel frosta mill-ħabel u keċċa lill-annimali u lill- bejjiegħa, ’il barra. Imbagħad mar fuq dawk l-imwejjed fejn kienu qegħdin jissarrfu l-flus u qalibhom u l-flus bdew jiġru ma’ kullimkien! “Oħorġu minn hawn” qalilhom Ġesù, “id-dar ta’ Missieri bdiltuha f’suq!”

Għalfejn taħsbu li rrabja Ġesù?

Ġesù rrabja għax dawn in-nies ma kienux qegħdin jużaw id-dar ta’ Alla b’mod tajjeb. Ma kienux qegħdin jużaw dan il-post biex ifaħħru lil Alla imma biex jisirqu lin-nies. Nistgħu ngħidu li Ġesù qisu għamel ‘spring cleaning’ tat-tempju, billi neħħa dak kollu li lil Alla ma kienx qiegħed jagħtih pjaċir.

Matul dan ir-Randan, tajjeb li anke aħna nagħmlu ftit ‘spring cleaning’. Kif tistgħu tagħmlu dan?

Naħseb ftit u nara x’nista’ nneħħi u narmi. Hemm xi ħaġa li qiegħed nagħmel u li qegħda twaqqafni milli nħobb lil Ġesù?

Tista’ wkoll tikteb dak li ħsibt fuqu. Fuq il-karta vojta, ikteb dak li qiegħed iżommok milli tħobb lil Ġesù. Forsi rrabjajt meta ma kellekx għalfejn, jew inkella kellek tagħmel xi ħaġa u bqajt ma għamilthiex. Jista’ jkun li ma għidtx il-verità. Meta tlesti, aqbad il-karta li ktibt fuqha, għaffiġha f’forma ta’ ballun. Issa bħala sinjal li ma tridx tibqa’ tagħmel dawn l-affarijiet, itfa’ l-karta mal-art, qisek qiegħed tarmiha. Fl-istess ħin itlob lil Ġesù biex matul dan ir-Randan, jgħinek biex tagħmel ‘spring cleaning’ ta’ qalbek u b’hekk tersaq aktar qrib tiegħu.

(Wara t-talba, iġbor din il-karta u poġġiha fuq il-mejda tat-talb, biex meta taraha tiftakar x’għandek tagħmel biex iżomm qalbek nadifa).

Wara isma’, Change my heart oh God.  

Irroddu s-salib.

Grazzi Ġesù li inti tħobbna, anke meta nirrabjaw. Għinna biex ma nibqgħux nagħmlu għażliet ħżiena u nersqu aktar qrib tiegħek. Grazzi tal-ħajja ġdida li tagħtina, għallimna biex insiru aktar nixbħu lilek. Ammen.

Illum ser naraw lil Ġesù jirrabja minħabba li kien hemm nies li ma kienux mixjin sew ma’ oħrajn. Hija waħda mill-ftit drabi li naraw lil Ġesù jirrabja, u dan kollu jseħħ fit-tempju (id-dar ta’ Alla).

  • Ġesù ma jridx li nkunu nġusti mal-oħrajn
  • Ġesù jrid li nqimuh bħala l-Mulej u Salvatur tagħna
  • Karta vojta
  • Lapes

Ġesù mar Ġerusalemm biex jiċċelebra l-festa tal-Għid, u daħal fit-tempju. Hu rrabja meta ra x’kien qiegħed jiġri fil-bitħa tat-tempju. Intom qatt irrabjajtu meta rajtu xi ħaġa ħażina ssir? Ħafna drabi naraw affarijiet li m’humiex ġusti. Ġesù jgħallimna biex naħsbu dwar kif nistgħu nbiddlu dawn l-affarijiet.

Fit-tempju Ġesù sab nies ibiegħu l-barrin, in-nagħaġ u l-ħamiem biex ikunu offruti lil Alla. Dak li ra Ġesù, aktar kien jixbaħ suq milli post ta’ qima. Ra nies bilqegħda wara l-imwejjed ibiddlu l-flus. Il-flus Rumani ma setgħux jintużaw biex jinxtraw l-offerti tat-tempju, għax fuqhom kien hemm l-immaġini tal-imperatur Ruman, li kien iqis lilu nnifsu alla. Għalhekk fuq dawn l-imwejjed kienu qed jinbidlu l-flus Rumani fi flus li setgħu jintużaw fit-tempju. It-tempju huwa post ta’ talb, imma dawn il-bejjiegħa u dawk li jsarrfu l-flus kienu bidlu dan il-post f’wieħed ta’ negozju! Huma kienu jitolbu aktar flus milli suppost, allura kienu jqarrqu bin-nies. Dan ma kienx sew għal dawk in-nies li ma tantx kellhom flus u li kienu marru t-tempju biex iqimu lil Alla. Huma kienu qed jieħdu vantaġġ min-nies u jittrattawhom b’mod inġust.

Għalfejn taħsbu li Ġesù rrabja meta ra dan kollu?

Niftakru li din kienet id-dar ta’ Alla; għalhekk Ġesù rrabja magħhom. Mill-ħabel huwa għamel frosta u ħareġ lil kulħadd ’il barra, anke l-annimali, ħariġhom ’il barra. Imbagħad mar ħdejn dawk li kienu qegħdin isarrfu l-flus u qalbilhom l-imwejjed.

X’taħsbu li ħassew dawn in-nies meta raw lil Ġesù jagħmel dan kollu? Ġesù ra affarijiet li ma kienux ġusti u tajbin, għalhekk ħa azzjoni. Hu kien qiegħed jiddefendi dak li kien jemmen fih, li jagħmel xi ħaġa pożittiva biex iġib bidla għall-aħjar.

Tistgħu taħsbu f’xi affarijiet li rajtu li ma kienux ġusti jew tajbin?

Taħsbu li hu sew li hawn nies li ma għandhomx biżżejjed ikel x’jieklu? X’tistgħu tagħmlu biex tbiddlu dan? Mod wieħed hu li tagħtu ikel lil dawk l-għaqdiet li jiġbru l-ikel għall-familji fil-bżonn. B’dan il-mod inkunu qegħdin nagħmlu xi ħaġa biex l-affarijiet jinbidlu u jsiru aħjar.

L-awtoritajiet staqsew lil Ġesù biex jispjegalhom għalfejn kien għamel hekk, minn fejn kien ġab is-setgħa biex iġib ruħu b’dan il-mod. Huma riedu sinjal. U Ġesù wieġeb u qal: “Ħottu dan it-tempju, u fi tlitt ijiem jien nerġa’ ntellgħu”. In-nies baqgħu mbelħa għal din it-tweġiba, għax huma fehmuha litteralment, imma Ġesù ma kienx qiegħed jitkellem dwar il-bini, kien qiegħed jitkellem dwaru stess. Ġesù huwa t-tempju li jinħatt, imma wara tlitt ijiem Alla jqajmu mill-mewt. Ġesù kien qiegħed jitkellem dwar il-mewt u qawmien tiegħu.

Ġesù rrabja meta ra lit-tempju wżat għall-attivitajiet diżonesti. Fuq il-karta ikteb dawk is-sitwazzjonijiet li jirrabjawk meta tara lil qegħda ssir inġustizzja. Dan jista’ jkun anki abbuż fuq l-annimali jew l-ambjent (aħsbu ftit dwar il-ħmieġ u skart li jitħalla ħdejn il-baħar jew fil-kampanja). Imbagħad isimgħu din.

Wara, poġġu l-karta fuq il-mejda tat-talb u aqrawha bil-mod lil Ġesù, u itolbuh jgħinkom u jurikom x’tistgħu tagħmlu. Imbagħad għaffġu l-karta u itfgħuha mal-art. F’qalbkom staqsu lil Ġesù biex tneħħu r-rabja li għandkom u tibdluha f’azzjonijiet tajba. (Tinsewx tiġbru l-karta fl-aħħar!)

Irroddu s-salib.

Ġesù, jien inħobbok fuq kollox u fuq kulħadd. Għinni biex nagħmel dak li nemmen li hu tajjeb u nagħti każ tal-affarijiet inġusti li qegħdin jiġru madwari.

Għinni biex lid-dinja nagħmilha post aħjar, li nimxi fuq l-eżempju tiegħek u ma nibżax nagħmel dak li hu sew u ġust. Dan nitolbu f’isem il-Missier, l-Iben u l-Ispirtu s-Santu. Ammen.

Fuljett Randan-03Niżżel

1. Fl-Evanġelju tal-lum, meta Ġesù rrabja mal-bejjiegħa li kien hemm fit-tempju, l-ewwel ma kellem direttament kienu il-bejjiegħa...

Correct! Wrong!

2. X'qal Ġesù lil dawn il-bejjiegħa?

Correct! Wrong!

3. Quddiem dan kollu, il-Lhud talbu sinjal lil Ġesù biex jurihom b'liema awtorità kien qed jagħmel dan. Ġesù qalilhom...

Correct! Wrong!

4. X'ried ifisser Ġesù meta qal li se jħott it-tempju u jibnieh fi tlitt ijiem?

Correct! Wrong!

Kif tuża din il-paġna

Alla jkellimna b'ħafna modi, inkluż bil-qari mill-Bibbja fil-Quddiesa. Hawnhekk tista' ssib tagħrif u attivitajiet marbuta mal-qari tal-Quddiesa tal-Ħadd u li għandhom jispirawk tgħix kuljum dan il-qari mill-Bibbja.