Illum huwa t-tieni Ħadd tal-Għid, il-Ħadd li fih niċċelebraw il-Ħniena Divina. Il-qari huwa mill-Evanġelju skont San Ġwann u jirrakonta żewġ laqgħat ma’ Kristu rxoxt. L-ewwel għandna r-rakkont tal-laqgħa ta’ Ġesù mad-dixxipli, jumejn wara l-qawmien tiegħu mill-mewt. It-tieni tiddeskrivi d-djalogu li Ġesù jkollu ma’ Tumas, li ma kienx hemm fl-ewwel laqgħa u ma emminx dak li qalulu.
Id-dixxipli kienu magħluqin ġod-dar, minħabba li kienu mbeżża. Beżgħu li kienu ser jarrestawhom u jikkastigawhom minħabba li kienu segwaċi ta’ Ġesù. F’daqqa waħda jsibu lil Ġesù f’nofshom u jgħidilhom, “Is-sliem għalikom!” It-tislima ta’ Ġesù, hija tipikament Lhudija, “Shalom”. Iżda, meta jgħidha Ġesù, il-prinċep tal-paċi, lil dawn id-dixxipli mbeżża, tieħu tifsira differenti (meta Ġesù huwa fostna, hemm il-paċi).
Hu jurihom idejh u ġenbejh. Hu mhuwiex bla korp, bħal fantażma, huwa l-istess Ġesù li miet fuq is-salib – iżda b’differenza wkoll. Il-biża tagħhom tinbidel f’ferħ hekk kif jaraw lil Ġesù, u jkompli jitkellem magħhom u jirrepeti t-tislima ta’ paċi. Imbagħad jagħtihom missjoni, “Kif il-Missier bagħat lili, hekk jien nibgħat lilkom.” Nefaħ fuqhom u qalilhom “Ħudu l-Ispirtu s-Santu. Dawk li taħfrulhom dnubiethom ikunu maħfura, u dawk li żżommuhomlhom ikunu miżmuma.” Dawn il-kliem Ġesù jgħidhom lilna l-insara wkoll, is-sejħa tad-dixxipli, hija l-missjoni tagħna wkoll.
Tumas it-tewmi, ma kienx qiegħed hemm meta dehrilhom Ġesù. Għalhekk jgħidulu, “Rajna lill-Mulej”. Iżda hu qalilhom: “Jekk ma narax f’idejh il-marka tal-imsiemer u ma nqigħedx sebgħi fuq il-marka tal-imsiemer u idi fuq ġenbu, jien ma nemminx”. Kemm il-darba nġibu ruħna bħal Tumas u ngħidu “nemmen jekk nara”? Huwa aktar faċli, li nemmnu, wara li nkunu rajna? Din hi marbuta wkoll mal-fiduċja.
Ġimgħa wara, reġgħu kienu miġbura flimkien, u Tumas kien magħhom wkoll. Il-bibien kienu msakkra; f’daqqa waħda Ġesù reġa’ deher fosthom. Wara li reġa’ tagħhom it-tislima ta’ paċi, stieden lil Tumas mhux biex jara l-pjagi f’idejh u ġenbejh, imma biex imisshom. “Tiddubitax, emmen.” Tumas tant kien emozzjonat b’din l-esperjenza li jgħid: “Mulej tiegħi u Alla tiegħi!” Dan huwa rikonoxximent qawwi tal-identità vera ta’ Ġesù – Alla. Hija att ta’ fidi. Din l-esperjenza kkonvinċiet lil Tumas li kien qiegħed fil-preżenza ta’ Alla nnifsu!
Il-kliem li jgħid Ġesù, jagħtuna kuraġġ, lilna li ma kellniex l-esperjenza bħal ta’ Tumas: “Henjin dawk li ma rawx u emmnu.” Aħna, irridu nkunu dejjem miftuħa biex nilqgħu dawn l-esperjenzi ta’ Alla. Permezz tal-Ispirtu s-Santu, aħna fost dawk li aħna henjin, għax għalkemm ma rajniex, aħna nemmnu.
Bħalma Swor Fawstina tgħid, “Ġesù, jien nafda fik,” permezz tal-magħmudija, aħna msejħa biex nafdaw (nemmnu) u nixhdu għall-verità, li Kristu huwa ħaj.
Illum ser nisimgħu kif Ġesù ltaqa’ mad-dixxipli tiegħu, wara li qam mill-mewt. L-ewwel darba, Tumas ma kienx qiegħed magħhom. Meta jgħidulu li kienu raw lil Ġesù, Tumas ma jemminhomx. Hu ried prova li dak li raw, verament kien Ġesù.
- Ġesù qam mill-mewt, huwa ħaj
- Il-fidi mhijiex biss li temmen
Il-Ħadd ta’ wara li Ġesù qam mill-mewt, filgħaxija, id-dixxipli kienu flimkien imsakkra ġo kamra. Minħabba li huma kienu ħbieb ta’ Ġesù, huma kienu qegħdin jibżgħu li ser jarrestawhom u jsallbuhom kif kienu għamlu lil Ġesù. F’daqqa waħda, Ġesù deher lilhom f’din il-kamra! Kif seta’ daħal? Kullimkien kien imsakkar! Ġesù wriehom il-pjagi f’idejh u ġenbejh, biex huma setgħu jagħrfuh.
Wieħed mid-dixxipli, Tumas, ma kienx qiegħed magħhom. Aktar tard, meta sħabu qaluli li huma kienu raw lil Ġesù, huwa ma emminhomx. Tumas kien ra lil Ġesù mejjet fuq is-salib, rahom jidfnuh. Kif jista’ jkun li Ġesù kien ħaj? Għalhekk Tumas qal, “Jekk ma narax f’idejh il-marka tal-imsiemer u ma nqigħedx sebgħi fuq il-marka tal-imsiemer u idi fuq ġenbu, jien ma nemminx”.
Ġimgħa wara, id-dixxipli reġgħu kienu flimkien imsakkra fil-kamra, Tumas kien magħhom. U Ġesù reġa’ dehrilhom. Ġesù qal lil Tumas, “Ġib sebgħek hawn u ara idejja, u ressaq idek u qegħedha fuq ġenbi; tkunx bniedem bla fidi, iżda emmen”.
Tumas niżel għarkupptejh u qal, “Mulej tiegħi u Alla tiegħi.” Issa emmen li Ġesù kien vera ħaj, għax kien rah b’għajnejh stess. U Ġesù qallu, “Emmint għax rajtni! Henjin dawk li ma rawx u emmnu”.
Aħna ma rajniex lil Ġesù, iżda nemmnu li wara tlett ijiem hu qam mill-mewt, u huwa ħaj. Biex nemmnu, bilfors irridu naraw b’għajnejna? Għalkemm ma nistgħux naraw l-arja ta’ madwarna, xorta nemmnu li qegħda hemm. Meta jonfoħ ir-riħ, naraw il-weraq li jkun tajjar u naraw is-siġar jiċċaqilqu. Lanqas ma nistgħu naraw l-imħabba tal-familja u ħbieb tagħna, iżda nafu li hi vera għaliex inħossuha fit-tgħannieqa tagħhom u fil-kliem ta’ ħlewwa tagħhom. Għalhekk, għalkemm aħna qatt ma rajna lil Ġesù, nemmnu fih, għax hekk twassalna biex nagħmlu l-Bibbja. Nistgħu nħossu l-imħabba ta’ Ġesù f’qalbna u naraw kif dawk li jemmnu f’Ġesù juru mħabba u ħniena lejn l-oħrajn. Il-fidi tagħna f’Ġesù bħala l-Mulej u Salvatur tagħna, tgħinna nemmnu fih mingħajr ma narawh bħala bniedem.
Inti hieni, imbierek. Aħna kollha mbierka, għax għalkemm qatt ma rajna lil Ġesù u qatt ma missejnieh, aħna nemmnu li Ġesù huwa ħaj!
Aqtgħu l-idejn u l-plakka li hemm fl-attività. Waħħlu s-saba’ jipponta lejn it-toqba fl-id l-oħra, u pinġu l-kliem, “Mulej tiegħi u Alla tiegħi,” u b’hekk turu li intom temmnu li Ġesù huwa ħaj. Waqt li qegħdin tagħmlu dan, isimgħu God’s not dead.
1. Fl-Evanġelju tal-lum, Ġesù iżur lid-dixxipli wara li hu qam mill-mewt. Huma kienu imbeżżgħa u bil-bibien magħluqa. X'kien il-kliem li qalilhom Ġesù meta żarhom?
2. F'dak il-waqt, Ġesu' ta rigal kbir lid-dixxipli tiegħu. Huwa qalilhom...
3. Min fost id-dixxipli, inzerta li ma kienx preżenti mill-ewwel meta Ġesù dehrilhom?
4. X'kienet tgħid l-istqarrija tal-fidi li għamel quddiem Ġesù, id-dixxiplu li għall-ewwel sabha diffiċli biex jemmen li Ġesù kien tassew ħaj?
Dwar
L-għan ta’ bekids.mt hu li joffri formazzjoni kateketika komprensiva għat-tfal u għall-adolexxenti li qegħdin jippreparaw biex jirċievu s-sagramenti.
