Jien ta’ Alla

Id-29 Ħadd ta’ Matul is-Sena

L-Evanġelju tal-lum huwa dwar waħda mid-drabi meta l-Fariżej jippruvaw jaqbdu lil Ġesù fuq sieq waħda. Ħadd ma jħobb iħallas taxxi. Tal-anqas, meta t-taxxi li tħallas jintużaw għall-ġid tal-pajjiż mod, iżda meta jintużaw għal ħaddieħor, hemmhekk aktar issibha bi tqila biex tħallas dak li hu dovut! Il-Lhud kienu fis-sitwazzjoni tal-aħħar. It-taxxi kienu jeħduhom ir-Rumani u ġid minn dawn it-taxxi, il-Lhud ma kienu jaraw xejn. Għar-Rumani, l-ewwel lealtà kienet lejn l-imperatur; għal-Lhud, Alla kien fuq l-imperatur u l-liġijiet tiegħu. Għalhekk il-Fariżej, jistaqsu lil Ġesù x’kien jaħseb dwar dan. Kienet dik li nsejħula trick question. Jekk Ġesù jaqbel mat-taxxi lir-Rumani, jiksirha mal-Lhud, jekk jgħid li le, jiksirha mar-Rumani u jkun qiegħed jgħid lil-Lhud biex jiksru l-liġi. Ġesù ma jinqabadx fin-nassa tagħhom. It-tweġiba tiegħu: “agħtu lil Ċesari dak li hu ta’ Ċesari, u lil Alla dak li hu ta’ Alla” ma kinitx dak li stennew. Ġesù, għalhekk, illum qiegħed ifakkarna li aħna għandna żewġ responsabbiltajiet. Meta Ġesù jistaqsi għall-munita, juri x-xbieha li kien hemm fuqha u r-responsabbiltà li għandna biex naqdu d-dmir tagħna ta’ ċittadini. Min-naħa l-oħra, aħna lkoll maħluqa fuq xbieha ta’ Alla. Jiena ta’ Alla. L-ewwel lealtà tiegħi tmur lejn Alla. Għalhekk, aħna għandna d-dover li nobdu l-liġijiet tal-istat, sakemm dawn ma jmorrux kontra l-liġi ta’ Alla. Meta nħares lejn ħaddieħor, nara x-xbieha ta’ Alla hemm ukoll. Mela aħna lkoll tiegħu. Alla m’huwiex tirann, bħalma kienu u jistgħu jkunu gvernijiet ta’ pajjiż. Alla huwa mħabba. Huwa Missier. Ġesù wriena kif nistgħu naqdu lil Alla, kif nagħtu lil Alla dak li hu tiegħu: permezz tat-talb u tal-imħabba lejn l-oħrajn. Bħala mudell, Alla bagħat lil ibnu Ġesù biex jurina kif nistgħu nimxu mal-liġi tiegħu. Meta aħna nagħmlu deċiżjonijiet u ngħixu ħajja li hi l-bogħod mill-valuri nsara, meta l-kmandamenti u l-beatitudnijiet ma humiex dawk li jmexxuna fid-deċiżjonijiet tagħna, inkunu qegħdin niksru l-liġi ta’ Alla. 

F’din is-silta, Ġesù qiegħed jurina li fil-ħajja aħna għandna numru ta’ responsabbiltajiet, iżda l-aktar ewlenija hija dik lejn Alla. Ħadd u xejn ma għandu jiġi qabel Alla. Żewġ liġijiet imexxuna. Il-liġi tal-bniedem u l-liġi ta’ Alla. Il-liġi ta’ Alla dejjem tibqa’ superjuri għal-liġi tal-bniedem.

Qari mill-Evanġelju skont San Mattew (Mt 22, 15-21) 

F’dak iż-żmien, il-Fariżej marru u bdew jiftiehmu bejniethom biex jaraw kif jonsbuh b’xi kelma. U bagħtulu d-dixxipli tagħhom ma’ xi Erodjani u qalulu: “Mgħallem, aħna nafu li int raġel tħobb is-sewwa, u li t-triq ta’ Alla tgħallimha kif tassew hi, bla ma tħabbel rasek minn ħadd, għax int lejn wiċċ ħadd ma tħares. Għidilna ħaġa, mela: Int x’jidhirlek? Sewwa jew le li wieħed iħallas it-taxxa lil Ċesari?”.

Imma Ġesù għaraf il-ħażen ta’ moħħhom, u qalilhom: “Għaliex tridu ġġarrbuni, ja wċuħ b’oħra? Uruni l-munita tax-taxxa”. Urewh dinar, u Ġesù staqsiehom: “Ta’ min huma dan il-wiċċ u din il-kitba?” Qalulu: “Ta’ Ċesari!” Imbagħad qalilhom: “Mela agħtu lil Ċesari dak li hu ta’ Ċesari, u lil Alla dak li hu ta’ Alla”

Il-Kelma tal-Mulej
Tifħir lilek Kristu

Istruzzjonijiet u għan

  1. Aqra sew l-Evanġelju biex issir midħla tiegħu.
  2. Aħseb dwaru u ara x’qiegħed jgħid lilek personali. Liema hi l-parti li l-aktar li laqtitek? Għaliex?
  3. Xi tfisser għalik “agħtu lil Alla dak li hu ta’ Alla”?
  4. Lilek x’tak Alla? Kif tista’ tuża dak li tak Alla biex taqdi lill-oħrajn, speċjalment lill-familja tiegħek?
  5. Ġieli naqgħu fit-tentazzjoni li l-ħajja tagħna npoġġuha f’sezzjonijiet differenti. Hemm fejn lil Alla ma nħalluħx jidħol, tista’ tkun fix-xogħol, fil-ħin ta’ divertiment. Aħseb u ara hemmx areas fil-ħajja tiegħek fejn lil Alla ma tħalliħx jidħol.
  6. Flimkien bħala familja sibu ħin u post biex taqraw dan l-Evanġelju. L-ambjent jgħin ukoll, għalhekk qabel ma tibdew, fejn se tiltaqgħu ppreparaw:
    i. Bibbja bil-qari minn San Mattew (22, 15-21)
    ii. Xemgħa mixgħula
    iii. Il-mejda jew post fejn hemm il-Bibbja, xemgħa, miksija bi drapp aħdar
    iv. Computer/laptop bil-qari u clips
  7. Mur fil-parti tat-tfal skont l-etajiet u għamilha flimkien magħhom
  8. Addatta din il-parti skont kif hemm bżonn, tiddejjaqx tkun kreattiv 😊

Il-Fariżej kienu kapijiet reliġjużi. Kienu jistudjaw ħafna l-liġi ta’ Alla. Ġesù ma kienx jaqbel magħhom, għax għalkemm kienu jafu l-liġi ta’ Alla, ma kienux jagħtu kas tan-nies. Ma kienux iħobbu lil kulħadd, kif Alla jħobb lil kulħadd. Fl-Evanġelju tal-lum, dawn il-Fariżej ser jippruvaw jaqbdu lil Ġesù fi żball. Madanakollu, Ġesù ma jħallihomx jidħku bih.

  • Alla ħalaq kollox u ta’ dan għandna ngħidulu grazzi
  • Għandna nobdu lill-ġenituri u lill-għalliema
  • Jeħtieġ nitolbu għal dawk it-tfal li għandhom ma jafux li Ġesù jħobbhom ħafna
  • Karta kbira vojta
  • Ċikkulata jew xi ħaġa tajba għal kulħad

Fi żmien Ġesù, il-pajjiż kien immexxi mir-Rumani u mhux mil-Lhud. Ħafna mill-affarijiet li jiġu deċiżi fid-dar, jiddeċieduhom il-mama u l-papa; per eżempju fejn se tmorru skola, fejn se toħorġu, x’se tieklu, kif se tirranġaw id-dar, x’se tixtru. Issa kieku minflok il-mama u l-papa kellha tiddeċiedi z-zija li ma toqgħodx magħkom? Mela kuljum iċemplilkom kmieni filgħodu biex tqajjimkom, anke fil-vaganzi tqajjimkom kmieni, tgħidilkom hi x’se tieklu, tordnalkom hi kif se tirranġaw l-għamara tad-dar, u meta toħorġu tridu tmorru fejn trid hi! X’taħsbu? Mhux sew hux hekk, għax iz-zija ma tgħix magħkom u mhijiex parti mill-familja tagħkom li tgħix magħkom kuljum fl-istess dar.

Il-Lhud kienu fl-istess sitwazzjoni f’pajjiżhom. Ma kienx hemm kapijiet Lhud iżda Rumani, nies minn pajjiż ieħor, u l-Lhud ma kienux kuntenti. Intom qatt smajtu lill-mama jew lill-papa jgergru għax iridu jħallsu t-taxxa? Ħadd ma jieħu gost iħallas it-taxxa, iżda kull pajjiż għandu bżonnha. B’dawn il-flus il-gvern jibni skejjel u sptarijiet, jagħmel ġonna u bandli, toroq u ħafna affarijiet oħrajn. Il-Lhud kienu jagħtu dawn il-flus lir-Rumani u r-Rumani ma tantx kienu jużaw dawn il-flus biex jgħinu lil-Lhud. Għalhekk jistaqsu lil Ġesù kienx jaqbel li huma kellhom iħallsu t-taxxi lir-Rumani. U Ġesù jgħidilhom: “agħtu lil Ċesari dak li hu ta’ Ċesari, u lil Alla dak li hu ta’ Alla.”

Ġesù qiegħed ifakkarna li aħna rridu nobdu lil dawk li jmexxuna. Mela aħna d-dar, nobdu lill-ġenituri tagħna, l-iskola nobdu lill-għalliema tagħna, jekk qegħdin għand in-nanniet, nobdu lin-nanniet tagħna. Il-ġenituri tagħna wkoll jobdu lil min imexxihom. Fuq kollox, Ġesù jgħidilna li l-aktar li rridu nobdu huwa lil Alla. Alla ħalaq kollox, għalhekk kollox huwa tiegħu, anke aħna.

Tafu ssemmu xi affarijiet li ħalaq Alla?
Mela, ladarba Alla ħalaq kollox, kollox huwa ta’ Alla.
U lil Alla x’ngħidulu ta’ dan il-ħolqien kollu sabiħ? (grazzi)

Alla ħalaq kollox sabiħ, imma hemm pajjiżi fqar. Fihom hemm nies li mhux dejjem jaqsmu dak li għandhom. Ħa nimmaġinaw din. Inti ma tiflaħx, ma mortx skola. Il-mama xtrat il-banana, u matul il-ġurnata, sakemm ġew ħutek mill-iskola, inti kilt il-banana kollha! X’ġara? Ma kienx għad baqa’ banana għal ħutek. U hemm pajjiżi, fejn xi nies ħadu kollox għalihom u ma ħallewx għal kulħadd. Għalhekk ikollna xi pajjiżi li huma fqar.

Imbagħad hawn pajjiżi fejn it-tfal ma jafux min hu Ġesù. Ma jafux li Ġesù jħobbhom ħafna, li jrid jgħinhom u jkun magħhom. Ma jafux li Ġesù miet għalihom. Ma jafux li wara tlett ijiem qam mill-mewt. Lanqas ma jafu li xi darba ser imorru niltaqgħu miegħu fil-ġenna! Issa ħa nagħmlu logħba żgħira.

Xi ħadd mit-tfal jintbagħat f’kamra oħra tad-dar. Titqassam iċ-ċikkulata jew ħaġa oħra li tkun ippreparata. Meta nagħtu ċ-ċikkulata ngħidu: “NN (isem dik il-persuna) Ġesù iħobbok ħafna.” Meta naslu għall-aħħar ċikkulata ngħidu: “BB (isem dik il-persuna li mhijiex fil-kamra) Ġesù  iħobbok ħafna.” Dawk li qegħdin jieklu ċ-ċikkulata jitkellmu dwar humiex jieħdu gost li qegħdin jiekluha, hijiex tajba, eċċ.
Nistaqsu: “X’ser nagħmlu biċ-ċikkulata ta’ BB?” (il-persuna li tkun f’kamra oħra waħedha)
Nissuġġerixxu li xi ħadd ieħor mit-tfal, jaqbad iċ-ċikkulata u jeħodhiela, u t-tnejn jiġu lura flimkien.

Meta jkun hemm tfal f’pajjiżi oħra li ma jafux dwar Ġesù, jiġri xi ħaġa simili. Dawk il-pajjiżi li jafu dwar Ġesù, jibgħatu nies, li nsejħulhom missjunarji, biex jgħallmu lit-tfal u lill-familji tagħhom dwar Ġesù. L-istess bħal meta ħadna ċ-ċikkulata lil BB. BB ma setgħetx tieħu ċ-ċikkulata magħna, għax ma kienitx hawn, lanqas ma setgħet idduqha u tara kemm hi tajba. Imma meta ħadnihielha setgħet tiekolha u saret taf li tajba.

Illum mela tgħallimna li Alla ħalaq id-dinja u dak kollu li hemm fiha u li rridu ngħidu grazzi lil Alla tal-ħolqien kollu. Tgħallimna wkoll li hawn nies li m’humiex komdi daqsna, u m’għandhomx ħafna ikel, dar u toys. Hawn min hu fqir, u aħna nitolbu għalihom, biex ikun hawn ħafna nies li jagħtu mill-flus tagħhom lil dawn in-nies fqar. Tgħallimna li mhux kulħadd jaf li hu maħbub minn Ġesù. Għalhekk l-missjunarji jmorru jsibu lil dawn in-nies biex jgħallmuhom u jgħinuhom.  Matul din il-ġimgħa waħħlu l-karta vojta f’xi post fejn tarawha u kulħadd, kuljum, jikteb jew ipinġi xi ħaġa għalfejn irid jgħid grazzi lil Alla għaliha.

Irroddu s-salib.

Mulej, grazzi ħafna tal-ħolqien tiegħek. Grazzi ta’ … (kulħadd isemmi dak li jixtieq jirringrazzja lil Alla għalih u wara jiktibha jew ipinġiha fuq il-karta)

Nisimgħu u nkantaw My God is number one.

Ġesù, illum nixtiequ nitolbu wkoll għal dawk it-tfal kollha li għadhom ma jafux li inti tħobbhom ħafna. Nitolbu biex imorru l-missjunarji għandhom u jgħallmuhom dwarek. Ammen.

Illum se nisimgħu kif xi nies ippruvaw jidħku b’Ġesù. Madanakollu, Ġesù jinduna mill-ewwel. Nisimgħu l-Evanġelju u naraw Ġesù x’messaġġ għandu għalina.

  • Kulma għandna huwa ta’ Alla, għax Alla ħalaq kollox
  • Alla għandu jkun l-ewwel fl-għażliet tagħna
  • Masking tape
  • Lapes / felt pen
  • Tmien kaxex taż-żraben (jew blocks) (jekk għandna biżżejjed, nistgħu nagħmlu 8 kaxex/blocks għal kull persuna)

Il-Fariżej kienu kapijiet reliġjużi. Kienu jistudjaw ħafna l-liġi ta’ Alla. Ġesù ma kienx jaqbel magħhom, għax għalkemm kienu jafu l-liġi ta’ Alla ma kienux jagħtu wisq kas tan-nies. Ma kienux iħobbu lil kulħadd, kif Alla jħobb lil kulħadd. Il-Fariżej u l-Erodjani ma kienux ħbieb. L-Erodjani kienu ħbieb ta’ Erodi. Erodi għalkemm kien Lhudi kien jobdi lir-Rumani. Ir-Rumani ma kienux jemmnu f’Alla wieħed, iżda f’ħafna allat. Din kienet waħda mir-raġunijiet għalfejn il-Fariżej kienu jistkerrħu lir-Rumani. Ma’ dan inżidu wkoll li r-Rumani kienu jeħdulhom it-taxxa u b’dawn il-flus ma kienux jgħinu lil-Lhud. Il-gvernijiet tal-pajjiżi jiġbru t-taxxi biex ikunu jistgħu jagħmlu pajjiż aħjar, bħal jibnu sptarijiet, skejjel, djar, toroq, ġonna, jixtru mediċini, jagħtu flus lil min hu fil-bżonn, u ħafna affarijiet oħra. Tridu timmaġinaw li intom qed tieħdu ħsieb it-taxxi? Mela bit-taxxi għandkom ħafna flus! Dawn il-flus tridu tużawhom biex tgħinu lill-oħrajn. Kif se tonfqu dawn il-flus tat-taxxi?

Biex nerġgħu niġu lura għall-Evanġelju, il-Fariżej u l-Erodjani ma kienux ħbieb, imma kienu jaqblu fuq ħaġa waħda. It-tnejn riedu li jaqbdu lil Ġesù u joqtluh.

Fl-Evanġleju tal-lum, insibuhom flimkien u jippruvaw, jagħmlu nassa għal Ġesù bil-mistoqsija li jistaqsuh dwar it-taxxi. Minkejja dan, Ġesù jinduna u jwieġeb b’mod li jħallihom bla kliem. Ġesù jgħidilhom “agħtu lil Ċesari dak li hu ta’ Ċesari, u lil Alla dak li hu ta’ Alla”.  X’taħsbu li jrid jgħid Ġesù b’dan il-kliem?

Ġesù qiegħed ifakkarna li aħna rridu nobdu kemm lil dawk li qegħdin fuqna u li huma responsabbli tagħna, bħall-ġenituri, għalliema, katekisti u oħrajn, u rridu nobdu lil Alla wkoll. Fuq kollox l-aktar importanti huwa li nobdu lil Alla. Fil-fatt jekk aħna nħobbu lil Alla u nagħmlu dak li jixtieq hu, inkunu qegħdin nobdu lill-ġenituri tagħna u lill-oħrajn ukoll!

Alla ħalaq id-dinja u kulma fiha. Għalhekk kollox huwa tiegħu. Aħna wlied Alla, aħna ta’ Alla wkoll. Meta Ġesù wera l-munita b’wiċċ Ċesari, qal lin-nies li jridu jobdu l-liġijiet ta’ Ċesari. U lilna qiegħed jgħidilna l-istess ħaġa, li rridu nobdu lil dawk li huma fuqna. Ġesù ma jieqafx hemm. Jgħidilna li jeħtieġ nobdu lil Alla. Alla huwa aqwa minn kulħadd, għalhekk l-ewwel li rridu nobdu huwa lil Alla. Kif ser nobdu lil Alla?

Ġesù, sar bniedem bħalna u hu wriena x’irridu nagħmlu biex nobdu u nħobbu lil Alla. Ġesù kien jitlob, kien jgħallem lill-oħrajn dwar Alla, kien jgħin lil kulħadd, kien iħobb lil kulħadd. Kif nistgħu nagħmlu bħal Ġesù il-lum? (nagħtu ħin biex kulħadd, żgħar u kbar, jagħtu t-tweġibiet tagħhom)

Ġieli nsibu li jkun hemm affarijiet li jfixkluna u ma nagħmlux għażliet tajba. Din speċjalment tkun diffiċli meta rridu nagħżlu bejn żewġ affarijiet tajba. Per eżempju, waslet il-ġurnata tal-Ħadd. Għadni lura ħafna fil-homework tiegħi, u rrid nispiċċa proġett ukoll. Biex inlesti kollox, m’għandix ħin noħroġ u mmur għall-quddies. Mhux sew li mmur l-iskola mingħajr ma jkolli x-xogħol lest. Mhux sew li ma mmurx għall-quddies. Kif se nagħżel?

F’dan il-każ, tajjeb li nara kif qassamt il-ħin fil-ġranet ta’ qabel? Ħlejt ħin li stajt użajtu biex inlesti l-homework? Hemm ħin ieħor li jista’ jkun li se naħlih minflok se nużah tajjeb?

Din is-sitwazzjoni niltaqgħu magħha kemm-il darba, għax aħna rridu nobdu lil Ġesù, imma wkoll irridu mmorru tajjeb fl-iskola, irridu mmorru għall-isports, nistudjaw xi strument tal-mużika, jew imorru niżfnu jew nitgħallmu npinġu, iridu ħin ma’ tal-familja u ħbieb, irridu nsibu ħin biex nilgħabu u naraw programmi favoriti. Kemm hemm affarijiet li rridu nagħmlu!  Ġesù jixtieq li jekk jista’ jkun jirnexxielna li nagħmlu kollox ukoll! Dawn huma kollha affarijiet tajba u sbieħ. Ġesù jrid li nkunu bravi u inqassmu l-ħin sew u jrid li bħalu nsibu ħin kuljum biex nitolbu, ħin biex ngħinu fid-dar u lill-oħrajn, u dejjem inħobbu lill-oħrajn

Fl-attività tal-lum se naraw kif nistgħu nagħmlu għażliet aħjar. Fuq il-kaxex (jew blocks) inwaħħlu biċċa masking tape. Fuq il-masking tape niktbu waħda minn dawn il-kelmiet: Alla (talb u quddiesa), skola, sport, ħbieb, ikel, flus, familja, logħob (jiġifieri, kull kaxxa ser ikollha kelma differenti). Jekk għandna biżżejjed kaxex għal kulħadd, kulħadd jagħmel il-kaxex fuq xulxin. Ta’ fuq nett se npoġġu l-aktar waħda importanti għalina. Wara niddiskutu u nagħtu raġunijiet għall-għażliet li saru. Jekk ma hemmx kaxex/blocks għal kulħadd, wara li xi ħadd jagħmel il-kaxex fl-ordni li jaħseb, nieħdu ritratt qabel ma xi ħadd ieħor jibdel il-kaxex fl-ordni li jixtieq. Meta jkollna r-ritratti ta’ kulħadd niddiskutu u nitkellmu dwar l-għażliet li għamilna. X’se nitgħallmu? Hemm xi ħaġa li rridu nibdlulha postha fil-ħajja tagħna? Hemm xi ħaġa li mhux nagħtu kasha u rridu nagħtuha aktar importanza?

Dak li Ġesù jrid jgħallimna llum hu li huwa tajjeb li nistudjaw, li nkunu tajbin fl-isport jew fil-mużika, jew żfin, tajjeb li meta nikbru, mmorru naħdmu għax għandna bżonn il-flus, tajjeb li nieklu, tajjeb li jkollna l-ħbieb. Minkejja dan, meta dawn l-affarijiet, jew affarijiet oħra, isiru tant importanti għalina li ma jkollniex ħin għal Alla, ma nkunux qegħdin nagħmlu għażla tajba. 

Inroddu s-salib.

Ġesù għallimna kif inħobbu lil Alla l-Missier u dejjem nagħtuh l-ewwel post fil-ħajja tagħna. Għinna biex nagħmlu dak li tixtieq inti, biex inkunu ħbieb ma’ kulħadd u ngħinu lil dawk li għandhom bżonn l-għajnuna tagħna.

Nisimgħu u nkantaw: I wanna do right.

Ġesù, il-lum qegħdin niċċelebraw il-Jum Missjunarju. Nixtiequ nitolbu għall-missjunarji kollha, li jagħmlu sagrifiċċji kbar biex imorru jgħallmu lit-tfal u lill-kbar li jgħixu f’pajjiżi oħra li ma jafu xejn dwarek. Nitolbu għal dawn in-nies ukoll biex jitgħallmu dwar l-imħabba kbira li inti għandek għalihom. Ammen.

1. Fl-Evanġelju tal-lum, il-Fariżej imorru jfittxu lil Ġesù; minħabba raġuni partikolari. X'kienet din ir-raġuni?

Correct! Wrong!

2. Il-Fariżej staqsew lil Ġesù dwar xi ħlas li huma kienu marbutin li jagħmlu. X'kien dan il-ħlas?

Correct! Wrong!

3. Ġesù talab lill-Fariżej biex juruh xi ħaġa wara li marru jkellmuh. Xi xtaq jara Ġesù?

Correct! Wrong!

4. Ġesù ried li l-imperatur ma jieħux il-post ta' Alla iżda li jiġi rispettat ta' imperatur li kien, jiġifieri ta' bniedem li għandu awtorita' fost il-bnedmin. B'liema mod Ġesù jirreferi għall-imperatur?

Correct! Wrong!

Kif tuża din il-paġna

Alla jkellimna b'ħafna modi, inkluż bil-qari mill-Bibbja fil-Quddiesa. Hawnhekk tista' ssib tagħrif u attivitajiet marbuta mal-qari tal-Quddiesa tal-Ħadd u li għandhom jispirawk tgħix kuljum dan il-qari mill-Bibbja.