San Bernard ta’ Clairvaux

20 ta' Awwissu

Bernard twieled fis-sena 1090, ġewwa l-Kastell ta’ Fontaines, qrib Dijon fi Franza.  Il-ġenituri ta’ Bernard kienu nobbli u rabbew lil uliedhom skont it-tagħlim tal-Fidi Kattolika.  Bernard irċievha l-edukazzjoni tiegħu fi skola ta’ fama kbira, fejn kien jispikka fi tagħlim kif ukoll fil-qdusija, id-devozzjoni tiegħu lejn il-Madonna u l-imħabba li kellu lejn l-istudju tal-Bibbja.

Meta kellu 19-il sena omm Bernard mietet.  Kien f’dak iż-żmien li iddeċieda li jgħix ħajja maqtugħ min-nies u ta’ talb;  ħass is-sejħa biex jidħol f’ l-Ordni  Ċisterċjan, Ordni li jimxi fuq ir-Regola ta’ San Benedittu.  Dawn il-Patrijiet jgħix ħajja ta’ faqar u sempliċita, xogħol manwali, studju u talb.

Meta kellu 24 sena, intbagħat ma 12-il patri ieħor biex iwaqqfu monasteru.  Dan il-Monasteru twaqqaf ġo wied u Bernard ġie maħtur Abbati (Abbatti huwa dak il-Patri li jmexxi il-kommunita u l-Monasteru).  Bernard kompla jivjaġġa u jwaqqaf monasteri oħra.  Diversi drabi ġie mitlub biex issir Isqof, imma qatt ma aċċetta.

Bernard sar magħruf għal għerf u l-qdusija, kif ukoll għal priedki; tant hu hekk li anki il-Papa kien jitlob il-pariri tiegħu. Fuq talba tal-Papa Ewġenju III, Bernard beda jippriedka it-Tieni Kruċjata, ( Il-Kruċjati kienu serje ta’ bosta kampanji militari li seħħew bejn is-Seklu XI u s-Seklu XIII). It-Tieni Kruċjata falliet, u Bernard ħassu xi ftit responsabbli minħabba li kien ippromova l-għaqda ta’ armata għall-Kruċjata.  L-esperjenzi ta’ ħajtu kellhom effett negattiv fuq saħħtu u miet fis-sena 1153 f’l-eta ta’ 63 sena.  San Bernard ta’ Clairvaux kien teologu kbir, Abbatti f’l-Ordni Ċisterċjan, Duttur tal-Knisja; fuq kollox kien raġel qaddis.  San Bernard għen ħafna rġiel biex iħaddnu l-vokazzjoni monastika.

  • Iddiskuti mat-tfal kif nistgħu nwasslu lil ħaddieħor għand Ġesu’.  
  • Jista jkun hemm tfal oħra li minħabba ix-xogħol tal-ġenituri tagħhom ma jistgħux immorru l-Quddies.  Tistgħu tehduhom magħkom il-Quddies, il-Mużew jew għal xi attivitajiet oħra.
  • Il-ħajja ta’ San Bernard kienet magħmula minn xogħol, studju u attivitajiet oħra, imma fuq kollox kien iqiegħed it-talb fiċ-ċentru ta’ ħajtu.
  • Flimkien mat-tfal, esploraw il-mod kif iqattu il-ħin tagħhom fil-vaganzi; biex il-ġurnata tagħhom tinkludi ħruġ, logħob, xogħol, studju u talb. Iddeċiedu dwar ħin fis li jqumu filgħodu, ħin biex jgħinu fil-faċendi tad-dar, jorganizzaw l-affarijiet ta’ l-iskola u biex inaddfu l-kamra tagħhom.
  • Ssibu mezz biex tkomplu issibu ħin għat-talb, tkunu fejn tkunu.

Ħin għat-Talb mal-familja

San Bernard għadu magħruf sallum għad-devozzjoni kbira tiegħu lejn il-Madonna.  Għalih il-Madonna hija Medjatriċi Qawwija. Fit-talba tal-‘Memorare’, (talba lill-Madonna),attribwita lil San Bernard, hemm miktub ‘Li qatt ma nstema’ li xi ħadd Intefa’ taħt il-ħarsien tiegħek, talbek l-għajnuna Jew fittex li tidħol għalih u inti ma smajtux’.

Mill-Bibbja ta-tfal, aqraw l-istorja tat-Tieġ ta’ Kana, esperjenza ta’ talb.  Tkellem mat-tfal kif il-Madonna kienet Medjatriċi f’din is-sitwazzjoni diffiċli.

Ħeġġeġ it-tfal biex jitolbu għal bżonnijiet tagħhom lill-Madonna.  (Dawn il-bżonnijiet jistgħu jidhru żgħar għalina, imma għalihom ikunu problemi diffiċli ħafna).  Igwidahom biex ippoġġu il-bżonnijiet tagħhom f’idejn Marija, biex hi tehodhom għand Ġesu’.

Kantaw xi innu Marjan

Kif tuża dan l-ispazju

Alla jkellimna b'ħafna modi, inkluż permezz tal-qaddisin tal-Knisja. Hawnhekk tista' ssib tagħrif u attivitajiet li jistgħu jgħallmuk dwar x'inhi l-qdusija u li jħeġġuk tgħix ħajja dejjem aktar qaddisa.