Santu Wistin

28 t’Awwissu

Santu Wistin huwa wieħed mill-akbar għorrief tal-Knisja Kattolika. It-tagħlim u l-kitbiet tiegħu għadhom jiġu studjati sal-lum.

L-esperjenzi ta’ ħajtu, speċjalment il-konverzjoni tiegħu, għandhom tagħlima kbira għall-mixja tagħna nisranija lejn il-Mulej.

Waħda mid-dikjarazzjonijiet tiegħu, li baqgħet tiġi kkwotata, hi: “Inti ħlaqtna għalik, o Alla, u qalbna ma ssibx mistrieħ qabel ma tistrieħ fik.”

Dan hu ħsieb pjuttost tqil għat-tfal, u forsi ma japplikax daqshekk fl-età zgħira tagħhom. Għalhekk mat-tfal nistgħu nieħdu xi tagħlimiet minn kif hi preżentata l-ħajja ta’ Wistin fil-vidjow.

Ħu l-opinjoni tat-tfal fuq l-influwenza tal-ħbieb. Kemm kien importanti għal Wistin li ħbiebu mhux biss jaċċettawh imma wkoll jammirawh?

Iddiskuti mat-tfal, skont l-età tagħhom, l-influwenza tal-ħbieb – kif il-ħbieb jistgħu jinfluwenzawhom għat-tajjeb jew għal dak li mhux daqshekk tajjeb. Ara x’jaħsbu fuq il-fatt:

  • Li Wistin u sħabu kienu jarmu l-frott li jkunu serqu
  • Li Wistin kien jigdeb lil ommu biex jaghmel dak li jrid

Fakkarhom x’kien sema’ Wistin mill-Isqof Ambroġ, u l-kliem li wassluh jaħseb fuq il-ħajja li kien qed jgħix: “Dak li tagħmlu ma’ dawn iż-żgħar, qed tagħmluh miegħi.” Il-kliem tal-Isqof kien ibbażat fuq id-dmir li għandna nieħdu ħsieb lil dawk li huma neqsin minn bżonnijiet bażiċi.

Ibdew id-drawwa ta’ talba spontanja qabel l-ikel, talba t’apprezzament tal-ikel fuq il-mejda. Inkoraggixxu lit-tfal li jaqsmu m’oħrajn dak li jkollhom:

  • Jekk huma żgħar, jaqsmu mal-oħrajn il-ġugarelli ma’ ħuthom, mal-kuġini jew mal-ħbieb
  • Jekk akbar, jaqsmu mal-oħrajn it-“tablet,” il-ħin fuq il-“laptop,” iċedu għall-aċċess għal xi logħba, għal xi programm fuq televizjoni
  • Jistghu jiddekoraw kaxxa/bott/landa u jitfgħu fiha xi ħaga mill-flus li jistgħu jingħataw, biex minbarra li jġemmgħu xi ħaġa għalihom, iġemmgħu wkoll għal xi skop ta’ karità li jinqala’ minn żmien għal żmien (għall-missjoni jew għal xi maratona ta’ karita, per eżempju)

Ġesù dejjem lest li jilqagħna b’idejh miftuħin fis-Sagrament tal-Qrar u jgħannaqna kif għamel ma’ Wistin. Kif Ġesù dejjem lest li jaħfrilna meta jiddispjeċina, hekk aħna nkunu lesti li naħfru lil xulxin. Fit-talb mal-familja dawn jistgħu jkunu ġranet fejn induru lejn dawk li nkunu nqasna b’xi mod u minbarra li ngħidu “Sorry” noffru wkoll tgħanniqa.

Wistin, iben Santa Monika, ma tantx kellu sentimenti lejn il-fidi Nisranija tant li kien bogħod minn Alla. Ommu Monika baqgħet titlob għalih u tinkwieta għalih. Maż-żmien, iltaqa’ mal-Isqof Ambroġ u tkellem u kkomunika miegħu dwar ir-Reliġjon. Wara ħafna diskussjonijiet u komunikazzjonijiet Wistin ikkonverta, sar qassis u hu beda jgħallem u ppriedka sakemm miet.

Żewġ persuni għandhom ikunu dahar ma’ dahar, b’karta u lapes f’idhom. Wieħed ipenġi, pass pass, fuq il-karta waqt li jgħid dak li jkun qed ipenġi. L-ieħor għandu jisma’ sew u jpenġi dak li qed jisma’. Meta t-tpenġija tkun lesta, għandkom turu lil xulxin dak li penġejtu biex taraw kemm ftehmtu u kkomunikajtu tajjeb. Wara erġgħu ilagħbu billi tpartu l-irwoli.

TpenġijaNiżżel

Kif tuża dan l-ispazju

Alla jkellimna b'ħafna modi, inkluż permezz tal-qaddisin tal-Knisja. Hawnhekk tista' ssib tagħrif u attivitajiet li jistgħu jgħallmuk dwar x'inhi l-qdusija u li jħeġġuk tgħix ħajja dejjem aktar qaddisa.