Santu Wistin

Ħu l-opinjoni tat-tfal dwar l-influwenza li kellhom il-ħbieb ta’ Santu Wistin fuqu.  Kemm kien importanti għal Wistin li sħabu mhux biss jaċċettawh imma wkoll jammirawh.

Iddiskuti mat-tfal, skont l-età tagħhom, l-influwenza tal-ħbieb – kif il-ħbieb jistgħu jinfluwenzawhom għat-tajjeb jew għal ħażin.

Staqsihom x’jaħsbu fuq il-fatt:

• Li Wistin u sħabu kienu jarmu l-frott li jkunu serqu
• Li Wistin kien jigdeb lil ommu biex jagħmel dak li jrid

Fakkarhom fil-kliem li Wistin kien sema’ mingħand l-Isqof ta’ Milan, San Ambroġ.  Dawn il-kliem wassluh jaħseb fuq il-ħajja li kien qed jgħix: “Dak li tagħmlu ma’ dawn iż-żgħar, qed tagħmluh miegħi.” Il-kliem tal-Isqof kien ibbażat fuq id-dmir li għandna nieħdu ħsieb lil dawk li huma neqsin minn bżonnijiet bażiċi.

Ibdew id-drawwa ta’ talba spontanja qabel l-ikel, talba ta’  apprezzament tal-ikel fuq il-mejda. Ħeġġeġ lit-tfal biex jaqsmu ma’ oħrajn dak li għandhom:

• Jekk huma żgħar, jaqsmu l-ġugarelli ma’ ħuthom, mal-kuġini jew mal-ħbieb
• Jekk huma akbar fl-età, għandhom jaqsmu l-ħin tagħhom fuq it-tablet, il-laptop, il-ħin tal-logħob jew il-ħin tat-televiżjoni ma’ oħrajn.
• Jistgħu jżejnu kaxxa/bott/landa u jitfgħu fiha xi flus li jirċievu biex jingħataw lill-karità. B’dan il-mod mhux biss qed jitgħallmu jfaddlu l-flus għalihom iżda wkoll għal dawk fil-bżonn.

Ġesù dejjem lest li jilqagħna b’idejh miftuħin fis-Sagrament tal-Qrar u jgħannaqna kif għamel lil Santu Wistin. Kif Ġesù dejjem lest li jaħfrilna meta jiddispjaċina għal dak li jkunu għamilna u nitolbu maħfra, hekk aħna nkunu lesti li naħfru lil xulxin.

Fit-talb mal-familja – dawn jistgħu jkunu ġranet fejn induru lejn dawk li nkunu nqasna b’xi mod u minbarra li ngħidulhom “Skużani” noffrulhom wkoll tgħanniqa.