Dalwaqt tispiċċa s-sena liturġika. Il-Ħadd li ġej hija l-festa ta’ Kristu Sultan, dan ikun l-aħħar Ħadd tas-sena. Il-ġimgħa ta’ wara nibdew l-Avvent. L-Evanġelju tal-lum jistedinna biex nieħdu bis-serjetà t-tagħlim ta’ Ġesù dwar l-aħħar żminijiet, u ndawwru qlubna u ħarsitna lejn il-ħajja li għad trid tiġi. Kif ser inkunu nafu li resqin lejn it-tmiem? Ma nafux la l-ġurnata u lanqas s-siegħa. Iżda nafu, li fi żmien li jafu Alla biss, meta d-dawl jiddi u jirbaħ fuq id-dlam, meta l-ġustizzja u l-imħabba jirrenjaw fuq kollox, iż-żmien kif nafuh jispiċċa u t-tieni miġja tal-Mulej tkun waslet.
Il-kliem ta’ Ġesù jirrifletti xbieha preżenti fit-Testment il-Qadim speċjalment dawk fil-ktieb ta’ Danjel, li qrajna minnu fl-ewwel qari. Huma xbihat apokalittiċi li jxandru li l-agħar żminijiet għad iwasslu għall-aħjar żminijiet. Apokalittiku tfisser revelazzjoni jew ‘kxif’. Flimkien mad-dixxipli tiegħu, Ġesù qiegħed fil-Ġnien taż-Żebbuġ, u Ġesù jwassal l-aħħar messaġġ dwar il-passjoni tiegħu. Jiddeskrivi s-sinjali li wieħed kellu jfittex li jindikaw il-miġja ta’ Bin il-bniedem. Ġesù ma jgħidx dan il-kliem biex ibeżżagħna iżda biex iħejjina għall-bidliet li rridu ngħaddu minnhom f’ħajjitna u fl-aħħar taż-żminijiet.
Il-qari juża lingwaġġ simboliku biex ifisser li ħadd ma jaf meta hu ż-żmien tas-salvazzjoni, u jagħti stampa ta’ żmien ta’ tensjoni u diżordni. Ma rridux ninterpretawh litteralment. Jeħtieġ li niffukaw fuq il-messaġġ ta’ Ġesù. Meta Ġesù juża l-eżempju tas-siġra tat-tin bħala sinjal li wasal is-sajf (għax ikollha l-weraq), ifakkarna biex nosservaw l-ambjent naturali ta’ madwarna, u hekk nagħrfu s-sinjali u naraw, “lil Bin il-bniedem ġej fis-sħab b’qawwa kbira u bi glorja.” Xbihat apokalittiċi jistgħu ibeżżgħuna, iżda l-messaġġ ta’ Ġesù hu wieħed ta’ tama. Ġesù jistedinna nemmnu li Alla jkompli jaħdem għan-nom tal-umanità kollha, anke jekk dan, aħna ma nagħrfuħx. Hu jgħid lid-dixxipli li meta xejn ma jibqa’ jagħmel sens, meta l-gwerer u d-diżastri qishom jagħtu rebħa lill-ħażen u l-kaos, jiskopru lil Bin il-bniedem ġej fuq is-sħab. It-tagħlim ta’ Ġesù jisfidana biex nafdaw lil Alla b’dak li jiġri fil-futur. It-twemmin fit-Tieni Miġja (Parousia) jirrikjedi l-fidi. Meta ser tiġi, Mulej? Forsi din mhux mistoqsija li nagħmlu, iżda bħala nsara, għanda nikkunsidraw x’inhuma l-ħsibijiet tagħna dwar l-aħħar taż-żmien. It-tweġiba ta’ Ġesù, hija l-istess bħalma ta lid-dixxipli elfejn sena ilu. Fittxu s-sinjali tal-miġja tiegħu fil-kaos tal-ħajja. Afdaw fil-wegħda tiegħu ta’ salvazzjoni. Kunu ċerti, li għad jiġi, meta ikun wasal iż-żmien!
Santu Wistin jgħid, “iż-żmien huwa tliet uċuh tal-preżent: il-preżent kif nesperjenzawh aħna, il-passat bħala memorja tal-preżent u l-futur bħala aspettativa.” Meta nieħdu ħsieb u nużaw sew iż-żmien li għandna, nitgħallmu npoġġu ħajjitna għas-servizz ta’ Alla, infittxu li ngħixu fil-preżenza tiegħu, b’għarfien dejjem jikber li l-Mulej ser jerġa’ jiġi u jdaħħalna fis-Saltna ta’ dejjem.
Dwar
L-għan ta’ bekids.mt hu li joffri formazzjoni kateketika komprensiva għat-tfal u għall-adolexxenti li qegħdin jippreparaw biex jirċievu s-sagramenti.
