Il-Missierna

Kieku xi ħadd kellu jistaqsik x’inhu t-talb, xi twieġeb? Issibha diffiċli li titlob? 

Id-dixxipli li kienu jqattgħu ħafna ħin ma’ Ġesù, rawh jagħmel ħafna ħwejjeġ kbar u tal-għaġeb, rawh jagħmel il-mirakli, rawh jgħallem u jżomm lin-nies attenti jisimgħu kull kelma li jgħid u rawh ukoll jitlob. Minn dawn l-affarijiet kollha, huma staqsewh biex jgħallimhom jitolbu. Jista’ jkun li ndunaw li għal Ġesù t-talb kien importanti ħafna u li t-talb tah il-kuraġġ, ir-rieda u l-qawwa biex jagħmel dak li ntbagħat jagħmel? Jekk għal Ġesù, it-talb kien essenzjali, nistgħu aħna ngħaddu mingħajru?

It-talb huwa komunikazzjoni ma’ Alla. Jekk hu komunikazzjoni, hu azzjoni bejn tal-anqas tnejn. Għalhekk anke t-talb personali tagħna ma għandux isir monologu. Fit-talb, nitkellmu aħna u Alla jisma’, imma mbagħad irridu nisimgħu lil Alla aħna wkoll. Lil Alla rridu nagħtuh ċans ikellimna. Dan isir meta l-ħin ta’ talb tagħna jinkludi wkoll ħin ta’ skiet. Kif għandu jkun it-talb tagħna? Fl-Evanġelju tal-lum, Ġesù jagħtina l-ingredjenti neċessarji. L-ewwel jagħtina t-talba li lkoll tgħallimna meta konna tfal – il-Missierna. Jgħallimna fuq kollox li Alla huwa Missier – ħafna aqwa mill-aqwa missier tad-dinja. Min hu Alla għalik? Huwa l-bogħod minnek, tarah bħala mħallef u ġudikatur tal-azzjonijiet tiegħek? Jew inkella l-Missier kif jiddeskrivih Ġesù? Alla li jista’ kollox, Alla li nistgħu mmorru lejh u nsejħulu ‘Pa’. Alla li nsibuh kull ħin u kull post, Alla li dejjem jismagħna u jweġibna. Alla li jħobb, għalhekk it-tweġibiet tiegħu mhux dejjem ser ikunu kif nixtiequhom aħna. Bħalma aħna bħala ġenituri, fl-għerf tagħna ma nagħtux lit-tfal dak kollu li jistaqsu għalih, għal raġuni varji, hekk ukoll Alla mhux dejjem iwieġeb it-talb tagħna, skont dak li nitolbuh, u l-unika raġuni għalfejn jagħmel dan hi, għax Alla huwa mħabba. Fit-talba tal-Missierna, Ġesù jgħallimna li t-talb tagħna għandu jibda bit-tifħir lil Alla. Tkun xi tkun is-sitwazzjoni li qegħdin fiha, lil Alla għandna dejjem infaħħruh. Nitolbu biex ‘tiġi Saltnatek.’ Is-Saltna ta’ Alla hija l-post fejn hemm l-imħabba, ġustizzja, ġenerożità, ħbiberija, paċi. Vera li qegħdin nitolbu biex fostna tirrenja s-Saltna ta’ Alla, imma vera wkoll li rridu nkunu aħna li nagħmluha possibbli. Jekk inħarsu lejn l-imġieba tagħna, kemm aħna nies li nħobbu, li naħdmu għall-ġustizzja? Kemm aħna ġenerużi bil-ġid tagħna, bil-ħin u talenti tagħna? Aħna ħbieb ta’ vera? Aħna naħdmu għall-paċi fil-familja, mal-ħbieb, fuq il-post tax-xogħol? It-talba tkompli, billi npoġġu quddiemu l-bżonnijiet tagħna u tal-oħrajn. Nitolbuh wkoll għall-ħniena tiegħu u għall-maħfra tiegħu għall-għażliet ħżiena tagħna. Fit-talba tal-Missierna, Ġesù jurina wkoll l-bżonn tagħna li insiru nies aħjar – “għax aħna wkoll naħfru lil kull min hu ħati għalina.” 

It-talb tagħna għandu jkun persistenti. Jeħtieġ li nikbru fil-virtù tal-paċenzja. Ma naqtgħux qalbna, nibqgħu nduru lejn Alla fit-talb. It-talb għandu s-setgħa li jbiddel lilna. It-talb ikabbar it-tama tagħna f’Alla, ikabbar u jsaħħaħ ir-relazzjoni tagħna ma’ Alla. 

Meta nitolbu rrid ikollna l-fidi. Nemmnu li Alla qiegħed jismagħna u li hu jista’ kollox. Nemmnu fl-imħabba, tjieba, ħniena u providenza tiegħu. Irid ikollna wkoll sens ta’ umiltà. Huwa Alla li jista’ kollox, aħna ma aħna xejn mingħajru. Nersqu lejn it-talb b’umiltà u mhux b’arroganza.    

“Il-Missier mis-smewwiet jagħti spirtu qaddis lil dawk li jitolbuhulu!” Il-Missier jagħtina l-akbar rigal – l-Ispirtu s-Santu u d-doni tiegħu – jagħtina dak li għandna bżonn, f’waqtu u jkabbar fina dawk il-kwalitajiet sbieħ u essenzjali biex insiru persuni aħjar li nħobbu lil Alla fuq kollox u fuq kulħadd u lill-proxxmu tagħna, bħalma nħobbu lilna nfusna.