Alla tal-ħajjin

Alla hu Alla tal-“ħajjin”, mhux tal-“mejtin”. Mal-ewwel daqqa t’għajn, dak li jgħid Ġesù fis-silta ta’ din il-ġimgħa jista’ forsi jidher ovvju. Alla huwa dak li jagħtina l-ħajja – Huwa Alla li jqajjem mill-imwiet. Dan kollu veru, iżda meta Ġesù jgħid li Alla huwa Alla tal-ħajjin, Hu mhux qiegħed sempliċement jirreferi għall-ħajja bijoloġika. Alla jagħti forom taʼ “ħajja” differenti! Il mistoqsija hi: aħna kif nistgħu nesperjenzawhom kollha?

Sabiex nifhmu dan ftit iktar, ikun interessanti li nagħmlu referenza għal eżortazzjoni li għamel il-Papa reċentement –Christus Vivit (tradott “Kristu Jgħix!”). Fiha, l-Papa jindirizza “liż-żgħażagħ u l-Poplu ta’ Alla kollu”. Id-dokument jesplora xi jfisser li wieħed ikun żagħżugħ u, hawnhekk, il-Papa Franġisku jenfasizza li: “iż-żogħżija hija aktar minn sempliċiment perjodu ta’ żmien; hija stat tal-moħħ”. Waħda mill-kwalitajiet taż-żogħżija hija, preċiżament, li tkun “ħaj”, kif Kristu huwa ħaj! Imma xi jfisser verament “li wieħed ikun ħaj”?

“Kristu ħaj u jridek tkun ħaj!” – hekk jibda l-Papa Franġisku fl-eżortazzjoni. Huwa faċli li ninsew li Kristu huwa ħaj anke bħalissa. Tabilħaqq, xi drabi naraw lil Kristu bħala “mudell sabiħ mill-imgħoddi, bħala memorja, bħala xi ħadd li salvana elfejn sena ilu”. Dan huwa żball li l-Insara kollha huma suxxettibbli għalih. Il-fatt hu, Kristu huwa etern u jeżisti bħalissa ukoll – Hu ma jeżistix sempliċement fl-Ewkaristija, iżda potenzjalment (u idealment!) fina nfusna ukoll. Kristu mhux sempliċement “salvana” (passat) – Hu “jsalvana” (preżent). F’ċertu sens, Ġesù hu dak li jimlik bil-grazzja tiegħu, dak li jeħilsek, ifejqek, u jikkunslak – kollha azzjonijiet li jiġru fil-preżent. Il-verità hija, li ħadd minna mhu kompletament “ħaj”, ħadd minna mhu kompletament “żagħżugħ”. Ejja nieħdu mument, għalhekk, biex naraw kif Kristu jista’ jgħinna nibqgħu żgħar – kif nistgħu nkunu aktar “ħajjin”.

Waħda mill-affarijiet li tneħħielna l-ħajja huma sentimenti bħall-“mibegħda, biża’, dubju jew falliment”. Dawn l-emozzjonijietineħħulna l-abbilta’ tagħna li nafdaw lil Alla b’mod sħiħ u li nħobbu lill-oħrajn b’imħabba ħielsa u pura. Il-Papa Franġisku jgħidilna li kull meta nħossu dawn it-tip ta’ emozzjonijiet, “[Kristu] ikun qiegħed hemm biex jerġa’ jġedded is-saħħa u t-tama tagħna”. Sempliċement irridu nħalluh jaħdem fina! Irridu nagħmlu l-isforz biex inkunu lesti nesperjenzaw l-imħabba u l-ispirazzjoni tiegħu!

Barra minn hekk, hemm ukoll ir-realtà tad-dnub li ssaħħaħ l-egoiżmu tagħna u li tagħlaqna mill-grazzja u mill-preżenza ta’ Alla. Kull meta nidinbu, nxejħu ruħna u noqtlu lilna nfusna iktar. F’ħafna modi, id-dnub joqtolna. Jtappan il-viżjoni tagħna u jmewwet it-tama. Kristu hu dak li jeħlisna mill-ktajjen tad-dnub. Il-ħniena tiegħu tfejjaq, l-imħabba tiegħu tkattar. Għalhekk il-Papa jgħidilna: “żomm għajnejk imwaqqfa fuq id-dirgħajn ta’ Kristu msallab, ħalli lilek innifsek tiġi salvata għal darb’oħra. U meta tmur tistqarr dnubietek, emmen bis-sħiħ fil-ħniena tiegħu li teħilsek mill-ħtija tiegħek. Ikkontempla demmu mxerred b’imħabba daqshekk kbira, u ħalli lilek innifsek titnaddaf biha. B’dan il-mod, tista’ terġa’ titwieled dejjem mill-ġdid”. Il-qrar huwa t-triq lejn it=tiġdid spiritwali. 

Fl-aħħarnett, ħaġa oħra li xi drabi għandha t-tendenza ‘toqtolna’ hija l-kilba tagħna li nintrabtu ma ċertu affarijiet b’mod estrem. Għandna t-tendenza li nsiru wisq marbuta ma’ l-affarijiet fid-dinja – affarijiet bħall-flus, il-poter, il-pjaċir, il-karrieri, l-ambizzjonijiet, l-ambjent tagħna, eċċ. – dawn l-affarijiet kollha jistgħu joqtluna – meta nagħtuhom prijorita’ fuq Alla. Huma mhumiex is-sors tal-ħajja, għalhekk kull meta nippruvaw infittxu l-ħajja fihom bilfors li se nispiċċaw diżappuntati. Il-Papa Franġisku jgħidilna kif “fil-passjoni tal-Mulej naraw żagħżugħ li ried jimxi wara Ġesù, iżda bil-biża’ ħarab għarwien (ara 14,51-52); kien nieqes mill-qawwa biex jixxandar kollox fuq wara l-Mulej. Iżda fil-qabar vojt, naraw żagħżugħ ieħor, “libes tunika bajda” (16:5), li jgħid lin-nisa biex ma jibżgħux u jxandar il-ferħ tal-qawmien (ara 16:6-7)” . Sabiex inkunu ferħanin u nxandru l-ferħ irridu l-ewwel inħallu l-Ferħ jittrasformana. Dan huwa ħafna aktar faċli jingħad – iżda dan il-proċess ħafna drabi huwa mixja.

F’dan id-dawl, ejjew nieħdu mument biex nirriflettu fuq silta li l-Papa jikteb fi Christus Vivit:

Itlob lill-Ispirtu s-Santu kuljum biex jgħinek tesperjenza mill-ġdid il-messaġġ t’Alla. Għaliex le? M’għandek xejn x’titlef, u hu jista’ jbiddilek ħajtek, jimliha bid-dawl u jmexxiha fi triq aħjar. Ma jeħodlek xejn, imma minflok jgħinek issib dak kollu li għandek bżonn, u bl-aħjar mod possibbli. Għandek bżonn l-imħabba? Mhux se ssibha fid-dissipazzjoni, billi tuża nies oħra, jew billi tipprova tkun possessiv jew billi tiddomina. Issibha b’mod li se jagħmlek ġenwinament kuntent. Qed tfittex emozzjonijiet qawwija? Mhux se tesperjenzahom billi takkumula oġġetti materjali, tonfoq ħafna flus, tiġri b’mod iddisprat wara l-affarijiet ta ‘din id-dinja. Jiġu, u b’mod ferm aktar sabiħ u sinifikanti, jekk tħalli lilek innifsek titħeġġeġ mill-Ispirtu s-Santu.

Fl-aħħarnett, kelma dwar ir-raġuni għaliex Kristu jiċħad ir-realtà taż-żwieġ fil-ħajja ta’ li jmiss. Dan mhux għax iż-żwieġ mhuwiex fundamentali. Pjuttost, ir-raġuni hija għax is-Sadduċej kienu poplu li ma jemminx fl-ebda forma ta’ ħajja eterna jew qawmien mill-imwiet. Huma ħasbu li l-uniku mod biex l-umanità tibqa tezisti hija permezz tar-riproduzzjoni. Il-punt ta ‘Kristu huwa li Alla tagħna huwa Alla ta’ ħajja eterna – għalhekk, iż-żwieġ mhuwiex meħtieġ biex ir-razza umana ma tispiċċax. Is-sors tal-umanità eterna huwa Alla! Is-Sadduċej kienu qed jippruvaw iqarrqu b’Ġesù, imma Ġesù wieġeb b’mod prudenti u loġiku. Il-mistoqsija hi: aħna stess kif inwieġbu lil dawk li jiddubitaw it-twemmin tagħna u jpenġuh bħala illoġiku jew xjentifikament assurd?