San Franġisk de Sales

24 ta' Jannar

San Franġisk de Sales twieled f’familja nobbli mir-Renju ta’ Savoia, qrib Ġinevra fl-Isvizzera, fil-21 ta’ Awwissu tal-1567.   Missieru kien François de Sales de Boisy. Ommu Françoise de Sionnaz kienet bint maġistrat prominenti. Omm Franġisk kienet tħobb taqralu l-ħajjiet tal-qaddisin li jġibu ismu: San Franġisk ta’ Assisi u San Franġisk de Paule u t-tfajjel, imħeġġeġ mill-eżempju tagħhom darba qalilha: ‘Ma’, ġa hemm żewġ San Franġiskijiet, bija jridu jkunu tlieta’.

Franġisk rċieva l-edukazzjoni tiegħu fil-Kulleġġi ta’ La Roche u Annecy, u wara fil-Kulleġġ tal-Ġiżwiti f’Pariġi u fl-aħħar intbagħat Padova fejn kiseb dottorat fil-Liġi Ċivili u Kanonika.  Missieru kien diġà ppjana l-futur ta’ Franġisk, peress li hu kien l-ewwel iben tiegħu. Hu xtaqu jsir maġistrat jew senator u jiżżewweġ lil xi tfajla sinjura u nobbli.

Meta kellu madwar dsatax-il sena u kien għadu għaddej bil-mixja akkademika tiegħu, għadda minn kriżi spiritwali tant qawwija li affettwatlu saħħtu. Meta ħareġ minn dak il-‘mina mudlama’ konvint li ‘Alla hu mħabba’, ikkonsagra lilu nnifsu lill-Madonna u ddedika ħajtu lil Alla. Huwa ddeċieda li jsir saċerdot.

Missieru oppona bil-qawwa kollha d-deċiżjoni tiegħu.  Hu aċċetta s-sitwazzjoni biss meta lil Franġisk ġiet imwiegħda l-kariga ta’ Provost (Kap) tal-Katidral ta’ Ġinevra. Din il-pożizzjoni kienet titqies bħala l-ogħla kariga fid-djoċesi u kienet taqa’ taħt l-awtorità diretta tal-Papa.

Franġisk ġie ordnat saċerdot fl-età ta’ 26 sena, wara li kien ċeda t-titlu u d-dritt tiegħu bħala suċċessur tal-familja, lil ħuh. Sena wara, offra ruħu biex imur f’Le Chablais, li kien sar fortizza tal-Kalvinisti. Dan kien grupp ta’ Insara li, wara li segwew lil Ġwanni Kalvinu — ir-riformatur Franċiż — kienu nfirdu mill-Protestanti, li min-naħa tagħhom kienu kkontestaw ċerti twemmin u prattiki tal-Knisja Kattolika.

Għall-ewwel, in-nies ta’ Chablais ma kellhomx il-kuraġġ imorru jisimgħuh jipprietka; għalhekk, Franġisk beda jikteb fuljetti li kienu jispjegaw it-twemmin Kattoliku. Huwa qassam dawn il-fuljetti fost l-abitanti, u ħalliehom mal-bibien tad-djar u f’postijiet pubbliċi oħra, anke wara li kien ġie mhedded u attakkat! B’riżultat ta’ dan, għadd kbir ta’ abitanti reġgħu lura lejn il-Fidi Kattolika.

Fl-età ta’ 31 sena, Franġisk ġie maħtur assistent tal-Isqof ta’ Ġinevra u tlett snin wara ġie maħtur bħala l-Isqof tad-djoċesi.  Minħabba l-fatt li Ġinevra kienet taħt il-kontrol tal-Kalvinisti ma setax jgħix f’din il-belt, għalhekk mar jgħix f’residenza barra minn Ġinevra. 

Bħala Isqof, minbarra l-amministrazzjoni tad-djoċesi tiegħu, huwa kompla bil-ħidma pastorali; saħansitra kien jgħallem il-katekiżmu lit-tfal u fassal lingwa tas-sinjali biex jikkomunika mal-persuni neqsin mis-smigħ. Huwa kompla bil-predikazzjoni u l-kitba tiegħu, indirizzati l-aktar lil-lajċi, fejn kien ixandar li, tkun xi tkun il-pożizzjoni li wieħed jokkupa fil-ħajja, kulħadd jista’ jsir qaddis.

Qatt ma stenna trattament speċjali għax kien isqof. Kien idur id-djoċesi tiegħu riekeb iż-żiemel. Kien jersaq lejn in-nies foqra u umli tad-djoċesi bl-istess dedikazzjoni u attenzjoni li kien juri mal-Papiet, mal-Prinċpijiet u mas-Slaten.

Flimkien ma’ qaddisa oħra, Ġiovanna Franġiska ta’ Chantal, hu waqqaf is-Sorjiet tal-Viżitazzjoni, ordni religjuża għan-nisa li ddedikaw ħajjithom għal opri tal-ħniena favur il-morda u l-foqra.

Maż-żmien, l-isforzi bla heda tiegħu biex iwassal l-Evangelju ħallew impatt negattiv fuq saħħtu. Huwa sofra puplesija qawwija li minħabba fiha ma setax jitkellem.  Meta kien fuq is-sodda tal-mewt u staqsewh jekk kellux xi kliem ta’ għerf, huwa talab karta u pinna u kiteb “Umiltà, umiltà, umiltà”.

San Franġisk De Sales miet fl-età ta’ 56 sena.  

Minħabba d-determinazzjoni tiegħu li jippersisti fit-“tixrid” tal-veritajiet tal-Fidi Kattolika, jibqa’ mfakkar bħala l-qaddis Patrun tal-Gurnalisti.

L-aħħar kelma ta’ għerf ta’ San Franġisk de Sales kienet “Umiltà”.

Fis-soċjetà tal-lum, din il-virtù ma tantx tinstema’ b’mod pożittiv, għax titqies bħala sinjal ta’ dgħufija li twassal biex il-persuna jkollha nuqqas ta’ stima fiha nfisha u li żżommok lura.

Bħala ġenituri, nistinkaw biex inrawmu f’uliedna x-xewqa biex ikollhom suċċess u jkunu kunfidenti fihom infushom.  Iżda jekk ma ngħinuhomx jiksbu l-virtù tal-umiltà biex isibu bilanċ bejn il-fiduċja u l-kunfidenza żejda, huma jikbru jemmnu li għandhom dejjem ikunu fiċ-ċentru tat-attenzjoni; li fil-ħajja għandhom dejjem igawdu minn marki tajbin, jirbħu, jiksbu dak li jixtiequ u jgħixu ħajja faċli! Huma ma jkunux ippreparati biex jiffaċċjaw diżappunti jew fallimenti.

Ejjew nikkunsidraw r-reazzjoni tagħna meta wliedna jiġu għandna b’ilmenti li jħossuhom injorati – kemm jekk mill-għalliem fil-klassi, jew għax ma ntgħażlux fi tim, jew inkella għax ħadd ma rrikonoxxa xi għemil tajjeb tagħhom. Filwaqt li nisimgħuhom b’empatija u ninkoraġġuhom biex jilħqu l-potenzjal tagħhom permezz tal-imħabba u kliem pożittiv, ejja niggwidawhom ukoll biex jagħrfu d-dgħufijiet u n-nuqqasijiet tagħhom ħalli jkomplu jitjiebu, mingħajr ma nqabbluhom ma’ ħaddieħor.

Ħeġġeġ lit-tfal biex jippreparaw kartolini li jagħmlu huma stess b’messaġġi ta:

  • Grazzi
  • Jiddispjaċini
  • Nittama li tħossok aħjar

(Idejat minn Pinterest) Jistgħu jħallu dawn il-kartolini f’post fejn persuna tista’ ssibhom bħala sorpriża.

Ħin tat-Talb mal-Familja

  • Ħeġġu lit-tfal biex jgħidu talb ta’ radd il-ħajr lil Alla għall-kwalitajiet tajbin jew kisbiet li jesperjenzaw,
  • Biex jitolbu l-għajnuna ħalli jitjiebu f’dak li fih iħossu li qed jonqsu.

Bl-għajnuna tal-Bibbja għat-tfal, għinhom jifhmu kif Ġesù huwa eżempju ta’ umiltà: l-Iben ta’ Alla li sar wieħed minna.

Għidu flimkien it-tielet Misteru tal-Ferħ.

Kif tuża dan l-ispazju

Alla jkellimna b'ħafna modi, inkluż permezz tal-qaddisin tal-Knisja. Hawnhekk tista' ssib tagħrif u attivitajiet li jistgħu jgħallmuk dwar x'inhi l-qdusija u li jħeġġuk tgħix ħajja dejjem aktar qaddisa.