L-Evanġelju tal-lum huwa dwar l-għażliet. Kuħadd, kuljum, ikollu jagħmel numru ta’ għażliet. Ġieli jkunu għażliet tajba, oħrajn le. Kull għażla ġġorr magħha konsegwenza. L-għażliet li nagħmlu ma humiex kollha tal-istess importanza. Hemm dawk li malajr naslu li niddeċieduhom, iżda għażliet oħrajn ikunu jridu aktar ħsieb. Hemm għażliet li nagħmluhom mingħajr ma nkunu nfluenzati minn ħadd, oħrajn fejn dawk ta’ madwarna jew is-sitwazzjoni li nkunu fiha, ixxaqlibna lejn l-għażla li nispiċċaw nagħmlu. Mhux l-għażliet tajba kollha jġibu magħhom sodisfazzjoni. Ġieli sibtu li wara li għamiltu għażla tajba, tliftu xi ħbieb, jew ċans ta’ promozzjoni, jew telf ta’ flus per eżempju? Minkejja t-tbatija marbuta ma’ din l-għażla li kienet tajba, il-kuxjenza tkun fil-paċi. Jiġri l-oppost meta l-għażla tkun ħażina. Għalkemm jista’ jkun li niksbu dak li xtaqna, il-kuxjenza tagħna tniggiżna u ma nkunux fil-paċi. Alla huwa mħabba. Huwa jrid li ngħixu fil-paċi u b’ferħ ġo qalbna. Alla jaf li fil-ħajja tagħna se jkun hemm numru ta’ drabi meta nagħmlu dawn l-għażliet ħżiena. Hu għalhekk, meta jara li ddispjċina, jerġa jagħtina ċans ieħor permezz tas-sagrament tal-qrar.
Il-parabbola tal-lum toffri sfida. Turina li dak li nagħmlu huwa ferm aktar importanti minn dak li ngħidu li se nagħmlu. L-indiema hija importanti. Li nindem ifisser li ninbidel għall-aħjar. Ġesù faħħar lil dak li l-ewwel ma obdiex u ma riedx jgħin lil missieru, iżda mbagħad bidel fhemtu u mar. Il-kliem waħdu ma huwiex biżżejjed. Ġesù kien ċar ħafna meta qal: “Mhux kull min jgħidli, ‘Mulej, Mulej’, jidħol fis-Saltna tas-Smewwiet, iżda min jagħmel ir-rieda ta’ Missieri li hu fis-smewwiet!” (Mt 7, 21) Li nemmen f’Alla ma huwiex kollox. Irrid ngħix ħajja li tirrifletti dan it-twemmin. Li ngħid li nħobb lil Alla, mhuwiex biżżejjed. Jeħtieġ nuri dan fil-mod kif ngħix. Dan għandu jsir ukoll fil-familja tagħna u ma ħbiebna. Nista’ ngħid lit-tfal “Inħobbok” minn filgħodu sa filgħaxija għaliex dan ma jkun ifisser xejn jekk l-azzjonijiet tiegħi ma jirriflettux din l-imħabba.
L-Evanġelju tal-lum se jagħtina parabbola oħra dwar missier li kellu żewġt itfal u kellu bżonnhom biex imorru jgħinuh fl-għalqa tad-dwieli.
- Importanti li nżommu l-kelma li nkunu tajna
- Li tindem tfisser li tinbidel u ssir aħjar
- Ġesù jrid li nħobbu lil Alla u lil xulxin
Tistgħu tiftakru meta kienet l-aħħar darba li xi ħadd staqsiek tagħmel xi ħaġa? (it-tfal jingħataw iċ-ċans jaħsbu u jsemmu din l-okkażjoni)
X’għamilt? Mort u għamiltha dak il-ħin stess? Għamiltha aktar tard? Jew m’għamilthiex?
Kif ħassejtek wara?
Kif taħseb li ħassitha dik il-persuna li staqsietek għall-għajnuna?
Fl-istorja li qalilna Ġesù llum, kien hemm raġel u kellu żewġ ulied.
Xi staqsa lill-ewwel tifel? (imur jgħinu fl-għalqa tad-dwieli)
X’qallu dan it-tifel? (qallu li ma riedx imur, iżda mbagħad bidel fehmtu u mar)
X’qallu t-tieni tifel? (qallu li se jmur, u ma mar xejn!)
Għalfejn taħsbu li t-tieni tifel ma marx l-għalqa?
X’taħsbu li jrid jgħidilna Ġesù b’din il-parabbola tal-lum? (dak li nagħmlu huwa mportanti; mhux biżżejjed li nuru li qegħdin nobdu bil-kliem. L-azzjonijiet tagħna juru jekk verament aħniex nobdu jew le).
Dak il-papa huwa bħal Alla u aħna bħal dawk l-aħwa. Ġesù qiegħed jgħidilna li meta Alla jurina dak li jixtieqna nagħmlu, għandna nagħmluh. Mhux biżżejjed li ngħidu li se nagħmluh, irridu nagħmluh ta’ vera. Dak it-tifel li l-ewwel qal li ma riedx imur jgħin lill-missieru, iżda mbagħad mar, nidem. Jiġifieri, bidel dak li qal li se jagħmel u għażel li jagħmel xi ħaġa aħjar.
Meta intom tħobbu lil xi ħadd, x’tagħmlu?
Semmu xi nies li tħobbu.
Kif turuhom li tħobbuhom?
Mela meta nħobbu lil xi ħadd, nagħmlu affarijiet biex nuruhom li nħobbuhom. Lil Alla, kif nuruh li nħobbuh?
Niftakru li għalkemm mhux dejjem nagħmlu għażliet li juru li nħobbu lil Alla, dejjem nistgħu ninbidlu. Alla dejjem jibqa’ jħobbna. Alla dejjem jagħtina ċans biex ninbidlu u nsiru aħjar.
Intom tafuhom il-kmandamenti?
X’inhuma?
Dawn m’humiex regoli li tana Alla biex jarana qalbna sewda u nkunu qisna ma nistgħu nagħmlu xejn. Dawn huma gwida għalina, biex meta nimxu fuqhom, nindunaw li aħna nkunu ferħana. Mhux dejjem se jirnexxielna nobdu dawn il-kmandamenti. Lanqas ma hu dejjem faċli li nobduhom. Ma jimpurtax. Alla jaf li mhux se jirnexxielna nobdu kull darba. Madanakollu hu jixtieq li bħal dak it-tifel li l-ewwel qal li ma jridx imur jgħin lil missieru, imbagħad mar, meta aħna nindunaw li għamilna għażla ħażina, jiddispjaċina u d-darba ta’ wara nippruvaw li ma nerġgħux nagħmlu l-istess żball.
Tajjeb li nkunu nafu l-kmandamenti, iżda aktar importanti li nkunu nafu xi jfissru, biex inkunu nafu kif nobduhom. L-attività tal-lum se tgħina nagħmlu dan.
Aqtgħu max-xifer tal-kaxxa. Importanti li naqtgħu sew biex il-qies ma jinbidilx. Araw dan il-clip biex jgħinkom titwu din il-karta. Biex tibdew titwu żommu n-naħa fejn hemm il-kliem, wiċċha l-isfel. Jiġifieri, meta tagħmel l-ewwel tiwja tkun qed tara karta vojta. Meta titlesta araw min jaf l-aktar dwar il-kmandamenti.
Inroddu s-salib.
Ġesù, inti dejjem iżomm il-promises li tagħmel magħna. Aħna nixtiequ li nkunu bħalek u nżommu kellmitna wkoll. Għina biex nindunaw malajr bl-iżbalji li nagħmlu u nirranġawhom kemm jista’ jkun malajr.
Nisimgħu, I will obey.
Fir-rakkont tal-Evanġelju tal-lum, Ġesù jindirizza lil grupp ta' nies partikolari. Dawn huma:
Fir-rakkont, Ġesù jsemmi żewġ ulied li kienu msejħin minn missierhom biex jaħdmu fl-għalqa tiegħu tad-dwieli. Lil min minnhom ifaħħar il-Mulej?
Ġesù jgħid li ċerti kategoriji tal-poplu, li xi wħud jarawhom f'dawl ikrah, jafu jkunu aktar ubbidjenti lejn Alla minn ħaddieħor u għalhekk jirtu l-premju tal-ġenna qabel ħaddieħor. Min huma dawn?
Kien hemm min emmen lil xi ħadd li ġie qabel il-Mulej biex iħejjilu t-triq, iżda skont Ġesù, mhux kulħadd kien lest li jilqa' lil dan il-'mibgħut'. Min kien dak il-profeta li Ġesù jsemmi?
Dwar
L-għan ta’ bekids.mt hu li joffri formazzjoni kateketika komprensiva għat-tfal u għall-adolexxenti li qegħdin jippreparaw biex jirċievu s-sagramenti.
