Patri Piju

Is-Sagrament tar-Rikonċiljazzjoni hu magħruf ukoll bħala s-Sagramet tal-Qrar. Huwa rit ta’ fejqan li fih persuna tistqarr dnubietha ma’ saċerdot u tirċievi l-maħfra u l-assoluzzjoni mingħand Alla.

Dan il-proċess jinkludi elementi ta’; li wieħed jagħraf in-nuqqasijiet u l-fallimenti tiegħu; li jesprimi sogħba; li jitlob u jirċievi d-don tal-maħfra u li jgawdi l-ferħ tar-rikonċiljazzjoni.

It-tfal jeħtieġ li jagħrfu dawn l-elementi fil-ħajja ta’ kuljum tagħhom, mhux biss biex japprezzaw aktar dak li jseħħ fis-Sagrament tar-Rikonċiljazzjoni, iżda wkoll biex ikollhom il-pedamenti meħtieġa biex isiru adulti maturi, mingħajr ma jiżviluppaw it-tendenza li jakkumulaw rabja u sentimenti negattivi:

• Li tammetti l-iżbalji hija sfida għaż-żgħażagħ. Huma għandhom it-tendenza li jitfgħu t-tort fuq ħaddieħor, u joqogħdu lura milli jerfgħu r-responsabbiltà għall-azzjonijiet tagħhom
• F’mument ta’ kalma, wieħed jista’ jgħinhom jagħrfu n-nuqqasijiet tagħhom. Jeħtieġ li jirrealizzaw li, meta jegħlbuhom, isiru nies aħjar.
• Membru tal-familja jista’ jsemmi sitwazzjonijiet li setgħu kienu diffiċli għalih biex jaċċettahom, pereżempju: Jien għażżien? Ngħid il-gideb? Inwaħħal f’ħaddieħor għal affarijiet li nagħmel jien? Nieħu xi ħaġa li mhijiex tiegħi? Ngħid kliem mhux edukat jew affarijiet ħżiena li jweġġgħu lill-oħrajn? Nobdi r-regoli tad-dar? eċċ.
• It-ton tal-vuċi għandu jkun baxx u kalm, u mhux qawwi jew akkużatorju.

Li taħfer u li titlob maħfra dejjem se jibqgħu sfidi għan-nisrani.

• Sib opportunità biex tisma’ lit-tfal jesprimu l-ħsibijiet tagħhom dwar xi jfisser li taħfer, kif tħossok meta tagħmel dan, u x’inhu faċli jew diffiċli f’dan ir-rigward.
• Ħeġġiġhom isibu eżempji ta’ kif jaħfru jew jitolbu maħfra. Dan ivarja skont l-età tagħhom.
• Dan jista’ jsir permezz ta’ dak li t-terapisti tal-familja jsejħulu “laqgħa tal-familja għall-maħfra” — jekk jista’ jkun darba fil-ġimgħa, jew għallinqas meta tinħoloq il-ħtieġa. Dan joffri opportunità biex wieħed jirrikonċilja mal-membri tal-familja preżenti dakinhar stess, u biex jiġu proposti ideat dwar kif wieħed jista’ jirrikonċilja ma’ oħrajn.

Nistgħu nwasslu lit-tfal biex jifhmu l-ħbiberija tagħna ma’ Alla:

Isma’ l-ideat tagħhom dwar xi jfisser li jkollok ħabib u li tkun ħabib.

• Ġesù hu l-ħabib tagħna; Hu dejjem magħna u dejjem lest jismagħna meta nkellmuh dwar kull ħaġa. Hu qatt mhu se jweġġagħna. Iżda xi drabi aħna nweġġgħu l-ħbiberija tagħna ma’ Ġesù.
• Meta nweġġgħu lill-oħrajn, jew meta nirrifjutaw li nitolbu maħfra jew li naħfru, il-ħbiberija tagħna ma’ Ġesù ma tibqax sħiħa.
• Jeħtieġ li nitolbuh il-maħfra wkoll: l-ewwel personalment u mbagħad fis-Sagrament tar-Rikonċiljazzjoni, fejn is-saċerdot jirrappreżenta lil Ġesù.

Mill-Bibbja tat-Tfal, ikkunsidra li tirrakkonta l-parabbola tal-Iben il-Ħali, billi toħroġ l-elementi tal-imħabba tal-missier, tad-dispjaċir, tal-maħfra u tar-rikonċiljazzjoni.

Ħin tat-Talb mal-Familja:  Itolbu flimkien: “Aħfrilna dnubietna bħalma naħfru lil min hu ħati għalina”. It-tfal jistgħu jiġu mħeġġa jgħidu “Talba ta’ Skuża” sempliċi tagħhom stess. Toqgħodx taħsibha darbtejn biex tgħid tiegħek.