Santa Eliżabetta u San Żakkarija

5 ta' Novembru

Il-Qaddisin Eliżabetta u Żakkarija kienu koppja anzjana li kienu jgħożżu l-liġi.  Kienu nies twajba, jħobbu lil Alla u jgħixu ħajja ezemplari. Fil-fatt Żakkarija kien qassis fit-tempju tal-Lhud. Għall-koppji Lhud, kien importanti li jkollhom wild, hekk kif il-Lhud kienu jitolbu lil Alla waqt li kienu jistennew it-twelid tal-Messija.

Eliżabetta u Żakkarija kienu ttamaw li jsiru ġenituri, imma ż-żmien kien għaddej ġmielu u Eliżabetta kienet qed tikber għalhekk iċ-ċans li jkollha t-tfal beda jsir aktar impossibbli. Huma baqgħu fidili lejn il-fidi tagħhom avolja setgħu jħossuhom disappuntati. Setgħu ukoll ħassewhom umiljati għax fil-kultura Lhudija li wieħed ma jkollux tfal kien ifisser li ma jkunx imbierek minn Alla.

Imma Alla kellu pjan għal din il-koppja!

Eventwalment, huma kellhom wild. L-Anġlu Gabrijel ħabbar lil Żakkarija, meta kien imiss lilu joffri sagrifiċċju fit-tempju, li Eliżabetta kienet se twelled tifel. Dak it-tifel kellu jkun Ġwanni l-Battista, li kien inħatar biex iħejji lill-poplu għall-miġja tal-Messija.

Żakkarija kellu jifraħ b’din l-aħbar kieku emmen f’dak li qallu l-anġlu. Minflok hu ddubita. Hu tbikkem. Din kienet prova għalih, biex jirrifletti u jisma’ l-messaġġ ta’ Alla għalih.  U meta reġa’ beda jitkellem, kien biex iwettaq ir-rieda ta’ Alla għalih, għal martu u għal binhom.

Minbarra li tara l-vidjow, tista’ ssib dan ir-rakkont mill-Evanġelju ta’ Luqa (Kap 1, versi 57-66).

Staqsi:

– Jistgħu l-anzjani jkollhom it-tfal?

Alla biss jista’ jagħmel dan possibbli. Hu jagħmel possibbli dak kollu li hu impossibbli. Alla jista’ jsolvi l-problemi tagħna b’diversi modi. Alla mhux dejjem jagħtina dak li nitolbuh, fil-mument li nitolbuh. Hu jista’ jibdel is-sitwazzjoni jew jista’ jgħinna ninbidlu aħna, sabiex inkunu nistgħu naċċettaw is-sitwazzjoni. Staqsi lit-tfal biex jirrakkontaw xi wħud mill-affarijiet speċjali li jħossu li Alla għamel għalihom.

Ħeġġiġhom jesprimu bil-kliem sitwazzjoni li jqisuha diffiċli jew saħansitra impossibbli. Tkellmu dwarha. Ara x’jistgħu jagħmlu dwarha. Erġgħu lura għaliha waqt il-ħin tat-talb. Ħalli lit-tfal:

  • jesprimu t-talba tagħhom u jemmnu li Alla qed jismagħhom.
  • għinhom jagħtu kelma li ser jagħmlu ħilithom u jibqgħu jagħmlu sforz, jaħdmu aktar iebes u jitolbu aktar.
  • jitolbu lil Alla għall-paċenzja biex jgħixu b’din is-sitwazzjoni sakemm jasal “il-mument opportun ta’ Alla.” Inħallu kollox f’idejn Alla.

Alla bagħat lill-Anġlu Tiegħu biex iwassal messaġġ speċjali lil Żakkarija. Staqsi:

  • Alla bagħat anġli lil nies oħra b’messaġġi speċjali? (Ħallihom isemmu okkażjonijiet speċjali meta dan ġara.)
  • Alla jibgħat anġlu biex iwasslilna l-messaġġi Tiegħu fil-ħajja tagħna ta’ kuljum?
  • Għinhom jirrealizzaw li l-messaġġi pożittivi kollha li jaslulna mill-Bibbja — spjegati minn saċerdoti, għalliema u katekisti — kif ukoll dawk li jiġu mingħand il-ġenituri, in-nanniet, il-gwardjani jew ħbieb tajbin, huma okkażjonijiet biex aħna nikkooperaw u niskopru x’irid Alla minna.

Ħin tat-talb mal-familja:

Ejjew infaħħru lil Alla għall-mumenti sbieħ lil jkollna.

Nitolbu l-għajnuna mingħand Alla f’sitwazzjonijiet diffiċli u biex naċċettaw dak kollu li jiġrilna.

Ngħidu, “Sliema għalik…..”

Mat-tfal il-kbar tista’ tgħid it-tieni posta tal-Ferħ u nagħtu kas kif il-kliem ta’ Eliżabetta jidħol fis-Sliema.

Inkantaw “He’s got the whole world in His hands.”



Santa Eliżabetta u San Żakkarija huma l-ġenituri ta’ San Ġwann il-Battista. Huma talbu ħafna lil Alla biex ikollhom trabija, u Alla tahom dan ir-rigal sabiħ minkejja li kienu kbar ħafna fl-età. Fil-fatt, Żakkarija ma riedx jemmen li se jkollhom tarbija, u minħabba f’hekk, ma setax jitkellem saċ-ċirkonċiżjoni ta’ Ġwanni.

Bħal Eliżabetta u Żakkarija, hemm bżonn nitgħallmu npoġġu t-tama tagħna f’Alla bit-talb. Hemm bżonn ukoll ngħinu lil xulxin f’dan! Għalhekk, għall-attività ta’ din il-ġimgħa agħżel persuna li vera tafda (bħal membru tal-familja, per eżempju), u staqsi lil din il-persuna biex toqgħod eżatt warajk. Agħlaq għajnejk u ntelaq lura fuq din il-persuna.

Afdajt f’din il-persuna? Intlaqt mill-ewwel? X’ħassejt? Kienet faċli tintelaq?

Xi drabi hi diffiċli ħafna biex nifhmu x’jiġifieri tafda, l-aktar meta nitkellmu dwar Alla għax qatt ma rajnieh. Imma ejjew nemmnu u nafdaw f’Alla x-xewqat u l-bżonnijiet tagħna u tal-familja tagħna fil-mumenti ta’ talb flimkien.

Colouring pageDownload

Kif tuża dan l-ispazju

Alla jkellimna b'ħafna modi, inkluż permezz tal-qaddisin tal-Knisja. Hawnhekk tista' ssib tagħrif u attivitajiet li jistgħu jgħallmuk dwar x'inhi l-qdusija u li jħeġġuk tgħix ħajja dejjem aktar qaddisa.