
Il-kelma ‘Bakhita’ tfisser fortunata fil-lingwaġġ ta’ din il-qaddisa.
Ġużeppina twieldet fir-reġjun ta’ Darfur fis-Sudan, l-Afrika. Kienet is-sena 1869, meta l-iskjavitù kien għaddej bla rażan. Kellha madwar seba’ u tmien snin, meta negozjanti Għarab tal-iskjavi ħatfuha waqt li kienet qed taħdem fl-għelieqi mal-familja tagħha. Ġiet sfurzata timxi ħafja sas-suq tal-isjkavi f’El Obeid, fejn inxtrat u nbiegħet madwar darbtejn matul dak il-vjaġġ.
Ġużeppina baqgħet tinbiegħ u tinxtara bħala skjava u b’hekk qattgħet iż-żgħożija tagħha fl-iskjavitù, tgħaddi minn sid għal ieħor. Fil-fatt kienet saħansitra nsiet isimha, u meta kienu jistaqsuha x’jisimha kienet twieġeb ‘Bakhita’, isem li kien ġie mgħoti lilha minn dawk li ħatfuha, forsi minħabba l-fatt li kienet ittorturata, msawta u mmarkata bil-ħadid jaħraq. Darba minnhom ġiet feruta f’diversi postijiet ta’ ġisimha li għamlulha l-melħ fuq il-feriti tagħha!
Matul dak iż-żmien kollu, Bakhita ma kinitx nisranija, iżda kienet dejjem tħares lejn is-sbuħija tan-natura b’ammirazzjoni kbira, u tistaqsi lilha nnifisha: “Min hu s-Sid ta’ din is-sbuħija kollha”.
Fl-aħħar inxtrat minn Callisto Legnani, il-Viċi Konslu f’Khartoum, il-belt kapitali tas-Sudan. Wara sentejn, ħadha miegħu l-Italja u taha bħala rigal lill-ħabib tiegħu Awgustu Michiele. Dan qabbadha tieħu ħsieb it-tifla tiegħu. Meta l-famija kellha bżonn tirritorna s-Sudan biex tieħu ħsieb xi affarijiet familjari, Bakhita talbet biex tibqa’ l-Italja. Is-sinjura tagħha ħallietha f’idejn is-sorijiet Kanossjani f’Venezja. Kien proprju dak iz-zmien li qattgħet mas-sorijiet li skopriet is-sejħa tagħha biex timxi wara Kristu billi tħaddan il-fidi Nisranija.
Meta s-sinjura ta’ Bakhita, rritornat mis-Sudan, insistiet li hi terġa’ lura d-dar tagħha biex tkompli taqdiha. Iżda Bakhita ma riditx titlaq minn mas-sorijiet. Is-superjura tal-kunvent iddeċidiet biex tidħol għad-drittijiet ċivili ta’ Bakhita quddiem l-awtoritajiet ċivili minħabba l-fatt li l-iskjavitù ma kienx legali fl-Italja u kien spiċċa fis-Sudan anke qabel ma kienet ġiet maħtufa Bakhita! Meta l-qorti ddeċidiet li Bakhita kienet mara ħielsa, hija għażlet li tibqa’ mas-Sorijiet Kanossjani.
Aktar ’il quddiem, ingħaqdet magħhom u ntbagħtet f’kunvent fi Schio, fil-provinċja ta’ Viċenza, l-Italja. Għal tnejn u erbgħin sena ħadmet bħala purtinara u fil-kċina. Kienet ukoll tiġi mqabbda titkellem mas-sorijiet li kienu se jmorru l-Afrika bħala missjunarji. Waqt dawn il-laqgħat, kienet titkellem dwar l-esperjenzi tagħha, il-ħtif u l-iskjavitù li għaddiet minnu.
Hija mhux biss ħafret lil dawk li ħatfuha imma wkoll rringrazzjathom għax kienet tqis lilha nnfisha fortunata għax kieku ma kienx ser ikollha l-esperjenza li tiltaqa’ ma’ Ġesù Kristu.
Hija mietet fit-8 ta’ Frar 1947.
