San Sebastjan

20 ta' Jannar

L-istorja ta’ San Sebastjan teħodna lura għal madwar 300 mitt sena wara l-mewt ta’ Ġesù.

Hu twieled Franza f’familja Nisranija u missieru kien nobbli. Meta kien żagħżugħ mar jgħix Milan u mbagħad Ruma fejn daħal fl-armata Rumana. Hu sar Gwardjan Pretorjan fejn serva bħala gwardjan personali tal-Imperatur.

Dak iż-żmien, l-Imperatur Ruman kien Dijoklezjanu. Dan l-Imperatur kien jobgħod lill-Insara u ordna l-mewt ta’ dawk li rrifjutaw li jqimu l-idoli Rumani u baqgħu jistqarru l-fidi tagħhom f’Ġesù Kristu.  Sebastjan żamm sigriet il-fatt li kien Nisrani sabiex ikun jista’ jkompli jippriedka dwar Ġesù Kristu. Hu wassal biex ħafna nies — inklużi suldati u uffiċjali tal-armata Rumana — iħaddnu l-fidi Nisranija.

Eventwalment, l-Imperatur skopra li Sebastjan kien Nisrani. Huwa kkundannah għall-mewt. Għalhekk ordna li jkun marbut ma’ arblu jew siġra u maqtul bil-vleġeġ. Iżda baqa’ ħaj u ordna li jiġi msawwat sal-mewt.

San Bastjan huwa l-Qaddis Patrun tal-vittmi tal-epidemiji speċjalment il-pesta.

Dan ġej mill-assoċjazzjoni simbolika bejn il-vleġeġ u l-feriti li jikkawżaw, u l-feriti fuq il-ġilda li kienet tikkawża l-pesta. Dak iż-żmien, peress li l-għarfien mediku kien limitat, l-ibliet u l-irħula kienu jirrikorru għand xi qaddis biex jitolbu l-interċessjoni u l-protezzjoni tiegħu.

Wara li taraw dan il-filmat qasir mat-tfal, isma’ l-opinjonijiet tagħhom dwar għalfejn jammiraw lil San Sebastjan u pprova oħroġ il-kwalitajiet li kellu. Il-kuraġġ, il-qlubija, u l-fidi soda li kellu.

Iddiskuti mat-tfal jekk humiex konxji tal-fatt li, anke llum il-ġurnata, f’xi pajjiżi tad-dinja huwa kontra l-liġi li tkun Nisrani. F’dawn il-pajjiżi, dawk li jemmnu f’Ġesù jiġu arrestati u xi drabi saħansitra msawta sempliċiment għax iħobbu lil Ġesù.  Agħti biss informazzjoni ġenerali (mingħajr ma tidħol f’dettalji) dwar esperjenzi tal-ħajja diffiċli u ta’ tbatija li jistgħu jinqalgħu minħabba l-istqarrija tal-Fidi.

Għinhom japprezzaw il-libertà li jipprattikaw il-fidi tagħhom, meta nistgħu mmorru l-knisja kull meta rridu u ħadd ma jżommna. Din it-tip ta’ diskussjoni għandha tiżviluppa mhux biss skont l-età tat-tfal, iżda wkoll skont is-sensittività tagħhom għat-tbatija.

Matul ħajjitna, jista’ jkun li ma niltaqgħux ma’ persekuzzjoni ħarxa. Madankollu, se jkun hemm mumenti meta nistgħu niġu mwaqqgħin għaċ-ċajt, injorati jew imżebilħin għax niddefendu dak li nemmnu fih. Dan kollu jwassalna biex inkunu sodi fil-fidi tagħna, anke meta n-natura dgħajfa tagħna tkun trid ‘taħrab fid-direzzjoni l-oħra’.

Wieħed jista’ jirreferi għall-istejjer tal-missjunarji u l-isfidi li jiltaqgħu magħhom meta jippridkaw l-Evanġelju lil nies ta’ kulturi u twemmin differenti.

Li ssegwi lil Ġesù b’kuraġġ u determinazzjoni fil-ħajja ta’ tifel jew tifla jinvolvi passi żgħar li jistgħu jikbru fid-daqs hekk kif huma jimmaturaw fil-fidi tagħhom. Ibda billi tissuġġerixxi xi wħud minn dawn il-passi:

  • Nitolbu qabel l-ikel, kull fejn inkunu
  • Nieħdu ħsieb jew nagħtu kas ta’ xi ħadd li jkun waħdu fi grupp ta’ ħbieb.
  • Ngħidu l-verità meta nagħmlu xi ħaġa ħażina – nammettu l-iżbaljana.
  • Nibqgħu nkunu twajba ma’ ħutna jew mal-ħbieb anke meta nħossu li gejna mweġġgħin, imwaqqgħin għaċ-ċajt jew diżappuntati.

Ħin tat-Talb mal-Familja:

  • Nitolbu għal dawk li qed ibatu minħabba l-fidi tagħhom
  • Dawk li weġġgħuna b’xi mod
  • Nitolbu maħfra jekk weġġgħajna lil ħaddieħor.

Fittxu l-kanzunetta “Strong and Courageous” u kantawha flimkien!

San Sebasjtan twieled f’familja nobbli fi Franza. Hu serva fl-Armata Imperjali Rumana u kien ukoll Gwardjan Pretorjan. San Bastjan kien iżur il-priġunieri u kkonverta ħafna suldati. Għalkemm kien il-favorit tal-imperatur, huwa bata ħafna għax ma riedx jiċħad il-fidi tiegħu, u miet martri.

San Sebasjtan hu l-qaddis Patrun tal-pandemiji u mard serju.

Il-cupcakes ta’ San Sebastjan 

Għall-attività tal-lum ser insajru Red Velvet cupcakes! Ara dan il-video għall-ingredjenti u l-metodu. 

Sabiex niftakru fil-martirju ta’ San Sebasjtan, ġib ftit toothpicks u fuq naħa waħda uża biċċiet ta’ karti, pinġihom u weħħilom fil-forma ta’ vleġġa. Daħħal it-toothpick fil-wiċċ tal-cupcake, sabiex jippreżentaw il-vleġġeġ ta’ San Sebastjan. Ara r-ritratt t’hawn isfel biex tieħu idea kif ser jiġu.

http://4.bp.blogspot.com/-H_ClohDGrY4/VL3h4qWTd_I/AAAAAAAAJbQ/oMYvfT2XeV8/s1600/ss.jpg

Wara għid l-istorja ta’ San Sebasjtan lill-familja u lill-ħbieb u tinsiex tispjegalhom it-tifsira tal-vleġġeġ. 

Tinsiex tibagħtilna ritratt tal-cupcakes! 🙂 

TpenġijaNiżżel

Kif tuża dan l-ispazju

Alla jkellimna b'ħafna modi, inkluż permezz tal-qaddisin tal-Knisja. Hawnhekk tista' ssib tagħrif u attivitajiet li jistgħu jgħallmuk dwar x'inhi l-qdusija u li jħeġġuk tgħix ħajja dejjem aktar qaddisa.