San Sebastjan

Tajjeb li wara li turi lit-tfal il-film qasir,  tipprova toħroġ minn għandhom il-kwalitajiet li jammiraw fih:

Il-Kuraġġ, il-Fidi soda, li qatt ma qata qalbu, li baqa’ jgħallem anke wara l-ewwel attentat fuq ħajtu.

Tajjeb niskopru mat-tfal jekk jafux li anke llum f’ħafna pajjiżi madwar id-dinja għad hawn nies li ma jistgħux juru li huma nsara għax jispiċċaw fil-ħabs u jiġu wkoll imsawta ħafna sempliċiment għax juru li jemmnu fi Kristu. Għin lit-tfal jifhmu l-ġmiel tal-liberta li jistgħu juru li jemmnu f’Alla mingħajr biża ta’ xi kastig.

Fil-ħajja tagħna nistgħu ma niltaqgħux ma persekuzzjoni kbira għax nemmnu fi Kristu imma jista’ jkollna persekuzzjoni żgħira bħal meta nsibu min jidħaq bina għax nippruvaw ngħixu tajjeb .

Għalhekk tajjeb li nitgħallmu nkunu ta’ fidi soda anke meta n-natura tagħna tibża’ jew tistħi.

Meta aħna tfal tajjeb li niffurmaw ruħna f’fidi soda ħalli nidraw li ĦADD u XEJN ma jbeżżagħna milli nibqgħu sodi meta nkunu challenged speċjalment fiż-żgħożija 

Għalhekk tajjeb li nibdew nipprattikaw li nuru li aħna nemmnu b’affarijiet li nagħmlu fil-pubbliku meta nkunu żgħar:

• nitolbu qabel nieklu inkunu fejn inkunu,
• ngħidu l-verita’ meta nagħmlu xi ħaga ħażina,
• nibqgħu nuru mħabba u nibqgħu infittxu ħbieb li jkunu ġġieldu magħna, waqqgħuna għaċ-ċajt jew kisruna

Waqt it-talb tajjeb li nitolbu għal dawk li qed ibagħtu minħabba l-fidi tagħhom, għal dawk li weġgħuna b’xi mod, u tajjeb nitolbu maħfra l’Alla jekk aħna weġġajna lil ħaddieħor. Tajjeb li matul din il-pandemija nitolbu lil San Bastjan biex jidħol għal dawk li mardu, għal min qed jieħu ħsiebhom, għal dawk li mietu.