San Franġisku u Santa Ġjaċinta

20 ta' Frar

Aħna lkoll imsejħin biex insiru qaddisin. Il-Qaddisin Franġisku u Ġjaċinta Marto rnexxielhom jilħqu l-qdusija bil-ħajja sempliċi tagħhom meta kellhom biss ħdax u għaxar snin rispettivament.

Dawn huma l-iżgħar aħwa qaddisin li ma mietux martri, imma saru qaddisin għax kienu fidili għas-sejħa tal-qdusija, minkejja li kienu għadhom tfal.

Huma kienu tfal komuni u skola ma kinux jafu. Il-ġranet tagħhom kienu jqattgħuhom jirgħu n-nagħaġ fl-għelieqi u jilagħbu flimkien.  Franġisku kien idoqq il-flawt, Ġjaċinta tkanta u tiżfen u magħhom kien ikun hemm il-kuġina tagħhom Luċija li kienet ftit akbar minnhom. Kienu jitolbu wkoll.

Fl-1916, l-Anġlu tal-Paċi dehrilhom u tahom messaġġ minn Alla. L-Anġlu staqsiehom jekk ridux  jogħġbu lil Alla billi joffru talb u sagrifiċċji sabiex dawk li ma jħobbux lil Alla jiddispjaċihom li għamlu d-dnub u jerġgħu jsiru ħbieb tiegħu. Dawn aċċettaw il-messaġġ tal-Anġlu u żammew l-wegħda li kienu għamlu.

Fit-13 ta’ Mejju 1917, waqt li t-tfal kienu qed jirgħu n-nagħaġ bħas-soltu dehritilhom il-Madonna imdawra b’dawl sabiħ.  L-apparizzjonijiet komplew iseħħu fit-13 ta’ kull xahar sat-13 ta’ Ottubru 1917.

Il-messaġġ tal-Madonna kien li jitolbu r-Rużarju u joffru talb u sagrifiċċji għall-paċi u l-konverżjoni tal-midinbin.

Francisco miet fl-1919 u Ġjacinta fl-1920, meta mardu bl-influwenza Spanjola, virus li kien infirex fl-Ewropa dak iż-żmien.

Huma ġew iddikjarati qaddisin mhux minħabba l-Apparizzjonijiet tal-Madonna, iżda għaliex, minkejja li kienu għadhom żgħar ħafna, għexu ħajjithom qasira b’mod erojku minkejja l-oppożizzjoni, it-theddid u l-persekuzzjoni, tant li saħansitra spiċċaw il-ħabs.

Il-kuġina tagħhom Luċija, daħlet soru Karmelitana u għexet sakemm kellha 97 sena. L-isqof tal-post kien talabha tikteb l-esperjenzi tagħhom. Dak li nafu fuq dawn il-Qaddisin żgħar mhux minn dak li qalu n-nies imma minn dokumenti ta’ waħda li għaddiet minn dawn l-esperjenzi. 

Ikun tajjeb li flimkien mat-tfal taraw il-film dwar il-miraklu li kien sar Fatima. Il-link hi din: The Miracle of Our Lady of Fatima”. 

Il-virtujiet ta’ Franġisku u Ġjaċinta kienu ġejjin mill-isforzi kontinwi tagħhom biex joffru sagrifiċċji ħalli l-midinbin jerġgħu jibdew iħobbu lil Alla.

Iddiskuti mat-tfal x’ifsser “sagrifiċċju”.

  • Isma’ l-opinjonijiet tagħhom.
  • Imbagħad spjegalhom li ‘sagrifiċċju’ jfisser ‘li ċċedi xi ħaga’ u din il-ħaġa tkun waħda tajba.
  • Spjegalhom kif plejers tal-futbol, atleti, żeffiena tal-ballet u mudelli jkollhom iċedu ħafna mill-ħin liberu tagħhom biex jipprattikaw, isegwu dieta u jitħarrġu kontinwament biex jirnexxu. (Jista’ jkun li huma stess ikollhom eżempji tagħhom).  
  • Semmi wkoll il-missjunarji li jħallu warajhom il-familja u pajjiżhom biex ixerrdu l-fidi.
  • Issuġġerilhom li, matul il-ġimgħat tar-Randan, jistgħu jaħsbu fuq dak li jistgħu jċedu bħala parti mit-tħejjija għall-Għid.

L-isforzi ta’ dawn it-tfal għoġbu ħafna lill-Mulej u kienu l-ewwel passi tagħhom biex isaħħu l-virtù tar-rażan, kwalità prezzjuza fil-formazzjoni tal-karattru.

Il-Madonna ta’ Fatima talbet  ħafna drabi biex nitolbu r-Rużarju. Meta tkun irrakkontajt l-istorja ta’ Fatima tista’ tibda tintroduċi r-Rużarju lit-tfal u turihom fuq il-kuruna kif jingħad.  

Ħin tat-Talb mat-Familja:  Tista’ tħejji post ta’ talb bi stampa jew statwa tal-Madonna. Poġġi ftit fjuri. Spjega li l-Madonna hi Ommna fis-sema li tħobbna ħafna u li tridna mmorru l-Ġenna.  Spjega li r-Rużarju hija t-talba li tfakkarna fil-ħajja ta’ Ġesù u Marija. Ibda billi tgħallimhom it-talb tal-Missierna, is-Sliema Għalik Marija u l-Glorja.

Tkun ħaġa sabiha wkoll li jitkanta l-Innu ta’ Fatima.

Attività

Ejjew tfal, nimxu wara l-passi ta’ San Franġisku u Santa Gjaċinta Marto sabiex kuljum ngħidu r-Riżuraju mal-familja tagħna. Nieħdu l-opportunità sabiex inħeġġu lil sħabna biex flimkiene magħna jattendu l-lezzonjiet tal-museum u l-quddies. Żur is-site bekids.mt sabiex ssir taf aktar dwar Ġesù.


Kif tuża dan l-ispazju

Alla jkellimna b'ħafna modi, inkluż permezz tal-qaddisin tal-Knisja. Hawnhekk tista' ssib tagħrif u attivitajiet li jistgħu jgħallmuk dwar x'inhi l-qdusija u li jħeġġuk tgħix ħajja dejjem aktar qaddisa.