Illum huwa l-ħames Ħadd tar-Randan. Il-ġimgħa d-dieħla niċċelebraw Ħadd il-Palm u l-bidu tal-Ġimgħa Mqaddsa. Mixjin flimkien ma’ Ġesù, lejn il-passjoni tiegħu.
Il-qari tal-llum huwa mit-12-il kapitlu ta’ San Ġwann, u hija ġrajja li seħħ wara li Ġesù kien midluk f’Betanja u d-daħla trijonfali tiegħu f’Ġerusalemm. Ġesù jgħallem lid-dixxipli dwar il-mod kif Alla għad jiglorifikah. Il-vuċi mis-sema tikkonferma dak li jgħid. Ġesù jbassar it-tbatija, mewt u qawmien tiegħu u jħejji lill-appostli biex jemmnu fis-salvazzjoni li kienet ser iġġib il-mewt tiegħu.
Fil-mixja tagħna lejn l-Għid, is-salib isir aktar sinjifikanti. Illum Ġesù qiegħed ikellimna dwar il-mewt tiegħu fuq is-salib. Għalih hija glorifikazzjoni, għalina aktar ta’ dilemma. Strument ta’ tortura u eżekuzzjoni, isir strument ta’ ħajja.
Xi jfisser is-salib għalik? Matul ir-Randan nimmeditaw aktar ‘it-Triq tas-Salib’. Il-mixja tagħna mal-Mulej xi drabi tinvolvi tbatija u anke skumdità. Din is-sena forsi xi ftit aktar minħabba r-restrizzjonijiet li qegħda ġġib magħha din il-pandemija. Iżda fl-istess ħin, ‘l-esperjenzi tagħna tas-salib’ jistgħu jgħinu biex nikbru spiritwalment. Il-mewt ta’ Ġesù fuq is-salib ħolqot relazzjoni ġdida bejnietna. L-għotja tiegħu nnifsu u s-sagrifiċċju tiegħu, juri kemm Alla jħobbna. L-ubbidjenza ta’ Ġesù, turina li l-glorja tas-salib tfisser li tmut għalik innifsek. Ġesù juża l-metafora tal-ħabba tal-qamħ, biex ifisser kif il-mewt tiegħu ser tkun ta’ benefiċċju. Dan ix-xebh mal-ħabba tal-qamħ, ikellem lilna wkoll. Bħala nsara, aħna msejħa biex nikkonvertu. Sakemm ma mmutux għalina nfusna u insiru anqas egoisti, ser nibqgħu waħedna mingħajr ir-rigal ta’ ħajja eterna. Matul ir-Randan, aħna msejħa għall-indiema. Għandna ċans nerġgħu nduru lejn Alla u ‘nagħmlu ħafna frott.’ Hija l-mixja ta’ Kristu lejn il-mewt u r-riżurezzjoni li tiġbidna lejh. Qisna, aħna b’xi mod, il-frott ta’ dik il-mixja, u ġo fina hemm iż-żerriegħa tiegħu.
Il-vuċi mis-sema tikkonferma dak li qal Ġesù, kważi kważi tweġiba għat-talba tiegħu. Bħal dak inhar tal-magħmudija ta’ Ġesù u fit-trasfigurazzjoni, il-vuċi ta’ Alla tapprova is-sagrifiċċju li Ġesù jagħmel għan-nom tagħna.
Permezz tas-sagrifiċċu ta’ Ġesù, Alla qiegħed joffri l-imħabba tiegħu, u aħna msejħa nwieġbu għal din l-imħabba. Bħala nsara, aħna nimxu wara Ġesù lejn is-salib, biex jurina t-triq għal għand il-Missier. B’dan il-mod, is-salib huwa stedina universali biex nimxu wara Ġesù u sinjal universali tal-imħabba ta’ Alla.
Nitolbu li aħna wkoll nistgħu nirriflettu l-imħabba ta’ Alla, anke jekk l-imħabba tiegħu twassal għas-salib. Il-mewt u l-qawmien ta’ Ġesù wasslu għas-salvazzjoni tad-dinja kollha.
Illum ser nisimgħu lil Ġesù jitkellem dwaru nnifsu, dwar dak li kien ser jiġrilu u dwar ir-raġuni għalfejn hu sar bniedem. In-nies li kienu ma’ Ġesù ma kienux fehmu għalfejn Ġesù ġie fid-dinja. Huma kienu ħasbu li Ġesù kien ser iwaqqaf saltna bħalma jwaqqfu s-slaten l-oħra fuq din l-art. Madanakollu, s-saltna ta’ Ġesù, mhix bħal dawn is-saltniet l-oħra u ssib il-milja tagħha fil-ġenna. Huwa ġie fid-dinja biex imut għad-dnubiet tagħna, biex b’hekk aħna nkunu nistgħu ningħaqdu miegħu fil-ġenna.
- Ġesù miet fuq is-salib għax ried hu, biex b’hekk iħallas għal dnubietna
- Ma hemm xejn aktar qawwija mill-imħabba ta’ Ġesù
- Kalamita b’saħħitha
- 3 jew 4 oġġetti tal-metall, bħal paper clips, safety pins, staples, għatu ta’ vażett
L-Evanġelju jispiċċa bil-kliem ta’ Ġesù, li jgħid lin-nies “meta nintrefa’ ’l fuq mill-art, jiena niġbed il-bnedmin kollha lejja.”
X’taħsbu li Ġesù jrid jgħid b’dawn il-kliem?
Ġesù kien qiegħed jgħallem lin-nies u jgħidilhom kif kien se jmut. Kien jaf li l-ġurnata meta jsallbuh u li jmur lura l-Ġenna kienet fil-qrib. Lil dawk ta’ miegħu qalilhom, “qiegħed inħoss ruħi mħawwda. X’naqbad ngħid? Missier, eħlisni minn din is-siegħa? Imma jien għalhekk ġejt: għal din is-siegħa. Meta nintrefa’ ’l fuq mill-art, jiena niġbed il-bnedmin kollha lejja.”
Ejjew naraw x’tista’ tagħmel din il-kalamita. Jekk iżżommha qrib tal-oġġetti tal-ħadid, x’jiġri? Ipprova u ara x’ser jiġri. L-oġġetti tal-ħadid jinġibdu lejn il-kalamita li għandha forza li ma tidhirx. Din il-forza li ma narawhiex qegħda tiġbed l-affarijiet tal-metall lejha.
Din il-forza b’saħħitha, ma hi xejn ħdejn is-saħħa li għandu Ġesù biex jiġbidna lejh. Hu tant iħobbna li miet fuq is-salib biex iħallas għad-dnubiet tagħna. Meta naraw kemm iħobbna, ninġibdu lejh, nersqu qrib tiegħu u bħal tfal ta’ Alla, nafdaw fih.
Meta aħna nagħmlu xi ħaġa li lilu ma togħġbux, inkunu qegħdin nersqu il-bogħod minn Ġesù. Taħsbu li Ġesù, ma jibqax iħobbna meta nagħmlu hekk? Le. L-imħabba tiegħu hija tant b’saħħitha li jerġa jiġbidna lejh speċjalment permezz tas-sagrament tal-qrar. Ara hawn.
Biex nenfassizaw l-imħabba ta’ Ġesù għalina, nisimgħu, “Yes Jesus Loves Me.”
Fl-Evanġelju tal-lum, Ġesù jgħidilna li jekk “il-ħabba tal-qamħ ma taqax fl-art u tmut, hi tibqa’ weħidha; imma jekk tmut, tagħmel ħafna frott.” Ġesù juża x-xbieha tal-ħabba tal-qamħ biex jitkellem dwar dak li kien ser jiġrilu. Ġesù qiegħed jerġa jitkellem dwar il-mewt u l-qawmien tiegħu, u wkoll dwar l-imħabba tiegħu li qisha żerriegħa ġo qalbna.
- Ġesù aċċetta li jmut għalina fuq is-salib biex jirbaħ id-dnub u biex bil-qawmien tiegħu mill-mewt, in-nies jemmnu li hu vera l-Iben ta’ Alla
- L-imħabba ta’ Ġesù hija b’saħħitha u meta jkollna l-imħabba ta’ Ġesù ġo fina, irridu nsostnuha biex tikber
- Żerriegħa
- Ħamrija
- Qasrija żgħira jew tazza tal-yogurt
Ħafna mit-tagħlim ta’ Ġesù jitkellem dwar in-natura. Tiftakruha l-parabbola tal-bidwi li ħareġ jiżra’ u l-parabbola taż-żerriegħa tal-mustarda? Illum, Ġesù jgħidilna li l-ħajja, titwieled minn mewt, juża l-eżempju taż-żerriegħa li tinżera’ fil-ħamrija, biex jispjega dak li jrid jgħid.
Intom qatt żrajtu xi ħaġa? Jew forsi rajtu lil xi ħadd jiżra’ l-ġulbiena. Dawn iż-żerriegħa żgħar huma iebsa u niexfa u jidhru bla ħajja. Meta niżirgħuhom f’ħamrija niedja u ngħattuhom u nħalluhom fil-kundizzjonijiet tajba, wara ftit ġranet narawhom inibtu mill-ħamrija. Wara ftit isiru pjanti!
Ġesù jgħid lill-ħbieb tiegħu li hu kellu jkun bħal żerriegħa. Kien jaf li kellu jmut fuq is-salib, li jidfnuh, imma wara tlett ijiem iqum mill-mewt. Hu kien imnikket, imma kien jaf li kellu jagħmel dan. Hu qal lill-appostli li “jekk il-ħabba tal-qamħ ma taqax fl-art u tmut, hi tibqa’ weħidha; imma jekk tmut, tagħmel ħafna frott.” Ġesù ra l-mewt tiegħu bħall-proċess taż-żerriegħa li dehret mejta, iżda tikber, issir pjanta u tagħmel aktar żerriegħa. Bħal pjanta aħna msejħa li nikbru u nagħmlu l-frott … mhux tuffiegħ u larinġ, imma ż-żerriegħa tal-imħabba ta’ Alla f’qalbna, irridu nitimgħuha u b’hekk nagħmlu affarijiet tajbin. Għandha bżonn kundizzjonijiet tajba biex tikber. Għandna nistaqsu lil Ġesù biex jgħinna nikbru fl-imħabba tagħna lejh u lejn it-tagħlim tiegħu.
Bl-imġiba tagħna nistgħu nuru lil ħaddieħor kif l-imħabba ta’ Ġesù tista’ tikber. Anke jekk nagħmlu xi ħaġa żgħira lil xi ħadd, tista’ tikber f’xi ħaġa kbira.
X’tista’ tagħmel matul din il-ġimgħa li tagħmel differenza lil xi ħadd li għandu bżonn l-għajnuna? Pereżempju, tista’ ċċempel lil xi ħadd li qiegħed waħdu u titkellem miegħu, jew tibgħatlu xi tpinġija li għamilt jew xi kartolina biex turi li qiegħed taħseb fih.
Issa iżra’ ż-żerriegħa li ppreparajt u agħtihom l-ilma, sadanittant tista’ tisma’ din is-song.
Wara poġġihom fit-tieqa … u dalwaqt tarahom jikbru!
1. Fl-Evanġelju tal-lum, naqraw li xi Griegi marru jfittxu lil wieħed mill-appostli biex jistaqsu għal Ġesù. Min kien dan l-appostlu?
2. Meta l-Griegi marru għand Filippu, huwa mar ifittex lil wieħed minn sħabu l-appostli biex jgħidlu dak li kien ġara. Lil min kellem Filippu?
3. Waqt li kien qed ikellem lill-appostli, minkejja li ħass il-mument iebes tal-passjoni riesaq lejh, Ġesù talab u qal...
4. Ġesù ħabbar ukoll li f'dak il-mument kien se jitkeċċa xi ħadd. Għal min kien qed jgħid?
Dwar
L-għan ta’ bekids.mt hu li joffri formazzjoni kateketika komprensiva għat-tfal u għall-adolexxenti li qegħdin jippreparaw biex jirċievu s-sagramenti.
