Santa Klara t’Assisi

Għal Klara, il-faqar kien il-passaġġ li mxiet fuqu fis-sejħa tagħha. Wara li tkunu rajtu l-vidjow flimkien mat-tfal staqsuhom:

• Xi tfisser tkun fqir? (X’aktarx it-tfal se jgħidu, “Ma jkollokx la flus, la x’tiekol, la x’tilbes u lanqas fejn toqgħod”) 
• Tista’ jkollok kollox u fl-istess ħin tkun fqir?

Dan huwa kunċett pjuttost tqil biex it-tfal jifhmu s-sinifikat tiegħu. Però, fil-ħajja materjalista tal-lum, huwa importanti li nibdew inxettlu fit-tfal il-valur li filwaqt li nibqgħu naħdmu biex intejbu s-sitwazzjoni tagħna, aħna nkunu kuntenti b’dak li għandna:

• Ħu okkażjonijiet biex it-tfal jitgħallmu jgħożżu u jibżgħu għal dak li jkollhom
• Ibda rawwem fihom il-valur li ma narmux affarijiet jekk għadhom tajbin
• It-tfal minn ċkunithom għandhom il-bżonn li jitgħallmu ma jkunux kapriċċużi, jitgħallmu d-differenza bejn bżonn u kapriċċ u jitbegħdu mill-kilba li ‘dejjem iridu iżjed’

Dan jgħodd ukoll għall-ikel meta t-tfal jistennew li jkollhom ‘borma’ għalihom, sandli/żarbun ġdid meta l-ieħor għadu tajjeb, ħwejjeġ bilfors tad-ditta, eċċ.

Għalkemm il-familja ta’ Klara kienu kontra tagħha biex timxi wara s-sejħa tagħha, hi żammet soda mas-sejħa għall-ħajja li Ġesù xtaq minnha. Anke lilna Ġesù jkellimna biex jurina xi jrid minna. Kif?

• Asal biex it-tfal jifhmu li kull ħsieb pożittiv, sabiħ, ikun messaġġ li Ġesù jwasslilna f’moħħna u f’qalbna
• Ġesù fl-Ewkaristija kien il-qofol tal-ħajja qaddisa ta’ Klara, u għalhekk nagħmlu mezz biex it-tfal ikollhom iżjed għarfien reali ta’ dan il-Misteru ta’ Mħabba
• Nibdew id-drawwa li kif nidħlu fil-knisja, qabel ma mmorru nfittxu fejn se noqogħdu, nieqfu quddiem Ġesù Sagramentat u nsellmulu b’mod sempliċi bħala ħabib, u nagħmlu l-istess qabel nitilqu mill-knisja
• Jekk it-tfal huma żgħar, agħtihom frażi inti (per eżempju, “Bonġu Ġesù, ġejt ħdejk illum” u “Sejra/Sejjer, Ġesù, se nieħdok miegħi d-dar”)
• Jekk it-tfal huma kbar, ħalli f’idejhom

Xi ħsibijiet għall-familja flimkien:

• Kun int li tagħti “credit” lit-tifel/tifla meta jkun sar xi att li kien/kienet kuntent/a b’li kellu/a
• Tista’ minflok tikteb messaġġ u tħallih fejn issibu jew waħħlu mal-“fridge” fejn jarah kulħadd
• Fit-talb niftakru f’dawk li huma neqsin minn tant affarjiet li aħna nieħdu “for granted”