Santa Klara t’Assisi

Għal Klara, il-faqar kien il-passaġġ li mxiet fuqu fis-sejħa tagħha. Wara li tkunu rajtu l-vidjo flimkien mat-tfal staqsuhom:

• Xi tfisser tkun fqir? (It-tfal x’aktarx iwieġbu: “li ma jkollokx flus, ikel, ħwejjeġ jew post fejn toqgħod” eċċ.) 
• Tista’ jkollok kollox u fl-istess ħin tkun fqir?

Dan huwa kunċett diffiċli ħafna biex jifhmuh it-tfal żgħar. Però, fil-ħajja materjalista tal-lum, huwa importanti li nibdew inrawwmu fit-tfal, il-valur li jkunu kuntenti b’dak li għandhom, filwaqt li xorta ninkoraġġuhom biex itejbu s-sitwazzjoni attwali tagħhom kull meta jkun possibli.

• Ħu l-opportunità biex tgħallem lit-tfal jgħożżu u jieħdu ħsieb dak li għandhom.
• Ibda rawwem fihom il-valur li ma narmux affarijiet jekk għadhom tajbin.
• Minn età żgħira ħafna t-tfal iridu jitgħallmu kif ma jkunux kapriċċużi, jitgħallmu d-differenza bejn bżonn u lussu, u jitbiegħdu mid-drawwa li ‘dejjem iridu aktar’.

Għalkemm il-familja ta’ Klara ma appoġġjathiex biex issegwi s-sejħa tagħha, hija baqgħet fidila lejn l-istil ta’ ħajja li Ġesù riedha ssegwi. Anke lilna Ġesù jkellimna biex jurina xi jrid minna. Kif?

• Għin lit-tfal jifhmu li kull ħsieb pożittiv u sabiħ, huwa messaġġ li Ġesù jibgħat lil qlubna u lil moħħna.
• Ġesù fl-Ewkaristija kien il-qofol tal-ħajja qaddisa ta’ Klara, u għalhekk għandna niżguraw li t-tfal ikollhom għarfien aħjar ta’ dan il-Misteru tal-Imħabba.

Nibdew id-drawwa, li kif nidħlu l-Knisja, qabel ma nsibu post fejn noqgħodu bilqiegħda, nieqfu ftit quddiem Ġesù Sagrament u nsellmulu b’mod sempliċi bħala ħabib, u nagħmlu l-istess qabel noħorġu mill-Knisja. Jekk it-tfal għadhom żgħar, jgħidu frażi bħal (“Bonġu Ġesù, ġejt ħdejk illum” u “sejra/sejjer, Ġesù, se nieħdok miegħi d-dar”). Jekk it-tfal huma kbar, ħalli f’idejhom.

Xi ħsibijiet għall-familja flimkien:

• Kun int li tfaħħar lit-tifel/tifla meta jġib/ġġib ruħu/ruħha b’mod responsabbli b’dak li għamel/għamlet anke jekk dan jinvolvi li tikteb messaġġ u twaħħlu mal-friġġ biex jaraħ kulħadd.

Nitolbu għal dawk in-nies li huma neqsin minn tant affarijiet essenzjali li aħna nieħdu ‘for granted.