L-Evanġelju tal-lum skont San Mark, jirrakkonta l-Aħħar Ċena, għalkemm fil-fatt, parti kbira minnu hija aktar dwar it-tħejjija tal-ikla u mhux dwar l-ikla nnifisha. Dan mhux qiegħed hemm mingħajr ħsieb. L-Aħħar Ikla, għalina l-insara illum, tissarraf fl-Ewkaristija. Illum Ġesù qiegħed jurina l-importanza tat-tħejjija tagħna għal dan il-mument kbir, għal dan ir-rigal li hu joffrielna ta’ kuljum.
Il-festa tal-Ġisem u d-Demm Imqaddes ta’ Ġesù, jew Corpus Christi, mhix hemm biex iżżid purċissjoni oħra, jew biex tagħti ċans lit-tfal li għamlu l-Ewwel Tqarbina, jerġgħu jilbsu l-ilbiesi tagħhom u jduru mat-toroq tal-parroċċa. L-għan ta’ din il-festa, hija biex iddaħħalna f’qoxritna u nistaqsu b’sinċerità xi tfisser l-Ewkaristija għalina. Ġesù jgħid: “Dan hu ġismi…dan hu Demmi”. Il-verb ‘hu’ qiegħed hemm biex juri li l-ħobż u l-inbid inbidlu u saru l-Ġisem u d-Demm ta’ Ġesù. Ma użax ‘bħal’ jew ‘qisu’ imma ‘hu’. Il-konsagrazzjoni ma tfissirx li l-ħobż u l-inbid isiru simboli tal-Ġisem u Demm ta’ Ġesù, iżda l-bidla ssir b’mod reali. Ma nistgħux nifhmu kif dan iseħħ. Dan huwa miraklu, mirakli huma misteru. Kif għidna l-ġimgħa l-oħra, misteru mhux sigriet li Alla ma jridx li nifhmuh, iżda huwa dak li bil-limitazzjoni ta’ moħħna mhux possibbli li nifhmuh. Lanqas ma jfisser li naċċettah u daqshekk. Meta nasal li nemmen b’qalbi kollha li dik l-ostja li qed nirċievi hija vera Ġesù, allura l-attitudni u mġieba tiegħi ma tistax tibqa’ l-istess.
Diffiċli li temmen dak li ma tarax. Dawn huma xi għajnuniet biex jgħinnuna nikbru fit-twemmin tagħna li Ġesù huwa preżenti b’mod reali fl-Ewkaristija.
- Żur lil Ġesù Sagramentat u għaddi ħin miegħu
- Staqsih għall-għajnuna. Agħmel it-talba tiegħek, bħal ta’ dak il-missier li kellu lil ibnu maħkum mix-xitan: “Jiena nemmen! Għinni fil-fidi nieqsa tiegħi.” (Mark 9, 24)
- Uri qima lejn Ġesù Sagramentat, baxxi rasek jew agħmel reverenza kull darba li tgħaddi minn quddiem it-Tabernaklu
- Agħti l-attenzjoni kollha tiegħek waqt il-konsagrazzjoni
- Il-ħin wara t-tqarbin huwa prezjuż, użah biex titkellem u tiftaħ qalbek ma’ Ġesù, jekk tista’ tawwal dan il-ħin, ibqa’ għal ftit aktar ħin ma’ Ġesù, wara li tispiċċa l-quddiesa
- Ħejji ruħek sew għat-tqarbin. Jekk hemm bżonn mur qerr, żomm is-sawma ta’ siegħa qabel it-tqarbin
- Ipprova żid quddiesa matul il-ġimgħa, mhux nhar ta’ Ħadd biss
- Aqra l-qari qabel ma tmur għall-quddiesa
- Aqra dwar mirakli ewkaristiċi li seħħew, ara dan is-sit.
- Ewkaristija tfisser ringrazzjament, qabel ma torqod, ara ta xhiex għandek tirringrazzja lill-Mulej illum.
Dawn huma għajnuniet biex idaħħluna aktar fil-misteru tal-Ewkaristija. Jekk il-quddiesa u t-tqarbin huma biss rutina jew obbligu, mhux ser iħallu ġid fina. L-attitudni tagħna ta’ reverenza u tħejjija, ser tbiddel ftit ftit din l-indifferenza u tgħinna nagħrfu r-rigal kbir u l-għajnuna li nistgħu niksbu mill-Ewkaristija.
Qari mill-Evanġelju skont San Mark (Mk 14, 12-16,22-26)
Fl-ewwel jum tal-Ażżmi, meta kienu jissagrifikaw il-ħaruf tal-Għid, id-dixxipli tiegħu qalu lil Ġesù: “Fejn tridna mmorru nħejju biex tiekol l-ikla tal-Għid?”.
Imbagħad hu bagħat tnejn mid-dixxipli tiegħu u qalilhom: “Morru l-belt, u tiltaqgħu ma’ raġel iġorr ġarra ilma. Morru warajh, u għidu lil sid id-dar ta’ fejn tarawh dieħel: ‘Qallek l-Imgħallem: Fejn hi l-kamra tiegħi li fiha nista’ niekol l-ikla tal-Għid mad-dixxipli tiegħi?’. U hu jurikom kamra kbira fuq, imgħammra u lesta. Ħejjulna hemmhekk”.
U d-dixxipli marru u daħlu fil-belt, u sabu kollox kif kien qalilhom hu; u ħejjew l-ikla tal-Għid.
Huma u jieklu, ħa l-ħobż f’idejh, qal il-barka, qasmu, newwilhulhom u qal: “Ħudu, dan hu ġismi”. Imbagħad ħa kalċi f’idejh, radd il-ħajr, u newwilhulhom, u lkoll xorbu minnu. U qalilhom: “Dan huwa Demmi, id-Demm tal-patt, li jixxerred għal ħafna. Tassew ngħidilkom, li ma nixrobx iżjed mill-frott tad-dielja sa dakinhar li nixrob inbid ġdid fis-Saltna ta’ Alla”.
Imbagħad kantaw is-salmi u ħarġu lejn l-Għolja taż-Żebbuġ.
Il-Kelma tal-Mulej
Tifħir lilek Kristu
Istruzzjonijiet u għan
- Aqra sew l-Evanġelju biex issir midħla tiegħu.
- Aħseb dwaru u ara x’qiegħed jgħid lilek personalment. Liema hi l-parti li l-aktar laqtitek? Għaliex?
- L-Aħħar Ċena, kienet ikla speċjali ta’ Ġesù mal-ħbieb tiegħu. Ir-rutina mgħaġġla li ngħixu u l-ħafna mpenji, jagħmluha diffiċli li nieklu flimkien bħala familja. Ikla flimkien, mingħajr distrazzjonijiet, hija ferm importanti, biex nitkellmu dwar dak li għaddejjin minnu. Ġesù wriena wkoll l-importanza li kulħadd jagħti s-sehem tiegħu. Ara kif tista’ tagħmel l-ikla tal-familja okkażjoni aktar regolari, jekk din mhijiex diġà, u kif tista’ tinvolvi lil kulħadd fit-tħejjija tagħha. Tinsewx tibdew l-ikla, b’talba ta’ ringrazzjament.
- X’aktarx li l-appostli ma fhemuhx lil Ġesù meta qalilhom jieklu mill-ħobż u jixorbu l-inbid u offriehomlhom bħala ġismu u Demmu. Madanakollu, żgur li ħassew li xi ħaġa speċjali kienet qed isseħħ. It-tfal jista’ jkun li għadhom żgħar biex jifhmu x’qiegħed jiġri waqt il-quddiesa, iżda mill-mod li inti, bħala ġenitur u adult, iġġib ruħek u t-tħejjija tiegħek għall-quddiesa, ser tinfluwenza lit-tfal. Aħseb ftit dwar dan u l-messaġġ li qed tgħaddi lil uliedek.
- Flimkien bħala familja sibu ħin u post biex taqraw dan l-Evanġelju. L-ambjent jgħin ukoll, għalhekk qabel ma tibdew, fejn ser tiltaqgħu ppreparaw:
i. Bibbja bil-qari minn San Mark (14, 12-16,22-26)
ii. Xemgħa;
iii. Il-mejda fejn hemm il-Bibbja, miksija bi drapp abjad
iv. Computer/laptop bil-qari u clips - Mur fil-parti tat-tfal skont l-etajiet u għamilha flimkien magħhom
- Addatta din il-parti skont kif hemm bżonn, tiddejjaqx tkun kreattiv
- Mur fil-parti Itlob mid-dar għall-mument ta’ talb flimkien bħala familja
Tfal, illum festa kbira oħra. Il-festa tal-lum insejħulha l-Festa tal-Ġisem u tad-Demm Imqaddes ta’ Ġesù. Xi wħud minnkom din is-sena għamiltu jew daqt tiċċelebraw l-Ewwel Tqarbina tagħkom, għalhekk tafu għalfejn din hija festa kbira u speċjali.
- Ġesù bagħat stedina lil dawk kollha li ltaqa’ magħhom
- Ġesù qalilna biex ngħidu lil kulmin niltaqgħu miegħu li hu jħobbhom
- m’aħna ser niġu bżonn xejn fl-attività tal-lum
Meta tmorru l-knisja qatt indunajtu li jkun hemm bħall-lampa kbira, li nsejħulha l-lampier li dejjem tkun mixgħula, jew jekk ma jkunx hemm il-lampier, ikun hemm xemgħa fuq l-altar mixgħula? Tafu għalfejn?
Dan id-dawl tal-lampier jew tax-xemgħa, ifakkarna li Ġesù qiegħed hemm fit-tabernaklu. Din diffiċli li nifhmuha, imma nemmnu li hi vera. Smajtuh l-Evanġelju tal-lum? X’qal Ġesù meta ħa l-ħobż f’idejh? (“Ħudu, dan hu Ġismi”)
U meta ħa l-inbid, x’qal? (“Dan huwa Demmi”)
Ħa nieqfu ftit u nistaqsikom xi ħaġa. Intom għandkom pet id-dar? X’għandkom? Jekk ma għandkomx, tafu lil xi ħadd li għandu pet?
X’tagħmlu meta jkollkom pet? (tieħu ħsiebu, tagħtih jiekol u jixrob, tħobbu, tnaddaflu l-post fejn joqgħod, tgħaddi ħin miegħu, tilgħab miegħu)
Għalfejn tagħmlu dan kollu mal-pet? (għax tħobbuh)
Issa Ġesù lilna jħobbna ħafna aktar milli aħna nħobbu lill-pets tagħna. U magħna jagħmel dan kollu li semmejna u aktar. Per eżempju, semmejtu li tnaddfu lill-pet. Meta aħna nagħmlu xi għażla ħażina, qisna nitħammġu. Ġesù lilna jnaddafna għax jaħfrilna. Jieħu ħsiebna, u jagħtina nies bħall-mama, il-papa, in-nanniet u oħrajn biex iħobbuna u jieħdu ħsiebna. Lill-pet nagħtuh jiekol u jixrob. U Ġesù ħa ħsieb li jagħtina nieklu u nixorbu wkoll!
Waqt il-quddiesa s-saċerdot jerġa jirrepeti dawn l-istess kliem li qal Ġesù fl-Aħħar Ċena, meta jieħu l-ostja u l-inbid f’idejh. Bħall-appostli aħna mhux ser naraw l-ostja jew l-inbid jinbidlu. Lanqas meta nieħdu l-ostja u l-inbid mhu ser ikollhom togħma differenti. Anke l-appostli, wara li Ġesù qal dan il-kliem u huma kielu mill-ħobż u xorbu mill-inbid, dawn kellhom l-istess togħma bħal qabel. Madanakollu, minħabba li Ġesù kien ħabib kbir tagħhom u dejjem qal il-verità, huma emmnu li dak li kien qal, kien verità. Żgur li ma fehmux x’ried jgħid, imma biż-żmien huma fehmu aktar, avolja qatt ma setgħu jifhmu kif isir dan il-miraklu kbir. Aħna nagħmlu l-istess, aħna nemmnu li Ġesù qatt ma jigdeb. Nafu li Ġesù jrid ikun ħafna qrib tagħna. Għalhekk għażel dan il-mod biex vera jkun viċin tagħna. Meta nitqarbnu l-ostja tiġi fina, mela Ġesù jkun ġie fina! Wow dan l-akbar rigal li nistgħu nirċievu, kemm aħna lucky!
Tiftakru dak li tkellimna dwaru f’dawn l-aħħar ġimgħat? Wara li Ġesù għamel din l-ikla speċjali mal-appostli, hu miet u qam mill-mewt u wara ftit tela’ fis-sema. L-appostli kienu mħawwda x’ser jaqbdu jagħmlu, kienu qegħdin jibżgħu wkoll li s-suldati jaqbduhom u joqtluhom bħal Ġesù. Mbagħad, ġie l-Ispirtu s-Santu fuqhom, kif kien wiegħed Ġesù u ġihom ħafna kuraġġ biex jagħmlu dak li xtaqhom Ġesù.
Meta nitqarbnu, Ġesù jagħtina dan l-ikel speċjali li jagħtina ħafna qawwa u kuraġġ biex insiru tfal bravi u nies li nħobbu lilu u lill-oħrajn. Meta nitqarbnu jkollna l-kuraġġ biex nagħmlu dak li jixtieq Ġesù.
Ejjew nisimgħu din is-song biex niftakru dak li jixtieqna nagħmlu Ġesù, I’m trying to be like Jesus.
Hemm min minnkom li għalissa ma jitqarbinx, imma ftakru x’għidna fil-bidu. Meta mmorru l-knisja u naraw dak id-dawl tal-lampier jew tax-xemgħa, niftakru li Ġesù qiegħed hemm ukoll, qiegħed qrib ħafna. Vera li Ġesù huwa qrib tagħna l-ħin kollu, imma meta mmorru l-knisja niftakru aktar fih, dan huwa l-ħin speċjali tagħna ma’ Ġesù. Għidna li għax inħobbu lill-pets tagħna, aħna nilgħabu magħhom u ngħaddu ħin magħhom. Mela jekk inħobbu lil Ġesù, għandna ngħaddu ħin miegħu ukoll. Hu jħobb ħafna dan il-ħin speċjali miegħu.
Il-lum ma għandix attività bħas-soltu għax dak li ser nippruvaw nagħmlu ser tkun xi ftit differenti. Ser niftakru li Ġesù jħobb jitkellem magħna ħafna, għalhekk meta noħorġu mal-ġenituri tagħna jew man-nanniet u ngħaddu minn quddiem knisja, infakkruhom biex nidħlu ħa ngħidu hello lil Ġesù. Ippruvaw li tal-anqas tagħmlu hekk darba fil-ġimgħa. Dawk li għamlu l-Ewwel Tqarbina, ser jiftakru wkoll biex fil-weekend ifakkru lill-ġenituri tagħhom biex imorru għall-quddiesa u jirċievu r-rigal kbir u sabiħ tat-tqarbin.
Inroddu s-salib
Grazzi Ġesù li inti trid tiġi għandna b’dan il-mod speċjali ħafna tat-tqarbin. Illum nixtiequ nitolbu għal dawk it-tfal kollha li qegħdin jiċċelebraw l-Ewwel Tqarbina tagħhom, biex dan il-ferħ li qegħdin iħossu issa jibqgħu iħossuh kull darba li jitqarbnu. Ġesù għinna biex aħna nħobbu lill-oħrajn, kif inti tħobb lilna. Ammen.
Dwar dak li jagħmel fina t-tqarbin, isimgħu din is-song, The E-U-C-H-A-R-I-S-T Song, (nota lill-ġenituri: fissru lit-tfal xi kliem li jista’ jkun diffiċli għalihom)
Illum qegħdin niċċelebraw festa oħra: il-festa tal-Ġisem u d-Demm Imqaddes ta’ Ġesù. Din hija l-festa li tfakkarna li Ġesù huwa verament preżenti fil-ħobż u l-inbid, li permezz tal-konsagrazzjoni, jinbidlu fil-Ġisem u d-Demm Imqaddes tal-Mulej. Il-konsagrazzjoni issir, meta waqt il-quddiesa, s-saċerdot jirrepeti l-kliem li qal Ġesù fl-Aħħar Ċena u bil-qawwa tal-Ispirtu s-Santu, l-ħobż u l-inbid jinbidlu fil-ġisem u demm ta’ Ġesù.
- Il-ħobż u l-inbid isiru l-Ġisem u d-Demm imqaddes tal-Mulej
- It-tqarbin jagħtina l-qawwa biex ngħixu bħal Ġesù
Jekk għandna pet id-dar, irridu nagħtuh jiekol u jixrob, l-istess irridu nagħmlu lill-pjanti u s-siġar li għandna fil-ġnien. Anke aħna, ma nistgħux inkunu b’saħħitna jekk ma nieklux u ma nixorbux. Tafu li biex inkunu b’saħħitna, ma nistgħux nieklu u nixorbu dak li jfettlilna, imma rrodi nieklu u nixorbu dak li jagħtina s-saħħa.
Ġesù wkoll jagħtina l-ikel u x-xorb, mhux biex inkunu b’saħħitna fiżikament, iżda biex insiru tfal u nies aħjar. Intom titgħallmu li Ġesù huwa l-mudell għalina. Jiġifieri li għandna nħarsu lejn Ġesù, naraw kif għex u nippruvaw li nagħmlu bħalu. Kif kien jgħix Ġesù? (jitlob, iħobb u jgħin lil kulħadd, kien ħabib ma’ kulħadd)
Kif taħsbu li Ġesù rnexxielu dejjem jagħmel dak li hu tajjeb? (għax kien iħobb ħafna lil Alla Missier u kien iħalli lill-Ispirtu s-Santu jmexxih).
Għalkemm Ġesù jixtieq li aħna nkunu bħalu, jaf li mhux faċli. Għalhekk jgħidilna biex nitolbu kif kien jagħmel hu. Jibgħatilna nies li jħobbuna biex jgħinnuna nagħmlu għażliet tajba. Imma ried ukoll jagħtina xi ħaġa speċjali biex ifakkarna li hu dejjem magħna u biex bl-istess mod li l-ikel jagħtina s-saħħa, Ġesù jagħtina wkoll is-saħħa biex nagħmlu dak li hu tajjeb. Dan ir-rigal speċjali li jagħtina Ġesù huwa t-tqarbin, l-Ewkaristija.
Fl-Evanġelju ta’ San Luqa, insibu l-ġrajja ta’ meta Ġesù jibqa’ fit-tempju. Din il-ġrajja tispiċċa hekk: Ġesù jmur lura Nazaret fejn “baqa’ jikber fl-għerf, fis-snin u fil-grazzja, quddiem Alla u quddiem il-bnedmin.” (Luqa 2, 52). It-tqarbin jagħtina l-saħħa biex bħal Ġesù nikbru fl-għerf, fis-snin u fil-grazzja quddiem Alla u l-bnedmin. Kif nistgħu nagħmlu dan?
Tikber fl-għerf meta tkun taf x’għandek tagħmel f’sitwazzjoni diffiċli. Ġieli smajtu l-kelma kuxjenza. Il-kuxjenza hija dik li nħoss qisha tkellimni ġo qalbi wara li nkun għamilt xi ħaġa, turi jekk dak li għamilt huwiex tajjeb jew ħażin. Biex inkun naf nagħmel dan irrid nitgħallem kemm fl-iskola, kif ukoll fil-parroċċa.
Biex nikbru fis-snin, irridu nieħdu ħsieb tagħna nfusna, nieklu dak li hu tajjeb għalina, nagħmlu eżerċizzju, ikollna ħbieb li jgħinnuna nagħmlu għażliet tajba biex nikbru b’saħħitna.
Nikbru fil-grazzja quddiem Alla meta nitolbu, naqraw il-Bibbja, nobdu l-kmandamenti, inħobbu lil Alla.
Nikbru fil-grazzja quddiem il-bnedmin meta nobdu, ngħinu lill-oħrajn, nuru rispett u mħabba, inkunu ħbieb ta’ vera.
Il-printout li għandkom maqsuma f’erba’ kaxex. Tistgħu tagħmlu printout fuq karta A3 u tużawha bħala familja, inkella fuq karta A4 u kulħadd ikollu l-printout tiegħu. Kull ġimgħa tibdew printout ġdida. Din mhux kompetizzjoni biex naraw minn ser iniżżel l-aktar affarijiet! Fil-familja aħna maħbuba u nħobbu lura. Għalhekk kulħadd jgħin mhux ifixkel. Kuljum naraw x’għamilna matul il-ġurnata u kif kbirna fl-għerf, fis-snin u fil-grazzja, u niktbuha fuq din il-karta. Nafu li dan ma nistgħux nagħmluh mingħajr għajnuna. Ġesù jagħtina ħafna għajnuna meta nirċevuh fl-Ewkaristija. Għalhekk importanti mhux li mmorru għall-quddies u nitqarbnu kull nhar ta’ Ħadd biss, imma jekk nistgħu mmorru wkoll matul il-ġimgħa.
Nisimgħu, I wanna do right, u niftakru li meta nitqarbnu u nafdaw f’Ġesù, hu jgħinna biex nagħmlu dak li hu tajjeb.
Inroddu s-salib
Grazzi Ġesù tal-għajnuna li inti tagħtina permezz tal-Ewkaristija biex inħobbu u ngħinu lill-oħrajn. Grazzi wkoll li tgħina nsiru nafu aktar lil Alla li jħobbna, jaħfrilna u jħenn għalina. Nitolbu għal dawk kollha li ma għandhomx xewqa li jersqu għat-tqarbin, ibgħatilhom nies fil-ħajja tagħhom biex jgħinuhom jifhmu x’rigal kbir u ta’ għajnuna hija l-Ewkaristija. Ammen.
1. Id-dixxipli, skont l-Evanġelju tal-lum, staqsew lil Ġesù x'għandhom jagħmlu biex iħejju ikla speċjali. X'kienet din l-ikla li kienu se jagħmlu?
2. Huma ħejjew għal din l-ikla ġo post partikolari. X'kien dan il-post?
3. Waqt l-ikla, Ġesù ħa l-ħobż u l-kalċi f'idejh u newwilhom lid-dixxipli. Huwa tkellem u qal li l-ħobż u l-inbid....
4. Wara li d-dixxipli kielu u x-xorbu l-ġisem u d-demm tal-Mulej...
Kif tuża din il-paġna
Dwar 
L-għan ta’ bekids.mt hu li joffri formazzjoni kateketika komprensiva għat-tfal u għall-adolexxenti li qegħdin jippreparaw biex jirċievu s-sagramenti.
