Alla jara l-Qalb!

32 Ħadd ta' Matul is-Sena

Ma tantx tidher li nbidlet id-dinja! Fi żmien Ġesù kien hemm numru ta’ nies li kienu jagħtu importanza kbira u żejda għal mod kif jidhru. Illum l-istess, moħħna kif nidhru, kif jarawna l-oħrajn; l-istatus li għandna huwa mportanti. Aktar importanti kif nidhru, milli min aħna fir-realtà. L-Iskribi u l-Fariżej, kienu wkoll ifittxu li jidhru mportanti u li n-nies jaħsbuhom nies tajba u qaddisa. Ġesù jgħid li dawn in-nies kienu “jħobbu jduru mat-toroq bi lbiesi twal, jixtiequ min isellmilhom fil-pjazez, u fis-sinagogi joqogħdu fis-siġġijiet ta’ quddiem, u fil-postijiet ewlenin fil-pranzijiet; iberbqu ġid ir-romol, u mbagħad għal wiċċ in-nies idumu ħafna jitolbu.”

Dawn fir-realtà kienu nies rispettati minħabba li huma kienu għorrief tal-Liġi. Il-problema kienet li huma kienu aktar imkabbra minħabba l-pożizzjoni li kellhom milli għall-għerf tagħhom. Ġesù jikkundanna wkoll il-fatt li kienu jisfruttaw lill-foqra u d-dgħajfa, meta dawn kienu fid-dmir li jgħixu skont ir-rieda ta’ Alla. Il-kilba għall-poter u għall-pożizzjoni, u r-regħba għall-ġid materjali tidher li hija dgħufija tal-bniedem matul iż-żminijiet. 

Meta aħna nagħtu aktar importanza għall-ġid materjali, u għad-dehra tagħna, se nkunu aktar moħħna fina nfusna milli fl-oħrajn. L-armla fqira ma kellha xejn minn dawn il-pretensjonijiet. 

L-armla, kienet mimlija umiltà. Id-dehra tagħha ma kinitx komparabbli ma’ tal-għonja li felħu jagħtu mill-ħafna li kellhom. Ħadd ma ta kasha, jew warrab biex tgħaddi hi. Iżda lil Ġesù ma ħarbitlux! Jużaha biex jgħallem lil dawk ta’ madwaru. L-armla tagħti dak kollu li kellha, u tafda fil-providenza ta’ Alla. Dan l-Evanġelju qiegħed jidderiġina lejn il-passjoni ta’ Ġesù, fejn hu wkoll jagħti dak kollu li għandu, jagħti ħajtu lil Alla għalina.

L-Evanġelju tal-lum ukoll jgħinna biex nirriflettu mhux biss fuq il-ġid materjali li għandna, u li aħna mitluba li ngħinnu lill-oħrajn, iżda wkoll dwar it-talenti tagħna. Dan ukoll huwa ġid tagħna. It-talenti li għandna, huma rigali mingħand Alla. Alla tahomlna għall-ġid tagħna u tal-oħrajn. Naħsbu ftit, aħniex imkabbra b’dawn it-talenti tagħna. Nistennewx li nkunu mfaħħra, minflok ma nagħrfu li dak li għandna ġej mill-ġenerożità kbira ta’ Alla. Jekk Ġesù hu l-mudell għalina, il-kburija m’għandiex tkun waħda mill-kwalitajiet tagħna.

Qari mill-Evanġelju skont San Mark (Mk 12, 38-44) 

F’dak iż-żmien, Ġesù kien qiegħed jgħallem fit-tempju u jgħid: “Iftħu għajnejkom mill-kittieba, li jħobbu jduru mat-toroq bi lbiesi twal, jixtiequ min isellmilhom fil-pjazez, u fis-sinagogi joqogħdu fis-siġġijiet ta’ quddiem, u fil-postijiet ewlenin fil-pranzijiet; iberbqu ġid ir-romol, u mbagħad għal wiċċ in-nies idumu ħafna jitolbu. Dawn jieħdu kundanna aktar iebsa”.

Ġesù kien qiegħed biswit it-teżor, iħares u jara xi flus jitfgħu n-nies fit-teżor. Bosta għonja bdew jitfgħu ħafna. Resqet waħda armla fqira u tefgħet biċċtejn żgħar, jiġifieri xi żewġ ċenteżmi.Hu sejjaħ id-dixxipli tiegħu u qalilhom: “Tassew ngħidilkom, li din l-armla fqira tefgħet iktar minn dawk kollha li tefgħu fit-teżor. Għax dawk kollha tefgħu miż-żejjed tagħhom, imma hi, fil-faqar tagħha, tefgħet kulma kellha, dak kollu li kellha biex tgħix”.

Il-Kelma tal-Mulej
Tifħir lilek Kristu

Istruzzjonijiet u għan

  1. Aqra sew l-Evanġelju biex issir aktar familjari miegħu.
  2. Aħseb dwaru u ara x’qiegħed jgħid lilek personali. Liema hi l-parti li l-aktar li laqtitek? Għaliex?
  3. Kemm hu importanti għalik dak li jaħsbu n-nies dwarek? Tagħti kas esaġerat għad-dehra tiegħek? Xi jżommok lura milli tidher kif fil-verità int? Matul din il-ġimgħa, agħmel il-ħin biex tkun waħdek quddiem il-Mulej u b’mod sinċier taffaċċja dak li verament inti. Alla jħobbok u jafek aktar milli taf lilek innifsek.
  4. Mhux se nkunu qed nagħtu dak kollu li għandna bħalma ma għamlet din l-armla, imma tajjeb li b’mod regolari ngħinu anke b’mod finanzjarju lil min hu fil-bżonn. Importanti li anke t-tfal jidraw jagħmlu dan. Jekk bħala drawwa, intom toħorġu tieklu jew tordnaw l-ikel id-dar, dan il-weekend, minflok, sajru xi ħaġa sempliċi u l-flus li kieku nfaqtu biex ħriġtu tieklu, agħtuhom lil min hu fil-bżonn. Numru ta’ parroċċi, ikollhom kaxxa fejn jinġabru flus għal dawn il-bżonnijiet.
  5. Flimkien bħala familja sibu ħin u post biex taqraw dan l-Evanġelju. L-ambjent jgħin ukoll, għalhekk qabel ma tibdew, fejn ser tiltaqgħu ppreparaw:
    i. Bibbja bil-qari minn San Mark (12, 38-44)
    ii. Xemgħa
    iii. Il-mejda fejn hemm il-Bibbja, miksija bi drapp aħdar
    iv. Computer/laptop bil-qari u clips
  6. Mur fil-parti tat-tfal skont l-etajiet u għamilha flimkien magħhom
  7. Addatta din il-parti skont kif hemm bżonn, tiddejjaqx tkun kreattiv 😊
  8. Mur fil-parti Itlob id-dar għall-mument ta’ talb flimkien bħala familja

Illum Ġesù qiegħed qrib tat-Tempju u jara ħafna nies jagħtu l-flus biex jintużaw għat-Tempju u għall-fqar. Kien hemm minn kollox, nies sinjuri u anke mara fqira. Ejjew naraw x’qal Ġesù dwar dawn in-nies.

  • Ġesù jimpurtah aktar mill-intenzjoni tagħna meta ngħinu lill-oħrajn, milli l-ammont ta’ għajnuna li nagħtu
  • Pakkett b’ħelu żgħir (jew flus taċ-ċikkulata) li jista’ jitqassam b’mod li kulħadd ikollu żewġ ħelwiet, u xi ħadd mit-tfal ikollu waħda u xi ħadd ma jkollu xejn

Biex nifhmu aħjar dak li smajna fl-Evanġelju tal-lum, se nibdew f’eżempju. Għandkom dan il-ħelu u ħa naqsmuh bejnietna. (ġenituri jqassmu l-ħelu, jagħtu żewġ ħelwiet lil kulħadd, lil xi ħadd mit-tfal jagħtuh waħda, u xi ħadd mill-ġenituri jibqa’ b’xejn)

Ħarsu lejn il-ħelu. Kulħadd għandu l-istess?
Hemm min baqa’ b’xejn? Min?
Intom tħobbuh lill-papa/tħobbuha lill-mama?
Se nħalluh/a mingħajr ħelu?
Mela biex ma jibqax/tibqax b’xejn, kulħadd jagħti ħelwa milli għandu.
X’taħsbu? (it-tfal jingħataw iċ-ċans jitkellmu, speċjalment min għandu ħelwa waħda, inħalluh/a jesprimi kif qed iħossu/a)

Meta nagħtu minn dak li għandna, imma jibqa’ għalina wkoll, mhux diffiċli ħafna, imma meta nagħtu u ma jibqagħlna xejn, huwa ħafna aktar diffiċli. Meta nagħmlu xi ħaġa għall-oħrajn, wara li nkunu sibniha diffiċli biex nagħmluha, iżda nagħmluha għax inħobbuhom, ifisser li aħna nkunu għamilna sagriffiċċju. Hekk għamlet dik l-armla li smajna dwarha fl-Evanġelju. Ġesù faħħar lil dik il-mara u mhux lil dawk li taw il-flus mill-ħafna li kellhom. L-ammont ta’ flus li tat hi kien vera ftit, imma hi tat il-flus minn qalbha. L-oħrajn taw il-flus biex jarawhom in-nies u jfaħħruhom, x’aktarx kieku ma kien hemm ħadd iħares lejhom, kienu joqgħodu jistennew li jiġu n-nies biex qabel ma jpoġġu l-flus fil-kaxxa tal-offerti!

Għandna kemm għandna żmien, xorta nistgħu nkunu bħall-armla. Din l-armla tfakkarna f’Ġesù, li tant iħobbna, li sar bniedem bħalna u anke miet fuq is-salib għalina.  

Qabel ma tkomplu bl-attività, isimgħu din is-song, The Sharing Song, (nota lill-ġenituri, tkellmu mat-tfal dwar il-lyrics ta’ din is-song)

Ġesù jrid li meta nagħmlu xi ħaġa għall-oħrajn nagħmluha minn qalbna. Tistgħu taħsbu x’tistgħu tagħmlu biex tkunu bħal din l-armla? (eżempji jistgħu jinkludu: jagħtu flus mill-pocket money għall-karità, eżempji ta’ kif jgħinu fid-dar, speċjalment mingħajr ħadd ma jistaqsihom, ħin ta’ talb jew stejjer mill-Bibbja minflok ma jilgħabu)

Tfal matul il-ġranet li ġejjin ippruvaw wettqu fil-prattika dawn l-eżempji li intom tkellimtu dwarhom. Ftakru li ma għandkomx tagħmluhom biex xi ħadd ifaħħarkom, imma għamluhom għax intom tħobbu lil Ġesù u lill-oħrajn. U tafu xhiex? Għalkemm forsi ħadd ma jfaħħarkom għal dak it-tajjeb li tagħmlu, Ġesù qiegħed jarakom u vera qiegħed jieħu pjaċir bikom. Kif Ġesù ra dawk il-ftit flus tal-armla, hekk ukoll jara dak li nagħmlu aħna.

Inroddu s-salib.

Għażiż Ġesù, inti taf kemm hu diffiċli li aħna nagħtu xi ħaġa milli għandna jew ngħinu lill-oħrajn. Ġesù għinna u agħtina l-kuraġġ biex ikollna qalb ġeneruża li tħobb bħalma tħobb inti. Grazzi Ġesù.

Introduzzjoni

Illum naraw lil Ġesù jħares lejn in-nies huma u jpoġġu l-offerta tagħhom fit-Tempju. Ħafna kienu sinjuri u poġġew amont kbir ta’ flus, imma dan ma kienx b’xi sagrifiċċju, għax kellhom ħafna flus. Resqet ukoll armla fqira, u poġġiet biss żewġ ċenteżmi. Din ukoll ġibdet l-attenzjoni ta’ Ġesù. Ħa naraw x’qal Ġesù dwar din il-mara u l-oħrajn ta’ qabilha.

  • Alla ta lil kull wieħed u waħda minna diversi talenti u kwalitajiet sbieħ, biex nużawhom għall-ġid tagħna u tal-oħrajn
  • Kaxxa żgħira tal-kartun
  • Ċrieki tal-kartonċin, daqs ta’ munita tal-flus, imma kbar biżżejjed li jistgħu jiktbu fuqhom
  • Kuluri
  • Lapes
  • Dekorazzjonijiet biex tiżżejjen il-kaxxa

Tafu xi tfisser tkun ġeneruż? (tagħti flus, jew affarijiet oħra bħall-ħin tiegħek u anke taqsam it-talenti tiegħek ma’ oħrajn, u ma tistenna xejn lura)

Ġeneralment meta xi ħadd ikun ġeneruż ikun qed jagħmel ukoll sagrifiċċju. Jekk l-iskola qegħdin jiġbru toys u logħob biex jingħataw lil tfal orfni u inti tagħtihom toy li m’għadekx tilgħab biha, din hija azzjoni tajba. Imma jekk inti tagħtihom toy jew logħba, li għadek kemm qlajt u li vera xtaqt, tkun qiegħed tagħmel att ta’ ġenerożità. Għamilt ukoll sagrifiċċju kbir biex wasalt li tagħtiha lil dawn it-tfal, filwaqt li ma tantx sibtha diffiċli li tagħti t-toy li ma għadekx tilgħab biha. 

L-armla tal-Evanġelju kienet ġenreuża. Hi tat dak kollu li kellha. Għalkemm bħala ammont ta’ flus, dan kien vera ftit u l-oħrajn ta’ qabilha taw ħafna flus, Ġesù jfaħħar lil din il-mara u mhux lill-oħrajn. Din il-mara kellha wkoll fidi f’Alla li hu kien ser jipprovdilha dak li jkollha bżonn. Meta tisimgħu l-ewwel qari tal-lum, li jitkellem ukoll dwar armla oħra, tisimgħu kif Alla pprovdilha dak li kellha bżonn wara li hi kienet ġeneruża ma’ Elija.

Allura, Ġesù lil min taħsbu li jixtieqna, li nkunu nixbħu? Lil dawk l-għonja li taw ħafna flus, jew lill-mara armla li tat ftit flus?

Ġesù jixtieq li aħna nkunu ġenerużi bħal dik l-armla. Jista’ jkun qed tgħidu, imma jien x’nista’ nagħti? Din l-armla ftit kellha x’tagħti, imma l-ftit tagħha kien jiswa ħafna. Għax Alla ma jħarisx lejn l-ammont iżda jara qalbna u xi ħsibijiet kellna meta aħna qsamna dak li għandna mal-oħrajn. Alla jara s-sagrifiċċju li nagħmlu. 

Kif tistgħu tkunu ġenerużi? (eżempji li jistgħu jagħtu t-tfal jinkludu: jagħtu flus mill-pocket money tagħhom, fil-break joqgħodu ma’ xi tfal li minħabba l-kundizzjoni tagħhom ma jistgħux joqgħodu jilgħabu mal-oħrajn, jgħinu fid-dar mingħajr tgergir, speċjalment jekk dan ifisser li jnaqqsu mill-ħin tal-logħob tagħhom, jużaw it-talenti tagħhom, per eżempju jekk tajbin fil-kant, jidħlu fil-kor tal-parroċċa, jekk tajbin fil-qari, jaqraw stejjer lil ħuthom iżgħar)

Fl-Evanġelju tissemma l-kaxxa tat-teżor tat-Tempju. Il-lum ħa tagħmlu waħda intom ukoll. Għandkom kaxxa, jekk tixtiequ, iddekorawha ħa tiġi tidher sabiħa. Għandkom ukoll dawk iċ-ċrieki tal-kartonċin, li jirrappreżentaw il-flus. Fuq dawn iċ-ċrieki ser tiktbu dak li intom tistgħu tagħtu u li jieħu gost bihom Ġesù. Ftakru li dawk l-għonja, taw ħafna flus, imma dawn kienu mill-ħafna flus li kellhom u għalhekk ma għamlu l-ebda sagrifiċċju. Anzi taw il-flus biex jarawhom in-nies u jfaħħruhom. Mela intom għandkom aktar tixbħu lill-armla fqira li tat ftit imma dak il-ftit tagħha kien jiswa aktar għax għamlet sagrifiċċju kbir biex tat dawk il-flus. Wara li tiktbu fuq iċ-ċrieki, poġġuhom fil-kaxxa. (nota lill-ġenituri, anke intom tistgħu tagħmlu kaxxa għalikom u tiktbu l-azzjonijiet tajba li ser tagħmlu. Ftakru li l-eżempju tagħkom jgħallem ħafna lit-tfal). Din il-kaxxa ħalluha fil-kamra tagħkom jew ħdejn il-mejda tat-talb tagħkom. Kuljum, jew b’mod regolari, daħħlu jdejkom fil-kaxxa u araw x’ser ittellgħu u ppruvaw li dak in-nhar tagħmlu dak li hemm miktub. Din il-‘munita’ tistgħu terġgħu tpoġġua fil-kaxxa. Ovvjament jekk tkunu ktibtu xi ħaġa bħal ‘nidħol fil-kor tal-parroċċa’, jew ‘insir abbati’, dan iċ-ċirku ma terġgħux tpoġġuh lura fil-kaxxa, għax dan se jkun impenn li tibqgħu tosservah.

Wara li tlestu din l-attività, isimgħu, Give a little kindness.

Inroddu s-salib.

Ilqa’, Mulej, u ħu l-libertà tiegħi kollha, il-memorja, il-fehma, u r-rieda kollha tiegħi. Kull ma għandi, int tajtuli, u għalhekk jiena nerġa’ rroddulek u nħallih f’idejk kollu kemm hu biex tmexxini skont ir-rieda mqaddsa tiegħek. Agħtini biss imħabbtek u l-grazzja tiegħek. B’dawn biss, inkun għani biżżejjed u xejn aktar ma nkun neħtieġ. Ammen. 

Ngħidu flimkien it–Talba ta’ San Injazju ta’ Loyola.

Dalwaqt.

Kif tuża din il-paġna

Alla jkellimna b'ħafna modi, inkluż bil-qari mill-Bibbja fil-Quddiesa. Hawnhekk tista' ssib tagħrif u attivitajiet marbuta mal-qari tal-Quddiesa tal-Ħadd u li għandhom jispirawk tgħix kuljum dan il-qari mill-Bibbja.