Bdiewa ħżiena

Is-27 Ħadd ta’ Matul is-Sena

Kulmin għandu t-tfal żgur li xi darba sema’ dawn il-kliem bejn l-aħwa: “Dik tiegħi. Dik tiegħi”, u x’aktarx konna msejħa biex nagħmulha ta’ mħallef u naqtgħu is-sentenza! Iżda din mhijiex attitudni tat-tfal biss. Il-parabbola tal-lum twissi dwar din in-nassa li xi drabi lkoll naqgħu fiha. Kien hemm drabi, meta per eżempju rraġunajna li ‘din il-ħajja tiegħi, nagħmel li rrid’? Jew li nista’ nieħu deċiżjonijiet kif irrid?

Il-ħajja tagħna hija rigal mingħand Alla u fl-aħħar irridu nagħtu rendikont tad-deċiżjonijiet li ħadna. Bħala nsara, għalhekk, kull deċiżjoni għandha tittieħed fid-dawl tal-Kelma ta’ Alla. Il-bdiewa ħasbu li la huma kienu ħadmu fl-għalqa, din saret tagħhom u s-Sid ma kellux aktar jedd fuqha. Ma baqgħux jgħoddu lis-sinjur bħala s-sid tal-art. Hu kien ħanin. Bagħat numru ta’ nies biex bil-kelma t-tajba jurihom li ma kienux qegħdin jirraġunaw sew. Madanakollu, dawn il-bdiewa tant kienu saru egoisti, li sawtu u qatlu lil dawk kollha li bagħat is-sid, inkluż lit-tifel tiegħu.

Alla jimxi magħna b’dan il-mod. Huwa tana l-ħajja tagħna bħala rigal, tana l-ħolqien kollu bħala rigal, tana familja bħala rigal ukoll. Poġġiena bħala amministraturi ta’ dan il-ħolqien. Ma ħalliniex waħedna. Fil-parabbola, Ġesù jgħidilna li s-sid bagħat numru ta’ nies u anke lil ibnu.  Dawn huma l-għajnuniet li jagħtina Alla biex insiru nies aħjar. Għandna l-Kelma tiegħu: il-Bibbja; għandna nies, bħall-qassisin, id-diretturi spiritwali, u l-għalliema li juruna t-triq u jgħinuna. Hemm diversi mezzi oħra ta’ għajnuna fejn nistgħu nduru biex nevalwaw dak li qegħdin nagħmlu, ma’ dak li jixtieq Alla mingħandna. Kemm qegħdin nagħmlu użu sew minn dan kollu? Jew qegħdin inġibu ruħna bħall-bdiewa u nirraġunaw li l-ħajja tagħna, nagħmlu biha li rridu aħna, ngħixu kif jidhrilna, ma jimpurtaniex kif id-deċiżjonijiet li nieħdu se jeffettwaw l-ambjent u lil dawk ta’ madwarna.

F’dan l-Evanġelju tissemma l-ġebla tax-xewka. Din hija ġebla importanti ħafna fil-bini. Ma titpoġġiex biex il-bini jidher sabiħ, iżda biex il-bini jkun sod. Ġesù, iqabbel lilu nnifsu ma’ din il-ġebla. Ġesù, għandu jkun dak li nibnu ħajjietna fuqu. Hekk inkunu qegħdin nibnu ħajjietna fis-sod. Ġesù huwa “ġebla tax-xewka, imsejsa sewwa.” (Isaija 28, 16)

Qari mill-Evanġelju skont San Mattew (Mt 21, 33-43)

F’dak iż-żmien Ġesù qal lill-qassisin il-kbar u lix-xjuħ tal-poplu: “Isimgħu parabbola oħra: Kien hemm wieħed, sid ta’ għalqa, u ħawwilha bid-dwieli; tellgħalha ħajt tas-sejjieħ madwarha, ħaffer magħsar fiha, u bnielha torri; u qabbilha lil xi bdiewa. U siefer f’art oħra.

Meta wasal żmien il-frott, bagħat il-qaddejja tiegħu għand dawk il-bdiewa biex jiġbrulu l-frott li kien imissu. Iżda l-bdiewa qabdu lill-qaddejja, u lil wieħed sawtuh, lil ieħor qatluh, u lil ieħor ħaġġruh. Reġa’ bagħtilhom qaddejja oħra, aktar minn qabel, u għamlulhom l-istess.

Fl-aħħar bagħtilhom lil ibnu. “Minn ibni jistħu,” qal. Iżda kif raw lil ibnu l-bdiewa bdew jgħidu bejniethom: “Ara l-werriet! Ejjew noqtluh, biex il-wirt tiegħu niħduh aħna”. Qabduh, xeħtuh ’il barra mill-għalqa u qatluh. Issa sid l-għalqa x’jagħmlilhom lil dawk il-bdiewa meta jiġi?”. Qalulu: “Jeqridhom bla ħniena, ta’ ħżiena li huma, u l-għalqa jqabbilha lil bdiewa oħra li jroddulu l-frott fi żmienu”.

Qalilhom Ġesù: “Qatt ma qrajtu fl-Iskrittura li:

“Il-ġebla li warrbu l-bennejja saret il-ġebla tax-xewka;
bis-saħħa tal-Mulej seħħ dan: ħaġa tal-għaġeb f’għajnejna?”

Għalhekk ngħidilkom li s-Saltna ta’ Alla tittieħed mingħandkom u tingħata lil ġens li jagħmel il-frott minnha”.

Il-Kelma tal-Mulej
Tifħir lilek Kristu

  1. Aqra sew l-Evanġelju biex issir midħla tiegħu.
  2. Aħseb dwaru u ara x’qiegħed jgħid lilek personali. Liema hi l-parti li l-aktar li laqtitek? Għaliex?
  3. Isma’ Cornerstone .
  4. Id-deċiżjonijiet li tieħu huma fid-dawl tat-tagħlim tal-Knisja?
  5. Inżomm lil Ġesù bħala l-kriterju ta’ dak li hu tajjeb u dak li hu ħażin?
  6. Flimkien bħala familja sibu ħin u post biex taqraw dan l-Evanġelju. L-ambjent jgħin ukoll, għalhekk qabel ma tibdew, fejn se tiltaqgħu ppreparaw:
    a) Bibbja bil-qari minn San Mattew (21, 33-43);
    b) Xemgħa mixgħula;
    ċ) Il-mejda jew post fejn hemm il-Bibbja, xemgħa, miksija bi drapp aħdar;
    d) Computer/laptop bil-qari u clips.
  7. Mur fil-parti tat-tfal skont l-etajiet u għamilha flimkien magħhom.
  8. Addatta din il-parti skont kif hemm bżonn, tiddejjaqx tkun kreattiv 😊
  9. Mur fil-parti tal-Prayer Spaces għall-mument ta’ talb flimkien bħala familja.

Illum ser nerġgħu nisimgħu parabbola, għaliex Ġesù kien iħobb ħafna jirrakkonta l-istejjer. Din il-parabbola hija dwar raġel li kellu għalqa tad-dwieli. Tiftakru x’inhi għalqa tad-dwieli? (għalqa fejn jikber l-għeneb). Hu ma setax jieħu ħsieb l-għalqa u sab xi nies biex jaħdmu f’din l-għalqa. Iżda dawn in-nies ma kinux bravi u riedu jżommu l-għeneb kollu għalihom u lis-sid ma riedu jagħtuh xejn!

  • Alla ħalaq id-dinja;
  • Alla jrid li aħna nieħdu ħsieb il-ħolqien.
  • Printout tal-istampi;
  • Jekk tixtiequ stampi oħra kif deskritt aktar l-isfel
Nibżgħu għall-pjantiNiżżel
Taħlix ilmaNiżżel
Itfi’ d-dawlNiżżel

Fil-parabbola tal-lum smajna kif kien hemm raġel li kellu għalqa tad-dwieli u kien jieħu ħsiebha ħafna. Hu ma setax jibqa’ jieħu ħsiebha, allura sab xi nies biex imorru jaħdmu fl-għalqa tiegħu. Wara xi żmien, ir-raġel jibgħat xi nies biex iġibulu l-għeneb, iżda dawk li kienu qed jaħdmu fl-għalqa ma ridux ituhomlhom! Dawn in-nies riedu jżommu l-għeneb kollu għalihom, avolja l-għalqa ma kinitx tagħhom. Nistgħu inqabblu dan bħal meta intom, tfal, toħorġu għal xi picnic u tieħdu ballun magħkom biex tilgħabu bih. Ikun hemm il-kuġini u jkunu jridu jilgħabu huma bil-ballun u inti tħallihom, għax dak il-ħin ma tistax tmur tilgħab għax qiegħed tiekol biċċa ħobż. Meta tlesti mill-ħobż, tmur biex tilgħab magħhom u ma jħallukx! Hekk sew? Il-ballun tiegħek u ma tistax tilgħab bih!

Tafu li Alla lilna sellifna ħafna affarijiet? Id-dinja u kulma fiha, ħalaqhom Alla. Mela la ħalaqhom hu, huma tiegħu. Lilna tahomlna biex nużawhom u nieħdu ħsiebhom.

Tafu ssemmu xi affarijiet li ħalaq Alla?

Kif taħsbu li nistgħu nieħdu ħsieb il-ħolqien?

Alla ħalaq l-ilma. Kif nieħdu ħsieb l-ilma?

Alla ħalaq l-annimali. Kif nieħdu ħsieb l-annimali?

Alla ħalaq is-siġar u pjanti. Kif nieħdu ħsieb is-siġar u pjanti?

Alla ħalaq lilna. Kif nieħdu ħsieb ta’ xulxin?

Xi kultant ninsew nieħdu ħsieb il-ħolqien. Per eżempju, l-karti jsiru mis-siġar. Jekk noqgħodu naħlu l-karti, ikunu qed jinqatgħu siġar bla bżonn. M’għandniex naħlu elettriku lanqas. Mela jekk f’kamra ma jkun hemm ħadd m’għandniex inħalluha mixgħula. Fid-dinja hawn ikel għal kulħadd. Madanakollu hawn min hu bħal dawk il-bdiewa tal-parabbola u jrid iżomm kollox għalih. Aħna, għalkemm ma nagħmlux l-ikel aħna, lanqas ma rridu naħlu. Mela meta nieklu, fil-platt inpoġġu dak li aħna żguri li se nieklu u mhux nieħdu ħafna, inħalluh fil-platt, imbagħad jintrema.

Tfal, intom tafu għalfejn xi ħadd jikteb u jibgħat ittra?

Tafu li Papa Franġsiku lilna ġieli jiktbilna ittra u jibgħathielna?

F’waħda minn dawn l-ittri li jisimha Laudato Sì (li tfisser Tkun Imfaħħar), il-Papa jkellimna dwar kif nistgħu nieħdu ħsieb il-ħolqien. Araw dan il-clip flimkien  (ikun hemm bżonn ta’ spjegazzjoni lit-tfal iż-żgħar)

Fl-attività tal-lum hemm xi stampi biex nagħtuhom il-kulur. Meta tlestuhom ħalluhom f’postijiet differenti biex matul din il-ġimgħa tiftakru li għandkom tieħdu ħsieb il-ħolqien li tana Alla. (nota lill-ġenituri/adulti: Hemm stampi oħrajn li jistgħu jpinġu t-tfal, li juru li qegħdin jieħdu ħsieb il-ħolqien, jista’ jkun eżempji li semmew it-tfal stess. Tistgħu ssibu dawn l-istampi mill-internet u jitpoġġew f’postijiet ċentrali biex il-familja tiftakar f’dan id-dmir. Tajjeb li l-membri tal-familja jfakkru lil xulxin biex flimkien kull familja tagħti sehemha u tħalli dinja aħjar).

Waqt li qed tagħtu l-kulur lill-istampi, isimgħu, One World.

Irroddu s-salib.

Grazzi Mulej tal-ħolqien sabiħ li tajtna. Nitolbu biex il-gvernijiet tad-dinja jagħmlu liġijiet biex jipproteġu l-ħlejjaq kollha.  Ġesù għallimna biex nieħdu ħsieb il-ħolqien sabiħ u nieħdu ħsieb xulxin ukoll. Ammen 

Fil-parabbola tal-lum se nisimgħu dwar raġel li kellu għalqa tad-dwieli u kien jieħu ħsiebha ħafna. Meta ġie żmien li ma setax ikompli jieħu ħsiebha, sab xi nies biex jaħdmu huma fl-għalqa tiegħu. Meta l-għeneb kien lest biex jinġabar, il-ħaddiema qatgħuh u żemmewh kollu għalihom, ma riedu jagħtu xejn lis-sid.

Alla jagħtina kwalitajiet sbieħ biex bihom inħobbu u ngħinu lill-oħrajn.

  • Disa’ ċagħqiet
  • Felt pens

Fl-Evanġelju tal-lum, Ġesù jitkellem dwar il-frott. Jgħid “Meta wasal żmien il-frott, bagħat il-qaddejja tiegħu għand dawk il-bdiewa biex jiġbrulu l-frott.” Dan is-sid qisu Alla. Alla lilna jagħtina l-ħila li nikbru u nagħmlu l-‘frott’. Mhux frott bħall-għeneb, banana, tuffiegħ u larinġ! Il-frott tagħna huwa dak kollu li aħna nagħmlu tajjeb. Bl-istess mod li per eżempju fruit salad ikun fih ħafna frott differenti, hemm ħafna affarijiet tajba li aħna nistgħu nagħmlu u bihom nuru kemm inħobbu lil Alla u lill-oħrajn.

Tafu ssemmu xi affarijiet tajba li nistgħu nagħmlu? (ninkoraġġixxu t-tfal biex jitkellmu, u wara dan, l-adulti jistgħu jżidu mal-eżempji).

Tafu li bit-talenti li għandna, aħna nistgħu nuru l-imħabba tagħna lejn l-oħrajn ukoll? X’inhuma xi talenti li għandna? (talenti huma l-kwalitajiet sbieħ li għandna, li jinkludu wkoll affarijiet bħal kant, tpinġija, żfin, daqq ta’ xi strument. Dawn nistgħu nużawhom biex inferrħu lill-oħrajn). Kull darba li nuru imħabba jew nagħmlu xi ħaġa tajba inkunu qegħdin nagħmlu l-‘frott’.

San Pawl, f’waħda mill-ittri tiegħu, lill-Galatin, isemmi l-‘frott’ li jista’ jkun parti mill-karattru tagħna. Dawn huma l-imħabba, l-hena jew il-ferħ, il-paċi jew is-sliem, is-sabar jew il-paċenzja, il-ħniena, it-tjieba, il-fidi, il-ħlewwa jew ġentilezza, ir-rażan.

Waqt li se ngħidu xi ħaġa żgħira fuq kull waħda, aħsbu ftit liema minn dawn il-frott qiegħed jiddeskrivi lilek u liema le.

Meta nħobbu, nkunu lesti li nagħmlu sagrifiċċji biex ngħinu lill-oħrajn.

Il-ferħ li jagħtina Alla ma jiddependix minn dak li għandek jew li tkun akkwistajt. Tfisser li tkun vera, vera kuntent. Tħoss il-ferħ anke meta l-affarijiet ma jiġux kif tixtieq. Dan il-ferħ jiddependi fuq ir-relazzjoni tiegħek ma’ Alla. Meta nafdaw f’Alla inkunu ferħana.

Il-kelma paċi ġġibilna f’moħħna stampa ta’ nuqqas ta’ ġlied jew gwerra. Imma din hija paċi differenti, hija l-paċi li jkollna meta lil Alla nkunu nafuh sew. Meta jkollna din il-paċi nħossuna kalmi.

Kemm għandna paċenzja? Il-paċenzja tfisser li nkunu fil-kju u nistennew li  jmiss lilna, li nistennew jasal il-Milied biex nirċievu r-rigal li nixtiequ. Paċenzja tfisser ukoll li nistennew li t-talb tagħna jkun milqugħ. Santa Monika damet titlob għal ħafna snin biex it-tifel tagħha jsir iħobb lil Alla. Wara ħafna u ħafna snin, it-talb tagħha kien milqugħ. Santa Monika kellha ħafna paċenzja u baqgħet titlob.

Ngħin lill-oħrajn mhux għax nitħassarhom iżda għax inħenn għalihom. Meta nħenn għal xi ħadd inkun nixtieq li l-ħajja tagħhom issir aħjar. Mhux dejjem faċli li nħenn għall-oħrajn, speċjalment meta jagħmluli d-deni.

Li tkun twajjeb tfisser li tkun onest, li tagħmel għażliet tajba u li jiddispjaċik għad-dnub li tagħmel.

Li tkun fidil tfisser li meta tagħmel promise, iżżommu. Tfisser li tibqa’ ħabib anke jekk diffiċli; li tkun persuna li l-oħrajn jafdaw fiha. Tfisser ukoll li tagħmel dak li tagħti kelma li se tagħmlu.

Kemm aħna ġentili mal-oħrajn? Xi drabi nkunu ġentili ħafna mal-ħbieb, iżda ma’ tal-familja nġibu ruħna mod ieħor.

Qatt xi ħadd qalilna, “il-marelli kemm taqbiżlek malajr!” Meta taqbżilna malajr, nuru li ma tantx għandna rażan. Persuna li għandha r-rażan, tkun kalma u l-affarijiet tagħmilhom fil-ħin tagħhom.

Fuq kull ċagħqa niktbu waħda mill-frottiet kif imsemmija minn San Pawl. Kull ġimgħa tintgħażel waħda minn dawn. Titpoġġa f’post fejn il-familja kollha taraha. Tista’ titpoġġa fuq xi ħaġa fejn tiġbed aktar l-attenzjoni. Matul dik il-ġimgħa kulħadd jipprova jgħix aktar dan il-virtù. Bħala familja sibu l-ħin biex titkellmu u taqsmu bejnietkom dak li qegħdin tagħmlu. Żgur li jekk kulħadd jagħmel il-parti tiegħu, il-familja ssir isbaħ u aktar magħquda.

Waqt li tkunu qegħdin tippreparaw ic-cagħaq isimgħu Fruit of the Spirit.

Inroddu s-salib.

Grazzi Ġesù tal-kwalitajiet sbieħ u talenti li tajtna. Tħallinix li nżommuhom għalina biss, imma naqsmuhom mal-oħrajn. Ammen.

1. Fir-rakkont tal-Evanġelju tal-lum, Ġesù jirrakkonta parabbola oħra li titkellem dwar sid li kien jikkultiva bil-qalb il-propjetà tiegħu. X’kellu dan is-sid?

Correct! Wrong!

2. Fir-rakkont, Ġesù jgħid li s-sid bagħat lill-qaddejja tiegħu aktar minn darba biex jiġbru il-frott, iżda l-bdiewa qatluhom. Wara dan, bagħat ukoll lil xi ħadd speċjali biex jiġbor il-frott. Min kien dan?

Correct! Wrong!

3. Ġesù jistaqsi lill-qassisin il-kbar u lix-xjuħ tal-poplu, x’kastig kien se jagħti s-sid lill-bdiewa li kienu qatlu lill-aħħar qaddej li dan bagħat biex jiġbor il-frott. X’weġbuh dawn lil Ġesù?

Correct! Wrong!

4. Dik l-għalqa li tissemma fil-parabbola, ma’ xiex iqabbilha Ġesù?

Correct! Wrong!

Fuljett Ħadd-27Niżżel

Kif tuża din il-paġna

Alla jkellimna b'ħafna modi, inkluż bil-qari mill-Bibbja fil-Quddiesa. Hawnhekk tista' ssib tagħrif u attivitajiet marbuta mal-qari tal-Quddiesa tal-Ħadd u li għandhom jispirawk tgħix kuljum dan il-qari mill-Bibbja.