
Maria Tereża kienet l-unika bint tal-Baruni Benedettu Pisani Mampalao Cuzkeri u Vincenza Carrano. Hija twieldet Napli fid-29 ta’ Diċembru 1806 u tgħammdet fl-istess jum fil-Parroċċa ta’ San Mark f’Pizzofalcone. Missierha kellu t-titlu Malti ta’ Baruni ta’ Frigenuini; ommha kienet Taljana.
Matul ħajjitha kellha ħafna nkwiet fil-familja tagħha. Ommha u missierha kellhom ħafna problemi fiż-żwieġ tagħhom, minħabba li missierha kien jixrob ħafna. Minħabba f’hekk ommha telqet mid-dar u ħalliet it-tifla għand in-nanna tagħha min-naħa ta’ missierha. Maria Tereża kellha 10 snin meta mietet in-nanna u bagħtuha fi skola Napli. Peress li issa ma kellhiex min jieħu ħsiebha, kienet torqod l-iskola.
Imbagħad, missierha kien kkundannat għall-mewt minħabba l-involviment politiku f’rewwixti f’Napli. Iddeportawh Malta peress li kien ċittadin Ingliż.
Fl-1825, hi u ommha ġew jgħixu Malta ma’ xi qraba fir-Rabat imma qatt ma reġgħu għexu flimkien ma’ missierha għax dan baqa’ jgħix kif kien qabel. Tereża qatt ma warrbet lil missierħa; anzi kull meta kienet tiltaqa’ miegħu fit-triq, kienet tieqaf u titolbu jberikha.
Hi baqgħet tirrifjuta t-tentattivi kollha ta’ ommha biex iżżewwiġha. Minkejja l-oppożizzjoni kontinwa mill-familja tagħha, hi wieġbet għas-sejħa tagħha u ngħaqdet mas-Sorijiet Beneditini fil-Monasteru ta’ San Pietru fl-Imdina, fejn għażlet ħajja umli ta’ kastità, talb, xogħol, silenzju u ubbidjenza.
Isimha nbidel għal Maria Adeodata, ċaħdet it-titli, qassmet il-wirt kbir li kellha u żammet biss dak li kien ta’ bżonn għaliha u biex tgħin lill-oħrajn. Fil-monasteru, ix-xogħol l-aktar għall-qalba kien dak li tieħu ħsieb tiftaħ il-bieb ta’ barra. Din ir-responsabbiltà ġabitha f’kuntatt mal-foqra li kienu jiġu jitolbu l-għajnuna, kif ukoll kienet tieħu ħsieb il-kappella għax kienet tagħtiha aktar ħin li toqgħod ħdejn is-Sagrament Mqaddes.
Lejn l-aħħar ta’ ħajjitha, hija serviet ukoll bħala Badessa għal sentejn, żmien li matulu kellha tiffaċċja kunflitti, anke minn membri tal-komunità li fehmu ħażin il-qdusija u l-missjoni tagħha.
Hija mietet fil-25 ta’ Frar tal-1855, fl-età ta’ 48 sena. Ġiet midfuna fil-kripta tal-Monasteru, post li jżuruh ħafna nies biex jitolbu l-interċessjoni tagħha. Il-Papa Ġwanni Pawlu II iddikjaraha Beata Maria Adeodata Pisani fid-9 ta’ Mejju tal-2001.
