Dawl kbir

Il-familja Mqaddsa ta' Ġesù, Marija u Ġużeppi Sena B

Fl-Evanġelju tal-lum ser nisimgħu dwar Marija u Ġużeppi, il-familja ta’ Ġesù. Insejħulhom il-Familja Mqaddsa. Fl-Evanġelji ftit insibu dwar din il-familja, imma fil-ftit li jagħtuna, hemm tagħlim kbir għal kull familja nisranija. Marija u Ġużeppi, jieħdu lit-tarbija Ġesù biex jippreżentawh fit-Tempju. Jiltaqgħu ma’ Xmun u Anna, it-tnejn xjuħ u nies ta’ fidi kbira. 

Marija u Ġużeppi, jobdu l-liġi u kif kien mitlub minnhom jieħdu lil Ġesù u jippreżentawh lil Alla fit-Tempju. Bħala ġenituri nsara, intom ukoll, ippreżentajtu lil uliedkom fil-magħmudija. Din hija ħaġa tajba u pass importanti fil-mixja nisranija. L-aħħar parti tal-Evanġelju hija dik li titfa’ d-dawl fuq kif għandha tkun familja nisranija. Ġesù għadda tfulitu ma’ Marija u Ġużeppi, u magħhom huwa kiber u sar ir-raġel li ħareġ jgħallem lin-nies dwar Alla. Dan juri li s-snin ta’ tfulija fi ħdan il-familja huma snin li jiffurmaw lit-tfal. Il-ġenituri u dawk l-aktar qrib tat-tfal ser jgħinu fil-formazzjoni tal-futur tat-tfal. It-tfal jitgħallmu mill-imġieba u attitudnijiet tal-adulti ta’ madwarhom, jitgħallmu mill-attivitajiet li jieħdu sehem fihom. Il-fidi tat-tfal ser tissaħħaħ bil-mod li l-ġenituri jgħixu l-fidi tagħhom, bil-mod li jitolbu, bil-mod kif ikellmu lit-tfal, bl-eżempju li jagħtu.

Niftakru fir-raba’ kmandament: weġġah lil missierek u lil ommok. Dan mhux kmandament indirizzat lit-tfal biss. Ir-rispett tat-tfal lejn il-ġenituri jiġi mill-attenzjoni, kura u mħabba li jirċievu mingħand il-ġenituri, mis-sagrifiċi li l-ġenituri jagħmlu għalihom. Ġenituri nsara jieħdu ħsieb it-tfal tagħhom għax huma l-edukaturi ewlenin ta’ uliedhom. Huma l-aktar persuni strumentali biex ilaqqgħu lit-tfal ma’ Ġesù. Huma l-ġenituri li jipprovdu għat-tfal, kemm dak li hu materjali, kif ukoll spiritwali. Ovvjament, hemm għajnuna għall-ġenituri, iżda l-għajnuna, anke mill-Knisja, qatt ma tista’ tieħu l-post importanti tal-ġenituri. 

Kulħadd, kull familja u kull ġenitur ser jiltaqa’ ma’ problemi u diffikultajiet. Anke l-Familja Mqaddsa kellha diffikultajiet, mhux kollox kien ward u żahar. Id-differenza għall-familja u ġenituri nsara, hija fejn u għand min, ser jirrikorru għall-għajnuna. Inħallu lill-Mulej Alla jmexxina. Inħalluh jidħol fid-djar tagħna u jsir parti mill-familja tagħna, insiru midħla tal-għajnuniet li toffri l-Knisja, speċjalment fil-parroċċi tagħna, anke fil-formazzjoni nisranija, mhux tat-tfal biss, iżda wkoll għall-adulti.

Qari mill-Evanġelju skont San Luqa (Lq 2, 22-40)

Wara li għalqilhom iż-żmien għall-purifikazzjoni tagħhom skont il-Liġi ta’ Mosè, Marija u Ġużeppi ħadu lil Ġesù Ġerusalemm biex jippreżentawh lill-Mulej, kif hemm miktub fil-Liġi tal-Mulej: “Kull tifel li jitwieled l-ewwel, jiġi kkonsagrat lill-Mulej” – u biex joffru b’sagrifiċċju par gamiem jew żewġ bċieċen, kif jingħad ukoll fil-Liġi tal-Mulej.

F’Ġerusalemm kien hemm wieħed, jismu Xmun, raġel ġust u tajjeb, li kien jistenna l-faraġ ta’ Iżrael u li kellu l-Ispirtu s-Santu fuqu. L-Ispirtu s-Santu kien nebbħu li ma kienx se jara l-mewt qabel ma jara l-Messija tal-Mulej. Mar mela fit-tempju, imqanqal mill-Ispirtu, u xħin il-ġenituri daħlu bit-tarbija Ġesù biex jagħmlulu dak li kienet trid il-Liġi, huwa laqgħu fuq dirgħajh, bierek lil Alla u qal:

“Issa, o Sid, tista’ tħalli l-qaddej tiegħek
imur fis-sliem, skont kelmtek,
għaliex għajnejja raw is-salvazzjoni tiegħek
li int ħejjejt għall-popli kollha,
dawl biex idawwal il-ġnus,
u glorja tal-polpu tiegħek Iżrael”.

Missieru u ommu baqgħu mistagħġba b’dak li kien qiegħed jingħad fuqu. Xmun berikhom, u qal lil ommu Marija: “Ara, dan se jġib il-waqgħa u l-qawmien ta’ ħafna f’Iżrael; se jkun sinjal li jmeruh, – u inti wkoll, sejf jinfidlek ruħek! – biex jinkixfu l-ħsibijiet moħbija fil-qlub ta’ ħafna”.

Kien hemm ukoll waħda profetissa, Anna, bint Fanwel, mit-tribù ta’ Aser. Kienet imdaħħla ħafna fiż-żmien; wara xbubitha kienet għamlet seba’ snin miżżewġa, u mbagħad romlot. Sa ma kellha erbgħa u tmenin sena ma kienet titwarrab qatt mit-tempju, lejl u nhar taqdi lil Alla fis-sawm u t-talb. Dak il-ħin stess waslet, u bdiet trodd ħajr lil Alla u titkellem fuq it-tarbija ma’ dawk kollha li kienu jistennew il-fidwa ta’ Ġerusalemm.

Meta temmew kull ma kellhom jagħmlu skont il-Liġi tal-Mulej reġgħu lura lejn il-Galilija fil-belt tagħhom ta’ Nazaret. U t-tifel baqa’ jikber u jissaħħaħ, mimli bl-għerf. U l-grazzja ta’ Alla kienet fuqu.

Il-Kelma tal-Mulej
Tifħir lilek Kristu

Istruzzjonijiet u għan

  1. Aqra sew l-Evanġelju biex issir midħla tiegħu.
  2. Aħseb dwaru u ara x’qiegħed jgħid lilek personalment. Liema hi l-parti li l-aktar li laqtitek? Għaliex?
  3. Aħseb dwar ir-rwol tiegħek bħala ġenitur, kif tista’ tkun aħjar?
  4. Aħseb dwar ir-rwol tiegħek bħala ġenitur nisrani, kif tista’ tkun aħjar?
  5. L-Ispirtu s-Santu, jgħin lil Xmun biex jagħraf lil Ġesù bħala l-Messija. Fil-magħmudija, aħna nsiru tempji tal-Ispirtu s-Santu. L-Ispirtu s-Santu jgħix fina, qiegħed hemm jistenna biex jagħtina l-għajnuna tiegħu. Itlob lill-Ispirtu s-Santu biex jgħinek u jagħ
  6. Itlob Salm 121
    Nerfa’ għajnejja lejn l-għoljiet; mnejn se tiġini l-għajnuna?
    L-għajnuna tiegħi mingħand il-Mulej, li għamel is-sema u l-art.
    Ma jħalli qatt li riġlek jogħtor; ma jongħosx dak li jħarsek.
    Ara, la jongħos u lanqas jorqod dak li jħares lil Iżrael.
    Il-Mulej hu dak li jħarsek; il-Mulej hu d-dell tiegħek fuq lemintek.
    Ma tolqtokx ix-xemx binhar, anqas il-qamar billejl.
    Iħarsek il-Mulej minn kull deni; hu jħarislek ħajtek.
     Il-Mulej iħarsek fil-ħruġ u d-dħul tiegħek, minn issa u għal dejjem.
  7. Flimkien bħala familja sibu ħin u post biex taqraw dan l-Evanġelju. L-ambjent jgħin ukoll, għalhekk qabel ma tibdew, fejn ser tiltaqgħu ppreparaw:
    i. Bibbja bil-qari minn San Luqa(2, 22-40);
    ii. Il-presepju
    iii. Xemgħa
    iv. Il-mejda fejn hemm il-Bibbja, miksija bi drapp abjad;
    iv. Computer/laptop bil-qari u clips
  8. Mur fil-parti tat-tfal skont l-etajiet u għamilha flimkien magħhom
  9. Addatta din il-parti skont kif hemm bżonn, tiddejjaqx tkun kreattiv 😊
  10. Mur fil-parti tal-Prayer Spaces għall-mument ta’ talb flimkien bħala familja.

Intom ġieli rajtu r-ritratti tal-magħmudija tagħkom? Fil-magħmudija, il-ġenituri tagħkom ħadukom il-knisja biex intom issiru parti mill-familja ta’ Alla. Il-ġenituri tagħkom iħobbukom, u jafu li huwa importanti li tkunu parti mill-familja ta’ Alla, għalhekk għamdukom meta kontu għadkom żgħar ħafna. Il-ġenituri ta’ Ġesù, kienu jħobbuh ħafna wkoll. Għalhekk, meta kien għadu tarbija, huma ħadu lil Ġesù fit-Tempju biex jippreżentawh lil Alla.

  • Ġesù kien tifel bħalna u kien iħobb u jobdi lill-mama u papa tiegħu
  • Ħabel twil

Wara li Marija u Ġużeppi ħadu lil Ġesù fit-tempju, huma reġgħu marru lura d-dar. Ġesù baqa’ jgħix ma’ Marija u ma’ Ġużeppi għal ħafna snin. Hu kien tifel bravu u kien jobdi lill-ġenituri tiegħu. Kien jgħin lil Ġużeppi fix-xogħol ta’ mastrudaxxa u Ġesù tgħallem ħafna mingħandu. Kien jgħin lil Marija fix-xogħol tad-dar, kien imur magħha sal-bir biex iġibu l-ilma. Ġesù kien jilgħab ma’ sħabu u kien jitgħallem mingħand il-ġenituri tiegħu. Marija kienet tgħallmu ħafna dwar Alla, kienet tgħallmu li Alla jħobbu u jgħinu, kienet tgħallmu jitlob. Marija, Ġużeppi u Ġesù kienu jmorru s-sinagoga, kif intom tmorru l-knisja mal-ġenituri tagħkom. 

Intom tridu tkunu bħal Ġesù?
Ġesù, kien iħobb u jobdi lil Marija u lil Ġużeppi u minħabba li kien iħobbhom u jobdihom, hu kien ferħan ukoll.

Tfal, intom bħal Ġesù? Tkunu aktar ferħanin meta tħobbu u tobdu lill-mama u lill-papa? Meta ma nobdux, ma nkunux ferħanin, lanqas il-mama u l-papa ma jkunu ferħanin. Meta nkunu ferħanin inħossuna, li qisu il-mama u l-papa qegħdin jgħannquna l-ħin kollu. Madanakollu, meta nagħmlu xi ħaġa ħażina, jew meta ma nobdux, qisna ersaqna ’l bogħod minnhom u huma ma jistgħux jibqgħu jgħannquna. 

X’jiġri meta jiddispjaċina?
Meta jiddispjaċina u ngħidu sorry, aħna nerġgħu nkunu ferħana, aħna nerġgħu nersqu qrib tal-mama u tal-papa u jerġgħu jgħannquna waħda kbira.

Ser nagħmlu logħba biex naraw kif inħossuna meta ma nobdux u kif inkunu ferħana mal-ġenituri tagħna meta nħobbuhom u nobduhom.

Bil-ħabel, għamlu ċirku kbir. Kulħadd joqgħod fiċ-ċirku. Xi ħadd mill-ġenituri jagħti eżempji ta’ mġieba tajba u mġieba ħażina tat-tfal. Meta jingħata eżempju ta’ mġieba tajba, kulħadd jibqa’ fiċ-ċirku u l-ġenituri jgħannqu lit-tfal. Meta jingħata eżempju ta’ mġieba ħażina, it-tfal joħorġu miċ-ċirku. Meta jgħidu sorry, jistgħu jidħlu lura fiċ-ċirku u jitgħannqu mal-ġenituri. Tajjeb li l-eżempji jittieħdu mill-ħajja tat-tfal, biex it-tfal jistgħu jiddentifikaw magħhom. Ukoll jistgħu jifhmu għalfejn qegħdin jitolbu skuża. 

Xi eżempji li jistgħu jintużaw huma dawn, kif għidna, aktar ma jkunu qrib l-imġieba tat-tfal, aktar aħjar.

Meta nasal lura mill-iskola, jew il-mama u l-papa jaslu lura mix-xogħol, nitlaq li nkun qed nagħmel u mmur nagħtihom bewsa
Nilgħab ma’ ħuti
Nitlob mal-mama u l-papa
Nistaqsi lill-mama jew lill-papa qabel ma nieħu l-ħelu mill-cupboard
Ngħid grazzi lill-mama jew lill-papa, għall-ikel li sajru
Nagħti lill-kelb jiekol u jixrob

Nirrabja u nsabbat saqajja meta l-mama u l-papa ma jixtrulix dak li rrid
Immur nilgħab meta l-mama tistaqsini biex niġbor il-ħwejjeġ mill-kamra tiegħi
Ngħid lill-papa li għandi uġigħ ta’ żaqq, meta mhux vera, imma ma għandix aptit immur ngħinu jaħsel il-platti
Ngħid kelma pastaża
Il-mama u l-papa mhux qegħdin fil-kamra, immur nieħu l-ħelu, mingħajr ma nistaqsihom
Barra kienet ix-xita, nibqa’ dieħel id-dar mingħajr ma nimsaħ saqajja u nagħmel il-passi ma’ kullimkien

Irroddu s-salib.

Grazzi Ġesù tal-familja tiegħi. Grazzi Ġesù li tajtni familja li tħobbni u tieħu ħsiebi. Ġesù nixtieqek li tbierek lil (kulħadd isemmi xi persuna mill-familja). Għinna Ġesù biex inħobbu aktar lil xulxin. Ġesù, aħna nħobbuk ħafna.

Inkantaw, Baby Jesus we love you.

Wasal il-Milied u ċċelebrajna t-twelid ta’ Ġesù f’Betlehem. Fiż-żmien ta’ meta twieled Ġesù, il-ġenituri Lhud, wara erbgħin ġurnata li titwieled it-tarbija, kienu jmorru fit-tempju biex jippreżentawha lil Alla. Fl-Evanġelju tal-lum, naraw kif Marija u Ġużeppi jobdu din il-liġi u jmorru t-tempju. Hemmhekk jiltaqgħu ma’ Xmun u Anna. B’dak li jgħidu dawn iż-żewġt ixjuħ, iħallu ħafna ħsibijiet għaddejjin minn moħħ il-ġenituri ta’ Ġesù.

  • Ġesù sar bniedem u trabba f’familja bħalna

  • Printout taċ-chatterbox
  • Kuluri
PrintoutNiżżel

Wara li Marija u Ġużeppi  ppreżentaw lil Ġesù fit-Tempju, huma marru lura flimkien id-dar tagħhom u Ġesù kiber magħhom. Marija u Ġużeppi kienu jħobbuh ħafna lil Ġesù u kienu jgħallmuh dak kollu li kienu jafu. Marija u Ġużeppi, kienu wkoll iħobbu ħafna lil Alla, għalhekk anke lil Ġesù, kienu jgħallmuh dwar Alla, kienu jitolbu flimkien u jmorru s-Sinagoga. Il-familja ta’ Ġesù ma kinitx sinjura, fil-fatt meta jippreżentaw lil Ġesù, il-ġenituri tiegħu “joffru par gamiem jew żewġ bċieċen.” Din kienet l-offerta tal-fqar, is-sinjuri kienu joffru ħaruf.

Kif taħsbu li kienet it-tfulija ta’ Ġesù?
X’kien jagħmel Ġesù bħala tifel?
Taħsbu li kien imqareb?
Kien jobdi?
Kien jitlob?
X’taħsbu li tgħallem mingħand Marija u mingħand Ġużeppi?
Intom x’tgħallimtu mingħand il-ġenituri tagħkom?

Ġesù, kien tifel bravu. Kien jobdi u jirrispetta lill-ġenituri tiegħu. Intom tafuhom il-kmandamenti? Tafu liema hu r-raba’ kmandament? (Weġġah lil missierek u lil ommok, jiġifieri ħobb u rrispetta lill-ġenituri tiegħek).

Ġesù, żgur li dan il-kmandament kien jobdih. Il-kmandamenti mhumiex hemm biex jenfassizzaw dak li aħna nagħmlu ħażin, imma biex jgħinuna ngħixu b’mod li nkunu ferħanin. Aħna nafu li meta nagħmlu għażliet ħżiena, ma nibqgħux ferħana. Il-kmandamenti jfakkruna f’dak li għandna nagħmlu biex inkunu ħbieb ma’ Alla u mal-oħrajn. Il-ħbiberija ġġib magħha ferħ u paċi.

Intom x’tistgħu tagħmlu biex tobdu dan il-kmandament? Kif turu li tħobbu u tirrispettaw lill-ġenituri tagħkom u lil dawk li jieħdu ħsiebkom?

Fl-attività ta’ din il-ġimgħa ser nagħmlu chatterbox. Din ser tgħinna niftakru kif nistgħu nħobbu u nobdu lill-ġenituri aktar. Matul din il-ġimgħa, kuljum staqsu lill-mama jew lill-papa, jagħżlu numru miċ-chatterbox u matul dik il-ġurnata agħmlu dak li hemm miktub. Ippruvaw ftakru liema numri għażiltu, biex matul din il-ġimgħa tkunu għamiltuhom kollha. 

Biex tagħmlu ċ-chatterbox, tistgħu taraw dan il-clip.

Qegħdin fiż-żmien tal-Milied, sakemm tkunu qegħdin tagħmlu din l-attività, isimgħu dawn: 
Jesus Saviour of the world
Jump for joy
Do you hear what I hear
Born is the King, it’s Christmas
Joy to the world
O come all ye faithful
Sent from above

Irroddu s-salib.

Ġesù, nitolbuk tbierek lill-familja tagħna. Agħmel li nħobbu lil xulxin dejjem aktar. Nixtiequ wkoll nitolbu għal familji oħra (kulħadd isemmi tipi ta’ familji li jixtieq jitlob għalihom, per eżempju familji fejn hemm il-mard, fejn hemm il-faqar, fejn hemm nuqqas ta’ mħabba)

Grazzi Ġesù li inti tħobbna ħafna u sirt tifel bħalna.

1. Fl-Evanġelju tal-lum, naqraw li Ġużeppi u Marija ħadu l-Ġesù fit-Tempju biex jippreżentawh lill-Mulej. X'kien jismu dak ir-raġel li ħa t-tarbija fuq dirgħajh filwaqt li faħħar lill-Mulej?

Correct! Wrong!

2. X'kienet l-ewwel reazzjoni ta' Marija u ta' Ġużeppi għad-diskors li beda jingħad dwar Ġesù?

Correct! Wrong!

3. Waqt il-preżentazzjoni tal-Mulej, kien hemm ukoll profetessa li għarfet il-kobor tat-tarbija li Marija u Ġużeppi marru jippreżentaw. X'kien jisimha din il-mara?

Correct! Wrong!

4. Din is-silta tintemm billi San Luqa jgħidilna li t-tfajjel Ġesù kellu fuqu....

Correct! Wrong!

Dalwaqt.

Kif tuża din il-paġna

Alla jkellimna b'ħafna modi, inkluż bil-qari mill-Bibbja fil-Quddiesa. Hawnhekk tista' ssib tagħrif u attivitajiet marbuta mal-qari tal-Quddiesa tal-Ħadd u li għandhom jispirawk tgħix kuljum dan il-qari mill-Bibbja.