Ejjew warajja

It-3 Ħadd ta’ Matul is-Sena B

Il-lum ser nisimgħu dwar is-sajd! Qatt xi ħadd minnkom mar jistad? Biex tkun sajjied tajjeb, ma taqbadx tqum u tiddeċiedi li ser tmur tistad. Is-sajjied jipprepara sew, ilesti l-qasba jew ix-xbiek u nases u s-snanar, iħejji l-lixka u l-għalf li ser juża. Qabel xejn jara t-temp, jiddeċiedi liema post l-aħjar li jmur. Jekk ser juża d-dgħajsa, irid jara li din hija ppreparata wkoll. Mhux kulħadd jitwieled sajjied. Wieħed irid jitgħallem kif jistad, jitgħallem fejn huma l-aħjar postijiet għas-sajd u meta hu l-aħjar ħin u żmien.

Ġesù jsejjaħ lil Xmun u lil Indrì biex isiru sajjieda tal-bnedmin. Din is-sejħa jagħmilha lilna wkoll. Bħal sajjied li jitgħallem u jħejji ruħu għal sajda, aħna wkoll irridu nitgħallmu u nħejju ruħna biex nimxu wara Ġesù u nkunu dixxipli tiegħu. L-ewwel ħaġa li rridu nkunu nafu hu l-messaġġ li rridu nwasslu. Dan il-messaġġ insibuh fil-Bibbja. Tant huwa importanti li nsiru midħla tal-Bibbja, li ftit tas-snin ilu, Papa Franġisku ddikjara t-tielet Ħadd tas-Sena (jiġifieri dan il-Ħadd, il-lum) bħala l-Ħadd tal-Kelma ta’ Alla. Irridu nsiru nafu lil Ġesù personalment, qabel ma nistgħu nwassluh lill-oħrajn. Eżerċizzji bħal Lectio Divina, tgħin biex insiru aktar familjari mal-Kelma ta’ Alla. Nisimgħu b’attenzjoni l-qari u l-omelija ta’ nhar ta’ Ħadd. Jekk irridu nidħlu aktar fil-fond, irridu wkoll nirrikorru għall-Katekiżmu tal-Knisja Kattolika, fejn wieħed isib dak kollu li għandu x’jaqsam mat-tagħlim nisrani. Ċertament, laqgħat ta’ formazzjoni nisranija huma ta’ għajnuna kbira.

Minbarra li wieħed ikun jaf il-messaġġ li jrid iwassal, irid ikun jaf lil min ser iwassal dan il-messaġġ. Bħala ġenituri, intom fid-dover li l-ewwel u qabel kollox twasslu dan il-messaġġ lill-uliedkom. Irid jitwassal b’mod li jifhmuh, għalhekk bi kliem addattat skont l-età tagħhom. 

Fis-sajd trid ħafna paċenzja. Ġieli tara sajjieda bilqegħda fuq xi pont, bil-qasba f’idhom u jibqgħu hemm għal ħin twil, ma jiċċaqalqux, jistennew xi ħuta taqbad il-lixka. Bl-istess mod, biex inwasslu l-messaġġ ta’ Ġesù, rridu ħafna paċenzja. Ix-xhieda u l-perseveranza tagħna tista’ tkun il-lixka li għandhom bżonn.

Ġesù għażel lill-appostli, kif illum jagħżel lilna. L-appostli ma għażilhomx għax kienu xi għorrief tal-Iskrittura, jew kienu jgħaddu l-ħin kollu tal-ġurnata fit-Tempju jitolbu. Kienu nies sempliċi, x’aktarx il-maġġoranza tagħhom bla skola, żgur li kienu midinba. Li jista’ jkun li kellhom differenti kienet fit-tweġiba li taw lil Ġesù. Meta Ġesù sejħilhom, telqu kollox u marru miegħu. Aħna, jista’ jkun naħsbuha darbtejn, għax l-affarijiet u l-attivitajiet li mlejna ħajjitna bihom, huma aktar għal qalbna milli s-sejħa ta’ Ġesù.

L-Evanġelju jibda bi kmand mingħand Ġesù. Ġesù jrid li nindmu. Meta tindem, mhux biss jiddispjaċik ta’ dak li għamilt ħażin, imma wkoll ikun hemm deċiżjoni li tinbidel. Ikun hemm deċiżjoni li ssir aktar skont dak li jixtieq Alla. Il-bidla li saret fl-appostli kienet kbira ferm. Huma telqu dak kollu li kellhom biex imorru wara Ġesù. Aħna mhux qed inkunu mistennija nagħmlu bidla radikali bħal din, imma x’inbiddlu għall-aħjar hemm żgur.

Qari mill-Evanġelju skont San Mark (Mk 1, 14-20) 

Wara li arrestaw lil Ġwanni, Ġesù mar il-Galilija jxandar l-Evanġelju ta’ Alla u jgħid: “Iż-żmien huwa mitmum, u s-Saltna ta’ Alla waslet; indmu u emmnu fl-Evanġelju”.

Waqt li kien għaddej ma’ xatt il-baħar tal-Galilija, lemaħ lil Xmun u ’l ħuh Indrì qegħdin ikalaw ix-xbiek fil-baħar, għax kienu sajjieda. U Ġesù qalilhom: “Ejjew warajja, u nagħmel minnkom sajjieda tal-bnedmin”. U minnufih telqu x-xbiek, u marru warajh.

Wara li mexa ftit ieħor ra lil Ġakbu ta’ Żebedew u lil ħuh Ġwanni fid-dgħajsa qegħdin isewwu x-xbiek, u minnufih sejħilhom. U huma telqu lil missierhom Żebedew fid-dgħajsa mal-lavranti, u marru warajh.

Il-Kelma tal-Mulej
Tifħir lilek Kristu

Istruzzjonijiet u għan

  1. Aqra sew l-Evanġelju biex issir midħla tiegħu.
  2. Aħseb dwaru u ara x’qiegħed jgħid lilek personalment. Liema hi l-parti li l-aktar li laqtitek? Għaliex?
  3. Aħseb dwar kif qattajt dawn l-aħħar ġranet. Sibt ħin għal Alla u biex tħobb u tgħin lill-oħrajn? Forsi tgħid li għandek wisq x’tagħmel, bejn ix-xogħol, tfal u dar, ma għandekx ħin. Għas-sajjied, is-sajd huwa importanti ħafna u jagħmel sagrifiċċji kbar biex jaqbad il-ħut. Għan-nisrani, Alla huwa l-aktar importanti, u bħas-sajjied, irridu nagħmlu sagrifiċċji biex insiru nafuh u nħobbuh.
  4. Li tindem tfisser li jiddispjaċik għal dak li għamilt u jkun hemm deċiżjoni li tinbidel. X’qiegħed jitolbok Alla li tbiddel bħalissa?
  5. Flimkien bħala familja sibu ħin u post biex taqraw dan l-Evanġelju. L-ambjent jgħin ukoll, għalhekk qabel ma tibdew, fejn ser tiltaqgħu ppreparaw:
    i. Bibbja bil-qari minn San Mark (1, 14-20);
    ii. Xemgħa
    iii. Il-mejda fejn hemm il-Bibbja, miksija bi drapp aħdar
    iv. Xibka (tista’ tkun tal-frott), printouts tal-ħuta (waħda għal kull membru tal-familja), kulħadd jikteb ismu fuq waħda mill-ħut. Dawn il-ħut jiddendlu max-xibka
    v. Computer/laptop bil-qari u clips
  6. Mur fil-parti tat-tfal skont l-etajiet u għamilha flimkien magħhom
  7. Addatta din il-parti skont kif hemm bżonn, tiddejjaqx tkun kreattiv 😊
  8. Mur fil-parti tal-Prayer Spaces għall-mument ta’ talb flimkien bħala familja

Il-ġimgħa l-oħra kantajna Come follow me. Il-lum ser inkomplu nitgħallmu dwar x’irridu nagħmlu biex inkunu ħbieb ta’ Ġesù u nimxu warajh.

  • l-ħbieb ta’ Ġesù jagħmlu għażliet tajba
  • Printouts tal-għażliet tajba u għażliet ħżiena
  • 2 kaxex żgħar fejn jitpoġġew il-kards tal-għażliet
  • Stampi ta’ Ġesù
Għażliet tajbaNiżżel
Għażliet ħżienaNiżżel
Stampa ta’ Ġesù ferħanNiżżel
Stampa ta’ Ġesù jibkiNiżżel

Smajna kif Xmun, Indrì, Ġakbu u Ġwanni ħallew dak li kienu qegħdin jagħmlu, biex imorru jgħixu ma’ Ġesù. Taħsbu li kienet faċli għalihom li jagħmlu dan? Huma telqu x-xogħol li kellhom, lill-familja, lill-ħbieb. Ma baqgħux jgħixu fid-dar li kellhom!

Tafu x’kien ix-xogħol tagħhom? (sajjieda)
X’jagħmel sajjied? (jaqbad il-ħut)

Lil Xmun u lil Indrì, Ġesù qalilhom li ser jagħmilhom sajjieda tan-nies! Dan x’ried jgħid Ġesù? Għalfejn riedhom jaqbdu lin-nies?

Ġesù ma ridhomx jaqbdu lin-nies u jeħduhom x’imkien. Wara li għadda ż-żmien u huma saru jafu aktar lil Ġesù, indunaw x’ried ifisser Ġesù meta qalilhom li ser isiru sajjieda tal-bnedmin. Ġesù, l-ewwel għallem lil dawn il-ħbieb tiegħu. Ma kienx hemm dawn l-erba’ biss. Ġesù għażel tnax, u lil dawn il-ħbieb ta’ Ġesù, aħna nsejħulhom appostli jew dixxipli. Ġesù għallimhom kemm iħobbhom Alla, kemm Alla jixtieq jgħinhom. Urihom ukoll xi tfisser li tħobb lil Alla. Urihom u għallimhom li huma kellhom iħobbu u jgħinu lill-oħrajn. Ġesù għallimhom kif kellhom jgħixu biex jogħġbu lil Alla. Wara li miet Ġesù, dawn il-ħbieb tiegħu komplew jgħallmu, jgħinnu u jħobbu lin-nies, kif kien urihom Ġesù. B’hekk huma saru sajjieda tal-bnedmin!

Meta aħna nagħmlu dak li jixtieq Ġesù, aħna wkoll inkunu qegħdin nogħġbu u nħobbu lil Alla.

Smajtu kif Xmun, Indrì, Ġakbu u Ġwanni, mill-ewwel obdew lil Ġesù? Intom mill-ewwel tobdu dak li jgħidulkom?

Bil-fors kien hemm xi ħaġa speċjali ħafna f’Ġesù biex obdew mal-ewwel!

Lilna Ġesù mhux jistaqsina biex nitilqu mid-dar jew biex ma nibqgħux immorru l-iskola. Aħna xorta ser jibqa’ jkollna d-dar, il-familja, il-ħbieb. Madanakollu Ġesù, jixtieq li ma nagħmlux xi affarijiet u minflok nagħmlu oħrajn u b’hekk inkunu qegħdin inħobbuh u nixmu warajh. Ġesù jixtieq li nobdu lill-ġenituri, li ma nissuppervjawx, li nħobbu lill-oħrajn u ma ngħidux kliem li jweġġaħhom. Ġesù jixtieq li ma noqgħodux nilgħabu l-ħin kollu u li parti minn dan il-ħin nużawh biex naqraw, nisimgħu jew naraw ġrajjiet mill-Bibbja jew biex nitkellmu miegħu u nitolbu. Il-Ħadd, Ġesù jieħu gost ħafna jarana l-knisja mal-familja tagħna u li nġibu ruħna sew. 

Ħa naraw x’nistgħu nagħmlu matul din il-ġimgħa biex nuru li nħobbu lil Ġesù u li bħal Xmun, Indrì, Ġakbu u Ġwanni, aħna wkoll irridu nimxu warajh.

Nota lill-ġenituri dwar l-attività: ipprintjaw il-paġna tal-għażliet tajba u ħżiena u aqtgħuhom biex ikollkom 16-il għażla tajba u 16-il għażla ħażina; ħawduhom, tħalluhomx tajbin għalihom u ħżiena għalihom. Ipprintjaw l-istampi ta’ Ġesù: waħda Ġesù ferħan u l-oħra Ġesù imnikket. Dawn l-istampi ta’ Ġesù waħħluhom mal-kaxex. Aqraw l-għażliet, waħda waħda, lit-tfal. Agħtuhom ċans jaħsbu f’liema kaxxa ser ipoġġu dik l-għażla. Jekk hija għażla tajba, titpoġġa fil-kaxxa fejn hemm Ġesù ferħan. Jekk hija għażla ħażina, titpoġġa fil-kaxxa l-oħra, fejn hemm l-istampa ta’ Ġesù mnikket.

Wara din l-attività nisimgħu u nkantaw: There were twelve disciples.

 L-actions għal din is-song tistgħu ssibuhom hawn.

Irroddu s-salib.

Grazzi Ġesù talli tħobbna ħafna. Grazzi li inti tridna li nkunu ħbieb tiegħek u nimxu warajk. Ġesù, aħna nħobbuk ukoll, imma xi drabi ma jirnexxilniex nagħmlu dak li tixtieq inti, xi drabi ma nkunux tfal bravi. Jiddispjaċina Ġesù ta’ meta (it-tfal isemmu xi ħaġa li huma għamlu ħażin, tista’ tkun xi ħaġa milli ssemmiet fl-attività). Grazzi Ġesù li inti tħobbna u taħfrilna u tibqa’ dejjem ħabib tagħna.

Fl-Evanġelju tal-lum ser nisimgħu dwar xi nies li s-sajd kien ix-xogħol tagħhom. Dan kien il-mod li jaqilgħu l-flus biex jgħixu huma u l-familji tagħhom. Darba jiltaqgħu ma’ Ġesù, li jgħidilhom biex imorru miegħu. Bilfors li f’Ġesù raw xi ħaġa speċjali ħafna, għax telqu dak li kienu qegħdin jagħmlu u marru miegħu.

  • Ġesù jistedinna biex nimxu warajh u nkunu dixxipli tiegħu
  • Karti vojta – daqs ta’ A4, waħda għal kulħadd
  • Lapsijiet
  • Imqass
  • Dekorazzjonijiet u kuluri
  • Stampa tas-sajjieda
Stampa tas-sajjiedaNiżżel

Li tkun dixxiplu ta’ Ġesù tfisser li żżomm lil Ġesù bħala l-mudell tal-ħajja tiegħek, li tħobbu u tagħmel dak li jixtieq hu. Ifisser ukoll li twassal lill-oħrajn għand Ġesù, biex il-ferħ u l-imħabba li jagħtik hu ma żżommhomx inti biss, imma wkoll twassalhom għand oħrajn. Id-deċiżjoni ta’ Xmun, Indrì, Ġakbu u Ġwanni kienet waħda kbira, li bidlitilhom ħajjithom ta’ taħt fuq. Lilna Ġesù qed jitlobna wkoll nagħmlu pass, forsi mhux kbir daqs tal-ewwel dixxipli. Hu jixtieqna li kuljum nagħżlu li nimxu warajh u bl-eżempju tagħna, oħrajn jitħajru jimxu warajh ukoll. 

Xmun, Indrì, Ġakbu u Ġwanni telqu x-xbiek u x-xogħol tagħhom, telqu lil missierhom u marru wara Ġesù. X’taħsbu li ġalhom jitilqu kollox ta’ daqs tant malajr u jmorru warajh?

Forsi kienu diġà semgħu dwar Ġesù. Forsi kienu diġà semgħuh jgħallem, jew semgħu lil Ġwanni l-Battista jitkellem dwaru, għalhekk riedu jsiru jafuh aktar (bħalma rajna fl-Evanġelju tal-ġimgħa l-oħra). Kienet x’kienet ir-raġuni, huma ħallew warajhom lill-familja tagħhom u x-xogħol tagħhom. Għamlu dan għax indunaw li Ġesù kien ħafna aktar importanti minn dak kollu li kellhom.

Lilna wkoll jistedinna biex nimxu warajh u biex inkunu dixxipli tiegħu. Aħna x’nistgħu nagħmlu biex nimxu wara Ġesù? Dawn l-appostli għażlu li jagħmlu xi ħaġa oħra, differenti minn dak li kienu qegħdin jagħmlu. X’ser nagħmlu differenti matul din il-ġimgħa biex nogħġbu aktar lil Ġesù? Bħala eżempju, nistgħu minflok naraw xi programm favorit, naqraw ġrajja mill-Bibbja jew inkella naraw xi ġrajja mill-Bibbja; minflok ma nilgħabu nistgħu nistaqsu lill-mama jew lill-papa kif nistgħu ngħinuhom; minflok ma nirrabjaw jew ngħidu xi gidba, nieqfu u f’qalbna ngħidu lil Ġesù li nħobbuh u nistaqsu, kieku Ġesù kien minfloki x’kien jagħmel?; minflok ma nċemplu lil sħabna li għadna kif konna magħhom l-iskola, inċemplu lil xi ħabib li ilu ma jiġi l-iskola, jew lin-nanniet jew zijiet li ilna ma nkellmuhom.

Għal dawn l-appostli, Ġesù kien l-aktar importanti fil-ħajja. Ħallew kollox u kulma kellhom biex jissieħbu miegħu. Ġesù lilna mhux qiegħed jistaqsina biex inħallu l-familja tagħna, imma jixtieq li aħna wkoll niddeċiedu li npoġġuh l-ewwel f’ħajjitna. Ġesù jixtieq li nħobbuh u ngħixu kif jgħallimna hu. Ġesù ma jħalliniex waħedna. Bl-istess mod kif is-sajjied ikollu x-xbiek, il-lixka u affarijiet oħra biex jgħinuh, lilna Ġesù tana l-Bibbja, l-Ispirtu s-Santu, is-sagramenti, it-talb u l-Knisja biex lilna jgħinuna nimxu warajh.

Neħħu ż-żraben u l-kalzetti. Poġġu saqajkom fuq il-karta u penġu madwar is-sieq. Aqtgħuha biex ikollkom il-forma ta’ saqajkom. Fuq din iktbu isimkom u iktbu wkoll dak li ser tagħmlu matul din il-ġimgħa biex turu li tixtiequ togħġbu lil Ġesù u tridu timxu warajh. (Din hija attività għall-familja kollha u mhux biss għat-tfal). Min jixtieq jista’ jiddekora s-sieq qabel ma jitwaħħlu kollha mal-fridge, biex kuljum kulħadd jiftakar fil-wegħda li għamel.

Waqt li qegħda ssir din l-attività, isimgħu The twelve disciples song.

It-talba tal-lum ser tkun maqsuma f’żewġ partijiet. Bħalma Ġesù sejjaħ lill-appostli biex isiru sajjieda tal-bnedmin, hekk ukoll għadu jsejjaħ oħrajn anke illum, biex iwasslu t-tagħlim tiegħu u jressqu oħrajn lejh. Żgur li sa issa kien hemm numru ta’ nies li lilek kellmuk dwar Ġesù u għallmuk dwaru. Fuq l-istampa tas-sajjieda, ikteb isem dawn in-nies.

Fl-evanġelju Ġesù qalilna biex nindmu. Parti mit-talba ser tkun li nitolbu skuża ta’ dak li għamilna ħażin. Sib ħin matul din il-ġimgħa biex tmur tqerr.

Irroddu s-salib.

Grazzi Ġesù li inti sejjaħtilna biex nimxu warajk. Grazzi li inti ma tħalliniex waħedna imma tagħtina l-għajnuna u nies biex jgħallmuna dwarek. Illum nixtiequ nitolbu għal (kulħadd isemmi dawk in-nies li kiteb isimhom fuq l-istampa tas-sajjieda). 

Nixtiequ wkoll ngħidulek li jiddispjaċina ta’ dawk id-drabi li għażilna li ma nimxux warajk u għamilna dak li lilek ma jogħġbokx. Nitolbuk taħfrilna. (mument ta’ skiet biex kulħadd jaħseb dwar għażliet ħżiena li għamel f’dawn l-aħħar ġranet).

Tingħad l-Att tal-Indiema.

Grazzi Mulej li inti dejjem lest li taħfrilna. Għinna biex nagħmlu għażliet tajba kuljum. Ammen.

1. L-Evanġelju tal-lum, jibda billi jgħid li xi ħadd kien ġie arrestat. Min kien dan?

Correct! Wrong!

2. Ġesù ħareġ jippriedka l-messaġġ li....

Correct! Wrong!

3. Eżattament wara li sejjaħ lil Xmun u lil ħuħ Indrì, Ġesù sejjaħ ukoll lil...

Correct! Wrong!

4. Dawn id-dixxipli kienu sajjieda iżda Ġesù għamilhom xi ħaġa oħra. X'kienet din?

Correct! Wrong!

Fuljett Ħadd-03Niżżel

Kif tuża din il-paġna

Alla jkellimna b'ħafna modi, inkluż bil-qari mill-Bibbja fil-Quddiesa. Hawnhekk tista' ssib tagħrif u attivitajiet marbuta mal-qari tal-Quddiesa tal-Ħadd u li għandhom jispirawk tgħix kuljum dan il-qari mill-Bibbja.