Wasalna fir-Raba’ Ħadd tar-Randan. Dan il-Ħadd insejħulu Dominica Laetare, jiġifieri Ħadd immarkat mill-ferħ . Għalkemm għadna fi żmien ta’ penitenza u ċaħda, f’nofs ir-Randan, il-Knisja tfakkarna li għandna għalfejn nifirħu, il-qawmien tal-Mulej mill-mewt huwa fil-qrib!
L-Evanġelju tal-lum għandu messaġġ ta’ ferħ. L-imħabba ta’ Alla għalina hija tant kbira, li ma jrid lil ħadd jintilef. Alla jrid lil kulħadd, hu min hu, hu minn fejn hu, li jgawdi l-ħajja ta’ dejjem. Tant hija xewqa kbira ta’ Alla, li huwa bagħat lil Ibnu stess biex jurina kif għandna ngħixu. Ġesù miet mewta ħarxa biex isalvana. Biex nifhmu fi kliem eħfef, xi tfisser li Ġesù fdiena bil-mewt tiegħu, hemm storja dwar żewġt iħbieb.
Kienu dejjem flimkien fi ċkunithom, imma meta kibru ħadu toroq differenti. Wieħed laħaq imħallef, u l-ieħor iżda sar kriminal. Darba dan tal-aħħar jispiċċa l-qorti quddiem sieħbu, li issa kien imħallef. L-imħallef ħass għafsa ta’ qalb jara lil sieħbu hemmhekk, iżda l-ġustizzja riedet tingħata u jagħtih is-sentenza li kien ħaqqu. Kif tispiċċa s-seduta, l-imħallef imur ħdejn sieħbu u jħallaslu hu l-penali li kien ingħata. B’hekk, għax kien iħobbu, ħallas hu għal dik is-sentenza meta hu ma kien ħati ta’ xejn.
Għax Alla huwa mħabba, ma jridx li jikkundannana. Hu jrid li ħadd ma jintilef. Ladarba Alla huwa mħabba, huwa jagħtina l-libertà tal-għażla. Dan l-Evanġelju jagħtina kuraġġ u tama. Għamilna x’għamilna, huma kbar kemm huma kbar id-dnubiet tagħna, Ġesù jibqa’ dawl għalina. Jekk irridu, iżda nistgħu nagħżlu li nibqgħu nimxu fid-dlam. Alla dejjem jibqa’ joffrielna l-maħfra. Aħna kollha dgħajfin u għandna l-limitazzjonijiet tagħna. Dan m’għandux jaqtgħalna qalbna. Meta nħarsu lejn il-kurċifiss, ninduaw x’imħabba kbira għandu Alla għalina. Jekk inħalluh, nisimgħu lil Ġesù jgħidilna “Jien batejt il-mewt għalik ukoll, jien inħobbok, jien naħfirlek.” Inħallu lil Ġesù jkun id-dawl tat-triq tagħna. Ma niddejqux li nikxfu quddiemu l-għażliet ħżiena tagħna, ma nħallux in-nuqqasijiet tagħna jżommuna fid-dlam u ‘l bogħod mill-ħniena ta’ Alla.
L-Evanġelju tal-lum huwa dwar l-imħabba kbira ta’ Alla, u nitgħallmu aktar għalfejn Ġesù sar bniedem bħalna.
- Alla jħobbna
- Ġesù ma jħalliniex waħedna
- Ġesù huwa dawl li ma jħalliniex nimxu fid-dlam
L-Evanġelju tal-lum mhux ħafif biex nifhmuh. Madanakollu, Ġesù jgħidilna li hu se imut fuq is-salib, biex aħna wkoll, xi darba, nistgħu ngħixu miegħu fil-Ġenna. Ġesù, sar bniedem bħalna, għax Alla jħobbna ħafna.
Intom tfal, qatt kontu f’xi kamra waħedkom fid-dlam? Kif ħassejtukom?
Mhux ħaġa sabiħa li tkun waħdek fid-dlam, hux hekk? Tippreferu li tkunu ma’ xi ħadd li tħobbu u f’xi post li hemm id-dawl fih. Ġesù, ġie fid-dinja, biex ikun bħal dawl għalina. Illum Ġesù qiegħed jgħidilna, li hu jrid ikun id-dawl li jurina t-triq. Meta aħna niddeċiedu li nagħmlu xi għażla ħażina, lil Ġesù qisna qed ngħidulu, li ma rridux nimxu fit-triq li qiegħed jurina hu. Meta nagħmlu għażla ħażina, inkunu nixtiequ li ħadd ma jaraha. Jekk kontu waħedkom f’xi kamra u kissirtu vażun li hu favorit tal-mama, x’inhi l-ewwel ħaġa li tiġikom f’moħħkom? Li taħbuh? Meta taħbi xi ħaġa, tkun qisek poġġejtha f’post fid-dlam, fejn ħadd ma jista’ jaraha, u hekk ma jarax dak li tkun għamilt!
Ġesù, hekk qiegħed jgħidilna. Qed jgħidilna, li meta aħna nagħżlu li nagħmlu xi ħaġa ħażina, qisna nitfu d-dawl biex ħadd ma jara dak li għamilna! Imma Ġesù iħobbna ħafna, hu ma jridx li aħna nkunu fid-dlam. Ġesù jixtieq, li meta aħna nagħmlu xi ħaġa ħażina, mhux naħbuha, imma jiddispjaċina u ngħidu sorry, filwaqt li nippruvaw li ma nerġgħux nagħmlu din l-istess ħaġa darb’oħra.
Alla ma jħallinix waħedna, la meta nagħmlu dak li hu tajjeb u lanqas meta nagħżlu li nagħmlu xi ħaġa ħażina. Hu dejjem jixtieq li nagħmlu dak li hu tajjeb, jagħtina l-għajnuna u jurina kif għandna nagħmlu għażliet tajba.
L-attività tal-lum ser tgħinkom tiftakru kemm iħobbkom Alla. Bl-għajnjuna tal-ġenituri tagħkom aqtgħu l-forom mill-printout. Biex tkun aktar soda, jew ipprintjawha mal-ewwel fuq kartonċina, inkella tistgħu twaħħluha fuq kartonċina. Wara aqtgħuha. Aqtgħu wkoll dik il-linja bit-tikek. Fil-qalb vojta ikteb ismek. Għamel it-toqob fejn indikat. Penġi wiċċek jew waħħal ritratt. Agħti l-kulur l-istampa ta’ Alla, tiegħek u lill-qlub. Għaddi spaga jew żigarelli mit-toqob tal-qlub u dendilhom mal-istampa ta’ Alla. Poġġi l-istampa tiegħek, f’dik il-linja fejn kien hemm it-tikkek, biex Alla jħaddnek miegħu. Dendel din l-istampa tiegħek u ta’ Alla fil-kamra tiegħek, biex kull darba li taraha tiftakar li Alla jħobbok, u ma hu ser iħallik waħdek qatt.
Nisimgħu God loves me u niktakru, biex qabel ma norqdu, naħsbu dwar dak li għamilna matul il-ġurnata, ngħidu sorry lil Alla ta’ dawk l-għażliet ħżiena li għamilna u norqdu kuntenti għax nafu li Alla jħobbna u qiegħed magħna.
Fl-Evanġelju tal-lum, Ġesù qiegħed jitkellem ma’ Nikodemu, dwar l-imħabba ta’ Alla. U jagħtih raġuni għalfejn hu sar bniedem bħalna.
- Alla jħobb lil kulħadd
- L-imħabba ta’ Alla ma tinbidilx
Taf min hu Nikodemu,
ir-raġel, li kien qiegħed jitkellem miegħu Ġesù?
Hawnhekk tistgħu taqraw dwar min kien Nikodemu.
Nistgħu aħna nkejlu l-imħabba ta’ xi ħadd?
Nistgħu nqisu jew nikkalkulaw l-imħabba li għandhom il-mama u l-papa għalina?
Nistgħu nuru b’numru kemm aħna nħobbu lill-mama u lill-papa?
Allura jekk ma nistgħux inkejlu l-imħabba jew niżnuha, kif inkunu nafu kemm xi ħadd iħobbna?
Intom kif tafu li l-mama u l-papa jħobbukom?
Intom kif turu lill-mama u lill-papa, li tħobbuhom?
Alla lilna jħobbna ħafna. Tant iħobbna li Ġesù, iben Alla, sar bniedem bħala. Alla ma kellux għalfejn isir bniedem. Sar bħalna biex jurina b’mod ċar kif irridu ngħixu. Ġesù kien iħobb u jgħin lil kulħadd, qatt ma għamel xejn ħażin. Ken hemm nies li lil Ġesù ma kienux iħobbuh u għalhekk qatluh. Ġesù miet fi tbatija kbira għaliex sallbuh mas-salib. Minkejja dan, nafu li Ġesù ma baqax mejjet, għax wara tlett ijiem, Ġesù qam mill-mewt.
Dalwaqt niċċelebraw din il-festa kbira. Meta mortu l-quddies illum, indunajtu li l-qassis kien liebes differenti? X’kulur kien liebes? Illum il-kulur liturġiku huwa roża (jista’ jkun li fejn mortu quddies intom, il-qassis kien liebes vjola, għax mhux bilfors jilbes ir-roża). F’din il-ġimgħa, l-Knisja tuża dan il-kulur biex niftakru li dalwaqt se niċċelebraw il-festa tal-Għid.
Meta Ġesù bata, miet u qam mill-mewt, Ġesù tana rigal kbir ħafna. Jekk aħna nħobbu lil Ġesù u nagħmlu dak li jixtieq hu, meta xi darba mmutu, aħna mmorru ħdejh fil-Ġenna. Kemm iħobbna Alla biex għamel dan kollu għalina!
Qabel ma twieled Ġesù, kien hemm ħafna nies li urew lill-oħrajn kemm Alla jħobbhom u kif jixtieq li jgħixu. Naqraw dwar dawn in-nies fil-Bibbja, speċjalment fil-parti li nsejħulha t-Testment il-Qadim.
Tafu ssemmu xi nies fost dawn? (Abraham, Mosè, Ġużeppi, David, Isaija)
Għalkemm dawn in-nies kienu tajbin u kienu jħobbu lil Alla, ma setgħux jagħtuna dan ir-rigal kbir li tana Ġesù, jiġifieri li nkunu nistgħu mmorru l-Ġenna.
Meta Ġesù sar bniedem bħalna, hu wriena kif għandna ngħixu. Hu wriena li għandna naħfru u li għandna nitolbu skuża. Fl-Evanġelju tal-lum, Ġesù jqabbel lilu nnifsu mad-dawl. Meta aħna nagħmlu xi ħaġa ħażina, meta aħna nagħmlu dnub, qisna għażilna li nimxu fi triq kollha dlam, għax meta nagħmlu dnub, aħna ma nibqgħux qrib Ġesù, il-ħabib tagħna. Imma meta jiddispjaċina u ngħidu sorry, imorru nqerru u nippruvaw li ma nerġgħux nagħmlu dak id-dnub. Hekk nerġgħu nsiru ħbieb ma’ Ġesù, u nkunu qisna mixjin fi triq kollha dawl.
L-attività tal-lum ser nagħmluha biex tfakkarna fl-imħabba ta’ Alla. Mill-kartonċina aqtgħu strixxa twila. Mill-bqija aqtgħu 11-il qalb, ta’ daqs differenti. Qabel ma taqtgħuhom aqraw x’ser tikbtu fil-qalb. Bl-għajnuna tal-ġenituri tagħkom, ser tfittxu dawn il-kwotazzjonijiet mill-Bibbja. Dawn mhumiex il-kwotazzjonijiet kollha li juru li Alla jħobbna, hemm ħafna aktar! Kull kwotazzjoni ser tiktbuha fuq waħda mill-qlub. Wara tistgħu tagħtu l-kulur lill-qlub u anke lill-istrixxa tal-kartonċina. Taqbu l-qlub minn fuq u dendluhom bl-ispaga. Taqbu l-istrixxa tal-kartonċina u orbtuhom magħha. Jekk tridu tistgħu anke torbtu qalb ma’ oħra. Meta tkunu lesti għandkom hanging mobile, u tkunu tistgħu ddendluha fil-kamra tagħkom. (Minflok strixxa mill-kartonċina, tistgħu torbtu żewġt izkuk flimkien, biex jiffurmaw salib. Biex jidhru sbieħ, dawruhom b’suf kulurit, u l-qlub dendluhom ma’ dawn iz-zkuk). Meta tiddubitaw mill-imħabba ta’ Alla, aqraw waħda minn dawn il-kwotazzjonijiet.
Dawn huma l-kwotazzjonijiet li ser tfittxu u tiktbu:
Ġwanni 3, 16
Ġwanni 16, 27
1 Ġwanni 3, 1
1 Ġwanni 4, 7
1 Ġwanni 4, 10-11
Rumani 8, 38-39
Lhud 13, 5
Salm 86, 15
Salm 139,5
Isaija 54, 10
Lamentazzjonijiet 3, 22
Waqt li tkunu qegħdin tagħmlu din l-attività, isimgħu God’s love is big.
1. Fl-Evanġelju tal-lum, Ġesù jiltaqa' ma' personaġġ partikolari. Min kien dan il-personaġġ?
2. Ġesù qal li Alla bagħat lil Ibnu fid-dinja biex bih hija...
3. Skont Ġesù, il-bnedmin żbaljaw u għalhekk...
4. Min jagħmel is-sewwa, qal Ġesù, jersaq lejn...
Dwar
L-għan ta’ bekids.mt hu li joffri formazzjoni kateketika komprensiva għat-tfal u għall-adolexxenti li qegħdin jippreparaw biex jirċievu s-sagramenti.
