Ġesù jiltaqa’ ma’ Żakkew

Naqraw

Luqa 19, 1-10 

¹Ġesù daħal Ġeriko u kien għaddej mit-triq. ²Mela jkun hemm raġel, jismu Żakkew; dan kien wieħed mill-kapijiet tal-pubblikani, u kien għani. ³Kellu xewqa li jara min kien Ġesù, imma ma setax minħabba l-folla, billi kien raġel qasir. ⁴Għalhekk mar jiġri ’l quddiem u xxabbat ma’ siġra tat-tin selvaġġ, għax minn dik in-naħa kien se jgħaddi. ⁵Ġesù, kif wasal hemm, ħares ’il fuq u qallu: “Żakkew, isa, inżel minn hemm, għax illum jeħtieġli noqgħod għandek.” ⁶Dak niżel bla telf ta’ żmien, u kollu ferħan laqgħu għandu. ⁷In-nies, meta rawh, ilkoll bdew igemgmu bejniethom u jgħidu li għand wieħed midneb daħal jistrieħ. ⁸Imma Żakkew, wieqaf, qal lill-Mulej: “Ara, Mulej, nofs ġidi se nagħtih lill-foqra, u jekk jien qarraqt b’xi ħadd irroddlu għal erba’ darbiet iżjed.” ⁹Qallu Ġesù: “F’din id-dar illum daħlet is-salvazzjoni, għax dan ir-raġel ukoll huwa bin Abraham. ¹⁰Għax Bin il-bniedem ġie jfittex u jsalva l-mitluf.”

Nitolbu

Għażiż Alla, Ġesù kien jaf lil Żakkew b’ismu. Grazzi li inti taf ismi wkoll. Grazzi li taf isimna lkoll u żżommna fi ħdanek. Ammen. 

Ngħixu

Bħal Mattew, Żakkew kien pubblikan. Żakkew ta l-flus li kien seraq lura u l-bqija tahom karità.  

Illum agħti flus għall-karità. 

Attività