Il-Mulej qam tassew minn bejn l-imwiet. Hallelujah!
Il-lum niċċelebraw l-akbar festa tal-Knisja. Ġesù qam mill-mewt, huwa rebbiegħ u lilna qed jimliena bit-tama li aħna wkoll għad inqumu mill-mewt u ngawdu l-glorja tal-ġenna. Ħasra li l-pandemija, tista’ għal sena oħra ttellifna minn din it-tama. Snin oħra, l-Għid ġab miegħu għaqda, iċ-ċelebrazzjonijiet fil-knisja u purċissjonijiet u ġiri bil-vara ta’ Kristu rxoxt, familji jiltaqgħu u jieklu flimkien, xiri ta’ rigali u preparazzjonijiet ta’ ħelu bħall-figolli u bajd tal-Għid. Din is-sena kollox ser isir b’restrizzjonijiet kbar. Minkejja dan, huwa sewwa li niftakru li fil-fatt, dak li qegħdin niċċelebraw illum ma nbidel xejn minnu. Ġesù huwa l-messaġġ ċentrali u l-ebda pandemija ma tista’ tbiddel dan. Fil-fatt jista’ jkun li hija grazzja, li minħabba li ma kellniex ħafna ġenn, ġiri u preparazzjonijiet, stajna ngħixu r-Randan b’mod forsi aktar sinifikattiv u llum nistgħu niċċelebraw l-Għid b’aktar twemmin.
Fl-Evanġelju tal-lum, skont San Ġwann, naraw id-diżappunt ta’ Marija ta’ Magdala, Pietru u d-dixxiplu l-ieħor (li skont it-tradizzjoni, kien San Ġwann). Ġesù kien tkellem magħhom diversi drabi, li hu kien ser iqum mill-mewt, imma dan ma fehmuhx. Kieku fehemu, meta marru u sabu l-qabar vojt, kienu jwaqqgħu d-dinja bl-għajjat ta’ ferħ tagħhom. Minflok, infixlu! Jaraw il-faxex u l-maktur. X’jaqbdu jaħsbu? Jekk serqu l-ġisem ta’ Ġesù, qagħdu jneħħu l-faxex bil-galbu u jitwu l-maktur? L-Evanġelju jgħidilna li d-dixxiplu l-ieħor, ‘ra u emmen’. Imma x’emmen fil-fatt?
Fil-qari tal-ġimgħat li ġejjin, ser naraw, kif anke, jekk dakinhar l-appostli kienu għadhom ma fehmux u ma emmnux li Ġesù qam mill-mewt, permezz ta’ dawk id-drabi li Ġesù reġa ltaqa’ magħhom qabel it-tlugħ tiegħu fis-sema, huma neħħew kull dubju li qatt seta’ kellhom. Dan il-fatt, lilna jimliena bit-tama wkoll. Il-fidi hija rigal u biex tikber fina l-fidi irridu nikbru fl-għarfien tagħna ta’ Ġesù u tat-tagħlim tal-Knisja. L-appostli emmnu li Ġesù qam mill-mewt, meta wara li sabu l-qabar vojt, kellhom numru ta’ laqgħat oħra miegħu. Aħna wkoll, il-laqgħat personali tagħna ma’ Ġesù, ser ikabbru l-fidi tagħna. Aktar ma tikber u tissaħħaħ ir-relazzjoni tagħna ma’ Ġesù, aktar ser tikber il-fidi tagħna. Għalhekk, ma nemmnux għax smajna testimonjanza ta’ ħaddieħor biss, iżda nemmnu għax il-fiduċja tagħna f’Ġesù u l-wegħdiet tiegħu jsiru realtà. Jekk ninterpretaw il-parti tal-Evanġelju tal-lum, “daħal hu wkoll, ra, u emmen” li fil-fatt dan id-dixxiplu emmen li Ġesù, qam mill-mewt, dak li għenu biex jemmen, kienet l-imħabba li kellu għal Ġesù. Din l-imħabba ġegħlitu jiġri aktar u jasal l-ewwel wieħed ħdejn il-qabar, u għenitu wkoll, biex jara u jemmen li Ġesù qam mill-mewt.
Għalhekk, jekk inħossu li bħalissa l-fidi tagħna hija xi ftit dgħajfa, Ġesù qiegħed jerġa’ jagħtina opportunità oħra. Matul il-ġimgħat li ġejjin, jerġa’ jistedinna biex nimxu miegħu, biex inħalluh jidħol fil-ħajja tagħna u jagħtina t-tama. Matul dawn il-ġimgħat ngħaqqdu t-talba tagħna ma’ dik tal-missier li kellu lill-ibnu maħkum mix-xitan, u li talab hekk lil Ġesù: “Jiena nemmen! Għinni fil-fidi nieqsa tiegħi.” (Mk 9, 24) Nilqgħu wkoll l-istedina li kien għamel Papa Franġisku: “Nistieden lil kull Nisrani, biex iġedded illum stess il-laqgħa personali tiegħu ma’ Ġesù Kristu jew, tal-inqas, biex jieħu deċiżjoni li jħalli lilu [lil Ġesù] jiltaqa’ miegħu. M’hemm ebda raġuni għaliex wieħed għandu jaħseb li din l-istedina mhix għalih, għax ‘ħadd mhu eskluż mill-ferħ li jġib il-Mulej’.” (Evangelii Gaudium, 3)
Coming soon.