Il-Familja Mqaddsa

Il-Familja Mqaddsa ta’ Ġesù, Marija u Ġużeppi

Jekk qatt kont x’imkien u tliftu lit-tfal, dan il-mument żgur terġgħu tiftakruh kif tisimgħu l-Evanġelju tal-lum. Kif iddur u ma tarax lit-tfal, speċjalment jekk dawn huma żgħar, taqbdek ansjetà kbira u paniku sħiħ u ma tikkalmax sakemm issibhom. U meta ssibhom ir-reazzjoni tiegħek tant tkun waħda mħawwda, tħoss ferħ kbir li sibthom u li huma ma ġralhom xejn, tħoss rabja kemm għalik li ma ndunajtx li m’għadhomx miegħek, kif ukoll, rabja għalihom li telqu minn ħdejk u ma tkunx taf hux ser tgħannaqhom miegħek jew iċċanfarhom. Dawn x’aktarx huma l-emozzjonijiet li ħassew Marija u Ġużeppi kif indunaw li Ġesù ma kienx magħhom. Meta sabuh, Ġesù kien kalm u kważi kważi mistgħaġeb għalfejn huma kienu nkwetaw daqshekk. L-istess kif jiġri lilna jekk insibu lit-tfal mehdijin, iħarsu lejn xi ġugarelli li jixtiequ. Meta ssibhom iħarsu lejk, b’dik il-ħarsa li trid tgħid “Ħeqq ma tafx li jien qed nara dawn it-toys!” Qishom iridu jgħidu “Fejn aktar nista’ nkun, jekk mhux hawnhekk?” X’taqbad tagħmel?

Marija u Ġużeppi tilfu lil Ġesù, fittxewh u sabuh. Aħna lil Ġesù sibnieh? Ġesù huwa parti mill-ħajja tagħna ta’ kuljum, jew infittxuh biss meta jkollna bżonnu? Ġesù lilna qatt ma jitlifna, huwa dejjem magħna. Huwa aħna li nitbiegħedu minnu. Fejn infittxuh lil Ġesù aħna? Fejn niltaqgħu miegħu? It-talb u l-qari tal-Bibbja, huma għajnuniet ewlenin minn fejn għandna nibdew. 

F’dan l-Evanġelju minbarra li naraw li Marija u Ġużeppi kienu fidili u ubbidjenti għal-liġi ta’ Alla, Ġesù kien ubbidjenti wkoll lejn il-ġenituri tiegħu. Hu jmur lura magħhom Nazaret u jkompli “jikber fl-għerf, fis-snin u fil-grazzja.” Aħna nikbru fis-snin għax jgħaddi ż-żmien minn fuqna, iżda l-maturità fl-għerf u fil-grazzja tiġi minn Alla u mill-koperazzjoni tagħna miegħu. Tajjeb li bħala ġenituri, illum tieħdu l-okkazzjoni biex tirriflettu kemm qegħdin tgħinu lit-tfal biex jikbru fl-għerf u fil-kwalitajiet sbieħ li huma mżejna bihom. Ftakru li l-familja hija msejħa wkoll “Knisja Domestika”, jiġifieri l-famija hija l-post fejn wieħed jikber fil-fidi, fl-imħabba tiegħu lejn Alla u lejn il-proxxmu, fejn wieħed jitgħallem jagħmel għażliet tajba u għażliet li jgħinnuh jikber f’nisrani u ċittadin tajjeb.

Qari mill-Evanġelju skont San Luqa (Lq 2, 41-52) 

Ta’ kull sena l-ġenituri ta’ Ġesù kienu jmorru Ġerusalemm għall-festa tal-Għid. Meta kellu tnax-il sena telgħu wkoll, skont id-drawwa ta’ dik il-festa. Wara li għaddew dawk il-ġranet qabdu t-triq lura, imma t-tfajjel Ġesù baqa’ Ġerusalemm bla ma kienu jafu l-ġenituri tiegħu. Huma ħasbuh qiegħed ma’ xi wħud li kienu fit-triq magħhom; iżda meta wara jum mixi fittxewh fost qrabathom u n-nies li kienu jafuhom, ma sabuhx, u għalhekk reġgħu lura Ġerusalemm ifittxuh.

Wara tlitt ijiem sabuh fit-tempju, bilqiegħda f’nofs l-għalliema, jismagħhom u jistaqsihom; u kull min semgħu baqa’ mistagħġeb bid-dehen u t-tweġibiet tiegħu. Kif rawh, instamtu, u ommu qaltlu: “Ibni, dan għaliex għamiltilna hekk? Ara, missierek u jiena konna qegħdin infittxuk b’qalbna maqsuma”. U hu qalilhom: “U għaliex kontu qegħdin tfittxuni? Ma tafux li jiena għandi nkun f’dak li hu ta’ Missieri?”. Iżda kliemu ma fehmuhx.

Imbagħad niżel magħhom u raġa’ mar Nazaret; u kien jobdihom. U ommu kienet tgħożż f’qalbha dawn il-ħwejjeġ kollha. U hekk Ġesù baqa’ jikber fl-għerf, fis-snin u fil-grazzja, quddiem Alla u quddiem il-bnedmin.

Il-Kelma tal-Mulej
Tifħir lilek Kristu

Istruzzjonijiet u għan

  1. Aqra sew l-Evanġelju biex issir aktar familjari miegħu.
  2. Aħseb dwaru u ara x’qiegħed jgħid lilek personali. Liema hi l-parti li l-aktar li laqtitek? Għaliex?
  3. Li titlef lit-tfal u għal xi ħin ma ssibhomx hija trawma, iżda hija akbar, jekk it-tfal jitilfu t-triq u jagħmlu għażliet li ma jkunulhomx ta’ ġid la għar-ruħ u lanqas għall-ġisem. Itlob lil Familja Mqaddsa biex tipproteġi lit-tfal tiegħek u tmexxihom fit-triq it-tajba.
  4. L-ebda familja ma hi xempju tal-Familja Mqaddsa. Iżda kull familja nisranija għandna timmira li ssir dejjem aktar tixbaha. Iddiskutu bħala familja, kif tistgħu ssiru aħjar. X’tistgħu tagħmlu biex issiru tixbhu aktar lil Marija, lil Ġużeppi u lil Ġesù?
  5. Marija u Ġużeppi huma ppreżentati bħala familja Lhudija li kienu fidili għal-liġi ta’ Alla u dmirijiet Lhud. Il-fidi nisranija hija parti integrali mill-familja u mill-ħajja tiegħek, jew tħares lejha bħala xi obligu li trid tosserva?
  6. Flimkien bħala familja sibu ħin u post biex taqraw dan l-Evanġelju. L-ambjent jgħin ukoll, għalhekk qabel ma tibdew, fejn ser tiltaqgħu ppreparaw:
    i.  Bibbja bil-qari minn San Luqa (2, 41-52)
    ii. Xemgħa kbira bajda
    iii. Il-mejda fejn hemm il-Bibbja, miksija bi drapp abjad
    iv. Computer/laptop bil-qari u clips
  7. Mur fil-parti tat-tfal skont l-etajiet u għamilha flimkien magħhom
  8. Addatta din il-parti skont kif hemm bżonn, tiddejjaqx tkun kreattiv 😊
  9. Mur fil-parti Itlob id-dar għall-mument ta’ talb flimkien bħala familja

Illum ser nisimgħu dwar x’għamel Ġesù meta kellu tnax-il sena u mar flimkien ma’ Marija u Ġużeppi fit-Tempju ta’ Ġerusalemm. Ejjew nisimgħu x’ġara.

Dalwaqt.

  • Ġesù jgħallimna li rridu nobdu lill-ġenituri tagħna u wriena li meta nitolbu u nitkellmu ma’ Alla, aħna nkunu ferħanin.
  • Ritratt tal-familja tiegħek
  • Printout tal-attività fuq kartonċina
  • Dekorazzjonijiet
  • Lapsijiet tal-kulur
PrintoutNiżżel

X’ġara llum? Xi ġralhom Marija u Ġużeppi? (tilfu lil Ġesù)

Intom qatt intliftu?

X’ħassejtu meta ma rajtux lill-mama u lill-papa?

X’qalulkom meta sabukom?

Illum smajna kif meta kellu tnax-il sena, Ġesù mar Ġerusalemm mal-familja tiegħu. Huma kienu jgħixu Nazaret u kellhom jimxu t-triq kollha. Din it-triq kienet twila ħafna. Kienu jimxu għal xi erba’ jew ħamest ijiem! Kienu jimxu kollha flimkien, ġenituri, tfal, zijiet, nanniet, ħbieb. Huma marru Ġerusalemm biex jiċċelebraw il-festa ta’ meta Alla ħeles lil-Lhud mill-Eġittu. Tiftakruha intom l-istorja ta’ Mosé u kif bl-għajnuna ta’ Alla hu ħeles lil-Lhud?

Wara li kienu jibqgħu Ġerusalemm għal xi ġranet, jiċċelebraw din il-festa, kienu jerġgħu lura lejn Nazaret bil-mixi. Kienu jkunu grupp kbir ħafna. Ġesù ma kienx għadu tifel żgħir, allura ma kellux bilfors jimxi mal-ġenituri tiegħu, seta’ jimxi mal-ħbieb. Għalhekk Marija u Ġużeppi ma ndunawx mal-ewwel li Ġesù ma kienx hemm. Kif indunaw, inkwetaw ħafna u mal-ewwel marru lura jfittxuh.

Kieku tintilfu intom, x’taħsbu li jagħmlu l-papa u l-mama? Jinkwetaw ħafna bħal Marija u Ġużeppi, hux hekk? Wara ħafna, Marija u Ġużeppi, sabu lil Ġesù. Tiftakru fejn sabuh? (fit-Tempju)

Ġesù kien iħobbu ħafna lil Alla l-Missier u għalhekk meta sabuh, Ġesù ma kienx qed jibża’, ma kienx qiegħed jibki, anzi kien kuntent jitkellem mal-għalliema tat-Tempju. Ġesù kien kuntent għax kien fit-Tempju, fid-dar ta’ Alla. Ġesù nduna li l-ġenituri tiegħu kienu nkwetati ħafna, u hu mar magħhom u baqa’ jgħix magħhom, jobdihom u baqa’ jitgħallem u jikber u jħobb lil Alla u lil kulħadd. 

Illum rajna li Ġesù kien tifel bħalkom u kellu familja li tħobbu. Meta kien jitkellem ma’ Alla l-Missier, żgur li kien jirringrazzjah li tah lill-Madonna u lil San Ġużepp biex iħobbuh u jieħdu ħsiebu. Intom tgħidulu grazzi lil Alla, talli tagħkom il-mama u l-papa? Intom titolbuh lil Alla biex jieħu ħsieb il-mama u l-papa?

Illum ser twaħħlu ritratt tal-familja tagħkom fuq il-printout ta’ din il-ġimgħa. Wara li twaħħluh, imxu minn fuq it-tikkek bil-lapsijiet tal-kulur biex it-talba tkun tidher aħjar. Jekk tixtiequ ddekkoraw madwar ir-ritratt. Żommu dan ir-ritratt bit-talba, ħdejn Ġesù Bambin, u meta tgħaddu minn ħdejh, ftakru għidulu grazzi tal-familja tagħkom.

Għalkemm fl-Evanġelju tal-lum, Ġesù għandu 12-il sena, xorta waħda għadna fiż-żmien tal-Milied. Għalhekk morru quddiem Ġesù Bambin u għidulu li tħobbuh waqt li tkantawlu, Baby Jesus we love you.

Inroddu s-salib.

Grazzi Ġesù tal-familja tiegħi. Nitolbok tieħu ħsiebhom u tagħtihom l-għajnuna biex huma jkunu ġenituri bħall-Madonna u San Ġużepp. Ġesù nitlob għal dawk it-tfal li ma għandhomx familja li tħobbhom, biex huma jsibu min jieħu ħsiebhom u jħobbhom xorta waħda. Grazzi Ġesù.

Introduzzjoni

Illum niċċelebraw il-Festa tal-Familja Mqaddsa, jiġifieri l-familja ta’ Ġesù. Fl-Evanġelju tal-lum naraw kif din il-familja kienet taqdi d-dmirijiet tagħha u tobdi l-liġi ta’ Alla. Ġesù kellu tnax-il sena. Ejjew nisimgħu x’ġara meta mar mal-familja tiegħu Ġerusalemm.

Dalwaqt.

  • Ġesù jgħallimna li għandna nirrispettaw u nobdu lill-ġenituri tagħna
  • Għandna nitolbu lil Alla biex inġibu ruħna, bħalma ma kien jagħmel Ġesù
  • Kartonċina 
  • Ritratt ta’ kull membru tal-familja
  • Kuluri u dekorazzjonijiet
  • Lapes
PrintoutNiżżel

Għalfejn Ġesù mar mal-familja tiegħu Ġerusalemm? (marru biex jiċċelebraw il-Festa tal-Għid)

Kemm kellu żmien Ġesù? (tnax-il sena)

X’ġara meta Marija u Ġużeppi qabdu t-triq lura lejn Nazaret? (Ġesù ma marx magħhom, baqa’ fit-Tempju)

X’għamlu Marija u Ġużeppi meta ndunaw li Ġesù ma kienx magħhom? (marru lura jfittxuh)

Tfal, ftakru li Marija u Ġużeppi ma ndunawx mal-ewwel li Ġesù ma kienx magħhom, mhux għax huma ma kienux qegħdin jagħtu kasu, imma f’dak iż-żmien huma kienu jmorru minn post għal ieħor bħala parti minn grupp kbir ta’ nies. Għalhekk, minħabba li Ġesù kellu tnax-il sena, huwa seta’ jimxi jew ma’ ommu u n-nisa l-oħra, jew mal-irġiel jew inkella ma’ sħabu. 

Fejn sabu lil Ġesù? (fit-Tempju)

X’kien qiegħed jagħmel Ġesù? (kien qiegħed jisma’ lill-għalliema u jitkellem magħhom)

Kieku intom intliftu u l-ġenituri tagħkom damu ftit biex isibukom, x’kont tħossu?

Meta sabu lil Ġesù ma kienx imbeżża’. Għalfejn taħsbu li Ġesù ma kienx imbeżża’ u nkwetat? (Ġesù kien fit-Tempju, fid-dar ta’ Alla, u hemmhekk kien jaf li ma kien ser jiġrilu xejn)

Ġesù baqa’ fit-Tempju jew mar mal-ġenituri tiegħu? (Ġesù obda lill-ġenituri tiegħu u mar lura magħhom Nazaret)

Ġesù mar lura Nazaret għax kien iħobb u jirrispetta lill-ġenituri tiegħu. Meta aħna nħobbu lill-familja tagħna u l-familja tagħna tħobb lilna, inkunu qegħdin ngħinu lil xulxin biex nikbru f’persuni aħjar. Intom tafu li mhux dejjem faċli li tobdu lill-ġenituri tagħkom, u lanqas ma hi faċli għall-ġenituri tagħkom biex dejjem jagħmlu dak li hu tajjeb. Imma jekk titolbu lil Ġesù, hu jgħinkom biex bħala familja tagħmlu għażliet tajba. 

L-Evanġelju jispiċċa u jgħid li “Ġesù baqa’ jikber fl-għerf, fis-snin u fil-grazzja.” Kienet il-familja tiegħu li għenet lil Ġesù jikber, bħalma l-familja tagħkom tgħin lilkom. Kif tgħinkom tikbru l-familja tagħkom? (ikollokom ikel sustanzjuż, jibgħatukom l-iskola, titħarrġu fl-isport u f’attivitajiet oħra, titlobu, taqraw mill-Bibbja, jibgħatukom għad-duttrina, tmorru l-knisja…)

Fl-attività tal-lum ser twaħħlu r-ritratti tal-membri tal-familja tagħkom fuq kartonċina. Ħallu ftit spazju bejn ritratt u ieħor. Ħdejn kull ritratt iktbu kif din il-persuna tgħinek biex tikber fl-għerf, fis-snin u fil-grazzja. Jekk ikun ritratt ta’ ħutek iżgħar, ikteb kif inti tgħin lilhom biex jikbru fil-għerf, fis-snin u fil-grazzja.  Fuq in-naħa ta’ isfel tal-kartonċina, ikteb talba lil Ġesù u rringrazzjah tal-familja tiegħek u itolbu jgħinek tobdi lill-ġenituri tiegħek.
Minħabba li għadna fiż-żmien tal-Milied, u aħna nafu li Ġesù jħobbna ħafna, waqt li qegħdin tagħmlu din l-attività, isimgħu, When love was born.

Inroddu s-salib.

Mulej Alla, illum niċċlelebraw il-festa tal-Familja Mqaddsa. Għin lill-familja tiegħi biex bejnietna dejjem ikun hemm l-imħabba u l-paċi, li ngħinu lil xulxin u nikbru fl-għerf, fis-snin u fil-grazzja. Dan nitolbuh, f’isem Ibnek Ġesù Kristu Sidna. Ammen.

Aħbar TajbaNiżżel

Kif tuża din il-paġna

Alla jkellimna b'ħafna modi, inkluż bil-qari mill-Bibbja fil-Quddiesa. Hawnhekk tista' ssib tagħrif u attivitajiet marbuta mal-qari tal-Quddiesa tal-Ħadd u li għandhom jispirawk tgħix kuljum dan il-qari mill-Bibbja.