Il-ħajja ta’ dejjem

19-il Ħadd ta' Matul is-Sena

Dan il-Ħadd ukoll qegħdin inkomlu nisimgħu l-Evanġelju skont San Ġwann, id-diskors li jagħmel Ġesù fejn iqabbel lilu nnifsu mal-ħobż. Illum Ġesù jmexxina pass ieħor u jdaħħalna aktar fil-fond ta’ dan il-misteru. Illum Ġesù jerġa’ jħeġġiġna biex nemmnu dak li qiegħed jgħid. Hu jaf li ma nistgħux nifhmu dak li qiegħed jerġa jtenni llum, “Jiena hu l-ħobż il-ħaj, li niżel mis-sema. Jekk xi ħadd jiekol minn dan il-ħobż jgħix għal dejjem. U l-ħobż li jiena nagħti huwa ġismi għall-ħajja tad-dinja.” Ġesù jrid li naċċettaw li hu jista’ jsalvana u jagħtina l-ħajja ta’ dejjem. 

Ġesù jaf, li aħna bħal-Lhud nistaqsu u jiġuna d-dubji. Meta ngħaddu minn diffikultajiet, problemi u inġustizzji, il-fidi tagħna tkun ippruvata. Meta f’dawn is-sitwazzjonijiet tonqsilna t-tama, jiġuna l-istess mistoqsijiet li għamlu l-Lhud … Ġesù min hu? Dawn huma l-mumenti li rridu nitolbu aktar, nitolbu għall-fidi biex nemmnu aktar, biex nemmnu li għad ikollna l-ħajja ta’ dejjem. Irridu nimxu ’l hinn minn dak li naraw. Il-Lhud kienu mwaħħla wisq ma’ dak li kienu jafu fuq Ġesù, għalhekk ma setgħux jaraw min kien verament. 

Illum Ġesu jixtieq li naċċettaw li t-tagħlim tiegħu, huwa verità. Dan it-tagħlim iwassalna biex nagħrfu wkoll lill-Missier. Dan it-tagħlim isalvana.

F’dan il-qari, Ġesù juri b’mod ċar li l-ħobż li qiegħed jirreferi għalih, huwa l-Ewkaristija, “il-ħobż li jiena nagħti huwa ġismi.” Dan ifakkarna fl-għotja tiegħu nnifsu fuq is-salib. Ġesù ta ħajtu għalina biex aħna ksibna l-ħajja ta’ dejjem. 

L-Ewkaristija tbiddilna biex insiru nixbhu aktar lil Ġesù. It-tagħlim tiegħu jsir parti mill-ħajja tagħna, ibiddel l-istil ta’ kif ngħixu, l-attitudni li għandna lejn l-oħrajn. L-Ewkaristija tagħtina l-qawwa u l-kuraġġ biex naraw lil Ġesù fl-oħrajn, f’dawk li jixtiequ jirċievu l-imħabba mingħandna, jew jixtiequ l-għajnuna tagħna, jew qed jistennew il-maħfra mingħandna. Ġesù huwa f’kull wieħed u waħda minna. 

Qari mill-Evanġelju skont San Ġwann (Ġw 6, 41-51) 

F’dan iż-żmien, il-Lhud bdew igergru fuq Ġesù għax kien qal: “Jiena hu l-ħobż li niżel mis-sema”. U bdew jgħidu: “Dan mhuwiex Ġesù bin Ġużeppi? Lil missieru u ’l ommu ma nafuhomx? Mela kif qiegħed jgħid: ‘Jiena nżilt mis-sema’?”

Ġesù weġibhom: “Toqogħdux tgorru bejnietkom. Ħadd ma jista’ jiġi għandi jekk il-Missier li bagħatni ma jiġbdux lejja; u jiena nqajmu mill-imwiet fl-aħħar jum. Hemm miktub fil-Profeti: ‘U kulħadd ikun imgħallem minn Alla’. Mela kull min jisma’ lill-Missier u jitgħallem minnu jiġi għandi. Mhux għax xi ħadd qatt ra lill-Missier ħlief dak li hu minn Alla; hu dan li ra lill-Missier. Tassew tassew ngħidilkom, min jemmen għandu l-ħajja ta’ dejjem.

Jiena hu l-ħobż tal-ħajja. Missirijietkom kielu l-manna fid-deżert, u mietu; dan hu l-ħobż nieżel mis-sema, biex min jiekol minnu ma jmutx.

Jiena hu l-ħobż il-ħaj, li niżel mis-sema. Jekk xi ħadd jiekol minn dan il-ħobż jgħix għal dejjem. U l-ħobż li jiena nagħti huwa ġismi għall-ħajja tad-dinja”.

Il-Kelma tal-Mulej

Tifħir lilek Kristu

Istruzzjonijiet u għan

  1. Aqra sew l-Evanġelju biex issir aktar familjari miegħu.
  2. Aħseb dwaru u ara x’qiegħed jgħid lilek personali. Liema hi l-parti li l-aktar li laqtitek? Għaliex?
  3. Aħseb dwar l-attitudni tiegħek lejn l-Ewkaristija. Hija biss drawwa? Obligu? Jew inkella tersaq għat-tqarbin b’reverenza u twemmin ta’ dak li ser tirċievi?
  4. X’inhi r-relazzjoni tiegħek ma’ Ġesù? Meta titlob? Fil-bżonnijiet biss jew it-talb huwa parti mill-ħajja ta’ kuljum? Itlob għal aktar fidi.
  5. Flimkien bħala familja sibu ħin u post biex taqraw dan l-Evanġelju. L-ambjent jgħin ukoll, għalhekk qabel ma tibdew, fejn ser tiltaqgħu ppreparaw:
    i. Bibbja bil-qari minn San Ġwann (6, 41-51)
    ii. Xemgħa;
    iii. Il-mejda fejn hemm il-Bibbja, miksija bi drapp aħdar;
    iv. Computer/laptop bil-qari u clips;
  6. Mur fil-parti tat-tfal skont l-etajiet u għamilha flimkien magħhom
  7. Addatta din il-parti skont kif hemm bżonn, tiddejjaqx tkun kreattiv 😊
  8. Mur fil-parti Itlob mid-dar għall-mument ta’ talb flimkien bħala familja

Illum ser inkomplu nisimgħu lil Ġesù jkellem lin-nies. Madanakollu, kien hemm minn dawn in-nies li ma bdewx jifhmu dak li kien qiegħed jgħidilhom. Ġesù jgħidilhom li hu Iben Alla, imma huma kienu jafuh bħala t-tifel ta’ Ġużeppi u Marija, u allura tgerfxu!

  • Ġesù jaf li mhux dejjem ser nifhmu dak li jrid jgħidilna, iżda jixtieq li nibqgħu nitgħallmu u nsiru ħbieb tiegħu
  • Printout tal-istampa
  • Lapes
PrintoutNiżżel

Tfal, intom qatt għamiltu stampa join the dots? Din tkun stampa li meta tħares lejha mhux bilfors tinduna x’inhi. Ikun hemm ħafna tikek u meta tgħaqqadhom, jiffurmaw l-istampa li fil-bidu ma kinitx ċara. Illum għandkom waħda minn dawn l-istampi. Tistgħu taqtgħu x’inhi? Diffiċli hux? 

Ieqfu ftit u bl-għajnuna tal-ġenituri tagħkom għaqqdu dawn it-tikek. Issa għadha diffiċli biex tindunaw x’hemm fl-istampa?

Illum l-Evanġelju ma tantx kien faċli biex nifmuh. Madanakollu Ġesù jgħidilna biex ma naqtgħux qalbna. Kif l-istampa fil-bidu ma kinitx ċara, Ġesù jgħidilna li xi drabi t-tagħlim tiegħu ikun diffiċli biex nifhmuh mal-ewwel. Minkejja dan, m’għandniex naqtgħu qalbna. Nibqgħu nisimgħu aktar ġrajjiet minn ta’ Ġesù u ftit ftit nifhmu dak li jixtieq jgħidilna. Ġesù jgħinna nifhmuh, bl-istess mod li l-mama’ u l-papa’ għenuna ngħaqqdu dawk it-tikek, biex l-istampa ġiet ċara u stajna naraw x’iffurmaw dawk it-tikek kollha. Aħna wkoll ikollna bżonn l-għajnuna biex nifhmu dak li jrid jgħidilna Ġesù. Tafu min jgħinna? Jgħinuna l-mama’ u l-papa’, l-għalliema u katekisti, is-saċerdoti u dawk kollha li huma ħbieb ta’ Ġesù.

Illum Ġesù qed jgħidilna biex aħna nemmnu li hu l-Iben ta’ Alla. Hu jrid li nemmnu li hu tant iħobbna li meta nitqarbnu, hekk li hu jiġi għandna. Dan aħna ma nistgħux nifhmuh, imma nemmnuh. Aktar ma nikbru u nsiru nafu lil Ġesù, aktar ser nifhmu dak li qiegħed jgħidilna. 
Illum Ġesù jsemmi ħafna lill-‘Missier’. Intom tafu li Alla huwa l-papa’ tagħna? Tafu li hemm talba li ngħiduha lil dan il-papa’ tagħna li għalkemm ma nistgħux narawh, hu jħobbna ħafna? Fl-attività tal-lum,, ser nitgħallmu din it-talba, anke jekk diġà tafuha, ser tgħiduha flimkien mal-ġenituri tagħkom, tarawha wkoll bl-istampi u għandkom anke xi attivitajiet x’tagħmlu.

Inroddu s-salib

Ngħidu t-talba tal-Missierna u wara naraw din it-talba bħala action song.

Introduzzjoni

L-Evanġelju tal-lum ser ifakkarna f’ieħor li smajna xi ġimgħat ilu, meta Ġesù beda jgħallem lin-nies li kienu jafuh bħala tifel, u sabuha diffiċli li jemmnu li dan it-tifel li rawh jikber, li kienu jafuh sew, issa qiegħed jgħid kliem bħal “Jiena hu l-ħobż li niżel mis-sema”.

  • It-tqarbin jgħinni nsir aktar bħal Ġesù u nemmen dak li jgħallimni
  • Żewġ kaxex li fuqhom jistgħu jitwaħħlu l-istampi tal-qalb u tad-dustbin
  • Gloj 
  • Printout
  • Imqass
PrintoutNiżżel

In-nies li semgħu lil Ġesù jitkellem ma fhemuhx, u anke għalina, il-qari tal-lum, mhux faċli biex nifhmuh. Dawn il-mistoqisjiet jgħinuna nifhmuh ftit aktar.

Ġesù, minn fejn qal li kien ġej? (mis-sema)

Għalfejn taħseb li n-nies ma riedux jisimgħu dak li kien qiegħed jgħid Ġesù? (huma kienu jafuh, kienu jafu lill-mama’ u lill-papa’ tiegħu u allura ma riedux jemmnu li hu kien ġie mis-sema)

Liema hu l-akbar għalliem tagħna skont Ġesù? (Alla)

Kif nistgħu nsiru nafu lil Alla l-Missier? (l-ewwel irridu nsiru nafu lil Ġesù)

Ġesù ddeskriva lilu nnifsu bħala … (il-ħobż tal-ħajja)

X’jiġri lil dawk li jieklu minn dan il-ħobż tal-ħajja? (jgħixu għal dejjem)

Aħna nistgħu nirċievu dan il-ħobż tal-ħajja? (iva, fit-tqarbin)

Aħna fejn ser ngħixu għal dejjem? (ma’ Alla l-Missier, l-Iben u l-Ispirtu s-Santu, fil-ġenna)

Meta nitqarbnu aħna nemmnu li Ġesù qiegħed jiġi għandna b’mod speċjali ħafna. Nemmnu wkoll li t-tqarbin, li hu l-ikel tar-ruħ tagħna, jgħinna biex insiru nixbhu aktar lil Ġesù. Fl-Epistola (epistola hija ittra miktuba mill-Appostli lill-ewwel Insara; dawn l-ittri, insibuhom fit-Testment il-Ġdid) tal-lum, San Pawl, jgħid hekk lill-Efesin: “Kunu twajba ma’ xulxin, ħennu għal xulxin, aħfru lil xulxin, u imxu fl-imħabba, bħalma Kristu wkoll ħabb lilna.” Fil-bidu ta’ dan il-qari, San Pawl semma wkoll xi kwalitajiet koroh, bħal “imrar, saħna, korla, tagħjir, għajjat,” li m’għandux ikollna bħalhom.Fl-attività ser nagħmlu logħba, imma wkoll logħba biex nitgħallmu minnha. Għandkom stampa ta’ qalb u ta’ dustbin. Aqtgħuwhom, u waħħlu waħda fuq kaxxa u l-oħra fuq kaxxa oħra. Imbagħad aqtgħu l-kliem u ħalltuhom. Issa aqtgħu f’liema kaxxa għandhom imorru dawn il-kliem (nota lill-ġenituri, fissru l-kliem li t-tfal ma jafux). Jekk hemm xi kliem fil-kaxxa tad-dustbin, u intom tafu li intom tagħmlu hekk, ippruvaw li ma tibqgħux. Itolbu biex ikollkom il-kuraġġ li tinbidlu, itolbu speċjalment meta titqarbnu. U jekk hemm kwalitajiet fil-kaxxa bil-qalb li inti m’għandekx, itlob ukoll, biex jibda jkollok, inti wkoll din il-kwalità sabiħa.

Inroddu s-salib

Grazzi Ġesù li inti trid tibqa’ tgħallimna, anke meta aħna nsibuha diffiċli li nifhmuk. Għinna biex insiru nixbħuk aktar. Illum nixtiequ nitolbu għal dawk kollha li ma jridux isiru jafuk, u wkoll għal dawk li ma jridux jemmnu dak li inti qiegħed tgħidilhom. Nixtiequ nitolbuk ukoll biex kull darba li nitqarbnu nemmnu li inti qiegħed magħna b’mod speċjali. 

Bħala parti mit-talba, isimgħu din, Help me see, biex tgħinkom tiftakru min hu Alla għalina. 

1. Skont l-Evanġelju tal-lum, meta n-nies semgħu lil Ġesù jgħid li huwa l-ħobż li niżel mis-sema, huma bdew...

Correct! Wrong!

2. Lil dawn in-nies li gergru, Ġesù weġibhom u qalilhom li min jemmeh fih, għandu..

Correct! Wrong!

3. X'kielu fid-deżert, in-nies li jitkellem dwarhom Ġesù fl-Evanġelju tal-lum?

Correct! Wrong!

4. Skont Ġesu', x'inhu l-ħobż li jagħti hu għall-ħajja tad-dinja?

Correct! Wrong!

Kif tuża din il-paġna

Alla jkellimna b'ħafna modi, inkluż bil-qari mill-Bibbja fil-Quddiesa. Hawnhekk tista' ssib tagħrif u attivitajiet marbuta mal-qari tal-Quddiesa tal-Ħadd u li għandhom jispirawk tgħix kuljum dan il-qari mill-Bibbja.