Infetaħ!

23-il Ħadd ta' Matul is-Sena

Fl-Evanġelju tal-lum, San Mark qiegħed iwasslilna miraklu ta’ fejqan, biex juri l-qawwa ta’ Ġesù fuq il-mard. Ġesù jfejjaq raġel trux u mbikkem. Din il-ġrajja sseħħ f’raħal tal-Ġentili (nies mhux Lhud. Id-Dekapoli huma 10 ibliet Griegi-Rumani). Fi ġrajja oħra ta’ San Mark (5, 9-10), Ġesù jagħmel miraklu ieħor meta jneħħi xitan u jibgħatu f’merħla ħnieżer. Dan juri li l-messaġġ ta’ Ġesù hu wieħed universali. Il-ħniena u mħabba ta’ Alla hi għal kulħadd, hekk kif naqraw ukoll fi ġrajja oħra, meta Ġesù jfejjaq lit-tifla ta’ mara Sirofeniċja (mara Ġentili).

Din il-ġrajja li ser nisimgħu llum, qegħda biss fl-Evanġelju ta’ San Mark. Ġesù jwarrab lir-raġel mill-bqija tan-nies, jagħmel il-miraklu u wara jwissieh biex ma jgħid lil ħadd! Dak li jagħmel Ġesù huwa ġest fiżiku għall-aħħar. Hu jdaħħal subgħajh f’widnejh, immisslu lsienu bir-riq tiegħu, u jitniehed waqt li jħares lejn is-sema. Ġesù, imbagħad ilissen il-kelma, “Effata!” (li tfisser “infetaħ”). Minkejja il-mod kif isir dan il-fejqan, ma hemm xejn maġiku. Dan hu miraklu li jixhed il-qawwa u ħniena ta’ Alla. Fl-ewwel qari tal-lum, mill-Profeta Iżaija (elf sena qabel) insibu li l-Messija kellu jagħmel propju dan il-miraklu, “jinfetħu għajnejn l-għomja,
jinfetħu widnejn it-torox.”

Din il-qawwa tal-fejqan ta’ Ġesù, hi marbuta direttament mal-mod li bih il-Knisja tiċċelebra s-sagramenti, fejn jintużaw mezzi materjali. Fis-sagrament tal-Magħmudija, l-ilma u ż-żejt juru l-qawwa tal-Ispirtu s-Santu. Iż-żejt jintuża wkoll fis-sagramenti tad-dlik tal-morda u tal-griżma tal-Isqof. Fl-Ewkaristija, il-ħobż u l-inbid, jinbidlu fil-Ġisem u Demm ta’ Kristu. Aħna l-insara, aħna poplu sagramentali u nemmnu li l-grazzja ta’ Alla tingħatalna permezz ta’ dawn is-sinjali. 

L-ironija ta’ din il-ġrajja, hija li għalkemm Ġesù jagħmel li dan ir-raġel jista’ jitkellem, iwwissih biex ma jgħid lil ħadd. Ġesù jrid li l-aħbar dwar is-setgħa li kellu ta’ fejqan, evidenza li hu kien il-Messija, ma tinxteridtx. Din it-tema nsibuha numru ta’ drabi, fl-Evanġelju ta’ San Mark. Nirreferu għaliha bħala ‘s-sigriet messjaniku’ u li dak li għamel Ġesù kellu jkun mifhum biss wara l-qawmien tiegħu.

Qari mill-Evanġelju skont  San Mark (Mk 7: 31-37)

F’dak iż-żmien, Ġesù telaq mill-inħawi tal-belt ta’ Tir, għadda minn Sidon lejn il-baħar tal-Galilija, fl-inħawi tad-Dekapoli. U ġibulu wieħed, trux u mbikkem, u talbuh iqegħedlu idu fuqu. Ġesù ħarġu għalih waħdu minn qalb in-nies, daħħal subgħajh f’widnejh u messlu lsienu bir-riq tiegħu. Imbagħad refa’ għajnejh lejn is-sema, tniehed tnehida, u qallu: “Effata!” jiġifieri: “Infetaħ!” U minnufih widnejh infetħulu, l-irbit ta’ lsienu nħallu u qabad jitkellem sewwa.

Ġesù wissiehom biex ma jgħidu lil ħadd; iżda aktar ma wissiehom, aktar bdew ixandruh. U mimlijin bil-għaġeb, bdew jgħidu: “Kollox għamel tajjeb: jagħti s-smigħ lit-torox u l-kliem lill-imbikkmin!”

Il-Kelma tal-Mulej
Tifħir lilek Kristu

Istruzzjonijiet u għan

  1. Aqra sew l-Evanġelju biex issir aktar familjari miegħu.
  2. Aħseb dwaru u ara x’qiegħed jgħid lilek personali. Liema hi l-parti li l-aktar li laqtitek? Għaliex?
  3. Għalkemm ir-raġel trux u mbikkem ma wera l-ebda ħjiel ta’ fidi, Ġesù xorta waħda fejqu. Bħala nsara magħmda, aħna għandu jkollna fidi fil-qawwa ta’ fejqan ta’ Ġesù. L-Ispirtu s-Santu jaħdem fina, u jiftħilna għajnejna u widnejna, iħollilna lsiena biex inkunu nistgħu nfaħħru lil Alla għal dak li għamel permezz ta’ Ġesù.
  4. Irridu naħsbu, jekk mirakli bħal dawn isseħħux ukoll illum. Bħala ġenituri, aħna nitolbu għall-fejqan ta’ membri tal-familja. Matul din il-ġimgħa itlob għall-fejqan, f’isem Ġesù. Mulej Ġesù, jiena nemmen fil-mirakli u nitlob għalihom. Nemmen fil-ħniena u mħabba tiegħek, fiż-żmien, u l-milja ta’ fejqan fil-qawmien mill-mewt. Ammen. 
  5. Flimkien bħala familja sibu ħin u post biex taqraw dan l-Evanġelju. L-ambjent jgħin ukoll, għalhekk qabel ma tibdew, fejn ser tiltaqgħu ppreparaw:
    i. Bibbja bil-qari minn San Mark (7, 31-37)
    ii. Xemgħa
    iii. Il-mejda fejn hemm il-Bibbja, miksija bi drapp aħdar
    iv. Computer/laptop bil-qari u clips
  6. Mur fil-parti tat-tfal skont l-etajiet u għamilha flimkien magħhom
  7. Addatta din il-parti skont kif hemm bżonn, tiddejjaqx tkun kreattiv 😊
  8. Mur fil-parti Itlob id-dar għall-mument ta’ talb flimkien bħala familja

Illum ser nisimgħu dwar wieħed mill-mirakli ta’ Ġesù. Darba ħadu raġel quddiem Ġesù, dan ir-raġel ma kienx jisma’ u lanqas jitkellem. Ġesù ħa lir-raġel għalih waħdu u fejqu wara li misslu widnejh u lsienu u qal il-kelma, “infetaħ.”

  • Ġesù jfejjaq raġel trux
  • Aħna għandna nużaw ir-rigal tas-smigħ biex waqt il-quddiesa nisimgħu l-Kelma ta’ Alla
  • Printout tal-istampa
  • Kuluri u lapes 
PrintoutNiżżel

Li nisimgħu huwa rigal kbir ta’ Alla. Immaġinaw kif tkunu, kieku ma tistgħu tisimgħu xejn. Ma tkunux tistgħu tisimgħu leħen il-ġenituri u ħbieb, ma tisimgħux lill-kelb jinbaħ jew lill-qattus inewwaħ, jew il-ħoss tal-mużika. Fl-Evanġelju tal-lum, in-nies jistaqsu lil Ġesù biex ifejjaq raġel trux. Kif taħsbu li ħassu dan ir-raġel, li f’daqqa waħda seta’ jisma’ dak kollu li kien qiegħed jiġri madwaru? Kienet xi ħaġa tal-meravilja u li bidlitlu ħajtu. Dan ir-raġel lanqas ma seta’ jitkellem. In-nies talbu lil Ġesù jpoġġi jdejh fuqu biex ifejqu. Ġesù jwarrab lil dan ir-raġel mill-bqija tan-nies. Hu jpoġġi subajh f’widnejn ir-raġel. Imbagħad miss ilsien ir-raġel bir-riq tiegħu. Ġesù ħares lejn is-sema u qal, “Effata” li tfisser “infetaħ.” F’daqqa waħda dan ir-raġel beda jisma’ u jitkellem. In-nies li kienu ġabu lil dan ir-raġel quddiem Ġesù, baqgħu mistgħaġba u qalu, “Kollox għamel tajjeb: jagħti s-smigħ lit-torox u l-kliem lill-imbikkmin!”

Alla tana r-rigal tas-smigħ biex inkunu nistgħu nitkellmu u nisimgħu lill-oħrajn u wkoll biex nisimgħu l-ħsejjes tan-natura, bħall-mewġ iħabbat mal-blat, ir-riħ jonfoħ u l-għasafar jgħannu. Aħna nużaw dan ir-rigal biex nisimgħu l-Kelma ta’ Alla meta mmorru l-quddies u nisimgħu l-qari mill-Bibbja. Meta noqgħodu attenti u nisimgħu, Ġesù jiftħilna widnejna biex nisimgħu, ilsienna biex nitkellmu u qalbna biex nemmnu fih. 

Ġesù fejjaq lil dak ir-raġel li ħadu quddiemu. Kif jista’ Ġesù jfejjaq lilna? Ġesù jista’ jfejjaqna mill-mard, ifejjaqna meta nħossuna waħedna, meta nkunu nkwetati u wkoll minn xi vizzju ħażin li jista’ jwassalna biex nagħmlu dnub li jifridna minn Alla. Meta nisimgħu l-Kelma ta’ Alla, nistgħu nbiddlu l-ħajja tagħna. Meta Ġesù fejjaq lil dak ir-raġel, ried li iżomm dan bħala sigriet! Madanakollu n-nies tant kienu mistgħaġba b’dan il-miraklu ta’ Ġesù, li marru jgħidu lil kulħadd!

Illum Ġesù fejjaq raġel li kien trux ta’ vera. Xi kultant aħna nagħmlu ta’ bir-ruħna li ma nisimgħux, speċjalment meta tkun xi ħaġa li ma nixtiequx nisimgħu, bħal meta l-ġenituri tagħna jgħidulna biex niżbarazzaw il-kamra tagħna, nagħmlu s-sodda, nagħmlu l-mejda qabel l-ikel. Ejjew nitolbu lil Alla biex jagħtina r-rigal li nisimgħu u noqgħodu attenti waqt il-quddies.

Biex tiftakru dwar l-Evanġelju tal-lum, agħtu l-kulur lill-istampa ta’ Ġesù jfejjaq lir-raġel trux. Fuq nett tal-istampa ikteb il-kelma li qal Ġesù, “Effata” …. Infetaħ.

Waqt li qed tagħti l-kulur, isma’,  J.E.S.U.S.

Inroddu s-Salib

Alla ta’ mħabba, iftħilna widnejna għall-Kelma tiegħek. Iftħilna qalbna biex inkunu nistgħu naqsmu mal-oħrajn l-aħbar tal-imħabba tiegħek. Nitolbu għal dawk kollha li għadhom ma semgħux l-aħbar ta’ salvazzjoni tiegħek u lanqas dwar il-qawwa li inti tista’ tfejjaq lill-morda u lil dawk ta’ qalbhom maqsuma. Dan nitolbuh f’isem Ġesù. Ammen.

Introduzzjoni

Illum nisimgħu kif Ġesù, għen raġel li kien trux u ma setax jitkellem sew, biex beda jisma’ u jitkellem. Dan hu wieħed mill-mirakli ta’ fejqan ta’ Ġesù, u dawk li rawh baqgħu mistgħaġba. Ġesù jistaqsihom biex iżommu kollox sigriet. Madanakollu n-nies li raw dan il-miraklu ma baqgħux kwieti.

  • Is-sagramenti jgħinuna nfiequ
  • Bħala nsara, aħna bħal dan ir-raġel u l-ħbieb tiegħu, ma nistgħux inżommu l-aħbar it-tajba dwar Ġesù għalina biss, imma rridu naqsmuha mal-oħrajn biex huma wkoll isiru jafu dwar l-imħabba tiegħu
  • Kartonċina kkulurita
  • Lapsijiet tal-kulur
  • Imqass u gloj
  • Qlub (Printout)
PrintoutNiżżel

Meta Ġesù kien qiegħed idur fl-inħawi tad-Dekapoli, xi nies ħadu quddiemu raġel li kien trux u ma tantx seta’ jitkellem. Huma talbu lil Ġesù biex ipoġġi jdejh fuqu biex ifieq. Ġesù ħa lir-raġel għalih waħdu u poġġa subajh f’widnejh. Imbagħad miss ilsien ir-raġel bir-riq tiegħu. Ġesù ħares lejn is-sema u tniegħed u qal, “Effata” li tfisser “Infetaħ!” U minnufih widnejn ir-raġel infetħu u lsienu nħall u seta’ jisma’ u jitkellem normali. Ġesù staqsa lin-nies biex ma jgħidu lil ħadd, iżda huma ma obdewx. In-nies malajr xerrdu l-kelma, dwar dak li għamel Ġesù, ma’ dan ir-raġel.

Ġesù kien għamel miraklu u dan jurina l-qawwa ta’ Alla li ħadem permezz ta’ Ġesù. Għalfejn taħsbu li Ġesù miss lir-raġel biex fejqu u mhux biss qal “kun imfejjaq”? Ġesù għażel li jfejjaq b’mod sagramentali, jiġifieri b’ġest, bil-mess, b’kelma u anke bir-rieq, bħala s-sinjali li wasslu għall-fejqan u ma użax kliem ta’ fejqan biss. Dan il-fejqan bidel il-ħajja tar-raġel b’mod drastiku. Hu wkoll miraklu ta’ ħelsien. Ir-raġel issa seta’ jisma’ l-ħsejjes ta’ madwaru u jikkomunika mal-familjari u mal-ħbieb. Min jaf kemm ħassu ferħan!

Dan il-miraklu jgħallimna dwar is-sagramenti. Bħalma tafu, hemm seba’ sagamenti li permezz tagħhom Alla jagħtina grazzja speċjali – żuru hawn.

Fis-sagramenti simboli li jidhru, ġesti u kliem jintużaw mis-saċerdot. Fil-magħmudija għandna l-ilma, iż-żejt, id-dawl (xemgħa) u l-libsa bajda. Intom tafu li s-saċerdot jgħid talba speċjali, imsejħa t-talba tal-Effatah, u jgħidha waqt li jmiss widnejn u ħalq it-tarbija, “Sidna Ġesù, li ta s-smiegħ lit-torox u l-klema lill-imbikkmin, jagħti lilek ukoll il-grazzja li ma ddumx ma tkun tista’ tisma’ b’widnejk il-kelma tiegħu u tilqagħha, u tistqarr bil-fomm il-fidi tiegħek biex tfaħħar u ssebbaħ lil Alla l-Missier. Ammen.”

Għalkemm Ġesù talab lin-nies biex ma jgħidu xejn lil ħadd b’dan il-miraklu, huma ma żammewx is-sigriet, huma marru u qalu b’dak li ġara lill-oħrajn. Dan ukoll ifakkarna fis-sagramenti. Is-sagramenti jagħtuna l-qawwa biex naqsmu l-aħbar it-tajba ta’ Ġesù mal-oħrajn, bħalma għamel dak ir-raġel u l-ħbieb tiegħu, fl-Evanġelju tal-lum. Aħna għandna aħbar tajba dwar Ġesù li ma nistgħux ma naqsmuhiex mal-oħrajn biex huma wkoll isiru jafu dwar l-imħabba ta’ Ġesù.

Jekk tixtieq taqsam din l-aħbar tajba dwar Ġesù mal-oħrajn, jew inkella tixtieq tgħidilhom li tħobbhom u li qed titlob għalihom, agħmel printout tal-qlub u aqtagħhom. Waħħalhom fuq qalb naqra akbar, li taqta’ mill-kartonċina. Ikteb fuqha, isem il-persuna li ser tagħtiha l-qalb u ikteb ukoll “Ġesù jfejjaqna!” u għatihielha. Tista’ tagħtiha lil xi ħadd mill-familja jew ħbieb jew lil xi ġirien li joqgħodu waħedhom.
Waqt li qed tagħmel il-qlub, tista’ tisma’, Nothing is Impossible .

Inroddu s-salib.

Grazzi Mulej, tar-rigal tal-fejqan u tas-saħħa. Nixtieq nitlob għal (semmi xi nies li taf li huma morda u li tixtieq titlob għalihom) li bħalissa għandhom bżonn il-fejqan. Dan nitolbu f’isem Ġesù. Ammen. 

1. Skont l-Evanġelju tal-lum, lil Ġesù ġabulu quddiemu raġel li kellu bżonn l-għajnuna tiegħu. Xi problema kellu dan ir-raġel?

Correct! Wrong!

2. X'għamel Ġesù lil dan ir-raġel li ġabulu quddiemu?

Correct! Wrong!

3. X'kienet il-kelma li qal Ġesù, waqt li mess bir-riq tiegħu l-ilsien tar-raġel li kien trux u mbikkem...

Correct! Wrong!

4. Wara li għamel il-miraklu Ġesù qalilhom biex ma jgħidu lil ħadd iżda huma qabdu...

Correct! Wrong!

Kif tuża din il-paġna

Alla jkellimna b'ħafna modi, inkluż bil-qari mill-Bibbja fil-Quddiesa. Hawnhekk tista' ssib tagħrif u attivitajiet marbuta mal-qari tal-Quddiesa tal-Ħadd u li għandhom jispirawk tgħix kuljum dan il-qari mill-Bibbja.