Aħna lesti naċċettawH?

Ir-Raba' Ħadd ta' Matul is-Sena Ċ

L-Evanġelju tal-lum isegwi tal-ġimgħa l-oħra, fejn iltqajna ma’ Ġesù fis-sinagoga ta’ Nazaret. Fil-qari tal-lum hemm żewġ temi li tajjeb li nirriflettu fuqhom: il-missjoni ta’ Ġesù bħala profeta għad-dinja kollha u r-reżistenza inevitabbli għall-messaġġ radikali tiegħu.

Wara li spiċċa jaqra mill-ktieb tal-profeta Isaija, Ġesù qal li dakinhar seħħet il-profezija u n-nies stagħġbu u “lkoll laqgħu kliemu.” Madanakollu Ġesù induna li huma ma kienux fehmuh u għalhekk jisfidahom biex jaċċettaw li Alla jilqa’ lil kulħadd u jitlobna biex inħarsu ’l hinn minn kunċetti u ideat predeterminati.

Ġesù jirreferi għall-istejjer ta’ Elija u Eliżew (profeti tat-Testment il-Qadim) li wkoll wasslu l-messaġġ ta’ salvazzjoni ta’ Alla lill-Ġentili u użaw l-eżempju tal-armla minn Sarefta u Nagħman tas-Sirja. Dawn it-tnejn kienu Ġentili li Alla għenhom permezz tal-profeti. Alla bagħat lil Elija biex jagħmel miraklu mal-armal ta’ Sarefta, belt li kienet tqim lill-idoli. Eliżew fejjaq lil Nagħman, Sirjan lebbruż, għalkemm ma fejjaq lill-ebda Lhudi marid bil-lebbra.  Ġesù, ikkompara lin-nies ta’ raħal twelidu (Nazaret) mal-Lhud bla fidi, ta’ żmien Elija u Eliżew. Matul is-sekli, Iżrael dar kontra l-profeti li bagħat Alla, ma aċċettawx il-messaġġiera magħżula tiegħu. Minflok huma kienu jafdaw l-istint tagħhom u rrifjutaw lil Alla. Aħna nistgħu nagħmlu l-istess mistoqsija. Min hu Ġesù għalija? Profeta? Raġel qaddis? Mexxej reliġjuż impressjonanti? Jew huwa l-imgħallem u salvatur tiegħi?

Ġesù kompla u qal, “ebda profeta ma jilqgħuh tajjeb f’pajjiżu.” In-nies irrabbjaw għall-paragun li għamel Ġesù. Huma ma aċċettawx li dawk li ma kienux Lhud (il-Ġentili) setgħu igawdu wkoll il-barka ta’ Alla. Fir-rabja, in-nies qamu għal Ġesù u riedu jitfgħuh mill-irdum għal isfel. Huma riedu joqtluh. M’hemmx dettalji ta’ kif ħarab Ġesù. Nafu biss li hu għadda minn ġo nofshom u baqa’ sejjer.

Dakinhar, Ġesù sfidhom biex jaċċettaw li kulħadd jistħoqlu li jirċievi l-grazzja ta’ Alla. Il-messaġġ ta’ Ġesù hu għalina lkoll, iżda l-ewwel irridu nkunu nafu t-tagħlim tiegħu u nkunu miftuħa għall-imħabba tiegħu. Illum Ġesù qiegħed jisfidana. Lesti li naċċettaw din l-isfida?

Qari mill-Evanġelju skont San Luqa (Lq 4:21-30)

F’dak iż-żmien Ġesù qal lin-nies fis-sinagoga: “Din il-kitba seħħet illum, intom u tisimgħu”. U lkoll laqgħu kliemu u stagħġbu għall-kliem mimli ħlewwa li kien ħiereġ minn fommu u bdew jgħidu: “Dan mhuwiex bin Ġużeppi?” Iżda hu qalilhom: “Żgur li se tgħidu għalija dan il-proverbju: ‘Tabib, fejjaq lilek innifsek. Dak kollu li smajna li ġara f’Kafarnahum agħmlu hawn f’pajjiżek ukoll!’” U żied jgħidilhom: “Tassew, ngħidilkom, ebda profeta ma jilqgħuh tajjeb f’pajjiżu. Għax, ngħidilkom is-sewwa, kien hemm bosta romol f’Iżrael fi żmien Elija meta s-sema baqa’ tliet snin u sitt xhur magħluq u waqa’ ġuħ kbir fil-pajjiż kollu; madankollu għand ħadd minnhom ma ntbagħat Elija, imma għand waħda armla minn Sarefta ta’ Sidon. U kien hemm bosta lebbrużi f’Iżrael fi żmien il-profeta Eliżew, imma ħadd minnhom ma ġie mfejjaq ħlief Nagħman tas-Sirja”. Meta semgħu dan fis-sinagoga kulħadd imtela bil-korla; qamu, u ħarġuh ’il barra mill-belt, ħaduh fuq xifer ta’ rdum tal-għolja li fuqha kienet mibnija l-belt tagħhom, u riedu jixħtuh minn hemm fuq għal isfel. Iżda hu għadda minn ġo nofshom u baqa’ sejjer.

Il-Kelma tal-Mulej
Tifħir lilek Kristu

Istruzzjonijiet u għan

  1. Aqra sew l-Evanġelju biex issir aktar familjari miegħu.
  2. Aħseb dwaru u ara x’qiegħed jgħid lilek personali. Liema hi l-parti li l-aktar li laqtitek? Għaliex?
  3. Faħħar lil Alla tar-relazzjoni li għandek ma’ Ġesù u li aċċettajt il-messaġġ radikali tiegħu. Itlob lil Alla sabiex ma tkunx mimli/ja bi kburija u preġudizzju bħalma kienu n-nies tar-raħal fejn kien trabba Ġesù. Aħna lkoll denji li nsiru nafuh. 
  4. Ġesù huwa ħafna aktar minn profeta. Hu veru Alla u veru bniedem. Hu d-dawl tad-dinja u aħna msejħa sabiex inkunu xhieda tal-ħajja tiegħu. Matul din il-ġimgħa. Uża kull opportunità sabiex tgħix ta’ veru nisrani/ja.
  5. Flimkien bħala familja sibu ħin u post biex taqraw dan l-Evanġelju. L-ambjent jgħin ukoll, għalhekk qabel ma tibdew, fejn ser tiltaqgħu ppreparaw:
    i.Bibbja bil-qari minn San Luqa (4, 21-30)
    ii. Xemgħa
    iii. Il-mejda fejn hemm il-Bibbja, miksija bi drapp aħdar
    iv. Computer/laptop bil-qari u clips
  6. Mur fil-parti tat-tfal skont l-etajiet u għamilha flimkien magħhom
  7. Addatta din il-parti skont kif hemm bżonn, tiddejjaqx tkun kreattiv 😊

Fl-Evanġelju tal-lum, Ġesù jipprova jfiehem lin-nies, li hu kien mibgħut minn Alla. In-nies jisimgħuh, imma ma jemmnuhx. Huma jirrabbjaw u joħorġuh ’l barra mill-belt u jippruvaw jimbutawh minn fuq l-irdum. Madanakollu Ġesù jgħaddi minn nofshom u jimxi ‘l bogħod minnhom. 

  • Ġesù ġie fid-dinja għal kulħadd
  • Ġesù huwa l-Messija li kien imwiegħed mill-profeti u li kellu jiġi biex isalva l-poplu ta’ Alla
  • Kopja tal-attività tal-lum
  • Imqass u kuluri 
PrintoutNiżżel

Huwa faċli għalina li nifhmu li Ġesù ġie fid-dinja għal kulħadd, għax nafu li hu miet fuq is-salib biex isalvana mid-dnub tagħna u jagħtina r-rigal tal-ħajja ta’ dejjem. Dan ma kienx faċli li jifhmuh il-Lhud li kienu jgħixi fi żmien Ġesù. 

Huma kienu ilhom mijiet ta’ snin jisimgħu li huma kienu l-poplu magħżul ta’ Alla. Il-profeti kienu ħabbru li għad jiġi l-Messija u huma ħasbu li hu kien ser ikun għalihom biss.

Darba, Ġesù kien fis-sinagoga ta’ Nazaret (il-post fejn hu kien trabba bħala iben il-mastrudaxxa) jgħallem lin-nies. Hu qalilhom li hu kien il-Messija mwiegħed, iżda n-nies ma emmnuhx (huma kienu jafuh bħala iben Ġużeppi l-mastrudaxxa). Fil-fatt, irrabbjaw meta Ġesù qal li hu ġie fid-dinja għal kulħadd. Il-Lhud kienu jirrispettaw ħafna l-liġi ta’ Alla u ma setgħux jemmnu meta Ġesù qal li hu kien il-Messija. Huma ħasbu li Ġesù kien qiegħed iwaqqa’ dak li kienu jemmnu. Huma ħasbu li Ġesù kien qed imur kontra t-twemmin tagħhom. In-nies tant irrabjaw, li ħarġu lil Ġesù barra mir-raħal u kienu lesti li jimbuttawh minn fuq l-irdum. Madanakollu b’xi mod, Ġesù mexa minn ġo nofshom u baqa’ sejjer.

X’taħsbu li ħasbu n-nies meta Ġesù baqa’ sejjer? Forsi rrabjaw ħafna aktar, jew inkella forsi bdew jaħsbu li Ġesù seta’ kien qiegħed jgħid il-verità u li hu kien tassew il-Messija.

Huwa diffiċli għalina li nimmaġinaw kif kienet tkun ir-reazzjoni tagħna, minħabba li aħna nafu ħafna affarijiet dwar Ġesù. Kien hemm xi Lhud li ma setgħux jifhmu min kien Ġesù u ma setgħux jemmnu li hu ġie għal kulħadd. Intom taħsbu li hi ħaġa tajba li Ġesù ġie għal kulħadd? Jien hekk naħseb, għax dan ifisser li kulħadd għandu ċ-ċans li jsir jaf lil Alla u kulħadd jista’ jmur il-ġenna. Kulħadd għandu bżonn lil Ġesù, u kulħadd għandu jkun jaf li jista’ jkollu relazzjoni miegħu.

Ġesù jrid li kulħadd isir jafu, iħobbu u jimxi warajh. Aħseb dwar tliet affarijiet li taf dwar Ġesù u li tista’ tgħidhom lill-oħrajn. Għandek il-printout ta’ Ġesù, agħtiha l-kulur u wara li taqta’ l-istampi tista’ tagħtihom lill-ħbieb jew lil tal-familja.

Isma’, Do you know Jesus loves you.

Inroddu s-salib.

Għażiż Mulej, għalkemm aħna lkoll differenti, inti tħobbna lkoll. Aħna għandna bżonnok u inti ġejt biex bil-grazzja tiegħek, issalvana lkoll. Għinna biex nibqgħu fidili lejk, anke meta oħrajn ma jemmnux fil-qawwa tal-fejqan u maħfra tiegħek. Ammen.

Introduzzjoni

Illum se nkomplu nisimgħu il-ġrajja ta’ meta Ġesù kien fis-sinagoga ta’ Nazaret. Nisimgħu kif in-nies ma laqgħux dak li qal u ħarġuh ‘l barra, għax huma ma emmnuhx; huma riedu jixħtuh minn fuq l-irdum għal isfel, iżda Ġesù mexa minn ġo nofshom u ma baqa’ sejjer.

  • Il-messaġġ tal-Evanġelju tal-lum jisfidana biex naħsbu dwar dak li jgħid Ġesù u dwar kif dan jgħinna biex nagħmlu għażliet tajba
  • Printout tal-attività tal-lum
  • Lapes/kuluri
  • Imqass/gloj
TemplateNiżżel

Aħseb dwar min jagħtik parir: għalliema, ġenituri, nanniet, saċerdoti, katekisti u ħbieb. Xi drabi, aħna nduru fuq dawn in-nies meta niġu biex nagħmlu xi deċiżjoni importanti. Huma nies li nħossu li nistgħu nafdawhom, li jagħtuna parir tajjeb li jista’ jgħinna. Ġeneralment, hija persuna ta’ awtorità li tagħtina l-aħjar parir. 

L-Evanġelju tal-lum jiddeskrivi r-reazzjoni tan-nies għall-kliem li Ġesù jgħid fis-sinagoga ta’ Nazaret. Għall-ewwel huma baqgħu mistagħġba, u bdew jistaqsu wieħed lill-ieħor, “Dan mhuwiex bin Ġużeppi?” Kif qatt seta’ jkun li xi ħadd li trabba magħhom, jgħid li hu l-Iben ta’ Alla? Ġesù jgħidilhom li hu kien jaf li huma ma kienux qegħdin jemmnuh, bl-istess mod li l-profeti tat-Testment il-Qadim ma kienux ikunu milqugħha fl-irħula fejn twieldu.

In-nies irrabjaw meta Ġesù qabbel lilu nnifsu ma’ dawn il-profeti. Ġrew warajh lejn l-irdum u riedu jitfgħuh minn fuq għal isfel, iżda Ġesù baqa’ għaddej min-nofshom. Ir-reazzjoni tan-nies għall-kliem ta’ Ġesù ma kienitx waħda tajba. Huma kienu jafuh sew, iżda ma riedux jaċċettaw li dak li kien qiegħed jgħid, kien il-verità. Ġesù sfidahom u tahom parir dwar kif kellhom jinbidlu biex ma jiġrilhomx kif għamlu l-Lhud ta’ qabilhom meta ma semgħux mill-profeti. Madanakollu huma ma ħallewx kliem Ġesù jkun ta’ gwida għalihom. Ħafna drabi meta nisimgħu l-Evanġelju niltaqgħu ma’ sfida biex naħsbu b’mod differenti minn kif jaħsbu l-maġġoranza tan-nies. Ġesù kien jirrabbjahom lill-kapijiet Lhud, speċjalment meta jien ifejjaq nhar ta’ Sibt u kien jiekol mal-midinbin u dawk li jiġbru t-taxxi (huma kienu jaħsbu li dan kien ħażin, li dan kien kontra l-liġi ta’ Alla). Aħna għandna nkunu lesti li nisimgħu l-kliem ta’ Ġesù għax nafu li hu jgħid il-verità u li nistgħu nafdaw fil-pariri tiegħu. Aħna nisimgħu l-kliem ta’ Ġesù fl-Evanġelji u fit-tagħlim tal-Knisja. Aħna nafdaw dawn il-kliem, għax huma l-kliem ta’ min iħobbna u jridilna l-ġid. Għandna nitolbu biex il-kliem ta’ Ġesù jinflwenzana u jibdilna sabiex insiru segwaċi denji tiegħu.

Jekk tixtieq li tibqa’ tiftakar il-ġrajja tal-Evanġelju tal-lum, għamel ‘Story Cube.’ Ipprintja l-attività tal-lum u qabel ma taqtagħha jew ikteb vers mill-Evanġelju jew pinġi xi ħaġa fuq kull naħa tal-kaxxa biex tirrifletti dak li smajt. Wara agħtihom il-kulur u aqtagħha. Itwi biex tifforma kaxxa u waħħal bil-gloj, fejn hemm bżonn. Dawwarha biex taqra l-istorja!

Isma, I’m Trusting You.

Inroddu s-salib.

Għażiż Ġesù, għinni nisma’ l-kliem tiegħek fl-Evanġelju. Grazzi tal-profeti tad-dinja, li jsemmgħu leħenhom għal dak li hu tajjeb u jgħinuni biex insir nixbah lilhom. Għinni biex nuri l-ħniena mal-oħrajn u nagħmel minn kollox biex insir nixbah lilek. Ammen.

Niżżel minn hawn il-fuljettNiżżel

Kif tuża din il-paġna

Alla jkellimna b'ħafna modi, inkluż bil-qari mill-Bibbja fil-Quddiesa. Hawnhekk tista' ssib tagħrif u attivitajiet marbuta mal-qari tal-Quddiesa tal-Ħadd u li għandhom jispirawk tgħix kuljum dan il-qari mill-Bibbja.