Is-salvazzjoni!

It-Tieni Ħadd tal-Avvent

L-Evanġelju tal-lum, jibda billi jpoġġina fi żmien partikolari. San Luqa jidħol fid-dettall ta’ min kien qiegħed imexxi, kemm fil-gvern, kif ukoll fit-Tempju. Ġesù beda l-ħajja ta’ tagħlim u fejqan, f’dan il-kuntest partikolari, it-tagħlim tiegħu u s-salvazzjoni li kisbilna permezz tal-mewt u qawmien tiegħu huma għal kulħadd, “il-bnedmin kollha jaraw is-salvazzjoni ta’ Alla.” 

Il-qari tal-lum huwa sinjifikattiv ħafna għal żmien l-Avvent. Permezz tal-Avvent, il-Knisja terġa’ tfakkarna biex neżaminaw il-ħajja tagħna u r-relazzjoni tagħna ma’ Alla, hija sejħa biex “niddrittaw il-mogħdijiet” fil-ħajja tagħna.  Ġwanni sejjaħ għall-indiema … dan kien il-mod, kif ħeġġeġ lin-nies biex “iħejju t-triq tal-Mulej.” Li tindem ma jifissirx biss li jiddispjaċik għal dak li għamilt ħażin, iżda wkoll li tikkommetti ruħek li tinbidel.

Fil-bidu tal-quddiesa tal-lum, is-saċerdot jitlob hekk: “O Alla ħanin li tista’ kollox, agħmel li xejn fid-dinja ma jfixkilna aħna u nħaffu biex niltaqgħu ma’ Ibnek.” X’inhu dak li jista’ qiegħed ifixklek bħalissa? Kif tista’ tagħraf dan it-tfixkil? Meta “l-kelma tal-Mulej ġiet għand Ġwanni,” hu kien fid-deżert. Id-deżert huwa fejn ma niltaqgħux ma’ distrazzjonijiet, huwa ż-żmien fejn hemm biss Alla u int. Irridu nkunu aħna li nagħmlu dan il-pass u nidħlu fid-deżert biex inħallu lil Alla jkellimna u jbiddilna, permezz tat-talb, il-qari mill-Bibbja u il-ħin ta’ silenzju biex nagħtuh ċans jitkellem magħna. Meta nagħtu dan iċ-ċans lil Alla, hu jbiddilna biex insiru dak li ppjana għalina mill-bidu nett. Dak li ppjana Alla għal kull wieħed u waħda minna huma “pjanijiet ta’ ġid u mhux ta’ ħsara, li nagħtikom ġejjieni mimli tama.” (Ġeremija 29, 11) 

Wara li Ġwanni laqa’ l-kelma ta’ Alla, ħareġ ixandar. Ma żammx din il-kelma għalih. Bħala ġenituri l-ewwel dmir huwa lejn it-tfal. Nafu li l-akbar mod kif jitgħallmu, huwa bl-eżempju. Għalhekk matul dan l-Avvent, għaraf irrifletti wkoll dwar l-eżempju li qed tagħti lit-tfal.

Qari mill-Evanġelju skont San Luqa (Lq 3, 1-6) 

Fis-sena ħmistax tal-ħakma ta’ Tiberju Ċesari, meta Ponzju Pilatu kien gvernatur tal-Lhudija, Erodi tetrarka tal-Galilija, ħuh Filippu tetrarka tal-artijiet tal-Iturija u t-Trakonija, u Lisanja tetrarka ta’ Abileni, fiż-żmien meta l-uffiċċju ta’ qassis il-kbir kien f’idejn Anna u Kajfa, il-kelma tal-Mulej ġiet fuq Ġwanni bin Żakkarija, fid-deżert. U ġie fl-inħawi kollha ta’ madwar il-Ġordan, ixandar magħmudija ta’ ndiema għall-maħfra tad-dnubiet, kif hemm imniżżel fil-ktieb tal-profeziji ta’ Iżaija:
“Leħen ta’ wieħed jgħajjat fid-deżert:
Ħejju t-triq tal-Mulej,
iddrittaw il-mogħdijiet tiegħu.
Kull wied jimtela,
kull muntanja u għolja titbaxxa,
il-mogħdijiet mgħawwġa jiddrittaw,
u t-triqat imħarbta jitwittew.
U l-bnedmin kollha jaraw is-salvazzjoni ta’ Alla!”

Il-Kelma tal-Mulej
Tifħir lilek Kristu

Istruzzjonijiet u għan

  1. Aqra sew l-Evanġelju biex issir aktar familjari miegħu.
  2. Aħseb dwaru u ara x’qiegħed jgħid lilek personalment. Liema hi l-parti li l-aktar li laqtitek? Għaliex?
  3. Illum niltaqgħu mas-sejħa għall-indiema. Sib post u ħin, meta tista’ tkun għall-kwiet. Ibda billi titlob biex lill-Mulej jikkwieta lil qalbek u l-ħsibijiet tiegħek. Imbagħad aħseb dwar x’inhuma l-‘muntanji li jridu jitbaxxew’ u ‘l-widien li jridu jimtlew’ biex issir il-persuna li Alla jixtieqek li tkun. 
  4. Kulħadd għandu mogħdijiet, fil-ħajja tiegħu li għandhom bżonn, jittwittew. Bħala ġenitur, kif tista’ tgħin lit-tfal biex jinbidlu u jsiru persuni aħjar? X’inhuma l-valuri li qed tgħaddilhom?
  5. Flimkien bħala familja sibu ħin u post biex taqraw dan l-Evanġelju. L-ambjent jgħin ukoll, għalhekk qabel ma tibdew, fejn ser tiltaqgħu ppreparaw:
    i. Bibbja bil-qari minn San Luqa (3, 1-6)
    ii. Il-girlanda tal-Avvent, jinxtgħelu 2 xemgħat vjola
    iii. Il-mejda fejn hemm il-Bibbja, miksija bi drapp vjola
    iv. Computer/laptop bil-qari u clips
  6. Mur fil-parti tat-tfal skont l-etajiet u għamilha flimkien magħhom
  7. Addatta din il-parti skont kif hemm bżonn, tiddejjaqx tkun kreattiv 😊
  8. Mur fil-parti Itlob id-dar għall-mument ta’ talb flimkien bħala familja

Qatt smajtu s-song Santa Claus is coming to town? 

F’din is-song, il-kantant iwissi lit-tfal biex joqgħodu attenti u jkunu bravi għax Father Christmas qiegħed jara dak kollu li jagħmlu u jekk ma jkunux bravi ma jġibilhomx rigal! Fl-Evanġelju tal-lum, Ġwanni l-Battista wkoll għandu twissija. Mhux dwar Father Christmas, iżda dwar xi ħadd ħafna akbar. Ejjew nisimgħu l-Evanġelju tal-lum, it-tieni Ħadd tal-Avvent.

  • Ġesù huwa l-GPS tagħna li jurina t-triq għall-Ġenna

  • Siġra żgħira tal-Milied
  • Qlub maqtugħin minn kartonċina ħamra, il-qies irid ikun kbir biżżejjed biex it-tfal ipenġu fuqhom, tistgħu tagħmlu ftit żgħar ukoll
  • Lapes
  • Kuluri
  • Tiżjin għal fuq il-qlub
  • Żigarella 
  • Single hole punch

Ġwanni l-Battista jgħid lin-nies biex jippreparaw għal meta jiltaqgħu ma’ Ġesù. Dan qiegħed jgħidu lilna wkoll. Ġwanni jsemmi l-muntanji u l-widien. X’għandhom x’jaqsmu dawn ma’ Ġesù? Intom qatt sifirtu jew mortu xi post ġdid u xi ħadd mill-ġenituri tagħkom kien qiegħed isuq? X’jagħmlu biex isibu t-triq? Jużaw il-GPS biex jaslu fejn iridu. Jekk ma jużawx il-GPS jew xi mappa, x’aktarx jieħdu triq b’oħra aktar minn darba, u l-vjaġġ idum aktar milli kieku użaw l-għajnuna tal-GPS. 

Issa Ġesù, huwa l-GPS tagħna! Aħna kollha rridu xi darba morru l-ġenna. Nafu li biex immorru l-ġenna rridu nkunu tfal bravi u meta nikbru nibqgħu bravi. Irridu ngħixu bħal Ġesù. Għalhekk Ġesù hu l-GPS tagħna, għax Ġesù sar bniedem bħalna, u wriena kif għandna ngħixu biex immorru l-ġenna. Waħedna tkun aktar diffiċli, bħal meta ridna mmorru xi post ġdid, ma konniex nafu t-triq u ma ridniex nużaw l-għajnuna tal-GPS jew tal-mappa. Il-muntanji u l-widien li ssemmew fl-Evanġelju huma dawk id-diffikultajiet li niltaqgħu magħhom u li ma jħalluniex nimxu wara Ġesù.

X’tistgħu tagħmlu biex tużaw lil Ġesù bħala ĠPS tagħkom? (it-tfal jistgħu isemmu azzjonijiet tajba kemm fid-dar, fl-iskola u postijiet oħra, tajjeb li jissemma t-talb u wkoll il-qari ta’ ġrajjiet mill-Bibbja, li jgħinuhom biex isiru jafu kif għex Ġesù).

Biex matul l-avvent tibqgħu tiftakru u tibqgħu tużaw lil Ġesù bħala l-GPS tagħkom, għandkom is-siġra tal-Milied. Intom tafu kemm din tkun imżejna sabiħa. Intom se żżejnuha sabiħa wkoll, għax ser tkun mimlija b’dawk l-affarijiet tajbin li tagħmlu. Għandkom ukoll il-qlub. Aqbdu waħda u taqbuha fin-naħa ta’ fuq. Fuqha penġu xi ħaġa li semmejtu (dak li tistgħu tagħmlu biex Ġesù jkun il-GPS tagħkom). Wara li tagħtu l-kulur dak li penġejtu, żejnu l-qalb, u għaddu ż-żigarella mit-toqba biex iddendluha fuq is-siġra. Din is-siġra ħalluha fil-kamra l-aktar fejn tkunu bħala familja. Kulħadd jista’ jagħmel il-qalb tiegħu, anke l-ġenituri tagħkom, għax kulħadd jixtieq li Ġesù jkun il-GPS tiegħu! Fakkru lil xulxin, biex minn hawn u ftit ġranet oħra tagħmlu aktar qlub fuq is-siġra u tibqgħu tagħmlu hekk sal-aħħar tal-Avvent. Iżda għalkemm l-Avvent jispiċċa, ftakru li Ġesù dejjem jibqa’ dak li jurikom it-triq it-tajba.

Qabel ma tgħidu t-talba, kantaw, Walking with Jesus, u wkoll morru quddiem Ġesù Bambin u għamlu promise miegħu, li tridu timxu warajh.

Inroddu s-salib.

Għażiż Ġesù, jien irrid li inti turini t-triq. Jien irrid nimxi minn din it-triq li qed turini. Għinni biex f’din it-triq ma jkollix muntanji u widien li jfixkluni. Grazzi Ġesù, ejja u oqgħod ġewwa qalbi.

Introduzzjoni

Fl-Evanġelju tal-lum ser niltaqgħu ma’ personaġġ importanti: Ġwanni l-Battista. Ġwanni kien fid-deżert meta ġie mnebbaħ minn Alla biex jipprepara lin-nies għal meta jiltaqgħu ma’ Ġesù. B’ħafna kuraġġ u b’kelma soda hu jibda jħeġġeġ lin-nies biex jindmu u jitgħammdu.

  • Li nindmu tfisser li mhux biss jiddispjaċina għall-għażliet ħżiena li nagħmlu, iżda nwegħdu wkoll li ninbidlu għall-aħjar

Ma hemmx bżonn ta’ l-ebda materjal

Fl-Evanġelju smajna l-kliem, “Kull wied jimtela, kull muntanja u għolja titbaxxa, il-mogħdijiet mgħawwġa jiddrittaw,u t-triqat imħarbta jitwittew.” Kieku kellna nimmaġinaw kif tidher id-dinja jekk iseħħ dan kollu, quddiemha jkollha art kollha witta. Faċli timxi f’art bħal din, iżda f’post bil-widien, muntanji u toroq żigużajg, tgħejja u tasal biex taqta’ qalbek. Din triq b’ħafna ostakli u diffikultajiet! Ġwanni għalhekk illum qiegħed jistedinna biex inħarsu lejn il-ħajja tagħna u naraw x’inhuma dawk l-affarijiet li qegħdin joħolqulna ostakli fil-ħajja tagħna u qegħdin ifixkluna milli nsiru nafu aktar lil Ġesù. X’inhuma d-diffikultajiet li għandna u li mhux qegħdin iħalluna ngħixu kif jixtieq Ġesù? Ġwanni ċar ħafna, irridu nneħħu dawn l-ostakli għax ikun jaqblilna!

X’inhuma dawk l-affarijiet jew okkażjonijiet li qed jikkrejaw il-potholes fit-triq tiegħek lejn Ġesù? (tista’ tkun ir-rabja, il-vizzju tal-gideb, l-għażż jew għira għal dak li għandhom sħabkom)

Fl-Evanġelju smajna l-kelma ndiema. Din tfisser li jiddispjaċik għal dak li għamilt ħażin u tagħmel wegħda miegħek innifsek li ma terġax tagħmel hekk. Fil-fatt, dan huwa dak li nitolbu meta ngħidu l-Att tal-Indiema. Li tindem ma jfissirx li taqta’ qalbek jekk terġa tagħmel l-istess għażla ħażina, l-istess dnub. Tfisser li terġa’ tagħmel il-kuraġġ, u meta titfaċċa dik l-istess diffikultà, tipprova tegħlibha.

Dalwaqt wasal il-Milied. Bħal dan iż-żmien, ikun qiegħed isir aktar tindif mis-soltu fid-dar, hux hekk? Qisu kulħadd inaddaf dak il-ftit aktar, qabel ma jarma d-dar għall-Milied, huwa żmien meta ħafna jkollhom xi mistednin id-dar. Imma nnaddfu kemm inaddfu tajjeb, wara ftit tal-ġranet nerġgħu naraw it-trab fuq l-għamara u t-tidlik mal-art. X’nagħmlu? Inħallu l-ħmieġ jew nerġgħu nnaddfu?

U qalbna l-istess. Jiddispjaċina tal-ħażin li għamilna, immorru nqerru u wara ftit nerġgħu nagħmlu xi dnub ieħor u qalbna terġa’ titħammeġ. Għalkemm m’hemmx għalfejn immorru nqerru ta’ kuljum, tajjeb li kuljum naħsbu dwar l-għażliet tagħna ta’ matul il-ġurnata u nitolbu lil Alla jaħfrilna ta’ dak li għamilna ħażin. It-talb  u l-qari tal-Bibbja, u b’mod speċjali t-tqarbin, jgħinuna biex ngħelbu t-tentazzjonijiet li jkollna. L-għażliet tajba li nagħmlu, iwittu t-triq, waqt li l-għażliet ħżiena joħolqulna l-widien u l-muntanji fil-ħajja tagħna. 

L-attività għal din il-ġimgħa ma tistgħux tagħmluha d-dar, minflok ser tmorru l-knisja u tqerru. (nota lill-ġenituri, tħallux li l-qrar isir bl-għaġla qabel il-quddiesa, minflok araw meta jkun hemm saċerdoti għall-qrar u morru dak il-ħin).

Qabel ma tqerru ftakru f’dak li għandkom tagħmlu biex il-qrara tagħkom tkun tajba:

l-ewwel aħsbu dwar x’għażliet ħżiena għamiltu, irid jiddispjaċikom li għamiltu dan id-dnub

wara twegħdu lil Alla li ser tippruvaw ma terġgħux tagħmlu dan id-dnub.

Wara jmiss li tmorru quddiem is-saċerdot u tqerru. Ftakru l-penitenza li jgħidilkom tagħmlu u għamlu din il-penitenza wara li tqerru.Is-song, Totally transformed, tirrifletti dan il-ħsieb: li rridu lil Ġesù jbiddel lil ħajjitna.

Inroddu s-salib.

Mulej Alla, inti tixtieq li jien ukoll nipprepara lil qalbi biex nilqa’ lil Ġesù ġo fija. Għinni biex ninbidel u nsir aktar nixbaħ lil Ibnek Ġesù. Ammen.

1. Skont l-Evanġelju tal-lum, min kien il-gvernatur tal-Lhudija fiż-żmien li fih Ġwanni l-Battista kien qiegħed jippriedka?

Correct! Wrong!

2. F'liema inħawi kien qed jippriedka Ġwanni l-Battista?

Correct! Wrong!

3. Lil min fost il-profeti ikkwota Ġwanni meta kien qed jippriedka?

Correct! Wrong!

4. X'kien il-messaġġ prinċipali ta' Ġwanni?

Correct! Wrong!

Aħbar TajbaNiżżel

Kif tuża din il-paġna

Alla jkellimna b'ħafna modi, inkluż bil-qari mill-Bibbja fil-Quddiesa. Hawnhekk tista' ssib tagħrif u attivitajiet marbuta mal-qari tal-Quddiesa tal-Ħadd u li għandhom jispirawk tgħix kuljum dan il-qari mill-Bibbja.