Jiena d-dielja vera

Il-5 Ħadd tal-Għid

Din il-parti tal-Evanġelju li ser nisimgħu llum, hija parti mid-diskors ta’ Ġesù waqt l-aħħar ikla. Fl-Evanġelju ta’ San Ġwann, fl-aħħar ikla Ġesù jaħsel saqajn l-appostli, jitkellem dwar it-tradiment ta’ Ġuda u ċ-ċaħda ta’ Pietru u jagħmel diskors twil lill-appostli fejn iwiegħedhom li ser jibgħatilhom l-Ispirtu s-Santu u l-bżonn li jibqgħu magħqudin miegħu bħalma l-friegħi huma parti mid-dielja. U din fil-fatt, hija l-parti li ser nisimgħu llum. 

Din l-imaġini tad-dielja ġejja mit-Testment il-Qadim, fejn il-Poplu ta’ Alla huwa mxebbah mal-għalqa tad-dwieli u Alla dak li jieħu ħsiebha (Salm 80, 9-10). Wieħed mill-għanijiet ta’ San Ġwann, huwa li juri kif Ġesù jwettaq il-wegħdiet li Alla għamel mal-poplu ta’ Iżrael. F’dan il-passaġġ Ġesù jrid lill-appostli jifhmu u jemmnu li wara mewtu, hu ser jibqa’ magħhom u li huma se jkunu parti minnu kif il-fergħa hija parti mid-dielja. Din hi l-intimità li Ġesù jixtieq li jkollu magħna. Ġesù ried lill-appostli li jkollhom din ir-relazzjoni miegħu biex ikomplu dak li kien beda hu. Kieku din l-għaqda sfaxxat, l-appostli ma kienux jistgħu ikomplu fuq il-passi tiegħu. Issa, dan qiegħed jitkompla fina u permezz tagħna ukoll. 

B’din it-tixbiha, Ġesù jurina wkoll li aħna parti minn komunità akbar. Id-dielja magħmula minn diversi friegħi. Kif Ġesù, qiegħed fija, jinsab ukoll magħqud mal-oħrajn. Din torbot ħafna ma’ dak li San Pawl jiddeskrivi bħala l-Ġisem ta’ Kristu (1 Kor 12,27). Bl-istess mod li aħna nieħdu ħsieb ġisimna kollu, hekk ukoll irridu nieħdu ħsieb l-oħrajn, mingħajr preferenza. Aħna lkoll parti mill-istess ġisem. Irridu nħarsu lejn l-oħrajn, kif iħares lejhom Ġesù, inġibu ruħna magħhom, bil-mod kif iġib ruħu magħhom Ġesù, ngħinu, nħobbu u naħfru kif jagħmel hu. Hawnhekk, aktar nindunaw li waħedna dan kollu ma nistgħux naslu għalih. Irridu bilfors l-għajnuna tal-Ispirtu s-Santu, biex ngħixu bħala parti dejna tal-Ġisem ta’ Kristu.

Qabel ma Ġesù jgħid il-parti li qrajna llum, Ġesù wiegħed l-għajnuna tal-Ispirtu s-Santu. Hu jaf li waħedna hija diffiċli wisq. Huwa l-Ispirtu s-Santu li ser jagħtina l-kuraġġ, is-saħħa, ir-rieda u l-impenn biex ngħixu ħajja nisranija ta’ vera. X’qiegħed jistenna Ġesù minna? Ġesù jixtieq li qabel kollox insiru nafuh dejjem aktar. Aħna nsiru nafuh mill-Iskrittura. It-talb u l-Ewkaristija ser jgħinnuna biex insaħħu r-relazzjoni tagħna, miegħu ukoll. Aktar ma nsiru nafu lil Ġesù, aktar ser tidħol fina x-xewqa li nagħmlu dak li jixtieq hu. Meta nagħmlu dak li jixtieq Ġesù, inkunu qegħdin nagħmlu l-frott li qiegħed jitkellem dwaru Ġesù. 

F’din is-silta, Ġesù jiftħilna għajnejna wkoll, dwar dak li jiġri meta aħna nibirdu, meta aħna ma nibqgħux nagħmlu l-almu tagħna biex nimxu warajh. L-Evanġelju jibda bil-kliem ta’ Ġesù, “Jiena d-dielja vera.” Mela sinjal li hemm dwieli li ma humiex vera! Tajjeb li naraw ma’ liema dielja aħna magħqudin. X’jistgħu jkunu dawn id-dwieli oħra? X’inhu dak li għandu l-akbar prijorità fil-ħajja tagħna? It-tweġiba tagħna ser turina mal-liema dielja qegħdin. Biex inkunu mad-dielja l-vera, irridu nagħmlu kollox, għall-glorja ta’ Alla.  Dan iseħħ meta nippruvaw li nagħmlu għażliet tajba f’dak kollu li nagħmlu. 

Qari mill-Evanġelju skont San Ġwann (Ġw 15, 1-8)

F’dak iż-żmien, Ġesù qal lid-dixxipli tiegħu: “Jiena d-dielja vera u Missieri l-bidwi. Kull fergħa fija li ma tagħmilx frott jaqtagħha; u kull waħda li tagħmel il-frott jiżborha u jnaddafha, biex tagħmel frott aktar. Intom ġa ndaf minħabba l-kelma li għedtilkom.

Ibqgħu fija, u jiena nibqa’ fikom. Kif il-fergħa ma tistax tagħmel frott minnha nfisha jekk ma tibqax fid-dielja, hekk anqas intom jekk ma tibqgħux fija. Jiena d-dielja, intom il-friegħi. Min jibqa’ fija u jiena fih, dan jagħmel ħafna frott; għax mingħajri ma tistgħu tagħmlu xejn. Jekk wieħed ma jibqax fija, jintrema barra bħal fergħa, u jinxef; imbagħad, friegħi bħal dawn jiġbruhom u jixħtuhom fin-nar u jinħarqu.

Jekk tibqgħu fija u kliemi jibqa’ fikom, itolbu kulma tridu, u jingħatalkom. Din hi l-glorja ta’ Missieri, li intom tagħmlu ħafna frott u tkunu dixxipli tiegħi”.

Il-Kelma tal-Mulej
Tifħir lilek Kristu

Istruzzjonijiet u għan

  1. Aqra sew l-Evanġelju biex issir midħla tiegħu.
  2. Aħseb dwaru u ara x’qiegħed jgħid lilek personali. Liema hi l-parti li l-aktar li laqtitek? Għaliex?
  3. Irrifletti dwar il-ħajja tiegħek. L-istil ta’ ħajja li qed tgħix, l-għażliet li qed tagħmel, qegħdin isaħħu jew idgħajfu r-relazzjoni tiegħek ma’ Ġesù?
  4. Aħseb dwar l-għażliet li qed tagħmel għal uliedek. X’inhuma l-prijoritajiet? L-isport, il-mużika, l-istudju huma kollha importanti. Ara iżda jekk dawn, humiex jieħdu tant ħin tat-tfal u tal-familja, li mhux qed ikun hemm ħin biex it-tfal jattendu l-laqgħat ta’ katekeżi, biex tmorru flimkien għall-quddies tal-Ħadd u biex titolbu flimkien. Tista’ l-ħajja tal-familja tkun organizzata b’mod differenti, biex lil Ġesù tagħtuh prijorità?
  5. Flimkien bħala familja sibu ħin u post biex taqraw dan l-Evanġelju. L-ambjent jgħin ukoll, għalhekk qabel ma tibdew, fejn ser tiltaqgħu ppreparaw:
  6. i. Bibbja bil-qari minn San Ġwann (15, 1-8);
    ii. Xemgħa;
    iii. Il-mejda fejn hemm il-Bibbja, miksija bi drapp abjad
    vi. Pjanta, għinu lit-tfal jindunaw kif il-weraq hum
    v. Computer/laptop bil-qari u clips
  7. Mur fil-parti tat-tfal skont l-etajiet u għamilha flimkien magħhom
  8. Addatta din il-parti skont kif hemm bżonn, tiddejjaqx tkun kreattiv 😊
  9. Mur fil-parti Itlob mid-dar għall-mument ta’ talb flimkien bħala familja

L-appostli u l-ħbieb tiegħu mhux dejjem kienu jifhmu dak li kien qiegħed jgħallimhom Ġesù. Għalhekk, kien jgħidilhom xi storja jew jagħtihom eżempji b’affarijiet li huma kienu jafu sew. Illum Ġesù juża l-eżempju tad-dielja. L-appostli kollha kienu jafu x’inhi dielja, kienu jafu kif tikber u kif wieħed jieħu ħsiebha. Intom qatt rajtu dielja? Tafu x’inhi? (nota lill-ġenituri: uruhom l-istampa tad-dielja, jew ħafna aħjar kieku turuhom id-dielja ta’ vera. Jekk toħorġu flimkien, għaddu minn quddiem xi għalqa tad-dwieli biex jarawha t-tfal). Id-dielja hija dik il-pjanta li tagħtina l-għeneb. Ħa nisimgħu lil Ġesù, u x’ser jgħidilna dwar id-dielja.

  • Meta nagħmel dak li jixtieq Ġesù, jien inkun bħal dik il-fergħa tad-dielja li tagħmel il-frott.
  • Stampa ta’ dielja
  • Printout tal-attività
  • Kuluri
  • Ritratti jew minflok tistgħu tpinġu (araw l-attività, aktar l-isfel)
PrintoutNiżżel

Fhimtuha l-ġrajja li tkellem Ġesù dwarha llum? Mhux faċli hux vera? Ejjew naraw dan il-clip dwar Basil, u hekk tifhmu lil Ġesù aħjar. 

X’ried Basil? (Basil ried li jagħmel l-għeneb)

Seta’ jagħmel l-għeneb waħdu? (le)

X’kellu jagħmel biex ikollu l-għeneb? (ried jibqa’ mad-dielja)

Tafu għalfejn kellu jibqa’ mad-dielja biex ikollu l-għeneb? Għax iz-zokk jieħu l-ikel li jkollu bżonn biex jagħmel il-frott, mid-dielja. Id-dielja jkollha l-għeruq fil-ħamrija u mill-ħamrija tagħti l-ikel lill-friegħi tagħha. Għalhekk Basil, waħdu ma setax ikollu l-għeneb. Hu kellu bżonn lid-dielja, biex tagħtih is-saħħa u l-ikel u b’hekk seta’ jkollu l-għeneb.

Intom, tridu tkunu tfal bravi, hux hekk? 

Faċli li tkunu bravi?

Intom tafu li biex tkunu bravi, tridu tagħmlu dak li jixtieq Ġesù. U kif ser tkunu tafu x’jixtieq Ġesù? (nisimgħu ġrajjiet mill-Bibbja, nisimgħu u nitgħallmu mill-ġenituri tagħna u dawk li jħobbuna, noqgħodu attenti waqt il-laqgħat mal-katekisti u għalliema tar-reliġjon, u attenti wkoll meta mmorru l-knisja għall-quddiesa, u nitolbu)

Jekk aħna nippruvaw nagħmlu dak li jixtieq Ġesù, inkunu bħal Basil li baqa’ parti mid-dielja. Basil induna li waħdu ma setgħax jagħmel l-għeneb. Aħna wkoll, ma nistgħux inkunu bravi waħedna. Irridu lil Ġesù u lil dawk kollha li jibgħatilna Ġesù (bħall-ġenituri, nanniet, saċerdoti, katekisti, għalliema, ħbieb), biex jgħinuna nagħmlu dak li jixtieq hu. Dawn jgħinuna nagħmlu dak li jixtieq Ġesù, għax huma wkoll, bħal Basil, iddeċiedew li jibqgħu parti mid-dielja. Huma ddeċiedew li jridu jħobbu lil Ġesù u jagħmlu dak li jixtieq hu. U parti minn dak li jixtieq minnhom Ġesù, hu li jgħallmuna u jgħinuna biex inkunu tfal bravi!

Fl-attività tal-lum, għandkom stampa ta’ Ġesù, bħala d-dielja. Fil-friegħi (fiċ-ċrieki) ser twaħħlu ritratt tagħkom u ta’ dawk li jgħinukom biex tkunu tfal bravi. Jekk ma għandkomx ritratti, tistgħu tpinġuhom. Wara agħtu l-kulur lill-istampa kollha. Fejn ser tħalluha din l-istampa? X’imkien fejn tarawha ta’ sikwiet?

Meta aħna nagħmlu dak li jixtieq Ġesù, inkunu ferħanin, għalhekk ser inkantaw, Jump around, biex niftakru li kulma nagħmlu, għandna nagħmluh biex Ġesù jieħu gost bih. 

Il-ġimgħa l-oħra, Ġesù qal li hu r-Ragħaj it-Tajjeb. Illum ser nisimgħu lil Ġesù jiddeskrivi lilu nnifsu bħala d-dielja vera. Id-dielja hija dik il-pjanta li tagħtina l-għeneb. 

  • Ġesù jurina li meta nħalluh ikun parti mill-ħajja tagħna, aħna nagħmlu l-frott
  • Frott li jħobbu t-tfal
  • Xi frott li jħobbu t-tfal, iżda li hu mħassar
  • Toaster
  • Ħobż
  • Printout tal-istampa tal-għeneb
  • Finger paint vjola, jew kuluri
  • Lapes
PrintoutNiżżel

Ġesù, illum tkellem dwar il-frott, imma qabel ma nitkellmu dwar dak li qal Ġesù, ħa nagħmlu toast. (nota lill-ġenituri: qabel ma tibdew din is-sessjoni ppreparaw it-toaster u l-ħobż. It-toaster agħmluha fejn tidher u neħħu l-wire mis-socket tad-dawl. Ħallu l-wire jidher li mhux imqabbad mal-elettriku. Agħmlu ta bir-ruħkom li ma ndunajtux li l-wire mhux imqabbad u poġġu l-ħobż ġot-toaster. Jekk ma għandkomx toaster, tistgħu ġġibu eżempju bit-television, u minflok ser tagħmlu toast, għidu li ser taraw programm fuq it-television)

X’ġara? Jidher li mhux ser nieħdu toast illum! Tgħid it-toaster għandha l-ħsara? (jekk it-tfal jibqgħu ma jindunawx li l-wire mhux imqabbad mal-elettriku, ċaqalqu l-wire, jew inkella uruhom li mhux imqabbad. Waqt din l-attivita’ hu mportanti ħafna li nkunu mat-tfal u li kif suppost nagħmlu dejjem, nassiguraw ruħha mis-sigurta’ tagħhom)

Hekk aħjar … mela mhux it-toaster ħażina, imma biex taħdem, trid tkun imqabbda mad-dawl.

Biex jgħallem lill-appostli, Ġesù ma użax toaster, imma ġab l-eżempju tad-dielja. Dak iż-żmien toasters ma kienx hemm, imma dwieli kien hemm ma’ kullimkien, għalhekk l-appostli setgħu jifhmu eżatt x’ried jgħid Ġesù. Bħalma fhimtu intom, li minħabba li t-toaster ma kinitx imqabbda mal-elettriku, ma setgħetx issir it-toast.

X’għandu x’jaqsam dan kollu mal-ħajja tagħna? 

Illum Ġesù qiegħed jgħidilna li bl-istess mod kif il-friegħi jibqgħu ħajjin u b’saħħithom sakemm jibqgħu parti mid-dielja, hekk ukoll importanti li aħna nħallu lil Ġesù jkun parti minn ħajjitna. Minħabba li l-fergħa tibqa’ mad-dielja, hija tista’ tagħmel l-għeneb. Meta aħna nħallu lil Ġesù jidħol f’ħajjitna, il-frott li nagħmlu aħna jidher bil-mod li nġibu ruħna u bil-mod li nitkellmu. F’waħda mill-ittri li kiteb San Pawl, isemmi x’inhuma dawn il-frott li aħna nagħmlu. San Pawl, issejħilhom il-frott tal-Ispirtu s-Santu. L-Ispirtu s-Santu huwa dak li jagħtina l-kuraġġ u s-saħħa biex ngħixu kif jixtieqna Ġesù. San Pawl jgħidilna li l-Ispirtu s-Santu jgħinna biex nikbru fl-mħabba, fl-hena, fil-paċi, fis-sabar, fil-ħlewwa, fl-ħniena, fit-tjieba, fir-rażan u fil-fidi.

Nafu wkoll li l-pjanta għandha bżonn l-ikel biex tkun tista’ tagħmel il-frott. Aħna wkoll għandna bżonn l-ikel, dan insibuh fl-Ewkaristija (it-tqarbin), fit-talb u fil-qari tal-Bibbja. Mela biex nagħmlu dan il-frott tajjeb, għandna bżonn li nħallu lil Ġesù jkun parti mill-ħajja tagħna u bl-għajnuna tal-Ispirtu s-Santu, nagħmlu dan il-frott. 

Hawnhekk hawn dan il-frott (nota lill-ġenituri: uruhom il-frott it-tajjeb u anke dak li hu mħassar). Minn liema tridu?

Il-frott l-imħassar ħadd ma jridu! Ġesù qal li hu d-dielja l-vera. Dan juri li aħna nistgħu nkunu parti minn dielja li mhix vera, u f’dan il-każ nibdew nagħmlu frott imħassar. Dan jiġri meta lil Ġesù nwarrbuh minn ħajjitna, meta ma nitolbux, meta ma noqgħodux attenti waqt il-qari mill-Bibbja jew waqt il-laqgħat ta’ katekeżi u waqt il-quddiesa, jew inkella lanqas biss imorru għall-quddiesa, inkella meta aħna nobdu aktar mill-ħbieb tagħna milli minn Ġesù. 

Importanti għalhekk li aħna nkunu parti mid-dielja ta’ Ġesù. Hu jaf li mhux dejjem ser jirnexxielna nagħmlu dak li jrid hu, għalhekk isemmi li l-bidwi jiżbor lis-siġra, jiġifieri li bl-għajnuna ta’ Alla, aħna nistgħu nieqfu nagħmlu għażliet ħżiena, għalkemm dan mhux faċli. Fl-attività tal-lum, kulħadd ser jgħin biex joħorġu ideat ta’ kif ser inkabbru l-frott tal-Ispirtu s-Santu ġo fina. L-ewwel tistgħu tisimgħu din: Il-frott tal-Ispritu. Għandkom l-istampa tal-għanqud għeneb. Tistgħu tużaw il-fingerpaint biex tagħtu l-kulur lill-għeneb, inkella użaw kuluri oħra. Aħsbu kif tistgħu turu mħabba u ħniena, kif tistgħu tferrħu lill-oħrajn, kif tistgħu ġġibu l-paċi, agħtu eżempji ta’ meta turu paċenzja, rażan u tjieba, kif tistgħu tkabbru l-fidi. Dawn l-eżempji, iktbuhom fl-għeneb u l-istampa poġġuha mal-fridge biex kull darba li tħarsu lejha, tiftakru x’għandkom tagħmlu biex tikbru fil-frott tal-Ispirtu s-Santu.

Irroddu s-salib.

Bħalma l-friegħi huma kollha parti minn pjanta waħda tad-dielja, aħna wkoll maqgħudin kollha ma’ Ġesù. Biex nuru dan, illum, għat-talba nżommu id xulxin.

Ġesù, inti d-dielja l-vera u aħna l-friegħi. Għinna biex nibqgħu magħquda miegħek. Spirtu s-Santu kun inti l-għajnuna tagħna biex inkabbru fina l-frott tal-imħabba, hena, paċi, paċenzja, ħlewwa, ħniena, tjieba, rażan u fidi. Mulej Alla berikna biex bħala familja nibqgħu ngħixu fl-imħabba tiegħek. Ammen.

1. Fl-Evanġelju tal-lum, Ġesù jgħid li huwa d-dielja vera u li Missieru huwa...

Correct! Wrong!

2. Ġesù qal ukoll li kull fergħa li hija fih u li ma tagħmilx frott, huwa....

Correct! Wrong!

3. X'kien il-kmand li Ġesù ta lid-dixxipli meta hu wriehom li jridu jkunu parti minnu bħalma l-friegħi huma parti mid-dielja?

Correct! Wrong!

4. Ġesù jgħid li dawn il-friegħi, li għax ma baqgħux fih jintremew barra u jinxfu, għad ukoll...

Correct! Wrong!

Kif tuża din il-paġna

Alla jkellimna b'ħafna modi, inkluż bil-qari mill-Bibbja fil-Quddiesa. Hawnhekk tista' ssib tagħrif u attivitajiet marbuta mal-qari tal-Quddiesa tal-Ħadd u li għandhom jispirawk tgħix kuljum dan il-qari mill-Bibbja.