L-Indiema

Għalkemm dak li jgħidu n-nies dwar xi ħaġa partikolari kapaċi jaffettwa l-attitudni tagħna lejha, l-esperjenza tagħna ta’ dik l-istess ħaġa tagħmel differenza kbira. Min jaf kemm-il darba nisimgħu li film partikolari/series ikun ‘tajjeb ħafna’ iżda malli nibdew narawh ma jolqotniex filwaqt li ġieli ninzertaw ieħor li ftit inkunu smajna dwaru u jżommna mkaħħlin mal-iskrin.

Bħalissa ninsabu fi żmien ir-Randan u kemm-il darba smajt l-esperjenza ta’ persuni li semgħu lil xi qassis partikolari jipprietka l-eżerċizzi u tant laqathom li sena wara sena jkunu jridu jisimgħu tiegħu biss. Meta xi ħaġa tolqotna u tmissna, inkunu rridu nibqgħu nfittxuha u nibqgħu niġru warajha biex ma nitilfuhiex.

L-esperjenza ta’ Marija ta’ Magdala kienet simili, iżda ħafna iżjed qawwija għaliex dak li rċeviet kienet xi ħaġa li kienet bil-wisq akbar minn dak li hi stess kienet taħseb li ħaqqha. Bħala ġenituri, tant nidraw nagħtu lilna nfusna ‘b’xejn’ lil uliedna li meta dawn jiġu lura mill-iskola b’xi kartolina jew b’xi craft magħmul apposta għalina, nilqgħuh daqslikieku kien l-isbaħ rigal. Min jaf kif ħassitha Marija ta’ Magdala meta ltaqgħet ma’ Ġesù li ħafrilha d-dnubiet kollha tagħha u ħabbha bi mħabba li qatt ma kienet esperjenzat bħalha.

Ilkoll nafu li l-imħabba lejn il-maħbubin tagħna, b’mod partikolari lejn l-irġiel/nisa tagħna u wliedna, iġġegħelna nagħmlu affarijiet li qatt ma konna nimmaġinaw li għandna s-saħħa li nagħmlu. Min jaf kemm iljieli mqajma biex noqogħdu ma’ wliedna li jkunu ma jifilħux; kemm kuntatti u applikazzjonijiet biex insibulhom skejjel addattati għalihom; kemm ġiri għal terapiji u għand professjonisti minn ġenituri li għandhom tfal bi bżonnijiet speċjali, kemm ħin nagħmlu x-xogħol tad-dar u nsajru biex naraw li d-dar tagħna tkun ambjent sabiħ għal dawk kollha li jgħixu fiha. L-imħabba kapaċi tirbaħ il-biża’, id-dgħufija u anke l-mistħija.

Marija ta’ Magdala ħasset li din l-imħabba li rċeviet trid tibqa’ tiġri warajha, f’dak li hu l-imħabba ppersonifikata – Ġesù nnifsu. F’mument li fih kważi l-Appostli kollha ma kinux preżenti – jiġifieri taħt is-Salib – l-imħabba wasslitha biex ma tibżax tkun hemm, minkejja s-suldati, minkejja l-qalb maqsuma frott l-inġustizzja tat-tbatija ta’ raġel li hi kienet ċerta fuq li ċerta li hu innoċenti. Lil Marija nħafrilha ħafna u għalhekk ħabbet ħafna – bil-kliem u kif ukoll bl-għemil u dakinhar tal-Kalvarju – bil-preżenza.

Meta wliedna jkunu għadhom żgħar, insibuha faċli li nħobbuhom b’mod prattiku ħafna – għaliex jiddependu fuqna għal kollox! Madanakollu meta jikbru ġieli nindunaw li jkunu għaddejjin minn diversi forom ta’ tbatija u ma nkunux nafu x’nistgħu nagħmlu – speċjalment meta ma jħalluniex nidħlu f’dan l-ispazju. L-istess esperjenza tista’ tiġri mal-irġiel/nisa tagħna meta jingħalqu fihom infushom minħabba problemi ta’ xogħol, mard jew problemi oħra. Kif nistgħu nħobbu f’mumenti bħal dawn? Marija ta’ Magdala turina l-qawwa tal-preżenza, il-qawwa tal-imħabba li meta ma tistax tiġi espressa bil-kliem jew bl-għemil tista’ tibqa’ mwassla permezz tal-preżenza ta’ dak li jkun. Hi baqgħet hemm, siekta iżda preżenti. Waqt l-agunija tiegħu Ġesù seta’ jħares lejha u jara fiha persuna li baqgħet temmen fih sal-aħħar, baqgħet issegwih sal-aħħar – mhux biss fil-mumenti ta’ mirakli u ħwejjeġ kbar, iżda anke f’dan il-mument tal-akbar dgħufija u vulnerabbiltà – anke meta forsi hi stess ma kinitx qed tifhem x’qed jiġri. Marija ta’ Magdala baqgħet hemm, id-dixxiplu wara l-Imgħallem – sal-aħħar.