Min hu Ġesù?

24-il Ħadd ta' Matul is-Sena

F’dawn l-aħħar ġimgħat konna qegħdin nisimgħu kif il-folla u anke d-dixxipli ma għarfux l-identità propja ta’ Ġesù. Illum naraw lil Ġesù jistaqsi lid-dixxipli dwar dak li kienu qed jgħidu n-nies fuqu, u staqsa: “Min jgħidu n-nies li jien?” Wara li jisma’ dak li kellhom xi jgħidu, il-mistoqsija jirrepetieha din id-darba b’mod personali, “Imma intom, min tgħidu li jien?”

Huwa Pietru li għan-nom tal-oħrajn iwieġeb lil Ġesù. It-tweġiba hija perfetta: “Inti l-Messija,” iżda r-reazzjoni ta’ Pietru wara li Ġesù jfiehem dak li kellu jgħaddi minnu, turi li dan ma kienx il-Messija li xtaq Pietru. Il-Lhud kienu ilhom jistennew lill-Messija. Ħafna stennew li dan il-ħellies ser idur kontra r-Rumani u jeħlishom minn taħt idejn dawn il-mexxejja. Madanakollu Ġesù mhux talli ma jwiegħedx xi konfoffa kontra r-Rumani, iżda jgħid li ser ibati, jmut u wara tlett ijiem jerġa’ jqum. Pietru wkoll ma setax jaċċetta li Ġesù, li kien il-Messija, kien ser ikollu jbati u jmut. Wara r-reazzjoni ta’ Pietru, Ġesù jkellem mhux biss lid-dixxipli, iżda wkoll lin-nies li kienu hemm u jgħidilhom li min irid jimxi warajh irid jerfa’ salibu. F’dawk iż-żminijiet, is-salib kien mistmerr. Il-ħallelin u nies ħżiena kienu jingħataw il-mewt fuq is-salib. Kienet mewta ta’ tbatija u anke ta’ mistħija, minħabba li huma kienu jkunu mġielgħa jitilgħu bis-salib fuq daharhom sal-post fejn isallbuhom. Din aħna nafuha sew, għax hija fil-fatt il-mewt li ngħatat lil Ġesù. Meta Ġesù qal dawn il-kliem, ma kienx qed ifisser li dawk li jimxu warajh ser jingħataw il-mewt. Għalkemm ukoll, ħafna kienu li taw u għadhom jagħtu ħajjithom għall-imħabba tiegħu. Ġesù qiegħed jgħid lil kull wieħed u waħda minna li biex inkunu dixxipli tiegħu, aħna ser ngħaddu minn ħajja ta’ għażliet li magħhom jistgħu wkoll iġibu t-tbatija. Li nimxu wara Ġesù mhijiex għażla ta’ ħajja komda. Ġesù jwiegħed ukoll, li wara din it-tbatija u impenn biex nimxu warajh, ser inkunu ppremjati, bil-ħajja ta’ dejjem. 

Ħadd ma jitlob li jkollu salib fil-ħajja. Meta nkunu għaddejjin minn żmien diffiċli nitolbu li jfittex jgħaddi. Anke Ġesù, fl-ort tal-Ġetsemani talab biex jiġi meħlus mit-toqol tas-salib li kien qiegħed jistennih. Minkejja dan, għaliex hu kien ubbidjenti għar-rieda tal-Missier u b’fiduċja sħiħa fih, huwa jaċċetta li jbati, jiġi msallab u jmut. Kif nafu, l-istorja ma tieqafx hemm, għax kif jgħidilna llum Ġesù, wara tlitt ijiem jirbaħ lill-mewt. Għalhekk li nerfgħu salibna, tfisser li ngħixu bħal Ġesù, biex wara din il-ħajja, nirċievu dak li wegħdna: il-ħajja ta’ dejjem.

Qari mill-Evanġelju skont San Mark (Mk 8, 27-35) 

F’dak iż-żmien, telaq Ġesù flimkien mad-dixxipli tiegħu lejn l-irħula ta’ Ċesarija ta’ Filippu. Huma u mexjin, lid-dixxipli tiegħu għamlilhom din il-mistoqsija: “Min jgħidu n-nies li jien?” Weġbuh u qalulu: “Ġwanni l-Battista; oħrajn, Elija; u oħrajn, wieħed mill-profeti”. Staqsiehom: “Imma intom, min tgħidu li jien?”

Qabeż Pietru u qallu: “Inti l-Messija”. Imbagħad ordnalhom ħafna biex ma jitkellmu ma’ ħadd fuqu. U beda jgħallimhom fuq li kien meħtieġ li Bin il-bniedem ibati ħafna, ikun miċħud mill-anzjani u mill-qassisin il-kbar u l-kittieba, joqtluh, u wara tlitt ijiem jerġa’ jqum. Fuq dan kellimhom ċar. Pietru ġibdu lejh u beda jlumu. Iżda hu dar iħares lejn id-dixxipli tiegħu, u ċanfar lil Pietru u qallu: “Itlaq minn quddiemi, ja xitan, għax m’intix taħseb fil-ħwejjeġ ta’ Alla, imma f’dawk tal-bnedmin!”

Sejjaħ lejh in-nies flimkien mad-dixxipli tiegħu u qalilhom: “Jekk xi ħadd irid jiġi warajja, għandu jiċħad lilu nnifsu, jerfa’ salibu, u jimxi warajja. Għax min irid isalva ħajtu, jitlifha; imma min jitlef ħajtu għall-imħabba tiegħi u tal-Evanġelju, isalvaha. Għax x’jiswielu l-bniedem jekk jikseb id-dinja kollha u mbagħad jitlef ħajtu?”

Il-Kelma tal-Mulej
Tifħir lilek Kristu

Istruzzjonijiet u għan

  1. Aqra sew l-Evanġelju biex issir aktar familjari miegħu.
  2. Aħseb dwaru u ara x’qiegħed jgħid lilek personali. Liema hi l-parti li l-aktar li laqtitek? Għaliex?
  3. Li nerfgħu s-salib tagħna, tfisser li ngħixu bħal Ġesù. Sib ħin biex tirrifletti kemm qed tgħix bħal Ġesù. Ġesù kien iħobb lil kulħadd. Ġesù kien jaħfer. Ġesù kien jgħin, mingħajr ma jistenna xejn lura. Ġesù kien jitlob. Ġesù kien jafda f’Alla.
  4. X’inhu s-salib li qed iġġorr bħalissa? Minflok ma titlob biex Ġesù jeħilsek minnu, itlob lil Ġesù biex jgħinek, biex jurik it-triq, biex jimxi miegħek.
  5. Flimkien bħala familja sibu ħin u post biex taqraw dan l-Evanġelju. L-ambjent jgħin ukoll, għalhekk qabel ma tibdew, fejn ser tiltaqgħu ppreparaw:
    i. Bibbja bil-qari minn San Mark (8, 27-35)
    ii. Salib
    iii. Xemgħa
    iv. Il-mejda fejn hemm il-Bibbja, miksija bi drapp aħdar
    v. Computer/laptop bil-qari u clips
  6. Mur fil-parti tat-tfal skont l-etajiet u għamilha flimkien magħhom
  7. Addatta din il-parti skont kif hemm bżonn, tiddejjaqx tkun kreattiv 😊
  8. Mur fil-parti Itlob id-dar għall-mument ta’ talb flimkien bħala familja

Illum nisimgħu lil Ġesù jagħmel mistoqsija lill-ħbieb tiegħu. Jistaqsihom dwar min jaħsbu li hu! Ejjew nisimgħu l-Evanġelju ha naraw min ser iwieġeb tajjeb.

  • Ġesù jgħallimna li mhux dejjem faċli li nixmu warajh
  • Borża tal-karti
  • Kaxxa tal-kuluri jew tal-karti tal-logħob (daqs li tista’ titpoġġa fil-borża)

Nota lill-ġenituri: poġġu l-kaxxa tal-kuluri jew tal-karti tal-logħob fil-borża u għalquha. Uruha lit-tfal u staqsu:

X’taħsbu li fiha din il-borża? (agħtuhom ċans jippruvaw jaqtgħu x’fiha, tweġbuhomx intom u tgħidulhomx x’fiha)

Ħalluhom imissu l-borża u jħossu dak li hemm ġo fiha u jergħu jippruvaw jaqtgħu x’fiha.

Wara li jkunu qalu x’jaħsbu li fiha, ħalluhom jiftħu l-borża.

Issa li qed taraw x’hemm fil-borża tafu eżatt x’fiha, qabel stajtu biss tippruvaw taqtgħu x’kien hemm. Kien hemm differenza meta rajtu l-borża biss u meta stajtu tmisssuha wkoll.

Ġesù ma lagħabx din il-logħba mad-dixxipli, imma għamel xi ħaġa simili. L-ewwel staqsihom “Min jgħidu n-nies li jien?” In-nies ma kienux jafu lil Ġesù daqs kemm kienu jafuh id-dixxipli, allura t-tweġibiet tagħhom ma kienux tajba. Fil-fatt in-nies kienu bħal meta intom ippruvajtu taqtgħu x’fiha l-borża! Jekk naraw l-istorja ta’ Ġesu’, għalhekk kien hemm min ħaseb li Ġesù kien Ġwanni l-Battista, Elija jew  wieħed mill-profeti. Id-dixxipli, min-naħa l-oħra, kienu jafuh aktar lil Ġesù. Huma kien qishom intom meta ftaħtu l-borża u rajtu x’kien fiha. Għalhekk meta Ġesù staqsa, “Imma intom, min tgħidu li jien?” Pietru tah ir-risposta t-tajba: Ġesù hu l-Messija. 

Għalhekk minn din il-logħba u minn dak li qal Ġesù, illum nitgħallmu li rridu ż-żmien biex insiru nafu lil Ġesù. Bħad-dixxipli rridu nersqu lejn Ġesù, u nitkellmu miegħu u wkoll nisimgħu lilu jkellimna lura. Kif taħsbu li nistgħu nagħmlu dan? (naraw li fit-tweġibiet li jagħtu jkun hemm dawn ukoll: naqraw/nisimgħu ġrajjiet mill-Bibbja, nitgħallmu dwar Ġesù mil-laqgħat ta’ katekeżi u mill-iskola, mill-priedka ta’ nhar ta’ Ħadd, meta nitolbu u nitkellmu ma’ Ġesù, u noqgħodu ftit fis-skiet inħarsu lejh …. waqt it-talb, inħajru lit-tfal jagħlqu għajnejhom u jimmaġinaw lil Ġesù qiegħed ħdejhom. Tgħin li fejn qed jitolbu jkollhom stampa ta’ Ġesù, meta ngħaddu minn quddiem knisja nidħlu magħhom u wara li ngħidu talba noqgħodu ftit fis-skiet ukoll)

Aktar ma nsiru nafu lil Ġesù, aktar se nkunu bħall-ħbieb tiegħu u nkunu nafu nwieġbu tajjeb dik il-mistoqsija li għamel! U aktar ma nsiru nafu lil Ġesù, aktar inkunu rridu nagħmlu dak li jixtieq hu. Illum fl-Evanġelju, Ġesù jwissina li mhux dejjem faċli li nagħmlu dak li jixtieq hu. Hu jgħidilna li rridu nerfgħu s-salib. Dan mhux salib bħalma refa’ hu, imma s-salib huwa dawk l-affarijiet diffiċli li niltaqgħu magħhom, bħal per eżempju nobdu lill-ġenituri tagħna, ma niġġieldux, ngħidu l-verità, naqsmu dak li għandna, ngħinu fid-dar. Li nerfgħu s-salib tagħna, jfisser li nħobbu lill-oħrajn bħalma jħobb Ġesù.

Inroddu s-Salib

Mulej Alla, aħna rridu nsiru nafu lil Ġesù aktar, irridu nkunu ħbieb miegħu u rridu nagħmlu bħalu. Għinna niftakru li inti dejjem magħna u tgħinna f’dak li għandna bżonn.

Isimgħu din is-song, u għinu lit-tfal jifhmu l-kliem u jagħmluha wkoll parti mit-talba tagħhom, I wanna be like Jesus.

Illum, Ġesù jistaqsi lid-dixxipli dwar min jemmnu li hu. Aħna nemmnu li Ġesù, flimkien mal-Missier u mal-Ispirtu s-Santu, hu Alla. Għalhekk bħala egħluq għidu t-talba tal-Glorja bil-qalb. 

Jekk tixtiequ tistgħu tagħmlu dawn l-attivitajiet marbuta ma’ din it-talba.

Introduzzjoni

Fl-Evanġelju tal-lum, ser nisimgħu lil Pietru jgħid li Ġesù hu l-Messija. Ġesù min-naħa tiegħu, jgħallimna li dawk li jimxu warajh jiltaqgħu ma’ tfixkil u diffikultajiet u jkollhom jieħdu deċiżjonijiet diffiċli, jgħidilna li rridu nkunu lesti nġorru s-salib

  • Ġesù jgħallimna xi tfisser li nkunu ħbieb tiegħu
  • Li nimxu wara Ġesù, tfisser li se nkunu mistennija nagħmlu affarijiet diffiċli iżda dejjem ikun hemm hu biex jgħinna nagħmluhom.
  • Printout tal-attività
  • Lapes
  • Kuluri 
AttivitàNiżżel

Fl-Evanġelju tal-lum, rajna kif dawk li kienu qrib ta’ Ġesù, kienu jafu min hu. Ġesù hu l-Messija. Iżda huma kellhom idea differenti dwar x’kellu jagħmel il-Messija. Illum Ġesù jgħidilhom li hu l-Messija li kellu jbati u jmut. Ma kienx se jkun mexxej li joħodha kontra r-Rumani u jsalva lil-Lhud minn taħt il-ħakma tagħhom! Pietru u d-dixxipli ħaduha bi kbira, li Ġesù, il-ħabib kbir tagħhom kien ser ikollu jbati. Madanakollu, Ġesù ried jagħmel dak li ried Alla. Kien jaf li biex iwettaq dak li xtaq Alla, kien ser ikollu jbati u jmut. Ġesù ma jieqafx hemm. Illum Ġesù jkompli jaħsad lill-ħbieb tiegħu għaliex jgħidilhom li jekk iridu jkunu dixxipli tiegħu, anke huma ser ikollhom ibagħtu. 

Dan il-kliem jgħidu lilna wkoll. Jekk aħna rridu nkunu ħbieb ta’ Ġesù, se jkun hemm drabi li jkollna nagħmlu għażliet diffiċli. Jista’ jkun li ma nagħmlux dak li jixtieq Ġesù għax nibżgħu li jgħajruna l-ħbieb, jew ma jibqgħux ħbieb tagħna, naqtgħu qalbna għax naħsbu li m’aħniex tajbin biżżejjed biex nagħmlu dak li jixtieq Ġesù, inkella għax ma nemmnux li Ġesù qiegħed magħna u ser jgħinna. Dawn kollha huma ħsibijiet li jistgħu jiġuna f’moħħna. Dawn il-ħsibijiet ma jkunux ġejjin minn Ġesù. L-unika ħsibijiet li jiġu minn Ġesù huma dawk ta’ nkoraġġament biex nagħmlu dak li hu tajjeb. Bħala ħabib/a ta’ Ġesù, hemm xi ħaġa li bħalissa qed issibha diffiċli? (it-tfal jingħataw ċans jesprimu ruħhom u jitkellmu dwar dawn id-diffikultajiet. Ġenituri, jekk tistgħu, agħtuhom inkoraġġiment u għajnuna biex jegħlbu dawn id-diffikultajiet. Itolbu għalihom u magħhom u waqt it-talb semmu dawn l-okkażjonijiet u għażliet diffiċli).Illum smajna jagħmel dik il-mistoqsija: “Min tgħidu li jien?” Kieku kellek tiltaqa’ ma xi ħadd li għadu qatt ma sema’ dwar Ġesù u ma jaf xejn dwaru, x’se tgħidlu? Agħmel printout tal-attività tal-lu, u fl-ispazju vojt ikteb dak li tista’ tgħid lil din il-persuna li ma tafx lil Ġesù. Tista’ wkoll tagħti l-kulur lill-istampa ta’ Ġesù.  Waqt li qegħdin tagħtu l-kulur lill-istampa isimgħu, You are the one.

Inroddu s-salib.

Mulej, Ġesù, illum inti tistaqsina min naħsbu li int. Aħna lucky li għandna min jgħallimna dwarek u bil-mod qegħdin insiru nafuk dejjem aktar. Nixtiequ nitolbu għal dawk it-tfal u għal dawk in-nies li ma jafukx. Ibagħtilhom nies f’ħajjithom biex ikellmuhom dwarek biex bħalna jsiru jafuk ukoll.

It-talba tal-Kredu hija talba fejn nistqarru dak li nemmnu fih. Tafu li hemm il-Kredu tal-Appostli, kif ukoll il-Kredu ta’ Niċea? L-ewwel insara kienu jitolbu l-Kredu tal-Appostli. Dan il-Kredu, ngħiduh f’forma ftit differenti kull darba li jkun hemm magħmudija u meta waqt il-quddiesa ngħidu l-Kredu fil-forma ta’ mistoqsija u tweġiba, meta nkunu fil-fatt qegħdin nġeddu l-wegħdiet tal-magħmudija. Il-Kredu ta’ Niċea beda jingħad aktar tard, wara li kien hemm min beda jaqla’ xi dubji dwar id-divinità ta’ Ġesù, jiġifieri l-Kredu ta’ Niċea juru li aħna nemmnu li Ġesù hu Alla, li kien minn dejjem u jibqa’ għal dejjem.  Nemmnu wkoll li aħna salvati permezz tal-mewt ta’ Ġesù. Insejħulu ta’ Niċea għax dan il-Kredu ġie approvat waqt il-Konċilju li sar f’Niċea fis-sena 325 WK.

Itlob il-KreduNiżżel

1. Skont l-Evanġelju tal-lum, Ġesù flimkien mad-dixxipli tiegħu, kien sejjer lejn l-irħula ta'....

Correct! Wrong!

2. Meta Ġesù staqsa lid-dixxipli x'kienu jaħsbu dwar min kien hu, Pietru x'wieġbu?

Correct! Wrong!

3. X'ħabbar Ġesù lil Pietru u lid-dixxipli wara li dan tal-aħħar għamel stqarrija ta' fidi sabiħa?

Correct! Wrong!

4. Lid-dixxipli l-oħra li ingħaqdu mat-tnax, Ġesù qalilhom li kulmin irid jimxi warajh irid...

Correct! Wrong!

Kif tuża din il-paġna

Alla jkellimna b'ħafna modi, inkluż bil-qari mill-Bibbja fil-Quddiesa. Hawnhekk tista' ssib tagħrif u attivitajiet marbuta mal-qari tal-Quddiesa tal-Ħadd u li għandhom jispirawk tgħix kuljum dan il-qari mill-Bibbja.