Nimxu warajh

11-il Ħadd ta' Matul is-Sena

Illum nerġgħu nisimgħu qari mill-Evanġelju ta’ San Mattew, hekk kif qegħdin fiż-żmien ta’ matul is-sena (Żmien Ordinarju). Nisimgħu kif Ġesù wera mħabba u qalb tajba man-nies. Hu juri mħabba, meta jfejjaq lin-nies u jgħallimhom dwar l-imħabba ta’ Alla. Ġesù jixtieq li l-ħbieb tiegħu jkomplu x-xogħol tiegħu. Għalhekk isejjaħ lill-appostli u jagħtihom struzzjonijiet ta’ kif kellhom jaqdu s-sejħa li kien għamlilhom. Ġesù jaqsam il-missjoni tiegħu biex ixandar is-Saltna tas-Sema mad-dixxipli, aktar minn elfejn sena ilu, u llum jaqsamha magħna. 

Kif għandna nevanġelizzaw? L-Evanġelju tal-lum ifiehem li l-ħaddiema huma ftit, iżda l-ħsad huwa kbir. Aħna l-ħaddiema, fil-ħajja tal-familja tagħna, fuq il-post tax-xogħol, u fil-parroċċa tagħna. Irridu nkunu lesti li nagħtu xhieda tat-twemmin tagħna, li nkunu d-dawl ta’ Kristu għall-qraba, ħbieb u barranin. Bħala Knisja rridu nkomplu l-missjoni ta’ Kristu. Papa Ġwanni Pawlu II qal, “Li tkun nisrani qatt ma hi faċli … li timxi wara Kristu titlob kuraġġ għall-għażliet radikali, li ħafna drabi tfisser li tmur kontra l-kurrent.”

San Mattew isemmi, kif Ġesù jikkumissjona tnax-il appostlu u jagħti isimhom, l-istess kif insibu fl-Evanġelji ta’ San Mark u San Luqa. Il-kelma ‘appostlu’ tfisser ‘mibgħut.’ Huma mibgħuta minn Ġesù biex ixandru s-Saltna tas-Sema permezz tal-kliem u tal-azzjonijiet. Kull wieħed u waħda minna, aħna appostli ta’ Ġesù. Aħna msejħa biex nagħtu xhieda ta’ mħabba lil uliedna. Aħseb dwar  il-kwalitajiet sbieħ u talenti tal-membri tal-familja tiegħek u għinnhom biex jagħrfuhom lil xulxin. Kun ta’ eżempju tajjeb ta’ fidi, servizz, qalb tajba u sensittività, waqt li tagħraf li dawn it-talenti jgħinuna biex inwasslu l-Bxara t-Tajba tas-Saltna ta’ Alla lid-dinja. 

Jalla d-djar u parroċċi tagħna jkunu xhiehda ta’ ferħ. Meta aħna ngħinu lill-oħrajn, inkunu qed nevanġelizzaw u nkomplu l-missjoni ta’ mħabba ta’ Kristu.

Qari mill-Evanġelju skont San Mattew (Mt 9: 36-10:8)

 F’dak iż-żmien, Ġesù ra n-nies u tħassarhom, għax kienu mdejqa u mitluqa bħal nagħaġ bla ragħaj. Imbagħad qal lid-dixxipli tiegħu: “Il-ħsad huwa kbir, iżda l-ħaddiema ftit. Itolbu mela lil Sid il-ħsad biex jibgħat ħaddiema għall-ħsad tiegħu”.

Sejjaħ lejh it-tnax-il dixxiplu tiegħu, u tahom is-setgħa fuq l-ispirti ħżiena biex ikeċċuhom, u jfejqu kull xorta ta’ mard u ’l kull min kien nieqes minn saħħtu.

L-ismijiet tat-tnax-il appostlu huma dawn: l-ewwel Xmun, jgħidulu Pietru, u ħuh Indrì, u Ġakbu ta’ Żebedew, u ħuh Ġwanni, Filippu u Bartilmew, Tumas u Mattew il-pubblikan, Ġakbu ta’ Alfew, u Taddew, Xmun il-Kanani, u Ġuda l-Iskarjota, li mbagħad ittradieh.

Lil dawn it-tnax Ġesù bagħathom b’dawn l-ordnijiet: “Taqbdux triq il-pagani, u tidħlux f’belt tas-Samaritani; imma qabel xejn morru fittxu n-nagħaġ il-mitlufa tad-dar ta’ Iżrael. Intom u sejrin, xandru u għidu li s-Saltna tas-Smewwiet waslet. Fejqu l-morda, qajmu l-mejtin, fejqu l-lebbrużi, keċċu x-xjaten. B’xejn ħadtu, b’xejn agħtu”.

Il-Kelma tal-Mulej
Tifħir lilek Kristu

Istruzzjonijiet u għan

  1. Aqra sew l-Evanġelju biex issir aktar familjari miegħu.
  2. Aħseb dwaru u ara x’qiegħed jgħid lilek personali. Liema hi l-parti li l-aktar li laqtitek? Għaliex?
  3. Id-dixxipli msejħa biex jaħdmu flimkien, bl-istess mod li l-membri tal-familja jaħdmu flimkien. Itolbu biex il-familja tagħkom tibqa’ taħdem f’għaqda, u l-membri kollha jħobbu u jissapportjaw lil xulxin.
  4. Għamlu party u sejħulu ‘Għotja ta’ Mħabba.’ Kull membru tal-familja jikteb nota ta’ mħabba għal kull membru tal-familja u jikteb ukoll xi att ta’ mħabba li ser jagħmel. Kull membru jgeżwer dan il-messaġġ bħala rigal. Għamlu party u agħtu dawn ir-rigali lil xulxin. Iċċelebraw l-imħabba tal-familja tagħkom, ir-rigal li jibqa’ jingħata.
  5. Flimkien bħala familja sibu ħin u post biex taqraw dan l-Evanġelju. L-ambjent jgħin ukoll, għalhekk qabel ma tibdew, fejn se tiltaqgħu ppreparaw:
    a. Bibbja bil-qari minn  San Mattew (9:36-10:8)
    b. Xemgħa mixgħula
    c. Il-mejda jew post fejn hemm il-Bibbja u xemgħa miksija bi drapp aħdar
    d. Computer/laptop bil-qari u clips
  6. Mur fil-parti tat-tfal skont l-etajiet u għamilha flimkien magħhom
  7. Addatta din il-parti skont kif hemm bżonn, tiddejjaqx tkun kreattiv 😊

Fl-Evanġelju tal-lum nisimgħu ġrajja meta Ġesù iddejjaq meta ra li n-nies kienu mħassba u qed ifittxu l-għajnuna. Hu bagħat lid-dixxipli biex jieħdu ħsiebhom u lilna jistaqsina biex nagħmlu l-istess.

  • La aħna nimxu wara Ġesù, aħna msejħa biex ngħinu u nħobbu lill-oħrajn
  • Aħna msejħa biex inwasslu l-Bxara t-Tajba, li s-Saltna tas-Sema hi fil-qrib.
  • Printout tal-forma tal-id
  • Lapes / kuluri
  • Imqass / kartonċina / gloj
printoutniżżel

Darba waħda, Ġesù kien mal-ħbieb tiegħu, u ra għad ta’ nies madwaru, li kienu mdejqa u mitluqa. Ġesù ħassu qalbu sewda meta ra daqs tant nies li kellhom bżonn l-għajnuna. Hu dar fuq id-dixxipli tiegħu u qalilhom, “Kemm hawn nies li għandhom bżonn għajnuna! Imma ma hawnx biżżejjed li lesti jieħdu ħsiebhom. Itolbu lil Alla biex jibgħat ħaddiema jgħinuhom.”

Ġesù kien qiegħed jgħid lid-dixxipli kemm hu importanti li ngħinu lill-oħrajn, speċjalment lil dawk li huma fil-bżonn.

Wara li spiċċaw jitolbu, Ġesù sejjaħ tnax mid-dixxipli, u qalilhom, “Morru, fejqu lill-morda, qajmu lill-mejtin, fejqu lill-imġidmin, keċċu x-xjaten. Kull fejn tmorru wasslu dan il-messaġġ: ‘is-Saltna tas-Smewwiet waslet.’” Dan il-messaġġ kien Aħbar Tajba, kien messaġġ ta’ mħabba, li kellhom iwasslu lill-oħrajn, mhux biss bil-kliem, imma wkoll b’dak li jagħmlu. Wow! Din vera aħbar tajba. Aħsbu ftit. Is-Saltna tas-Smewwiet mhijiex xi post imbiegħed, imma qegħda hawnhekk, issa. Dan nuruh kull darba li ngħinu lill-oħrajn, kull darba li nuru mħabba jew ħniena ma’ dawk ta’ madwarna.  Mal-familja tagħna u mal-ħbieb. Il-messaġġ ta’ Ġesù ma nwassluhx biss bil-kliem (dak li ngħidu), iżda aktar importanti bl-azzjonijiet tagħna (dak li nagħmlu). Ġesù afda fid-dixxipli tiegħu li huma jkomplu l-missjoni tiegħu. Minħabba li aħna wkoll, aħna dixxipli ta’ Ġesù, aħna wkoll irridu nkomplu din il-missjoni. Għalqu għajnejkom u aħsbu dwar dawk in-nies fil-ħajja tagħkom li matul din il-ġimgħa tistgħu twasslulhom l-imħabba ta’ Ġesù. 

Għamlu printout tal-id, aqtgħuha u waħħluha fuq kartonċina. Fuq l-id iktbu, Idejn ferħana huma idejn li jgħinu. Idejn li jagħtu l-għajnuna huma mbierka. Għalhekk, matul din il-ġimgħa ħa nuża jdejja biex ngħin lil dawk li nħobb l-aktar. Fin-naħa ta’ isfel, ikteb ismek. 

Issa aħseb dwar 5 persuni li matul din il-ġimgħa tista’ tgħinhom, u llum b’mod speċjali kif ser tgħin lill-papa tiegħek, għax illum huwa Jum il-Missier. Fuq il-ħames swaba’ ikteb isem dawn in-nies li ħsibt fihom.

Isma’ s-song, Helping Hands.

Inroddu s-salib.

Mulej Alla, kollok imħabba, grazzi li inti tieħu ħsieb kull wieħed u waħda minna. Għinna biex ngħinu lill-oħrajn b’kull mod li nistgħu, waqt li kuljum nippruvaw nimxu warajk. Illum nitolbuk, b’mod speċjali biex tbierek lill-missirijiet kollha tad-dinja. Ammen. 

Fl-Evanġelju tal-lum, Ġesù jsejjaħ lit-tnax-il appostlu u jibgħathom bħala missjunarji biex ikomplu x-xogħol li Alla beda permezz ta’ Ġesù. Huma kellhom imorru jwasslu l-Bxara t-Tajba li s-Saltna tas-Smewwiet kienet waslet. 

Illum ukoll, aħna mibgħuta minn Ġesù biex inkunu appostli u nwasslu l-messaġġ li s-Saltna tas-Smewwiet waslet

  • Il-mudell tal-gazzetta
  • Kuluri
  • Ritratt tiegħek mal-familja jew mal-ħbieb
mudell tal-gazzettaNiżżel

Qatt xi ħadd bagħtek fuq qadja? Forsi l-ġenituri tiegħek bagħtuk iġġib xi ħaġa minn fuq, pereżempju, in-nuċċali, il-mobile jew il-papoċċ tas-sodda, għax kienu nsewhom. Forsi l-għalliema staqsietek biex tieħu xi ħaġa fi klassi oħra, jew tqassam il-kotba jew handouts lit-tfal tal-klassi. Kif ħassejtek tagħmel dan ix-xogħol? X’aktarx tħossok kburi li ngħatajt din ir-responsabbiltà. Jien kieku nipprova nagħmel dak li qaluli mill-aħjar li nista’.

Fl-Evanġelju tal-lum, Ġesù kien mal-ħbieb tiegħu u ma’ għadd kbir ta’ nies. Hu kien imdejjaq, għax in-nies kellhom bżonn l-għajnuna. Ġesù jsejjaħ u jagħti isem lit-tnax-il appostlu u jagħtihom xogħol importanti x’jagħmlu. Hu bagħthom jgħinu lin-nies, billi jfejqu lill-morda, iqajmu lill-mejtin, u jkeċċu lix-xjaten. Huma kellhom ikomplu x-xogħol li beda hu. Ġesù tahom regoli biex jimxu fuqhom. Huma ma kellhomx jitħallsu ta’ dak li jagħmlu, u kellhom jgħidu lin-nies li s-Saltna ta’ Alla kienet fil-qrib. Din kienet aħbar speċjali ħafna. Dan kellhom juruh b’dak li jagħmlu. Intom tafu li l-kelma ‘appostlu’ tfisser ‘wieħed li hu mibgħut’? Bħala nies li nimxu wara Ġesù, aħna wkoll appostli b’xogħol li għandna nagħmlu. Irridu ngħidu lill-oħrajn il-Bxara t-Tajba li s-Saltna t’Alla hi fil-qrib. Ma għandnix għalfejn imorru l-bogħod. Aħna mibgħuta biex inwasslu l-imħabba ta’ Ġesù lill-familji tagħna, fl-iskola u lill-ħbieb, billi nuruhom imħabba u jkollna qalb tajba magħhom. Aħna msejħa biex naħdmu flimkien u nitolbu flimkien, għall-ġid tal-oħrajn.

Issa tistgħu tagħmlu printout tal-mudell tal-gazzetta. Waħħlu r-ritratt tagħkom mal-familja jew ħbieb. Imbagħad aħsbu dwar kif, matul din il-ġimgħa, tistgħu tgħinu lil dawn in-nies, u turuhom l-imħabba ta’ Alla. Wara iktbu dan kollu biex tiġi qisha artiklu f’gazzetta.

Isimgħu s-song, Every Move I Make.

Inroddu s-salib

Mulej Alla, nirringrazzjawk li Ġesù ġie fid-dinja biex jurina kif għandna ngħixu u kif nieħdu ħsieb ta’ dawk li għandhom bżonn l-għajnuna tagħna. Għinna biex inwasslu l-Bxara t-Tajba, tal-imħabba tiegħek, lil dawk kollha li niltaqgħu magħhom, matul din il-ġimgħa. Illum nitolbu b’mod speċjali għall-missirijiet kollha, waqt li qed jiċċelebraw Jum il-Missier. Ammen.

Dalwaqt

Kif tuża din il-paġna

Alla jkellimna b'ħafna modi, inkluż bil-qari mill-Bibbja fil-Quddiesa. Hawnhekk tista' ssib tagħrif u attivitajiet marbuta mal-qari tal-Quddiesa tal-Ħadd u li għandhom jispirawk tgħix kuljum dan il-qari mill-Bibbja.