Nisimgħu lilu

It-Tieni Ħadd tar-Randan

Fit-tieni Ħadd tar-Randan naqraw il-ġrajja tat-Trasfigurazzjoni ta’ Ġesù, fil-preżenza ta’ Pietru, Ġakbu u Ġwanni. Dan nimmeditaw dwaru meta nitolbu l-misteri tad-dawl, fir-raba’ misteru li jiċċelebra r-rivelazzjoni tal-preżenza divina ta’ Alla.

Dan ir-rakkont tat-trasfigurazzjoni ta’ Ġesù, insibuh ukoll f’San Mattew u San Mark, iżda mhux fl-Evanġelju skont San Ġwann. Din il-ġrajja sseħħ fuq muntanja, li tradizzjonalment imsejħa l-Muntanja Tabor u tiġri, wara li Pietru jistqarr li Ġesù hu l-Messija (vers 20) u t-tbassir ta’ Ġesù, dwar il-passjoni tiegħu (vers 22). Dan kollu jinkoraġġina biex inħarsu lejn it-trasfigurazzjoni fil-kuntest tal-Misteru Paskwali ta’ Ġesù (Kristu jeħlisna permezz tal-passjoni, mewt, qawmien u tlugħ tiegħu fis-sema).

Fuq il-muntanja, Ġesù jieħu miegħu tlieta mid-dixxipli, Pietru, Ġwanni u Ġakbu. Huma kważi tmur għajnejhom bihom, waqt li Ġesù jitlob u meta d-dehra ta’ wiċċu tbiddlet u l-ilbiesi tiegħu saru ta’ bjuda li tgħammex.” Minkejja dan, jiġu f’tagħhom u jaraw lil Ġesù mibdul u miegħu ikun hemm Mosè u Elija. Dawn iż-żewġ personaġġi huma importanti fl-istorja ta’ Iżrael, u jirrappreżentaw il-kontinwità ta’ Ġesù mal-Liġi (Mosè) u l-Profeti (Elija). Meta jara dan kollu, Pietru joffri li jinbnew tliet tined għalihom, għax xtaq ħafna li dan il-mument ma jispiċċax. Lil Ġesù jindirizzah bħala “Mgħallem” meta ftit qabel kien għadu kif stqarr li kien il-Messija. Imbagħad, leħen mis-sema nstema’ jikkonferma li Ġesù huwa Bin Alla u jikkmanda lid-dixxipli biex jisimgħu lilu. Dan il-leħen, ifakkarna fil-magħmudija ta’ Ġesù (fl-Evanġelju ta’ San Luqa), meta dan il-leħen indirizza lil Ġesù, bħala Iben Alla.

It-Trasfigurazzjoni tantiċipa l-qawmien glorjuż ta’ Ġesù. Id-dixxipli ma jitkellmux dwar dak li raw u jifhmu dak li ġara fit-Trasfigurazzjoni, wara l-passjoni u l-mewt ta’ Ġesù. Din il-ġrajja nisimgħuha fil-bidu tar-Randan iżda fl-istess ħin, aħna nafu x’ser jiġri. Meta nisimgħuha, nantiċipaw il-qawmien ta’ Ġesù u wkoll nipppreparaw ruħna għall-passjoni u l-mewt ta’ Ġesù. Il-leħen mis-sema, jindirizza lid-dixxipli u jgħidilhom, “lilu isimgħu.” Staqsi ftit lilek innifsek kif tista’ tisma’ lil Ġesù. Ir-Randan huwa żmien li “nisimgħu” lil Alla. Kemm hu importanti għalik, li jkollok ħinijiet fis-skiet għat-talb u kontemplazzjoni? Kemm hu importanti li ta’ kuljum tagħmel il-ħin u tgħaddih ma’ Alla? Biex tkun dixxiplu, trid tinbidel, forsi anke trasfigurat bl-għerf ta’ Alla, speċjalment waqt it-talb, qari tal-Iskrittura jew waqt li tirċievi r-rigal tal-Ewkaristija. Jista’ jkun li dan iseħħ meta taqdi lill-oħrajn, tgħin lill-fqar u lill-emarġinati. Għinni biex nagħraf li “Kbir Sidna l-Mulej” (salm 147, 5)

Qari mill-Evanġelju skont San Luqa (Lq 9: 28b-36)

F’dak iż-żmien, Ġesù ħa miegħu lil Pietru, lil Ġwanni u lil Ġakbu, u tala’ fuq il-muntanja biex jitlob. U ġara li huwa u jitlob, id-dehra ta’ wiċċu tbiddlet u l-ilbiesi tiegħu saru ta’ bjuda li tgħammex.

U kien hemm żewġt irġiel jitħaddtu miegħu, Mosè u Elija, li dehru fil-glorja, jitħaddtu fuq it-tmiem ta’ ħajtu li kellu jseħħ f’Ġerusalemm. Pietru u sħabu kienu mejtin bin-ngħas, imma baqgħu mqajmin sewwa, u raw il-glorja tiegħu u ż-żewġt irġiel li kienu miegħu. Xħin dawn it-tnejn kienu se jinfirdu minnu, Pietru qal lil Ġesù: “Mgħallem, kemm hu sew li aħna hawn! Ħa ntellgħu tliet tined, waħda għalik, waħda għal Mosè, u waħda għal Elija”. Ma kienx jaf x’inhu jgħid.

Waqt li kien qiegħed jgħid dan, ġiet sħaba u għattiethom u huma beżgħu kif daħlu fis-sħaba. U minn ġos-sħaba nstama’ leħen jgħid: “Dan hu Ibni l-maħtur, lilu isimgħu!” Malli nstama’ l-leħen Ġesù sab ruħu waħdu. Huma żammew is-skiet, u għal dawk il-jiem ma qalu xejn lil ħadd minn dak li kienu raw.

Il-Kelma tal-Mulej
Tifħir lilek Kristu

Istruzzjonijiet u għan

  1. Aqra sew l-Evanġelju biex issir aktar familjari miegħu.
  2. Aħseb dwaru u ara x’qiegħed jgħid lilek personalment. Liema hi l-parti li l-aktar li laqtitek? Għaliex?
  3. Bħalma smajna fl-Evanġelju tal-lum, bħal Ġesù, importanti li drabi ninqatgħu mir-rutina ta’ kuljum biex nitolbu u nikontemplaw. Matul din il-ġimgħa, sib ħin biex tmur f’xi kappella tal-adorazzjoni u toqgħod fil-preżenza ta’ Ġesù.
  4. Aħseb dwar dawk l-affarijiet kollha li fid-dar jikkrejaw storbju u distrazzjoni, bħat-televiżjoni, radju, video games. Sibu ħin biex titfu dawn kollha, u bħala familja titolbu flimkien.
  5. Flimkien bħala familja sibu ħin u post biex taqraw dan l-Evanġelju. L-ambjent jgħin ukoll, għalhekk qabel ma tibdew, fejn ser tiltaqgħu ppreparaw:
    i.Bibbja bil-qari minn San Luqa (9, 28b-36)
    ii. Xemgħa
    iii. Il-mejda fejn hemm il-Bibbja, miksija bi drapp vjola
    iv. Ġebla, ramel
    v. Computer/laptop bil-qari u clips
  6. Mur fil-parti tat-tfal skont l-etajiet u għamilha flimkien magħhom
  7. Addatta din il-parti skont kif hemm bżonn, tiddejjaqx tkun kreattiv 😊

Fl-Evanġelju tal-lum, nisimgħu l-ġrajja meta Ġesù ħa tlieta mid-dixxipli fuq muntanja. Hemmhekk rawh jiddi daqs ix-xemx, jitkellem ma’ Mosè u Elija, dwar meta kien ser jittieħed Ġerusalemm biex joqtluh. Dan il-Ħadd insejħulu, il-Ħadd tat-Trasfigurazzjoni.

  • Ġesù huwa bniedem u huwa Alla
  • Karta bajda A4
  • Meraq ta’ lumija
  • Blalen tat-tajjar
  • Ħadida tal-mogħdija (l-għajnuna ta’ adult, hija meħtieġa)

Darba waħda, Ġesù tela’ fuq muntanja, flimkien ma’ Pietru, Ġakbu u Ġwanni. Waqt li kienu hemmhekk, Ġesù ġie trasfigurat. X’kelma tqila! Naħseb li qatt ma smajtuha qabel! Li tkun trasfigurat tfisser li tinbidel fil-mod li tidher. Fuq il-muntanja, Ġesù beda jiddi u l-ħwejjeġ tiegħu saru bojod ħafna, li jgħammxulek għajnejk. Meta Ġesù ittrasfigura ruħu, lid-dixxipli kien qiegħed jurihom kif jidher fil-glorja. Ma kienx qiegħed jibdel lilu nnifsu. Aħna nemmnu li Ġesù huwa veru Alla u veru bniedem. In-nies ta’ madwaru ma kienux jemmnu dan. Kienu jarawh biss bħala bniedem. 

Meta Ġesù kien trasfigurat, il-ħwejjeġ tiegħu ġew bojod ħafna u wiċċu beda jiddi bħax-xemx. Id-dixxipli rawh jitkellem ma’ tnejn min-nies, Mosè u Elija. Dawn kienu ilhom li mietu! Id-dixxipli baqgħu mistagħġba u tħawdu. Imbagħad tkellem Alla u qal, “Dan hu Ibni l-maħtur, lilu isimgħu!” Huma beżgħu. Kieku inti kont fuq il-muntanja, flimkien mad-dixxipli, kif kont tħossok? Ġesù qalilhom, “Tibżgħux!” Alla kien qiegħed juri lid-dixxipli min kien Ġesù. Hu wera li huwa l-Iben Alla. M’għandniex għalfejn nibżgħu għaliex hu magħna dejjem. Meta nibżgħu jew inħossuna waħedna, u meta nkunu ferħana u eċitati, għandna nisimgħu u nitgħallmu dwar Ġesù. U mhux hekk biss, għandna wkoll ngħidu lill-oħrajn kemm iħobbhom Ġesù. 

Biex turu kif xi ħaġa tista’ tidher mingħajr ma tinbidel (bħal Ġesù fuq il-muntanja) tista’ tagħmel din l-attività bil-meraq tal-lumi u ħadida tal-mogħdija sħuna. L-ewwel xarrab it-tajjar fil-meraq tal-lumi u fuq karta bajda, vojta, ikteb dawn il-kliem, “Dan hu Ibni l-maħtur, lilu isimgħu!” Ħalliha tinxef. Il-kliem ma jidhrux. Biex isiru jidhru, użaw ħadida tal-mogħdija, mixgħula fuq l-anqas livell, u għaddu minn fuq il-kliem. It-tfal m’għandhomx jagħmlu din l-attività waħedhom. Il-kliem jidhru kif il-ħadida tal-mogħdija tgħaddi minn fuqhom. Jekk ma jidhrux mal-ewwel, għaddu l-karta miż-żewġ naħat. B’dan il-mod, mingħajr ma nbidlet il-karta wriet xi ħaġa li ma kinitx tidher, l-istess li ġara lil Ġesù meta kien trasfigurat!

Sakemm qegħdin tagħmlu din l-attività, isimgħu, Grow, grow, grow.

Inroddu s-salib.

Għażiż Mulej, xi drabi diffiċli li nifhmu dak li hemm miktub fil-Bibbja, speċjalment dak li qrajna dwar it-Trasfigurazzjoni ta’ Ġesù. Għinna biex naraw il-qawwa u glorja tiegħek, u b’hekk insiru nafuk u ngħidu lill-oħrajn dwar Ġesù. Dan nitolbuh f’isem Ġesù. Ammen.

Illum niċċelebraw it-tieni ħadd tar-Randan, li nsejħulu, il-Ħadd tat-Trasfigurazzjoni. Trasfigurazzjoni tfisser li tbiddel il-forma jew il-mod li tidher. Ġesù inbidel quddiem Pietru, Ġwanni u ħuħ Ġakbu. Ġesù kien jiddi daqs ix-xemx u permezz ta’ dan wera d-divinità u glorja tiegħu.

  • Ir-Randan huwa żmien tajjeb biex nersqu aktar qrib ta’ Ġesù permezz tat-talb u qari mill-Bibbja
  • Bibbja
  • Karta u lapes

Fl-Evanġelju tal-lum, Ġesù jieħu tlieta mid-dixxipli, Pietru, Ġwanni u Ġakbu, fuq muntanja, fejn ikunu jistgħu jitolbu fil-kwiet. Waqt li Ġesù kien jitlob, wiċċu tbiddel, u l-ħwejjeġ saru bojod silġ. F’daqqa waħda, dehru Mosè u Elija jitkellmu miegħu. Huma dehru fil-glorja tal-Ġenna u tkellmu dwar x’kellha tfisser il-mewt ta’ Ġesù f’Ġerusalemm. Id-dixxipli kienu għajjenin ħafna. F’daqqa neħħew in-nagħas kollu li kellhom, u raw lil Ġesù fil-glorja u raw wkoll lil Mosè u lil Elija. Madanakollu, minħabba li kienu għajjenin, huma għal naqra ma tilfux xi ħaġa kbira! Sħaba għattiethom u semgħu leħen jgħid, “Dan hu Ibni l-maħtur, lilu isimgħu!” 

Kemm-il darba, Ġesù kien imur f’xi post fis-skiet, jitlob lil Alla Missier. Din id-darba ħa tlieta mill-ħbieb tiegħu. Imma huma x’għamlu? Huma kważi tilfu lil Ġesù trasfigurat (jiddi daqs ix-xemx). Din kienet xi ħaġa speċjali ħafna li wriet il-glorja u d-divinità ta’ Ġesù. Huma setgħu jaraw għalihom infushom, li Ġesù, verament kien Iben Alla u l-leħen kkonferma dan ukoll.

Ir-Randan huwa żmien li għandna nkunu mqajma (attenti) u nisimgħu. Xi drabi nitolbu meta nitkellmu ma’ Alla. Nistgħu nitolbu wkoll meta nisimgħu u nkunu fis-skiet, nistrieħu fil-preżenza ta’ Alla. Meta fil-kwiet naħsbu dwar Alla, nindunaw li hu qiegħed fil-qrib. Ippruvawha. Oqgħodu fis-skiet, neħħu kull distrazzjoni li jista’ jkun hemm u ftakru li Alla qiegħed magħkom. B’dan il-mod inkunu qegħdin niffukaw il-ħsibijiet tagħna fuq Alla, dan insejħulu ‘mindfulness’. Inwaqqfu l-pass mgħaġġel tagħna u nindunaw li Ġesù jħobbna u li hu dejjem magħna. 

Mod ieħor li nindunaw li Ġesù qiegħed magħna, huwa meta naqraw il-Bibbja. Fl-Evanġelju tal-lum, issemmew żewġ personaġġi mportanti mit-Testment il-Qadim. Tiftakru min kienu? Mosè u Elija dehru ħdejn Ġesù fuq il-muntanja. Jekk ma tafux eżatt min huma Mosè u Elija, matul din il-ġimgħa tistgħu taqraw dwarhom. Agħżlu wieħed minnhom u aqraw ġrajjiet dwaru. Insibu l-ġrajjiet ta’ Mosè fil-ktieb tal-Eżodu u ta’ Elija f’1 Slaten 17-22 u 2 Slaten 1-3. Dawn il-ġrajjiet juru kemm kienu mportanti dawn in-nies. Juru wkoll għalfejn kienet importanti d-dehra tagħhom lil Pietru, Ġwanni u Ġakbu, fuq il-muntanja. Tista’ wkoll tpinġi waħda minn dawn il-ġrajjiet, waqt li tisma’, One Way Jesus.

Inroddu s-salib.

Ġesù, aħna nafu li inti dejjem magħna. Għinna biex nieqfu u nkunu fis-skiet, biex b’hekk nagħrfu li qegħdin fil-preżenza tiegħek u nkunu nistgħu nisimgħuk. Ammen.

Aħbar TajbaNiżżel il-fuljett

Kif tuża din il-paġna

Alla jkellimna b'ħafna modi, inkluż bil-qari mill-Bibbja fil-Quddiesa. Hawnhekk tista' ssib tagħrif u attivitajiet marbuta mal-qari tal-Quddiesa tal-Ħadd u li għandhom jispirawk tgħix kuljum dan il-qari mill-Bibbja.