San Disma hu magħruf bħala l-Qaddis li kien kanonizzat minn Kristu stess minn fuq is-salib! Hu msejjaħ ukoll “Il-Ħalliel it-tajjeb!”kif ukoll “Il-Ħalliel li seraq il-Ġenna”!
Jista ħalliel ikun tajjeb? X’nafu fuqu? Hemm riferenza waħda biss għalih fil-vanġelu ta’ Luqa Kap 23, 39-43.
Huwa wieħed mill-ħallelin li kienu msallba ma’ Ġesù. Meta wieħed mill-ħallelin kien qed jiddieħaq bi Kristu għax ma kienx kapaċi jsalva lilu nnifsu u lilhom, Disma, il-ħalliel l-ieħor, qal li huma kien jixirqilhom il-penitenza tagħhom imma Kristu ma kienx jistħoqqlu l-mewta ħarxa.
Hu ma talabx miraklu biex jeħles mill-mewta kiefra, imma talab bil-ħerqa biex Kristu “jiftakar fih meta jidħol fis-saltna tiegħu.” Hu possibbli li din setgħet tfisser li Disma kien jaf li Ġesù kien kien idur mal-Galileja u l-Ġudeja, jippriedka fuq is-Saltna t’Alla jfejjaq il-morda u jqajjem il-mejtin. It-talba tiegħu kellha risposta malajr minn Ġesù, “ Tassew ngħidlek li illum stress tkun il-Ġenna miegħi!”
Fl-aħħar mumenti tiegħu waqt li kien bla nifs fuq is-salib Ġesù kien kapaċi jara l-indiema ta’ Disma u Hu mhux biss kellu dirgħajh miftuħa fuq is-salib imma kellu qalbu wkoll miftuħa berah biex jagħti tgħannieqa kbira ta’ mħabba u ħniena għal dan il-“Ħalliel Ikkonvertit”.
Dwar
L-għan ta’ bekids.mt hu li joffri formazzjoni kateketika komprensiva għat-tfal u għall-adolexxenti li qegħdin jippreparaw biex jirċievu s-sagramenti.
