Santa Fawstina

Qatt ma nistgħu nifhmu tassew il-kobor tal-Ħniena Divina. Nistgħu forsi nibdew nifhmuha ftit billi nħarsu lejn il-qalb ġeneruża ta’ bniedem. X’inhi l-ħniena, wara kollox? Il-ħniena tmur lil hinn mill-maħfra, u għandha għeruqha fil-kompassjoni u fl-empatija. Tfisser li nkunu miftuħin anke għal dawk li ma naqblux magħhom.  Tinvolvi li nrawmu sentimenti pożittivi lejn l-oħrajn.

San Tumas ta’ Akwinu jiddeskrivi l-ħniena bħala “kompassjoni f’qalbna għall-miżerja ta’ ħaddieħor, kompassjoni li tħeġġiġna nagħmlu dak kollu li nistghu biex ngħinuh.” Fl-2015, il-Papa Franġisku enfisizza l-fatt li “Ġesù Kristu hu l-wiċċ tal-Ħniena t’Alla” u ħabbar is-sena Ġubilari tal-Ħniena.

Ġesù, meta kien fostna, kien jirrifletti l-Ħniena ta’ Alla, murija fit-tjubija, fil-ġentilezza u fit-tenerezza tiegħu. Il-kompassjoni hi preżenti fil-mirakli li kien jagħmel, u li fihom kien ikun involut personalment.

Uża Bibbja tat-tfal u flimkien mat-tfal fittex:

• il-qawmien mill-imwiet tat-tifel tal-armla ta’ Najn;
• il-qawmien mill-imwiet tat-tifla ta’ Ġajru;
• Ġesù jibki lil Lazzru (u tistgħu tiltaqgħu m’aktar jekk tibqgħu taqraw!).

It-tfal żġur li japprezzaw ukoll l-episodju fejn Ġesù jilqa’ lit-tfal u ma jħallix lill-appostli jkeċċuhom. F’kull sitwazzjoni, emfasizza l-ħlewwa tal-kliem ta’ Ġesù. Ġesù jħoss għalina wkoll u hu jistenna li nħossu l-istess għal ħaddieħor. Ħeġġeġ lit-tfal jitkellmu dwar sitwazzjonijiet jew saħansitra dwar nies f’ħajjitħom li jsibuha diffiċli biex jaċċettaw jew jittolleraw – aħseb u ara kemm isiru ħbieb magħhom (esplora sitwazzjonijiet fl-iskola, fi gruppi tat-tfal bħall-katekiżmu, waqt attivitajiet sportivi u anke f’laqgħat tal-familja). Iddiskuti magħhom x’jistgħu jagħmlu biex jegħlbu attitudnijiet negattivi.

“Ġesù, jiena nafda fik” hija t-talba li marbuta ħafna mad-devozzjoni lejn il-Ħniena Divina. X’inhi l-fiduċja? X’jifhmu t-tfal b’fiduċja? Tistgħu tilagħbu l-Mixja tal-Fiduċja: ċaqlaq xi għamara fil-kamra b’tali mod li timblokka l-mogħdijiet. Għatti għajnejn it-tfal u staqsuhom jekk jafdawx fikom biex tmexxuhom mingħajr ma’ jaħbtu ma’ xejn. Żommulhom idejhom u mingħajr ma timbuttawhom, iggwidawhom biex jevitaw li jitfixklu jew jaħbtu.

Wara din il-logħba żgħira staqsi lit-tfal għalfejn aċċettawk bħala gwida. Wara li tismagħhom, tkellem fuq is-sens ta’ fiduċja fik, li għax tħobbhom u trid iżżommhom siġuri u tipproteġihom milli jagħmlu ħsara lilhom infushom. Kienu lesti li jħallu lil ħaddieħor jiggwidahom? Flimkien esploraw l-kwalitajiet ta’ persuni ta’ fiduċja, u lil min għandhom jafdaw speċjalment meta jkunu f’ambjenti u ma’ nies li ma jafuhomx.

Mat-tfal ikbar, wieħed jista’ jiddiskuti dwar dan fid-dawl tal-ħbiberiji. Nistgħu dejjem nafdaw f’Ġesù għax Hu qatt   mhu se jittradina, dejjem ser jipproteġina u jħobbna. Meta għandna lil Ġesù bħala l-ħabib tagħna, għandna nħossuna siguri.

Santa Fawstina kellha devozzjoni speċjali lejn l-Ewkaristija Mqaddsa. Flimkien mat-tfal, kompli saħħaħ l-attenzjoni fuq l-Ewkaristija; meta tidħlu fil-Knisja, fuq ir-realtà tal-preżenza ta’ Kristu waqt il-Quddiesa u wara li nirċevuh ġewwa fina fit-Tqarbin Imqaddes.

Ħin tat-talb mal-Familja:  ibda bit-talba: “Ġesù, jiena nafda fik għax … (dejjem tħobbni u dejjem tipproteġini, pereżempju).” Indirizzaw ukoll lill-Madonna: “Marija, Omm Ġesù, żommli jdejja u wassalni għand Ġesù, kif int żammejt idu meta kien għadu tifel biex tipproteġiH.” Mal-kbar, tistgħu titolbu l-Kurunella tal-Ħniena Divina.