Il-Qaddisin Perpetwa u Feliċita huma magħduda mal-qaddisin martri tal-Knisja tal-bidu, li kienu maqtula fil-203 AD f’Kartaġni fl-Afrika ta’ Fuq li illum tissejjaħ Tunisija. Fi żmien l-Imperu ta’ Saverus, dan kien ikkmanda li ħadd ma jiġi mgħammed u jsir Kristjan. Kien f’dan il-perjodu meta dawn iż-żewġ żgħażagħ nisa kienu maqtula minħabba l-lejaltà tagħhom lejn il-fidi tagħhom fi Kristu.
Ħafna drabi leġġendi u tradizzjonijiet idawru l-ħajjiet ta’ martri u qaddisin li kienu jgħixu ħafna snin ilu. Imma fuq dawn iż-żewġ martri żgħażagħ għandna informazzjoni l-iżjed antika u li tista’ toqgħod fuqha minn djarju li Perpetwa kienet żammet waqt l-aħħar ġranet ta’ ħajjitha kif ukoll minn rakkont ta’ mewtha minn xi ħadd li raha ssir.
Perpetwa kienet mara nobbli ta’ 22 sena li kienet għadha tredda lil binha. Feliċita kienet l-iskjava tagħha li kellha tmien xhur tqala. Kienu katekumeni li kienu qed jistudjaw il-Fidi Nisranija bi preparazzjoni għall-magħmudija. Fil-fatt Perpetwa u ħbiebha kienu mgħammda bil-moħbi fil-ħabs qabel ma ġew maqtula.
Flimkien ma’ erbgħa katekumeni oħra ġew ikkundannati biex jiġu mixħuta qalb l-annimali selvaġġi.
Omm Perpetwa kienet ġabet it-tifel ġol-ħabs biex tibqa’ treddgħu sa ma tmut, imma wara, it-tifel ġie meħud biex jitrabba mal-familja. Feliċita kellha tifla qabel ma ġiet maqtula. It-tifla imbagħad ħaduha għand familja Kristjana u rabbewha.
Dwar
L-għan ta’ bekids.mt hu li joffri formazzjoni kateketika komprensiva għat-tfal u għall-adolexxenti li qegħdin jippreparaw biex jirċievu s-sagramenti.
