Santa Roża minn Viterbo

4 ta' Settembru

Santa Roża għexet bejn 1235 u 1252.  Twieldet Viterbo, fiċ-ċentru tal-Italja, fi żmien meta l-Italja kienet għadha mhux magħquda iżda maqsuma fi stati. Ruma u ż-żoni ta’ madwarha kienu msejħa l-Istati Papali li kienu jaqgħu taħt il-ġurisdizzjoni tal-Papa, anke fil-poter politiku.  L-Imperatur Federiku II, li kien qed ifittex il-poter fuq l-istati Taljani, invada l-istati Papali fl-1240, meta Roża kellha ħames snin. L-Imperatur ġie skomunikat mill-Papa, iżda rnexxielu jokkupa l-istati Papali inkluż Viterbo.

Dan kien l-ambjent li fih għexet Roża tfulitha u ż-żgħożija tagħha. Matul ħajjitha, l-ispiritwalità profonda tagħha spikkat b’mod straordinarju sa minn età bikrija ħafna.  Jingħad li meta kellha tlett snin, hi u l-familja tagħha kienu miġburin mat-tebut ta’ zijitha. Tant tqanqlet quddiem in-niket tal-qraba tagħha, li poġġiet idejha ċkejknin fuq il-ġisem mejjet ta’ zijitha u sejħitilha b’isimha. Il-mejta fetħet għajnejha immedjatament u ħaddnet lin-neputija tagħha. Ta’ seba’ snin, kienet tqatta’ ġranet fit-talb u l-penitenza ġewwa kamra żgħira fid-dar tal-ġenituri tagħha. Kien f’dan iż-żmien li jingħad li Roża kellha viżjoni tal-Madonna, li qaltilha biex issir Franġiskana sekulari u tkun ‘xhud ta’ Alla fid-dinja.’ Meta kellha 12-il sena ħarġet fit-toroq tippriedka! 

Hi tkellmet dwar l-awtorità tal-Papa, dwar l-indiema, il-ġustizzja u l-ħniena, filwaqt li ħeġġet lin-nies biex jibqgħu leali lejn it-twemmin tagħhom.  Anke f’dik l-età bikrija, Roża ma żammitx lura milli titkellem kontra l-okkupazzjoni tal-forzi kontra l-Papa. B’riżultat ta’ dan, kienet f’riskju li tinqatel. Għalhekk is-sindku eżiljaha flimkien mal-ġenituri tagħha.  Hekk kif kienet timxi minn belt għal oħra, hija ma waqfitx tippriedka u tikkonverti lin-nies. Saħansitra bassret il-mewt tal-Imperatur Federiku, li fil-fatt miet tmint ijiem wara dik il-profezija.

Malli rritornat id-dar, talbet biex tiġi aċċettata bħala soru mal-Klarissi, iżda ġiet rifjutata… għax ma kellhiex flus biex tħallas id-dota!

Santa Roża mietet ftit tas-snin wara, meta kellha biss 17-il sena. Ġisimha ġie trasferit fil-kunvent tas-sorijiet Klarissi, li għall-ewwel kienu rrifjutawha għax kienet fqira, iżda mbagħad laqgħuha bħala qaddisa.

Ħudu l-opportunità biex tkellmu t-tfal dwar il-Papa:

  • Ismu proprju, dwar pajjiżu, kif jintgħażel Papa mill-Kardinali li jmorru Ruma meta jmut Papa.
  • Sibu ritratt tal-Papa u waħħluh ma’ kartonċina flimkien ma’ xi sentenza minn tiegħu
  • Ikkunsidra li tikteb messaġġ privat lill-Papa u tibgħatulu! Għandkom l-informazzjoni ta’ kif tistgħu tibgħatu messaġġ fuq il-‘link’ hawn.

Bħal Santa Roża:

  • aħna lkoll imsejħin biex inkunu xiehda ta’ Alla fid-dinja; billi nuru l-fidi tagħna fih bil-mod ta’ kif ngħixu u kif nitkellmu.  
  • aħna xiehda permezz tal-mod kif naġixxu mal-oħrajn, għax hekk għamel Hu:  laqa’ lil kulħadd. Aqsam mat-tfal esperjenzi fil-ħajja ta’ kuljum ta’ kif tista’ tkun xhud ta’ Alla.
  • aħna nkunu xiehda ta’ Alla meta nitkellmu b’mod sempliċi dwar il-veritajiet tal-Fidi tagħna; tista’ tiddiskuti mat-tfal x’għidu li kieku ħabib tagħhom jgħidilhom li qed isegwi l-Quddiesa online huwa tajjeb daqs kemm tmur il-knisja biex tisma’ l-Quddiesa.

Ħin għat-talb mal-familja:

  • ħeġġeġ lit-tfal biex jitolbu għall-Papa.  Tibqa’ mistagħġeb b’dak li joħorġu bih! 
  • Itlob lil Ġesù u lill-Madonna għall-bżonnijiet tal-Papa

Qattgħu ftit ħin fil-kwiet (b’mużika rilassanti fl-isfond) u wasslu lit-tfal fil-preżenza ta’ Alla.

Mexxi talba mat-tfal biex jitolbu lil Alla jurihom l-aħjar mod kif jistgħu jaqduh fil-ħajja tagħhom.

TpenġijaNiżżel

Kif tuża dan l-ispazju

Alla jkellimna b'ħafna modi, inkluż permezz tal-qaddisin tal-Knisja. Hawnhekk tista' ssib tagħrif u attivitajiet li jistgħu jgħallmuk dwar x'inhi l-qdusija u li jħeġġuk tgħix ħajja dejjem aktar qaddisa.